1, 2. (a) A tekingel a Jesus el medung er a Mateus 24:12, ngomuchel el melutk el kirir a rua techang? (b) Ngmekera babier er a Rellir e meketeklii el kmo a ruumesingd er tirke el Kristiano er a irechar a millemolem el mesisiich a bltkil a rengrir? (Momes er a siasing er a uchelel a suobel.)

SERA dirk lengar tia el chutem a Jesus, e ngmilsaod el mo er a rechad er a rolel e te mo dongchii a “ulebongel er a beluulchad.” E a ta er a tekoi el lulemlaoch el kirel a kmo: “Ngmo mekelekolt a bltikerreng rar betok.” (Mateus 24:3, 12) Me tirke el chad er a Judea er a irechar a millekoi el kmo te chedal a Dios, engdi te milecherei a bltikerreng er tir el mo er a Dios me ngmlo mekelekolt.

² Me nguaisei, engdi a ruumesingd el Kristiano er sel taem a kuk mle ngodech a uldesuir. Te kmal mle blak a rengrir el omerk er a “Ebangkelio el kirel a Jesus el Mesias” e ulechotii a bltkil a rengrir el mo er a Dios me a rekldemir er a klaumerang el mo lmuut er a rechad el dirkak bo lodengelii a klemerang. Me aika el tekoi a mle uchul, me tirka el Kristiano a millemolem el mesisiich a bltkil a rengrir el mo er a Dios. (Rellir 2:44-47; 5:42) Engdi ngklengiterreng, e le rebebil er tirka el Kristiano er a irechar a mlo mekelekolt a bltkil a rengrir. Kede mekerang e mo medengei?

3. Ngera el tekoi a locha mlo uchul, e ngmlo mekelekolt a bltkil a rengrir a rebebil el Kristiano?

 ³ A Jesus a dilu er a Rekristiano er a Efesus er a irechar el kmo: “A bltkil a rengum er ngak er chelechang a dikea le ua iser a kot el uchul.” (Ocholt 2:4) Tirka el Kristiano a locha milekesuseu er a omerellir a rechad el iliuekl er tir el di uleldeu a rengrir er a sorir el tekoi. (Efesus 2:2, 3) Tia el beluu er a Efesus a kmal mle merau el beluu, me a rechad er ngii a di mechesang el meleketek a rolel a klengar er tir. E a rebetok er tir a di mirruul a tekoi er a deleboes e dimlak lomekerreu a llechul a Dios. Te ngilai a deurreng er tir el mo ruchei er a bltkil a rengrir el mo er a Dios me a rechad.

4. (a) Ngoeak a ngera el rolel e ngmla mo mekelekolt a bltikerreng er chelechang? (b) Ngera el edei el tekoi a kired el meruul me lolemolem el mesisiich a bltkil a rengud?

⁴ Me a tekingel a Jesus el kirel a bltikerreng el mo mekelekolt a dirrek el motaut er chelecha el taem. A rechad er chelechang a kmal dikea bltikerreng er tir el mo er a Dios. Me a rebetok el miliol a dikea lebo er a Dios el kirel a semecheklel a mondai, e bai osiik a ngeso er a cheldebechel er tia el beluulechad. Me nguchul me a bltikerreng er tir a di merael el mo mekelekolt. Me a remesiungel a Jehovah er chelechang, a dirrek el sebechel el mo mekelekolt a bltkil a rengrir el di ua rechad er a ongdibel er a Efesus er a irechar. Mada me bo dosaod a edei el tekoi el kired el meruul me lolemolem el mesisiich a bltkil a rengud: (1) bltikerreng el mo er a Jehovah, (2) bltkil a rengud el mo er a klemerang er a Biblia me a (3) bltkil a rengud el mo er a rudam er kid.

5. Ngera uchul me ngkmal kired el mo betik a rengud er a Dios?

⁵ Ngtecha ngike el kirel mo kot el betik er a rengud? A Jesus a dilu el kmo: “‘Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.’ Tiaikid a kot el ngarbab el llach e kot el klou a belkul.” (Mateus 22:37, 38) Me a bltkil a rengud el mo er a Dios a ngosukid el mo olengesenges a llechul, e outekangel e dirrek el mo ouketui a mekngit el tekoi. (Monguiu er a Psalm 97:10.) Engdi a Satan me tia el mekngit el beluulechad er ngii, a di melasem el mengitechut er a bltkil a rengud el mo er a Dios.

6. Ngera mo duubech el mo er a rechad el oridii a bltkil a rengrir el mo er a Dios?

⁶ A beluulechad a kmal ngodech a uldesuel el kirel a bltikerreng. E le rebetok el chad a diak loubltikerreng el mo er a Dios, e bai di mechesang el di “omdasu er a di tir.” (2 Timothy 3:2) Te kmal mechesang er a “ngelbesel a klechad ma ikel leues a chad e nguibes er ngii.” (1 Johanes 2:16) A apostol el Paulus a milengelechel el kirel a tekoi el sebechel el mo duubech a lsekum e kede di mo melatk er a di kid er a ledu el kmo: “A lomesiur a rengud a di klechad, e ng mekrolid el mor a kodall.” E ngera uchul? E le tirke el uaisei el chad a mo cherrouel a Dios. (Rom 8:6, 7) Me a rechad el di mechesang el kirel a klengar er tir el di osiik a udoud, e di melemolem a rengrir el meruul a deleboes a kmal mo ouuchel a rengrir er a uriul.​—1 Korinth 6:18; 1 Timothy 6:9, 10.

7. Ngera el kdekudel el tekoi a sebechel el duubech er a uldesuir a Rekristiano er chelecha el taem?

⁷ A rebetok el diak loumerang er a Dios, me a diak a klaumerang er tir, me a rechad el oumerang el kmo kede mla er a mongkii el mei, a melasem el mengesuseu er a rebebil el mo diak el betik a rengrir er a Dios me a lechub e ngmo diak loumerang el kmo ngar er ngii a Dios. Me te mla smisichii a uldasu el kmo a chad el oumerang el kmo ngar er ngii a Ulemeob a kebelung e diak a skulel. Me a lmuut el tang, a rebetok el chad a oba klou el omengull el bedul a re scientist er a bai longull er ngike el Ulemeob. (Rom 1:25) E tiang a dirrek el sebechel el tomellii a uldesuel a Kristiano. Me a deleuill er kid el obengkel a Jehovah a sebechel el mo mechitechut e  dirrek el mo mekelekolt a bltikerreng er kid.​—Hebru 3:12.

8. (a) Ngera el blekeradel a sebechel el mengitechut a rengrir a rechedal a Jehovah? (b) Ngmekerang a bades er a Psalm 136 e chemolodid?

⁸ Me kid el kiei er tia el mekngit el beluulechad er a Satan a uchul, me ngkmal betok a tekoi el sebechel el rullid el mo mechitechut a rengud. (1 Johanes 5:19) Me a lsekum e ngdiak dekerekikl me ngmengal mo mechitechut a rengud, e ngsebechel a klaumerang er kid el mo mechitechut e dirrek el mo mekelekolt a bltkil a rengud el mo er a Dios. El ua tiang, kede locha mo chelebangel a mondai el kirel a cheluodel, me a lechub e ngmo er ngii a sechered, me a lechub e ngkmal mo metacherbesud er a rolel a udoud. Me a lechub e ngkmal mo mekngit a rengud, e le ngdikea el sebeched el meruul aike el soad el tekoi el durruul er a ngar er a mong. Me a lechub a tekoi el dullatk el kmo ngmo ungilbesul a mlo diak el sebechel. Me a ngii di el tekoi el bo dechelebangel me kid a kmal diak el kired el mo omdasu el kmo, a Jehovah a mla choitid. Ka molatk er a bades er a Psalm 136:23 el ngii a kmal mengelaod er kid e le ngdmu el kmo: “Ng dimlak lobes er kid er sera a bo de mechitechut, . . . a bltkil a rengul a diak a ulebengelel.” Me ngkmal kirel el mo ulterekokl a rengud el kmo, a Jehovah a orrenges a ‘nglunguched’ e ulterekokl el mo onger er kid.​—Psalm 116:1; 136:24-26.

9. Ngera ngilsuir a Paulus me ngmillemolem el melisiich er a bltkil a rengul el mo er a Dios?

⁹ A apostol el Paulus a mle mesiungel a Dios el mle dmolech el melebedebek er a rolel e a Dios a ullengeseu er ngii, e tiang a kmal silsichii a rengul me ngmle sebechel el melemolem el mesisiich a klaumerang er ngii. Ngmilluches el kmo: “A Rubak a olengeseu er ngak me ng diak bo kmedakt. Ng ngera sebechel a chad el rullii el mer ngak?” (Hebru 13:6) Me sel klaumerang er ngii el bedul a Dios, a ngilsuir el mo outekangel a rokui el ringel er a klengar er ngii. Me sera bo lechelebangel er a meringel el blekeradel, e ngdimlak a ta el bo lak loumerang er a Jehovah. Me ngmo lmuut er a taem el ble lekelebus, me ngdi ullengeseu el meluches a babier el mo melisiich er a rebetok el kldemel el Kristiano el ngar er a ongdibel. (Efesus 4:1; Filipi 1:7; Filemon 1) Me ngbetok el kakerous el mondai a blo  lechelebangel, engdi ngmillemolem el melisiich er a bltkil a rengul el mo er a Jehovah. Ngmle ultuil er ngika el “Dios er a bek longelaod, el mengelaod er kid sel de ngara chelsel a ngiidil ringel.” (2 Korinth 1:3, 4, BT) Me kede mekerang e mo oukerebai er a Paulus?

10. Kede mekerang e melemolem el melisiich er a bltkil a rengud el mo er a Jehovah?

¹⁰ A Paulus a milsaod er a ta er a rolel e ngsebeched el melemolem el melisiich er a bltkil a rengud el mo er a Dios er a loluches el kmo: “Moluluuch el di blechoel.” E a uriul e ngmilluches el kmo: “Di blechoel el meluluuch.” (1 Thesalonika 5:17; Rom 12:12) Ngera me a nglunguuch a okesengii a deleuill er kid me a Dios? E le sel doluluuch e kede mengedecheduch er a Jehovah. E tiang a meskid a techelled, me ngmo er ngii a ungil el deleuill er kid me ngii. (Psalm 86:3) Me sel douchais er ngika el Demad el ngar er a eanged el kirel aike el meringel er a uldesued me a rengud, e ngrullid el lmuut el mo kmeed er ngii. (Psalm 65:2) E a bltkil a rengud el mo er ngii, a lmuut el mo mesisiich sel desa rolel e ngonger er a nglunguched. Me ngulterekokl a rengud el kmo, a Jehovah a “kmeed er tirkel rokui el omekedong er ngii.” (Psalm 145:18) Me a klaumerang er kid el kirel a bltkil a rengul a Jehovah me a ngelsuil, a ngosukid el mo sebeched el outekangel a ngii di el mondai el bo dechelebangel er chelechang, me a dirrek el ngar medad el klebesei.

11, 12. Kede mekerang e lmuut el smisichii a bltkil a rengud el mo er a klemerang er a Biblia?

¹¹ Me kid el Kristiano a uchul me ngkmal betik a rengud er a klemerang. E ngar er a Tekingel a Dios e kede metik er a klemerang. A Jesus a dilu er a Demal el kmo: “A tekingem a klemerang.” (Johanes 17:17) Ngkmal kired el mo medengei a tekoi el ngar er a chelsel a Biblia, a lsekum e ngsoad el mo betik a rengud er a klemerang er a Biblia. (Kolose 1:10) Engdi ngdiak di el tiaikid e lemerekong. Ka molatk er a rolel e ngike el milluches er a Psalm 119 a ngosukid el mo medengei a tekoi el kired el meruul. (Monguiu er a Psalm 119:97-100.) Me ngungil el bek el sils el dolatk, e dedmolech el melebedebek aike el tekoi el dechuiu er a Biblia. Me a cherengel a doltaut a klemerang er a Biblia er a klengar er kid e nglmuut el medechel a bltkil a rengud el mo er ngii.

¹² A ta er a milluches er a psalm a kmo: “Ng meral ungil a telemtemul a llechum; ng kuk merekos er a honey!” (Psalm 119:103) Me a babilenged el mengai a uchetemel er a Biblia el loltobed a cheldebechelel a Dios a di ua ungil a telemtemul el kall. Me sel donga er a kall el kmal soad, e kede blechoel el mekekokid el menga er ngii. Me ngdi osisiu, ngsoad el mengoit a taem el mesuub. Ngoeak tiang, e ngkmal mo dmeu a rengud el mesuub a “ungil er orenges el tekoi” el ngii a klemerang, me bo el sebeched el melatk aike el dechuiu e dousbech el kuk ngosuterir a rebebil.​—Olisechakl 12:10.

13. Ngera ngilsuir a Jeremia el mo betik a rengul er a tekingel a Dios? E tiang ngera ngrirellii er ngii?

¹³ A profet el Jeremia a kmal mle betik a rengul er a tekingel a Dios, me ngdilu el kmo: “Ke milengedecheduch er ngak mak ulerrenges a bek el tekoi. Ngak a kloklem e RUBAK el Dios el Olab a Bek el Klisiich, isei a uchul ma tekingem a milekekii a renguk er a deurreng ma klengeltengat.” (Jeremia 15:16) Ngmle dmolech el melebedebek el kirel a mekreos el tekingel a Dios, e kmal mle betik a rengul er ngii. Ngulemes er a techellel el mo ouchais a klemechel a Jehovah el kmal mekreos. Me a lsekum e ngbetik a rengud er a klemerang er a Biblia, e kede ungil el medengei el kmo ngkmal ileakl tia el techelled el mo okedongall el ta er a Sioning er a Jehovah, e mo sebeched el omerk er a klumech el kirel a Rengedel er chelecha el taem er a ulebongel.

14. Ngera el tekoi a sebechel el lmuut el smisichii a bltkil a rengud el kirel a klemerang er a Biblia?

 ¹⁴ Ngera el tekoi a sebechel el lmuut el smisichii a bltkil a rengud el kirel a klemerang er a Biblia? Ngkired el mo blechoel el ngar er a miting er a ongdibel el ngii a basio el debo er ngii, e ngolisechakl er kid a Jehovah. A omesubel a Ongkerongel er a bek el sandei a ta er a rolel e kede mosisechakl. Me a lsekum e ngsoad el mo ngmai a klungioled er tia el miting, e ngkmal kired el kutmeklid el kirel er a uchei. El ua tiang, ngsebeched el omes aike el bades er a Biblia el mla meluches er a chelsel a suobel. Chelecha el taem, e a rebetok el chad a menguiu me a lechub e te download er a Ongkerongel el locha er a tablet er tir e le ngmla mo er ngii el ngar er a betok el bedengel a omelekoi el ngar sel website er kid el jw.org, me a dirrek el sel JW library app. E a bebil er a tablet a ngar er ngii a prokuram er ngii el sebeched el mereched el metik er a bades. Me a lsekum e kede mesuub a bek el suobel er a chelsel, e sel bo donguiu aike el bades, e bo dedmolech el melebedebek, e seikid e nglmuut el mukeroul a bltkil a rengud el kirel a klemerang er a Biblia.​—Monguiu er a Psalm 1:2.

15, 16. (a) A doltirakl er a bades er a Johanes 13:34, 35, e ngera el omengelechel a lebeskid a Jesus? (b) Ngmekerang a bltkil a rengud el mo er a Dios me a Biblia, e obengkel a bltkil a rengud el mo er a rudam er kid?

¹⁵ Ngar sel ulebongel el kesus er ngii er tia el chutem, e a Jesus a dilu er a redisaiplo er ngii el kmo: “Mak meskemiu a beches el llach el kmo, bo mkaubltikerreng. Ng kiriu el kaubltikerreng el ua ngak a kuubltikerreng el ekor kemiu. Cho bo mkaubltikerreng, e a rokui el chad a mo medengei el kmo kom obengkek.”​—Johanes 13:34, 35.

¹⁶ A bltkil a rengud el mo er a rudam me a rudos er kid, a obengkel a bltkil a rengud el mo er a Jehovah. Me a lsekum e ngdiak el betik a rengud er a Dios, e ngkmal diak el sebechel el mo betik a rengud er a rudam er kid. E a lsekum e ngdiak el betik a rengud er a rudam er kid, e ngkmal diak el sebechel el mo betik a rengud er a Dios. A apostol el Johanes a milluches el kmo: “Ng diak el sebechel el betik a rengul er a Dios el dirkak lesang a lak le betik a rengul er a tar ngii el bla lesang.” (1 Johanes 4:20) Me a bltkil a rengud el mo er a Jehovah me a rudam er kid, a dirrek el obengkel a bltkil a rengud el mo er a Biblia. E ngera uchul? E le  lsekum e ngbetik a rengud er a tekoi el desuub er a Biblia, e ngrullid el mo soad lolengesenges a llach el ngar er a chelsel el mengelechel er kid el mo betik a rengud er a Dios me a rudam er kid.​—1 Petrus 1:22; 1 Johanes 4:21.

17. Ngera bebil el rolel e kede ochotii a bltikerreng?

¹⁷ Monguiu er a 1 Thesalonika 4:9, 10. Ngera bebil el rolel e kede ochotii el kmo, ngbetik a rengud er a rechad el ngar er a ongdibel er kid? Nglocha ngar er ngii a chuodel el odam, me a lechub e ngodos el ousbech a mlai el oltak er ngii el mo er a miting e mo remei. A ta el melakl dil a locha mo ngar er ngii a utechioll er a blil. (Jakobus 1:27) Me a rudam me a rudos el mechitecheto rengrir, e chuarm a uldesuir me a lechub e te chelebangel a lmuut el bebil er a mondai, a dirrek el ousbech a ngeso er kid me a omelisiich me a ongelaod. (Osisechakl 12:25; Kolose 4:11) Me kede olecholt er a bltikerreng el mo er “tirkel bebil er kid el oumerang.”​—Galatia 6:10.

18. Ngera sebechel el ngosukid el sumechokl a mondai er a delongeled kid me a rudam er kid?

¹⁸ A Biblia a mesaod el kmo ngar er a taem er a “uriul sils” er tia el mekngit el beluulechad, e a rebetok el chad a mo merechorech e nguibes a rengrir. (2 Timothy 3:1, 2) Me kid el Kristiano a kmal kired el mo blak a rengud el melisiich er a bltkil a rengud el mo er a Jehovah, me a Tekingel, me a dirrek el derta me a derta er kid. Engdi kid el diak demecherrungel a uchul me a lebebil er a taem, e ngmo er ngii a klekakebosech er a delongeled kid me a rudam er kid. Engdi sel bltkil a rengud el mo er a ta me a tang a rullid el mo melasem el mesmechokl a ngii di el chetituokel er a delongeled er sel kot el mereched el taem. (Efesus 4:32; Kolose 3:14) Mada lak debecherei a bltkil a rengud me bo lemekelekolt! E bai debo er a tkurrebab el sebeched el loubltikerreng el mo er a Jehovah, me a Tekingel, me a rudam er kid.