1, 2. (a) Ngera me a remekekerei el chad el Kristiano a melemolem el kats er a mekemad lomtok er a Satan me a remekngit el anghel? (Momes er a siasing er a uchelel a suobel.) (b) Ngera kede mo mesaod er tia el suobel?

 A APOSTOL el Paulus a ulemekesiu er a Rekristiano el mora resoldau. Kid a ngar er a mekemad, e mera el ngar er ngii a recherroued engdi ngdiak doumekemad lomtok er a redi chad, e kede bai omtok er a Satan me a remekngit el anghel. Tirka mla oumekemad el betok el telael el rak me te kmal meduch el oumekemad me kede locha mo omdasu el kmo, ngdiak el sebeched el mo kats er tia el mekemad el ileakl a lsekum kede mekekerei el chad. Me ngsebechir a remekekerei el chad el mo kats er a mekemad lomtok er a remesisiich el cheraro? Choi, ngkmal sebechir el melemolem el di kats! E ngera uchul? E le te nguu a klisiich el mlara Jehovah. E ua rulsemuul el soldau, te ‘ousbech a rokui el klekedall er a mekemad el le besterir a Dios’ me bo el sebechir el kltmokl el mo oumekemad.​—Monguiu er a Efesus 6:10-12.

² A Paulus er sera lousbech er sel okesiu, e nglocha ngmillatk aike el klekedall er a mekemad el uluubail a resoldau er a Rom. (Rellir  28:16) Me ngar tia el suobel, e kede mo mesaod er sel kmal ungil el okesiu. Kede dirrek el mo mesaod a uldesuir a remekekerei el chad el kirel aike el uchul me ngsebechel el mo meringel a doubail er a derta er aika el klekedelled er a mekemad, me a dirrek el ike el klungiolel.

3, 4. Ngmekera klemerang er a Biblia e ua olekesengelir a resoldau er a Rom?

³ Monguiu er a Efesus 6:14. A olekesengelir a resoldau er a Rom a mla er ngii a deel el omekerreu er a debosir, e rullii a tekerengel a ulurir me ngdi chelellakl er sel lengar er ngii. A bebil er a olekesongel a mla er ngii a mesisiich el chesechesel el seluk a saider me a kekerei el oles er ngii me a soldau sel lokesengii a olekesengelel e ngsebechel klou a rengul el mo oumekemad.

⁴ A klemerang el desuubii er a Tekingel a Dios a omekerreu er kid er a klsuul el osisechakl el uai a olekesongel. (Johanes 8:31, 32; 1 Johanes 4:1) Sel lemengal el mo betik a rengud er aika el klemerang el ngar er a Tekingel a Dios e ngmo beot er kid el kiei el oltirakl a llechul a Dios me a lechub kede oubail er a ‘tekerengel a ulud.’ (Psalm 111:7, 8; 1 Johanes 5:3) Ngdirrek sel bo dungil el medengei aika el klemerang e ngsebeched el mo ungil el mesebechakl er a klaumerang er kid er a recherroued.​—1 Petrus 3:15.

5. Ngera me ngkired el blechoel el melekoi a klemerang?

⁵ Me a klemerang el ngar er a Tekingel a Dios a kmal klou a ultutelel er kid a uchul me kede olengesenges a tekoi el medung er a Biblia, e di blechoel el melekoi a klemerang. A cheleblad a ta er a ulekbetil a Satan el kmal oureor. Ngtomellii a chad el mengeblad me ngike el chad el oumerang a cheleblad. (Johanes 8:44) Me alta ngdiak demecherrungel ngdi kede melasem er a tkurrebab el sebeched el diak bo domulak. (Efesus 4:25) E tia sebechel el mo meringel. A Abigail el 18 a rekil a melekoi el kmo: “A omelekoi el klemerang a diak el blechoel el mo uchul a ungil tekoi alta omelekoi el blulak a sebechel el otebedau er a chelsel a meringel el blekeradel.” Me ngera uchul me ngblechoel el melasem el melekoi a klemerang? Ngdmu el kmo: “Sel kulekoi a klemerang e ngklikiid a ukltkek er medal a Jehovah, e a demak me a delak me a resechelik a medengei el kmo ngsebechir el ultuil a klaumerang er tir er ngak.” E a Victoria el 23 a rekil a melekoi el kmo: “Sel molekoi a klemerang e mosebechakl a klaumerang er kau, e a rechad a locha mo omcheracheb er kau engdi ngmo uchul e ngmo ulterekokl a rengum, e melechesukau el kmeed er a Jehovah, me tirke el betik a rengrir er kau a mo olecholt a omengull el bedul kau.” Me kau, ngsebechem el mesa uchul me ngklou a ultutelel el kirem el “ousbech er a klemerang el ua ia lolekesongel” er a bek el taem?

6, 7. Ngera uchul me a llemalt a lomekesiu er ngii el mora tekerengel a ulul a soldau?

⁶ A tekerengel a ulul a soldau er a Rom a mle blechoel el rruul er a chelaus el deel el meliuekl er a ulul. Aika el deel a mle bereked er a budel a charm el ngar er ngii a deel el chesechesel me a lechetel, e a ongelngelel a dirrek el mle bliull er a betok el chelaus el deel el bereked er a budel a charm. Me tiakid el tekerengel a soldau a telkib el mekberedii, e ngii a dirrek el mle kirel el  blechoel el omes er ngii me ngdiak lemetemall. Me nguaisei engdi tia el klekedall a ulemekerreu er a chaidirengul me a bebil el klekedellel a bedengel er a ngii di el saider me a kelel a balech!

⁷ A melemalt el llechul a Jehovah el ngii a omekerreu er a ‘rengul’ a chad a sebeched el omekesiu er ngii el mora tekerengel a ulul a soldau. (Osisechakl 4:23, NW) A soldau a kmal diak el kengei el mo omtechei er a tekerengel a ulul loba chimong el rruul er a mechitechut el deel. Me ngdi osisiu, ngkmal diak dekengei el mo omtechei a melemalt el llechul a Dios el ousbech er a di uldesued el kirel a llemalt. Ngkmal diak el sebeched el di kid el omekerreu er a rengud. (Osisechakl 3:5, 6) Me seikid a uchul me ngkired el blechoel el kerekikl el merriter er a “tekerengel” a ulud me di leblechoel el omekerreu er a rengud.

8. Ngera me ngkired el olengesenges a llechul a Jehovah?

⁸ A lebebil er a taem e kau, ke mo omdasu el kmo a llechul a Jehovah a rullau me ngmo diak a ilmeklem me a lechub e ngolekebai er kau me ngdiak moruul a soam el tekoi? A Daniel el 21 a rekil a melekoi el kmo: “A resensei me a rengalek er a skuul a melenguul er ngak e le ngak el kiei el oltirakl a llach er a Biblia. Me ngmla er ngii a taem e ngmlo mechitechut a renguk e chuarm a uldesuek.” Engdi ngua ngera uldesuel er chelechang? Ngdmu el kmo: “Ak miltebengii el kmo ngmo uchul a klungioled a dekiei el oltirakl a llechul a Jehovah. A rebebil el ‘sechelik’ a mlo melai a mekngit el kar, e a rebebil a mlo diak lengar er a skuul. Me ngkmal klengiterreng sera kumes a blekerdelel a klengar er tir el uaisei. Me ngsebechek el mesa el kmo a Jehovah a kmal omekerreu er kid.” E a Madison el 15 a rekil a melekoi el kmo: “Ngkmal meringel er ngak el oltirakl a llechul a Jehovah, e diak kuruul aike el tekoi el resechelik a omdasu el kmo, ngungil e uchul a deuil a rengud.” Me ngera ngmeruul er ngii? “Ak blechoel el di ngak el omeklatk er ngak el kmo a kumtechei er a ngklel a Jehovah, e a Satan a ousbech a omelsemai el ua lomoes er ngak. Me sel bok chelebangel a odechelakl e bok mesisiich, e ngkmal mo ungil a renguk.”

9-11. (a) Ngera el okesiu el oeacher a loueacher er ngii a Rekristiano? (b) Ngera sebechel el ngosukid el mo ungil el omerk er a klumech?

⁹ Monguiu er a Efesus 6:15. A soldau er a Rom a dimlak el sebechel el mo oumekemad el diak oecherel. Aika el oeacher a mle rruul er a edei el chachisois el budel a charm me ngkmal mle mesisiich. Ngkmal ungil el oeacher me a soldau sel lousbech e ngklou a rengul le ngdiak letorech.

¹⁰ Me ngdi uaike el oecherir a resoldau er a Rom el ngilsuterir me te mlo kats er a mekemad, me a okesiu el oeacher el doueacher er ngii a ngosukid el mo “omerk er a Ungil Chais er a budech.” (Isaia 52:7; Rom 10:15) Me nguaisei engdi lebebil er a taem e ngusbechall a klou el blekeu el mo omerk er a klumech. A Bo el 20 a rekil a melekoi el kmo: “Ngak el mle merur a uchul me ngmle meringel er ngak lousioning el mo er tirke el kimdak el skuul. Me sel kumes el bedul uriul, e ngmo diak kudengei el kmo ngera uchul me ak mle uaisei engdi chelechang e ngmera el dmeu a renguk lousioning el mo er tirke el ua meklungek.”

¹¹ A rebetok el mekekerei el chad el Kristiano  a mla metik el kmo te ungil olisechakl a lsekum te ungil kltmokl er a uchei. Me ke mekerang e mo ungil kltmokl? A Julia el 16 a rekil a melekoi el kmo: “Ngblechoel el di seluk aike el babilenged er a tik, e ak blechoel el orrenges er tirke el kimdak el skuul sel louchais a uldesuir me a klaumerang er tir. E seikid e ngmo sebechek el melatk aike el sebechel el mo ngosuterir. Me sel kungil el kltmokl e ngsebechek el mengedecheduch er tir el kirel aike el mo uchul a klungiolir.” E a Makenzie el 23 a rekil a melekoi el kmo: “A lsekum ngungil a blekerdelem e ungil el orrenges, e seikid e ngsebechem el mtab aike el lechelebangel tirke el ua meklungem. Me ak blechoel el kerekikl me ak chemuiu aike el rokui el suobel el motobed el kirir a rengeasek. E ngokiu tiakid el rolel e ngsebechek el omekrael er tir el mora Biblia me a lechub e ng jw.org el kirel a ngeso.” Me sel bo dungil el kltmokl el kirel a berkel a klumech e ngsebeched el omekesiu er ngii el ua doueacher er a oeacher el kmal ungil er a ochid.

12, 13. Ngera bebil el “kmard el belechel” a Satan?

¹² Monguiu er a Efesus 6:16. A soldau er a Rom a uleba klou el omekreakl el omekerreu er  ngii er a ongelngelel el mora bkul a ochil er a ngii di el saider, me a biskang, me a kelel a balech.

¹³ Ngera el ‘kmard el balech’ a lousbech a Satan el omalech er kau? Nglocha oldechelakl er kau lokiu a blulak el tekoi el kirel a Jehovah. A Satan a soal a bo momdasu el kmo a Jehovah a diak lebetik a rengul er kau, e diak a ngii di lechad lomekerreu er kau. A Ida el 19 a rekil a melekoi el kmo: “Ak mle blechoel el omdasu el kmo a Jehovah a cheroid er ngak, e diak el soal el Sechelik.” Me ngera ngmeruul er ngii sel bo uaisei a uldesuel? “Aika el miting a kmal melisiich er a klaumerang er ngak. A uchei e ak mle blechoel el di dengchokl, e diak kunger le kulemdasu el kmo ngdiak a chad el soal lorrenges aike el bo kulekoi. Engdi chelechang e ak mengetmokl er ngak el kirel a miting, e melasem el eru me a lechub e ngedei el taem el kunger. Alta ngmeringel engdi ngkot el mo ungil a renguk sel kuruul el uaisei. E a rudam me a rudos a kot el melisiich er ngak. Me a uriul er a bek el miting, e ak melechesuar el kmo a Jehovah a betik a rengul er ngak.”

14. Ngera kede suubii er a tekoi el dilubech el mora Ida?

¹⁴ A tekerengel a soldau a blechoel losisiu a meklungel engdi ngokiu a tekoi el dilubech el mora Ida, e kede mesa el kmo a klaumerang er kid a diak el uaisei. A klaumerang er kid a sebechel el mo klou me a lechub e ngmo kekerei, me a lechub e ngmo mesisiich me a lechub e ngmo mechitechut. E tia di mo ultuil er a omelilt er kid. (Mateus 14:31; 2 Thesalonika 1:3) Me a bo lomekerreu er kid a ‘klaumera’ er kid el ngii a uai a letekerenged, e ngkmal kired el blechoel el menglou e melisiich er ngii!

15, 16. Ngmekera omeltked e ua lkou?

¹⁵ Monguiu er a Efesus 6:17. A soldau er a Rom a oulkou e le ngomekerreu er a bdelul me a chiklel me a medal. A lebebil er a taem e aika el lkou a ngar er ngii a lechetel me ngsebechel a soldau el di beldoel er ngii.

¹⁶ A ‘osebeled’ a omekerreu er a uldesued el kmal di ua lkou el omekerreu er a no er a bdelul a soldau. (1 Thesalonika 5:8; Osisechakl 3:21) Me a omelatk a ngosukid el mo ultaut a osenged er a telbilel a Dios me ngdiak bo lemechitechut a rengud el mondai er kid a uchul. (Psalm 27:1, 14; Rellir 24:15) Me a lsoad a omeltked a bo lomekerreu er kid, e ngkmal kirel mo mera el tekoi er a rengud. Ngkmal kirel a lkunged el ngar er a bdelud el diak di debeldoel er ngii!

17, 18. (a) Ngmekera Satan e mengeblad er kid me kede ngubetii a lkunged? (b) Kede mekera ochotii el kmo ngdirkak demecheblad er a Satan?

¹⁷ Ngmekera Satan e mengeblad er kid me kede ngubetii a lkunged? Ka momtab er sera lolasem er a Jesus. Ngmle medengei el kmo a Jesus a mo mengedereder er a klechad engdi ngmle kirel el mo chuarm e mad. E seikid e ngkirel el mengiil er a temel a Jehovah, e mo King. Me a Satan a milsa techellel el mo mengedereder e tilbir el kmo a lsekum a Jesus a mo kongei el mengull er ngii e ngsebechel el di mereched el mo mengedereder er a beluulechad el rokir. (Lukas 4:5-7) A Satan a dirrek el mle medengei el kmo a Jehovah a tibir el mo meskid a betok el ungil el tekoi er a chelsel a beches el beluulechad engdi ngkired el mengiil er tia el telbiil el mo tmaut, engdi uchei e nglocha mo er ngii a betok el mondai er kid. Me a Satan a melasem el omeskid a techall el mo oldeu a rengud er a klengar er chelechang. Ngsoal a dengai aike el soad el tekoi el mo kot, e a Rengedel a Dios a mo ongerung.​—Mateus 6:31-33.

¹⁸ Te betok el mekekerei el chad el Kristiano a dirkak lemecheblad er a Satan. El ua tiang, a Kiana el 20 a rekil a melekoi el kmo: “Ak  medengei el kmo a di ta el omelatk el mo sumechokl a rokui el mondai er kid a Rengedel a Dios.” Me ngmekera omeltkel e ngar er ngii a lerellii er a uldesuel me a rolel a klengar er ngii? Ngosuir me ngsebechel el diak lobes el kmo a tekoi er tia el beluulechad a di tedeb. Me a Kiana a ousbech a temel me a klisichel el mesiou er a Jehovah er a bai lousbech el kirel a tekoi er tia el beluulechad.

19, 20. Kede mekera lmuut el mo ungil el ousbech er a Tekingel a Dios?

¹⁹ A soldau er a Rom a uluusbech a saider el mle bekord el 20 el ints a klemengetel (50 centimeter). E tirka kmal mle meduch lousbech a saider er tir, e le te mle blechoel el mesuub el ousbech er a bek el sils.

²⁰ A apostol el Paulus a dilu el kmo a Tekingel a Dios a uai a saider. A Jehovah a mla meskid a Tekingel engdi ngkmal kired el mesuub el mo meduch el ousbech er ngii el mesebechakl er a klaumerang er kid, me a lechub kede melodech a rolel a domdasu. (2 Korinth 10:4, 5; 2 Timothy 2:15) Me kede mekerang e lmuut el mo meduch el ousbech er ngii? A Sebastian el 21 a rekil a melekoi el kmo: “Ak luchesii a chimo el bades er a bek el bliongel er a Biblia el kunguiu, e oldekdak aike el kot el soak el bades.” Me tia ngilsuir el mo ungil medengelii a rolel a lomdasu a Jehovah. E a Daniel a dilu el kmo: “Sel kunguiu er a Biblia, e ak lemuches aike el bades el kumdasu el kmo ngmo ngosuterir a rechad el bo kungedecheduch er tir sel kuldingel a obliil. E ak mla metik el kmo, a rechad a blechoel el ungil a tekingir el mei er kid sel lomes er kid el kmal semeriar el mesaod er a Biblia, e meruul aike el sebeched el ngosuterir.”

21. Ngera me ngdiak el kired el medakt er a Satan me a remekngit el anghel?

²¹ Me ngokiu aike el tekoi el dilubech el mlo er tirke el mekekerei el chad el ngar er tia el suobel, e ngdiak el kired el mo medakt er a Satan me a remekngit el anghel. Ngklemera el tekoi el kmo te mesisiich engdi ngdiak bo leua klisichel a Jehovah, me tir a diak bo lekiei el mo cherechar. Te mo mekelebus me ngmo diak el sebechir el omekcharm er a ngii di el chad er a chelsel a Ta el Telael el Rak el Omengederederel a Kristus. E a uriul e te mo nguemed. (Ocholt 20:1-3, 7-10) Me kid a medengelii a cherroued, me a ulekbetil, me aike el tekoi el soal el mo meruul engdi ngokiu a ngelsuil a Jehovah e ngsebeched el mo mesisiich er ngii!