A Dios Ngomekerreu er Kid?

KE METIK er kau el chuarm a rengum ma uldesuem e le ngbetok a mondai er a telungalek er kau, ma rektel a bedengem, ma ureor, ma kuk bebil er a oberaod el ngerachel? Ngbetok a rechad el uaisei. Ngtecha er a chelechang a dirkak lecheremii a chelebirukel el omeruul, ma delengerenger, ma kdekudel el omeruul? Chochoi, ngkmal di ua ike el lolekoi a Biblia el kmo: “Kede medengei el kmo, a bleob el rokui a dul ongingd e ngara ringel ra cheroll el me lmuut er chelechang.” (Rom 8:​22) Misei a uchul me te betok el chad a oker el kmo: ‘A Dios ngomekerreu er kid? Ngmo ngosukid?’

Ngike el mellomes a rengul el King el Solomon a milluluuch el mo er a Dios el kmo: “Ngdi kau el tang a ungil medenge chelsel a rengrir a rengelekir a rechad.” A Solomon a uluumerang el kmo ngdiak di lodengelkid el lemerekong e ngdirrek el omekerreu er a derta ma derta er kid. Ngmle sebechel el olengit er a Dios el “ngara eanged e orrenges” el mo onger a nglunguchir a derta el chad el medakd-er-a-Dios el olecholt er a Dios a “kngtil a rengul ma rengelel.”​​—⁠2 Kronika 6:​29, 30.

Chelechang, e a Jehovah el Dios a dirk omekerreu er kid e mengemedaol er kid el omekedong er ngii el ngar er a nglunguuch. (Psalm 50:15) Ngmla tibir el mo orrenges aike el ngar er a rengud el nglunguuch el oltirakl a soal a rengul. (Psalm 55:​16, 22; Lukas 11:​5-​13; 2 Korinth 4:⁠7) Ochoi, a Jehovah a orrenges a “ngii di el nglunguuch, ma ngii di el ongit el kirel a kengei er ngii el mla er a ngii di el chad, ma lechub a rechedal.” Nguaisei, a bo doumerang er a Dios, e doluluuch el olengit a ngelsuil, e bo dekeed er ngii, e kid a mo melechesuar a ungil el ulekerreuil ma ulekrael er ngii. (Osisechakl 3:​5, 6) A chad el melluches er a Biblia el Jakobus a melekoi el kmo: “Bo mkeed ra Dios me bo le keed er kemiu.”​​—⁠Jakobus 4:⁠8.