“Ngerir A Mlora Beluulechad El Rokir”

“Rulleterir ar chad el mo Obengkek, e molecholb er tir loba ngklel a Chedam, ma Ngalek, ma Chedaol Reng.”​​—⁠MATTEUS 28:⁠19.

SER A uchei er a ngesechel el mo er a eanged, e a Jesus a milsterir a redisciplo er ngii a ngerachel. Ngdilu er tir el kmo: “Rulleterir ar chad el mo Obengkek, e molecholb er tir loba ngklel a Chedam, ma Ngalek, ma Chedaol Reng.” (Matteus 28:19) Ngkol mlo ua ngera klungel tia el ureor!

² Ka di molatk! Sera Pentekost 33 C.E., e a bekord el 120 el disciplo a ngiluu a chedaol el reng e ulemuchel el oltaut er sel ngerachel el ouchais er a rechad el kmo a Jesus a ngike el telbiil el Messias, e ngokiu ngii e a rechad a mo nguu a osobel. (Rellir Ar Apostel 2:​1-36) Te mekerang tirka el di mekesai el chad e mo er a “rokuil renged”? A denguu er a redi chad e ngkmal dimlak lsebechel el mo tekoi, engdi “Dios a di sebechel a ngii di lengerang.” (Matteus 19:26) A chedaol el reng er a Jehovah a ullengeseu er tirke el kot el Kristiano, el mo mellechesuar el kmo tia a mle orechudel el tekoi. (Sekaria 4:6; 2 Timoteus 4:⁠2) Me nguaisei, ngdi mle ngar er a chelsel a sese el rak, e a apostol el Paulus a mle sebechel el melekoi el kmo a ungil el chais a mla oberk “el kirel a ikel rokuil dingar el bleob el ngar cheungel a eanged.”​—⁠Kolose 1:​23.

³ Ngar er a chelsel aike el kot el dart el rak, e a mera el omengull a millemolem el oberk. Engdi, a Jesus a ulemlaoch el kmo ngmo er ngii a taem e a Satan a mo omriid a “omekodall el mungi” me tirke el mera el Kristiano el “mungi” a kora mo mechitechut er a betok el dart el rak el mo lmuut er a blsechel a sim. Uriul er a kodellir a rechapostol, e sel ulaoch a mlo klemerang.​—⁠Matteus 13:​24-39.

Mereched el Mo Obdois er a Chelecha el Sils

⁴ Sera 1919, ngmle temir a reklikiid el Kristiano el mungi el mo ileakl er a omekodall el mungi. Me tirke el ngellitel el Kristiano a mle medengei el kmo sel klou el ngerachel el lebilsterir a Jesus a dirk kirir el oltaut er tir. Te kmal ulumerang el kmo te kilie er a “uriul sils” e mle medengelii a ulochel a Jesus el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.” (2 Timoteus 3:1; Matteus 24:14) Chochoi, te mle medengei el kmo ngkmal klou el ureor a dirk kirel mo meketmokl.

⁵ Nguaisei, ngdi ua itirke el disciplo er sera 33 C.E., e tirke el ngellitel el Kristiano a chillebengelii a kmal klou el ureor. E di mle mekesai el telael er tir a ngar er a mekesai el beluu. Te mekerang e mo omerk er a ungil el chais er a “belulechad el rokir”? Kele mobes, a ildisir a rechad er tia el beluulechad er a temir a Rekaiser a mle 300 el milliol,e a uruil er a kot el mekemedil a beluulechad e ng ngilasech el mo 2 el billiol el chad. E ngar er a chelsel tia el 20 el dart el rak, e a ildios er a rechad a di olengesechekl el mo er bab er a di mereched el taem.

⁶ Engdi, a rengellitel el mesiungel a Jehovah, el ua itirke el odam er tir er a chelsel a kot el dart el rak, a  ulemuchel er a ureor el obang a mui el klaumerang el mo er a Jehovah, ngar reng er ngii a ulebengterir. Ngar er a belngel aike el rak er a 1930, e ng mle bekord el 56,000 a ildisir el chad a ulemerk er a klemerang er a Biblia el ngar er a 115 el beluu. El me lmuut er sel taem, e ngkmal mle klou a urerir, engdi ng mla er ngii a lmuut el klou el ureor el dirk medechel.

⁷ E dirrek, a lmuut el dmolech el klemedengei el kirel a “kloul seked” el losaod er ngii er a Chocholt 7:9 a milkais a beches el omelsemai e dirrek el tilbir a ongeseu el mo er tirke el meringel el oureor el Kristiano. A diak lemochur a ildisir el seked er a “ngodech el cheremek el sib,” el tirke el oba omelatk el mo kiei er tia el chutem, a mle kirel el mechudel “ra bek el renged, ma klebliil rar chad, ma bliongel rar chad, ma chomelekoi.” (Johanes 10:16) Tirka tirke el mo ‘mesiou er [a Jehovah] el ngara templo er ngii ra llomes ma klebesei.’ (Chocholt 7:15) Tia belkul a kmo te mo olengeseu er a ureor er a berkel a klumech ma osisechakl. (Isaia 61:⁠5) Me nguaisei, tirke el ngellitel el Kristiano a kmal dileu a rengrir er a lomes er a ildisir a rumerk er a klumech el di merael el mo obdois el mocha betok er a teruich el telael el mocha betok el milliol. Sera rak er a 2003, e a beches el ildisir a ruumerk er a klumech a ngilasech el mo 6,429,351​—⁠el betok er tir a mle teloi er a klou el seked. * A rengellitel el Kristiano a kmal dmeu a rengrir el kirel tia el ngeso, me tirke el kuk ngodech el sib a kmal dmeu a rengrir el kirel tia el klou el techall el mo olengeseu er a rengellitel el odam er tir.​—⁠Matteus 25:​34-40.

⁸ Sera lluut el mo kltukl a cheldebechel el mungi, e a Satan a mlo mesisiich el oumekemad er ngii. (Chocholt 12:17) Ngmilekerang er a leduum a klou el seked? Ngkmal mlo kdekudel a omerellel! Ngsebeched el mo oumededenger el kmo ngii el Satan a mle uchul a klou el ultok er a beluulechad el rokir el mo er a mera el omengull el mla er ngii er sel ongeru el mekemedil a beluulechad? Ngar er a bitang ma bitang er sel mekemad, e a Rekristiano a mlodechelakl. A rebetok er a rebetik er a rengud el odam ma rudos a chilarm a betok el ringel, ma rebebil a mlad el kirel a klaumerang er tir. E dirrek, el uleltaut er a tekingel ngike el milluches er a psalm el kmo: “Ak mo obengkel a Dios e mo odengesii a tekingel. A kuumerang er a Dios; e diak bo kmedakt. Ngera sebechel el rullii a chad el me er ngak?” (Psalm 56:​4, NW; Matteus 10:28) A rengellitel el Kristiano me tirke el kuk ngodech el sib, a dilak el mesisiich el dechor, el oeak a klisichel a reng er a Jehovah. (2 Korinth 4:⁠7) Sei a uchul, “ma Tekoi ra Dios a mengal uleberk.” (Rellir Ar Apostel 6:⁠7) Sera 1939, er a omuchel a mekemad, e a 72,475 el ildisir a reblak a rengrir el Kristiano a mle teloi er a ureor er a berkel a klumech. Engdi, sel dimlak lulterekokl el report el kirel a 1945, tia el rak e ngmlo merek a mekemad, a ullecholt el kmo a 156,299 el Sioning a ulemerk er a ungil el chais. Ngkol ua ngera el telemall el kirel a Satan!

⁹ Ngbleketakl el kmo, sel cheliseksikd el blekeradel er a ongeru el mekemedil a beluulechad a dimlak el relleterir a remesiungel a Jehovah el mo oumededenger el kmo tia el evangkelio a mo meketmokl. E le, sera 1943, er a bocha lemesisiich a mekemad, e ngmla er ngii a subed el kirel a teblo el beches el skuul. A tang, el domekedong er ngii el kmo Theocratic Ministry Skuul, a mle kirel el mo er ngii er a bek el ongdibel el olsisechakl er a derta ma derta el Sioning el mo meduch el omerk er a klumech e meruul er a remo disciplo. Sel kuk tang, a sel Watchtower Bible School of Gilead, el mo kudmekelterir a rechad el mo missionari el tir a mo olengeseu er a ureor er a berkel a klumech el ngar er aike el cheroid el beluu. Chochoi, sera bo lemerek a mekemad, e a remera el Kristiano a mle kltmokl el kirel a klou el ureor.

 ¹⁰ E ngkol mlo ua ngera klungiolel a urerir! Te mlosisechakl er a Theocratic Ministry Skuul, me tir el rokui​—⁠el ngeasek ma remechuodel, a rechedam ma rechedil ma rengalek, el mo lmuut er a rechitechut​—⁠a mlo teloi e dirrek el millemolem el ngar er a otutel sel klou el ngerachel el lebilskid a Jesus. (Psalm 148:​12, 13; Joel 2:​28, 29) Sera rak er a 2003, a average er a bek el buil, el 825,185 el chad a ullecholt el kmo ngkmal orechudel a taem, e le te mlo soiseb er a ureor er a klepioneer, er a bebil er a buil ma lechub e te millemolem er ngii. Ngar er seikid el osisiu el rak, e a Resioning er a Jehovah a chiloit a 1,234,796,477 el sikang el mengedecheduch er a rechad el kirel a ungil el chais er a Renged. Me ngulterekokl a Jehovah a kmal dmeu a rengul el kirel a blakerreng er a rechedal!

El Ngar er Aike el Cheroid el Beluu

¹¹ Aike el mereko el betok el rak, e tirke el tilobed er a Gilead ma dirrek el sel Ministerial Training Skuul er a chelecha el taem, a kiltmeklii a kmal ungil el chisir. El ua itiang, ngar er a beluu er a Brazil e ngmle kesai er a 400 el chad a omerk er a klumech er sera lekot el mo er sel beluu a remissionari er a 1945. Tirka el missionari me tirke el missionari el uleakuriul er tir a mle meringel el oureor el obengterir a reblak a rengrir el rudam er tir el chad er a Brazil, ma Jehovah a kmal ulemekngeltengat er tir. Ngkol ua ngera el deurreng el mo er tirke el mle medengelii er a ureor er a kot el uchul sel lesa report er a Brazil el mla er ngii a beches el ngar er a bab el ildisir a ruumerk er a klumech el mle 607,362 er sera 2003!

¹² Chelechang e molatk er a beluu er a Siabal. Uchei er a ongeru el mekemedil a beluulechad, e ngmla er ngii a bekord el dart el chad el lulemerk er a Renged er tia el beluu. Sera lebo er ngii a mekemad, e a kmal meringel el odechelakl a uchul e te di mirrael el mo mekesai, ma lemerkong a mekemad, e te di mekesai el Sioning a kiliei el millemolm a klengar er tir el kirel a tekoi er a klereng. (Osisechakl 14:32) Me tirke el mekesai el blak a rengrir el chad a kmal mlo dmeu a rengrir er sera 1949 er a louetkeu er tirke el mle kot el 13 el mlosisechakl er a Gilead el missionari, me tirka el missionaries a di mle mereched el mo betik a rengrir er tirke el blak a rengrir, e ungil a rengrir el odam el chad er a Siabal. Ngbetok er a 50 el rak er a uriul, el 2003, e ngmla er ngii a beches el ngar er a bab el ildisir a ruumerek er a klumech el 217,508! A Jehovah a mera el ulemekngeltengat er a rechedal er sel beluu. Ngngar er ngii a osisiu el report er a betok el kakerous el beluu. Me tirke el mle sebechir el mo er aike el cheroid el beluu el omerk er a klumech a mera el lullengeseu er a berkel a ungil el chais, me sera 2003 e te ullerrenges er ngii a rechad el ngar er a 235 el meklou el beluu, ma iungs, ma mekekerei el beluu er a beluulechad el rokir. Chochoi a klou el seked er a rechad a tobeda er a “rokuil renged.”

Mechudel “ra Bek el . . . Klebliil rar Chad, ma Bliongel rar Chad ma Chomelekoi”

¹³ Sel kot el mengasireng el omeruul a dilubech er a uriul er a redisciplo a mlo mengilt er a chedaol el reng er a Pentekost 33 C.E. a sera longdecheduch er a seked el ngar er a tekingir. Tirke el rokui el lulerrenges er tir a mle medengelii sel omelekoi el luluusbech er ngii a betok el beluu, el tekoi er a Griik. E le, te “mengull ra Dios,” te dirrek el mle medengei aike el cheldecheduch el mla er ngii er a templo er a tekoi er a Hebru. Engdi ngmera el ullechau a uldesuir er sera lorrenges er a ungil el chais el ngar er a omelekingir er a sera ledirk tolechoi.​—⁠Rellir Ar Apostel 2:​5, 7-12.

¹⁴ Ngdirrek, er a chelecha el sils, a betok el bedengel a omelekoi a lousbech er a ureor er a berkel a klumech. A ulaoch a ouchais el kmo a klou el seked a me tuobed el ngar er a bek el renged, ma dirrek el “klebliil rar chad, ma bliongel rar chad, ma chomelekoi.” A loltirakl er tiang, e a Jehovah ulemlaoch el oeak a Sekaria el kmo: “A reteruich el chad er a  bek el omelekoi er aike el renged a mo oreked er a bilel a chad el Chijudea, el melekoi el kmo: ‘Aki mo obengkemiu kemiu el chad, e le kirirenges el kmo a Dios a obengkemiu.’” (Sakaria 8:​23, NW) Altang a Resioning er a Jehovah a mla mo diak longedecheduch a ngodech el omelekoi, engdi te dirrek el medengelii a klungel a ultutelel a lolisechakl el ngar er a omelekingir a rechad.

¹⁵ Ngmerang, chelecha el sils e ngdi mekesai er aike el betok el omelekoi a lousbech er ngii a betok el bedengir el chad, el ua Tekoi er a Merikel, ma France, ma Sebangiol. Engdi, tirke el tilobed er a belurir e mo omerk er a klumech el ngar er a kuk ta er a beluu a melasem el mesuub a tekingir a rechad er sel beluu me bo lebeot er tirke el “kirir el mo nguu a diak a ullebengelel klengar” el mo medengelii tia el ungil el chais. (Rellir Ar Apostel 13:48) Tiang a sebechel mo meringel el tekoi. Sera bo lusbechall a babier el ngar er a omelekingir a rudam er kid el ngar er sel South Pacific el beluu er a Tuvalu, e a ta er tirke el missionari a kilengei el mo oureor el kirel. E le ngdimlak a dictionari er sel taem, me ngulemuchel el meluches er a dictionari er ngii er aike el tekoi er a Tuvalu. E uriul, e sel babier el Ngsebechem el Kie er a Paradis er Tia el Chutem el mo Cherechar * a lerirellii er a tekoi er a Tuvalu. Sera lebo er a beluu er a Curaçao tirke el kot el missionari, e ngdimlak a babier el mesaod er a Biblia ma ka le dictionari el ngar er a omelekingir a rechad er sel beluu, el Papiamento. Ngdirrek el mla er ngii a kmal klou el klaititekangel el kirel a omelechesel. Me nguaisei, engdi, ngar er a chelsel a eru el rak er a lebo er sel beluu tirke el kot el missionari, e a kot el tract el mesaod er a Biblia a tilobed er sel omelekoi. Chelecha el sils, e a tekoi er a Papiamento a ta er aike el 133 el omelekoi el loltobed er a Ongkerongel er a di osisiu el taem er a Tekoi er a Merikel.

¹⁶ Ngar er a beluu er a Namibia e tirke el kot el missionari a dimlak lsebechir el metik er a ta el Sioning er sel beluu el mo ngosuterir el oliuid a babier. Ma lmuut el tang, a chimong er aike el omelekoi, el Nama, a dimlak a tekingir el kirel a bebil er a tekoi el dousbech er a babilenged, el ua “cherrungel.” A ta el missionari a ouchais el kmo: “Sera kuliuid a babier e a kuluusbech er a resensei er a skuul el tirke el milsuub er a Biblia el obengkemam. E le te dimlak lsal medengelii a klemerang, me ngmle kirek el dengchokl el obengterir e oterekeklii a kmo a derta el sentence ngmle melemalt ma lechub e ngdiak.” Me nguaisei, e sel tract el Klengar el ngar er a Beches el Beluulechad a mloiuid el mo er aike el eua el omelekoi er a tekoi er a Namibia. Chelecha el sils, e a Ongkerongel a blechoel el tuobed er a Tekoi er a Kwanyama ma Ndonga.

¹⁷ Ngar er a beluu er a Mexico, a mera el omelekingir a tekoi er a Sebangiol. Engdi, uchei er a lebo er sel beluu a rechad er a Sebangiol, e ngmla er ngii a betok el bedengel a omelekoi, e tir a dirk ousbech a betok er aikang. Me nguaisei, chelecha el taem e aike el  babilengir a Resioning er a Jehovah a lorruul el ngar er a euid el kakerous el omelekingir a rechad er Mexico ma dirrek el Sign Language er a Tekoi er a Mexico. A Omesiunged el kirel a Renged er a Tekoi er a Maya a mle sel kot el babier el tuobed er a bek el buil el ngar er a tekoi er a American Indian. Nguaisei, a betok el telael el chad er a Maya, ma rechad er a Aztecs, ma rekuk bebil a ngar er a delongelir tirke el 572,530 el omerk er a Renged el ngar er a beluu er a Mexico.

¹⁸ Chelecha el taem, e te betok el milliol el chad a chemiis er a belurir el mo er a kuk ngodech el beluu el ua refugee, ma lechub e te mellukl e le ngmle mekngit a keizai er a belurir. Sei a uchul,me, ngar er a betok el beluu e ngketengel el ngar er ngii a klou el ildisir a rechad er a ngodech el beluu el kiei er ngii. A Resioning er a Jehovah a melasem el ngosuterir. El ua itiang, el ngar er a beluu er a Itali, e ngngar er ngii a betok el ongdibel ma mekekerei el cheldebechelir a rechad el ngar er a 22 el kakerous el omelekoi el diak lousbech er a Tekoi er a Itali. A bo lengesuterir a rudam el mo omerk er a klumech el mo er tirke el ousbech er a kuk ta er a omelekoi, e te kiletmokl a rolel a class el mo olisechakl a 16 el kakerous el omelekoi, el uldimukl er a Sign Language er a tekoi er a Itali. Ngar er a betok el kakerous el beluu, e a Resioning er a Jehovah a meruul er a osisiu el tekoi el melasem el mo ngosuterir a lmuut el klou el ildisir a rechad er a ngodech el beluu. Chochoi, ngoeak a ngelsuil a Jehovah, e a klou el seked a mera el meremang el mla er a betok el kakerous el omelekingir a rechad.

“Mlora Belulechad el Rokir”

¹⁹ Ngar er a chelsel a kot el dart el rak, e a apostol el Paulus a milluches el kmo: “Ngdimlak le morenges er tir? Ngdiak le uaisei; le ‘Ngerir a mlora belulechad el rokir, ma chomelekingir a mlo lmuut ra ullebongel ra belulechad.’ ” (Rom 10:18) Ma lsekum e tiang a mle klemerang er a chelsel a kot el dart el rak, e ngkol ua ngera el klemerang el kirel chelecha el sils! A rebetok el milliol​—⁠tir a ulterekokl el lmuut el betok er a ngii di el taem er a reksi er a klechad​—⁠a melekoi el kmo: “Ak mo blechoel loldanges ra Rubak; me ngdiak bo kmekimd el oldanges er ngii.”​—⁠Psalm 34:⁠1.

²⁰ Ma lmuut el tang, tia el ureor a diak lebo lemechitechut. A ildisir a ruumerk er a Renged a di merael el mo obdois. Te chemoit a lmuut el klou el taem el omerk er a klumech. E te meruul a betok el milliol el return visits ma betok el dart el telael el chad a losuub er a Biblia el obengterir. Ma rebetok el beches el chad a melemolm el semeriar. Tia el mlo merek el rak, e a beches el chetebtel a ulecherengelir a rechad el mle er a Chedaol el Blsoil er a kodellel a Jesus a mle 16,097,622 el ildisir a rechad. Ngkmal bleketakl el kmo, ngdirk ngar er ngii a klou el ureor el ketmekill. Me bo lsebeched el melemolem el oukerebai er tirke el blak a rengrir el rudam er kid el luluutekangel a meringel el oldechelakl. E me bo lsebeched el ochotii a uaisei el blakerreng el ua itirke el odam er kid el mle blak a rengrir el mesiou er a Jehovah er sera 1919 el mei. E dirrek kid el rokui bo lsebeched el melemolem el oltaut er a cheliteklel ngike el milluches er a psalm el kmo: “Moldanges ra Rubak e rokuil di ngar el bleob! Moldanges ra Rubak!”​—⁠Psalm 150:⁠6.

[Footnotes]

Ngsebechem el Mesoad er Ngii?

• Ngera el ureor a lulemuchel el meruul er ngii a rudam er sera 1919, e ngera uchul e tia mle chetituokel el tekoi?

• Te rua techang a mlo mechudel el mo olengeseu er a ureor er a berkel a klumech?

• Ngua ngerang a record el lekiltmeklii a remissionari ma rekuk bebil el mesiou el ngar er aike el cheroid el beluu?

• Ngera el ocholt a sebechem el ouchais el olecholt el kmo a Jehovah a omekngeltengat er a urerir a rechedal er a chelecha el sils?

[Study Questions]

1, 2. (a) Ngera el ngerachel a lebilsterir a redisciplo er ngii a Jesus? (b) Ngera me tirke el kot el Kristiano a mle sebechir el rullii a kmal klou el tekoi?

3. Ngerang a ulemart er tirke el klikiid el Kristiano el “mungi” er a osengir a rechad?

4, 5. Ngulemuchel er a 1919, e ngera el ureor a lulemuchel el meruul er ngii tirke el ngellitel el Kristiano, e ngera uchul e tiang a ulemekdubech er a klou el chetituokel el tekoi?

6. Ngmlo ua ngerang a ngelsecheklel a ureor er a berkel a klumech el me lmuut er aike el rak er a 1930?

7. (a) Ngera el beches el omelsemai a lechillebengellii tirke el rengellitel el Kristiano? (b) Ngoeak a ngelsuir tirke el “ngodech el sib,” ngmlo ua ngerang a ngesecheklel a ureor er a omengudel el me lmuut er a chelecha el taem?

8. Te milekerang a Resioning er a Jehovah er aike el meringel el orrimel el mlo er ngii er a ongeru el mekemedil a beluulechad?

9. Ngera el beches el skuul a mleketmokl er sera Ongeru el Mekemedil a Beluulechad?

10. Ngmilekerang e mocholt a blakerreng er a Resioning er a Jehovah er sera 2003?

11, 12. Ngera el okesiu a olecholt er a ungil el urerir a remissionari?

13, 14. Ngoeak a ngera el rolel e a Jehovah a ullecholt er a klungel a ultutelel a bo domerk er a ungil el chais el ngar er a “bek el . . . chomelekoi”?

15, 16. Te milekerang a remissionari ma rekuk bebil el mellasem el omerk er a ungil el chais el ngar er a omelekoi er aike el beluu?

17, 18. Ngera el omelsemai a mleketmokl el ngar er a beluu er a Mexico ma kuk bebil er a beluu?

19, 20. Ngera el tekingel a Paulus a mera el toutang er a chelecha el sils? Mosaod.

 [Chart on page 24-27]

2003 EL REPORT ER A RAK ER A UREOR ER A RESIO

 (See the bound volume)

[Picture on page 20, 21]

Sel cheliseksikd el blekeradel er sera ongeru el mekemedil a beluulechad a dimlak lerelleterir a remesiungel a Jehovah el mo oumededenger el kmo tia el evangkelio a mo oberk

[Credit Line]

Bungel: U.S. Navy photo; kuk bebil: U.S. Coast Guard siasing

[Pictures on page 22, 23]

Sel klou el seked a me tuobed er a rokui el klebliil er a rechad, ma omelekoi