A Biblia A Sebechel el Ngosuir A Chebechiielem

A CHEBECHIIL​​—⁠el kirir a rebebil, e tia el tekoi a kora ungil a omeltkir er ngii. Engdi el kirir a rebebil, e ngmo metitngall a rengrir. “Ak melechesukak el dikea kbechiil,” ngkora oumekikngit el reng el mengedecheduch a tang el bechiil el redil. “Ak kora di cheloit e kora kmal di sabisi er a bek el taem.”

Ngera rulleterir a reteru el chad el tir a tilbir er a uchelel el kmo te melemolem el kaubltikerreng e kaukerreu el mo diak a bltikerreng er a delongelir? A ta el rolel tiang, e le ngdiak a osisechakl el kmo kede mekerang a debechiil. “Kid a mo soiseb er a chelsel a chebechiil el dimlak a ngii di losisechakl el dengai er a uchei er a bo debechiil,” ngmillekoi a chad el ngii a meluches el ouchais a tekoi er a secher.

Ngdi mekesai er a chelechang a ngar er ngii a klemedengei er tir er a rolel a chebechiil el mlocholt er a omesuub el lurruul er ngii a The National Marriage Project, tiang a omesuub el mla er a Rutgers University el ngar er a New Jersey, er a U.S.A. “Te betok el ngar er tia el omesuub a mlukeroul er a diak a deurreng er ngii el telungalek ma lechub a rederrir ma redemerir a mlo kebii,” te milluches tirke el oungerachel er tia el ureor. “Te kmal medengei el kmo ngerang a mekngit el chebechiil, engdi te kora diak el sal medengei el kmo ngera ngar er a chelsel a ungil el chebechiil. A rebebil a mesaod er a ungil el chebechiil el kmo ‘ngkakerous er a chebechielir a demerir ma derrir.’ ”

A Rekristiano ngdiak el sebechir el mo er ngii a mondai er a chebechielir? Ngdiak ngmo er ngii. Sel domes, e a rebebil er a Rekristiano er a kot el dart el rak a uluusbech a bleketakl el omellach el kmo “e lak mongedoked er ngii” er a chebechielir. (1 Korinth 7:​27) Ngbleketakl, ngngii di el chebechiil el ngar er ngii a reteru el diak lemecherrungel el chad a mo er ngii a mondai er a chelsel, engdi ngar er ngii a sebechel el ngosukid. A rebechiil el sechal ma rebechiil el redil a sebechir el rullii a delongelir el mo ungil sel loltirakl a omellach er a Biblia.

Ngmerang, a Biblia a diak el babier er a osisecheklel a chebechiil. Engdi mlukreng er Ngike el uchul a chebechiil, me ngsebeched el mo ngma ngelsuil a omellach er ngii. Ngokiu a prophet el Isaiah, e a Jehovah el Dios a dilu el kmo: “Ngak, el Jehovah, a Dios er kemiu, el ngikel osisecheklemiu el mo ngmai a klungiaol, el ngikel omekrael er kemiu er a rael el kiriu el merael er ngii. Ulekum e ko mo orrenges er a llechuk! Isei e a budech er kemiu a mo ua omoachel ma llemeltiu a mo ua chedesaoch er a daob.”​​—⁠Isaiah 48:​17, 18, New World Translation.

Sel bltikerreng el mla er ngii er a delongelem kau ma bechim ngmla mo soal el mo nguemed? Ko melechesiu er kau el ua isel mkelebus er a chelsel a diak a bltikerreng er ngii el chebechiil? A chimo el bechiil el redil el mla mo 26 el rak el le bechiil a melekoi el kmo: “Sel ringel el ngar er ngii er tia el deleongel a diak a tekoi el sebechel el mo smodii. Engdi ngar er ngii er a bek el taem el diak el sebechel el mo nguemed.” Ngera me ngdiak molasem el mo kutmeklii a chebechielem er a bai di lekau el kmo becherei e tiang a di ungil e ngdiak a cheldechulel me ke ngar er a chebechiil el diak el bo lungil a rengum er ngii? Tia el ongingil el suobel a molecholt el kmo te mekera a rebechiil el sechal ma rebechiil el redil a mo ngmai a ngeso er a omellach el ngar er a Biblia el kirel a chebechielir el ousbech chimo el tekoi​​—⁠sel telbilel a chebechielir.