A Cheldecheduch Er A Klereng A Melisiich

“Lak motebedii a mekngit el tekoi ra ngeriu, ngdi lsekum ngkirel e moltobed a ungil tekoi el toketekii a klungiaol el morar chad el orrenges, me le nguu a klengeltengat.”​​—⁠EFESUS 4:​29.

“A CHELDECHEDUCH er a rechad a berrotel; e ngii a sengk el mla er a Dios, el ongasireng el tekoi.” A Ludwig Koehler a milluches er tiang. Ngsebechel el mo beot a rengud el kirel tia el mekreos el sengk el mla er a Dios. (Jakobus 1:17) Engdi ka di molatk er sel klou el mekreos el tekoi el remiid sel bo lak lsebechel a chad el mengedecheduch er a betik er a rengul e le uchul e ngmilloched. A Joan, el bechil a milloched, a mesaod el kmo: “Ngkmal mle ungil a cheldecheduch er a delongelam. Ak kmal oureng er choua ike el cheldecheduch!”

² A cheldecheduch a sebechel el melisiich a klausechelei, e mesmechokl a mondai, e melisiich er a remechitechut a rengrir, e melisiich a kloumerang, e dochelii a ungil el blekeradel er a klengar​—⁠engdi ngdiak le ngii el cheldecheduch a rullii a tekoi el mo ungil. Ngike el mellomes a rengul el King el Solomon a millekoi el kmo: “Ngar er ngii a chad el diak lomdasu a longedecheduch el ua merus el saider, engdi a tekingir a remellomes a rengrir a omekungil.” (Osisechakl 12:​18, NW) Kid a remesiungel a Jehovah, a soad a cheldechedechad a bo lomekungil e lolisiich er a bai lomekcharm e lolemall. Ngdirrek el soad a cheldechedechad a bo loldanges er a Jehovah, me sel doldingel obliil me sel dechachedecheduch kid ma rebebil. A tang el milluches er a psalm a milengitakl el kmo: “Aki oldanges er a Dios er a bek el sils, e aki mo odengesii a ngklem el mo cherechar.”​—⁠Psalm 44:⁠8NW.

³ A Jakobus a omeklatk er kid el kmo: “E ngdi chururir ar chad a diak a chad el sebechel choderderii.” Me ngomeklatk er kid el kmo: “E le kid el rokui a remuul a betok el tellemall, me ngikel diak a tellemall ra cheldechedechal, ingii a cherrungel chad, me ngdirrek el sebechel mesirii a chelechedal el rokir.” (Jakobus 3:​2, 8) Ngkmal diak a ta er kid el cherrungel. Me nguaisei, altang e kede kmal melasem, engdi a cheldechedechad a diak leblechoel el melisiich er a rebebil ma lechub el oldanges er ngike el Ulemeob er kid. Ma leuaisei, ngkired el mo kerekikl er aike el dolekoi. Ma lmuut el tang, a Jesus a dilu el kmo: “Sel sils ra kerrekeriil e a chad a mo mesaod er ngii el kirel a ikel diak a blkul tekoi el lulengedecheduch; e le chomelekingem a uchul me kobasech el melemalt, e dirrek el omelekingem a uchul me kobasech el kirel blals.” (Matteus 12:​36, 37) Chochoi, ngkired el mo mesaod er kid el kirel a tekinged el mo er ngike el mera el Dios.

⁴ A ta er aike el kot el ungil el rolel a dongeroid er kid er a mekngit el cheldecheduch a domeksau er kid el mo blechoel el mesaod a tekoi er a klereng. Me tia el suobel a mo olecholt el kmo ngmekerang e sebeched el mo uaisei, e ngera el tekoi a sebeched el mesaod er ngii, e ngera el klungiaol a bo dengai er a ungil el cheldecheduch.

Kede Mo Kerekikl el kmo Ngua Ngerang a Rengud

⁵ Sel domeksau er kid el ousbech er a ungil el cheldecheduch, e a kot e ngkired el medengei el kmo a omelekinged a olecholt er aike el ngar er a rengud. A Jesus a dilu el kmo: “Ele ikel mo olsibes ra reng a mo mechedecheduch ra ngor.” (Matteus 12:34) A beot el omesodel a kmo, ngsoad el  ouchais aike el tekoi el ngar er ngii a ultutelel er a rengud. Ma leuaisei, e ngkired el di kid el oker er kid el kmo: ‘A cheldechedechak ngngerang ochotii el kirel a blekerdelel a renguk? Sel kubengterir a rechad er a blik ma lechub e te kldemek el oumerang, ak blechoel el mesaod el kirel a tekoi er a klereng ma lechub ak blechoel el mesaod el kirel a klekool, ma bail, ma mubi, ma kall, ma ike el kulemechar el klalo, ma lechub a kuk bebil er a diak a ultutelel el tekoi?’ Altang dimlak dolatk er ngii, engdi a klengar er kid ma uldesued a sebechel el chelsenguul di er aike el diak a ultutelel el tekoi. A bo dolodech a uldesued el kirel aike el meklou a ultutelel el tekoi er a klengar er kid a sebechel el ngosuir a cheldechedechad ma blekerdelel a klengar er kid el mo ungil.​—⁠Filipi 1:⁠10.

⁶ A bo dekerekikl el melebedebek el domtab a tekoi a kuk ta er a rolel a bo dereilii a blekerdelel a cheldechedechad el lmuut el mo ungil. A lsekum e kede blechoel el outekangel el melebedebek a tekoi er a klereng, e kede mo metik el kmo ngmo beot er kid el mesaod er a tekoi er a klereng. A King el David a milsa ultutelel tiang. Ngmilengitakl el kmo: “A tikingek ma uldesuek bo le betechii a rengum, Rubak el euotelek!” (Psalm 19:14) Me ngike el milluches er ta er a psalm el Asaf a dilu el kmo: “Ak mo melebedebek e omtab a rokui el omerellem, e ak mo kerekikl er aike el moruul.” (Psalm 77:​12, NW) A reng ma uldasu el kmal mo kerekikl er aike el klemerang er a Tekingel a Dios a mo oltobed a olsibes el cheldecheduch er a odanges. A Jeremia a dimlak lsebechel el orreked er ngii me lak louchais el kirel aike el rokui el tekoi el lullisechakl er ngii a Jehovah. (Jeremia 20:⁠9) Ngdirrek el mo uaisei el kired a lsekum e kede blechoel el melebedebek a tekoi er a klereng.​—⁠1 Timoteus 4:⁠15.

⁷ A bo lungil a blekerdelel a omesubed e ng meskid a betok el tekoi el dousbech el kirel a ungil el cheldecheduch. (Filipi 3:16) Aike el assembly er kid, ma convention, ma miting er a ongdibel, ma beches el babier, ma bades el kirel a bek el sils ma omesodel a rokui el meskid a betok el mekreos el tekoi er a klereng el sebeched el ouchais el mo er a rebebil. (Matteus 13:52) E ngkol ua ngera el rolel a omelisiich er a klereng er kid aike el experience el ngar er a omesiunged el Kristiano!

⁸ A King el Solomon a kmal mle mechas a rengul er aike el betok el bedengel a kerrekar, ma charm, ma suebek el charm, ma ngikel el lulemes el ngar er a Israel. (1 King 4:33) Ngkmal mle dmeu a rengul el mesaod el kirel a blebelel a Dios. Me kid me ngsebeched el dirrek el mo uaisei. A remesiungel a Jehovah a oldeu a rengrir el mesaod el kirel a betok el kakerous el tekoi, engdi a tekoi er a klereng a blechoel el omsar a cheldechedecherir tirke el mesisiich a klereng er tir.​—⁠1 Korinth 2:⁠13.

“Bo Msichedekl a Ikal Tekoi er a Rengmiu”

⁹ A ngii di el tekoi a bo dosaod er ngii, e a cheldechedechad a mo melisiich er a rebebil a lsekum e ngoltirakl er a uleklatk er a apostol el Paulus el mo er a ongdibel er a Filipi. Ngmilluches el kmo: “Bo msichedekl a ikal tekoi ra rengmiu, el rokui el klemerang, ma rokui el kuoll, ma rokui el melemalt, ma rokui el bliochel, ma rokui el kirel morngii a bltikerreng, ma rokui el ngarngii a chetengel, ma ngiidi le ngeral klungiaol, ma rokui el odengesall.” (Filipi 4:⁠8) Aike el tekoi el lulsaod a Paulus a kmal mle klou a ultutelel me ngdmu el kmo “bo msichedekl aika el tekoi er a rengmiu.” Me ngkired el mekekii a uldesued ma rengud er aika el tekoi. Ma leuaisei e ka me bo dorritel a derta er aike el eai el tekoi el lulsaod er ngii a Paulus el sebechel el ngosukid er a cheldechedechad.

¹⁰ A klemerang a ousbech er a lmuut el betok er a di olechotel a suobel el kmo ngklemerang e diak leklsuul. Ngmelutk el mo er a tekoi el melemalt e sebeched el oumera er ngii, el ua klemerang er a Tekingel a Dios. Me nguaisei, sel douchais er a rebebil el kirel a klemerang er a Biblia el luldeuir a rengud, ma lechub el kirel a cheldecheduch el millisiich er kid, ma lechub a uleklatk er a Biblia el ngilsukid, e kede mesaod a klemerang el tekoi. Engdi ngar er a kuk bitang, e kede otngeklii a “klaititekangel el lomngakl el kmo klemedengei,” el di olecholt a kora teletelel a klemerang, e merekong. (1 Timoteus 6:20) E diak doutulechoid ma lechub e douchais aike el experience el diak dodengei el kmo klemerang ma lechub e ngdiak.

 ¹¹ Aike el rokui el kuoll aike el meklou a ultutelel el tekoi, el diak le ike el chelsengsang el tekoi. Aikei a uldimukl er ngii aike el meklou a ultutelel el tekoi el kirel a omesiunged el Kristiano, ma tia el blsechel a ringel el dekiei er ngii, ma klungel a ultutelel a durrekadel er a ungil el blekerdeled. Sel de kauchais choua ika el meklou a ultutelel el tekoi, e kede melisiich a rengud el di mekar er a rolel a klereng, e urrekodel er a blakerreng er kid, e melemolem el omerk er a ungil el chais. Nguaisei, a ungil el experience el ngar er a omesiunged ma ike el chais er a beluulechad el omeklatk er kid el kmo kede kiei er a uriul el sils a meskid a betok el kakerous el tekoi el kirel a ungil el cheldecheduch.​—⁠Rellir Ar Apostel 14:27; 2 Timoteus 3:​1-5.

¹² Sel tekoi el melemalt a belkul a kmo kede melemalt er a osengel a Dios​—⁠el oltaut er a llechul. A bliochel a ochotii a klikiid el uldasu ma blekeradel. A omelaes, ma demerur er ngii el ngellakel, ma tekoi er a deleboes a diak el kired el mesaod er ngii. (Efesus 5:3; Kolose 3:⁠8) A lengar er a ureor ma lengar  er a skuul, e a Rekristiano a kirir el mengeroid er tir sel lebo er ngii choua ika el delebeseaol cheldecheduch.

¹³ A Paulus er sera losaod el kirel aike el tekoi el kirel mo er ngii a bltikerreng, e ngmelutk el mo er aike el tekoi el omotech er a rengud e ungil ma lechub e ngmelisiich a bltikerreng, er a bai tekoi el omekdubech a klauketui, ma cheluached, ma lechub e ngklautok. Ma ike el tekoi el ngarngii a chetengel a melutk el mo er aike el suobel louchais a klemerang ma ungil el chais. Choua ika el ungil el chais a uldimukl er ngii a cheldecheduch er a klengar er a reblak a rengrir el odam ma rudos, el blechoel el tuobed er a Ongkerongel ma Awake! el magzine. Ngera me ngdiak mouchais er a uldesuem el mo er a rebebil er a uriul er a omonguiu aike el suobel el melisiich a klaumerang er kid? E ngkol ua ngera el omelisiich el me er kid sel dorrenges aike el bla leruul a rebebil el kirel a klereng! Choua ike el cheldecheduch a mo meleketek a bltikerreng ma kltarreng er a chelsel a ongdibel.

¹⁴ A Paulus a melekoi el kirel a “ngiidi le ngeral klungiaol.” A klungiaol a melutk el mo er a ungilreng ma lechub a bo deklikiid. Ngkired el mo kerekikl ma omelekinged a mo oltirakl a omellach er a Biblia me lak bo decheroid er a melemalt, ma bliochel, ma klikiid el cheldecheduch. A odengesall a belkul a kmo “chetengakl.” Sel mrrengesii a ungil el cheldecheduch ma lechub e mesa ungil el kerebai er a chelsel a ongdibel, mouchais er ngii el mo er a rebebil​—⁠el mo er ngii el chad ma dirrek el mo er a rebebil. A apostol el Paulus a mle blechoel el chemat er aike el ungil el blekerdelir a rekldemel el mengull. (Rom 16:12; Filipi 2:​19-​22; Filemon 4-7) E dirrek, aike el blebelel a Dios a mera el odengesall. Ma ikeikid a meskid a kmal betok el kakerous el tekoi el kirel a cheldecheduch el melisiich.​​—⁠Osisechakl 6:​6-8; 20:12; 26:⁠2.

Bo Lungil a Cheldechedecham

¹⁵ A Duteronomi 6:​6, 7 a melekoi el kmo: “Ngkmal diak mobes a ikal llach el kumeskau er chelechal sils. Mosisechakl el morar ngelekem. Ke mo omelekl cho mngara blai ma cho mcheroid, ma cho molengull ma cho moureor.” Me ngbleketakl, tia el omellach a belkul a kmo a rechedam ma rechedil a kirir el mo ungil el mengedecheduch er a rengelekir el kirel a tekoi er a klereng.

¹⁶ Ka di molatk el kirel a kemanget el cheldecheduch er a delongelel er a Jesus ma Demal el ngar er a eanged er sera losaod el kirel a ngerechelel sel lemei er tia el chutem. A Jesus a uluuchais er a redisciplo er ngii el kmo: “E ngngikel ulderchak el Chedam, ingii a milskak chodruchel el bo kulekoi e mengedecheduch.” (Johanes 12:49; Duteronomi 18:18) Ngike el chedam er a irechar el Abraham a chiloit a betok el sikang el mengedecheduch er a ngelekel el Isak el kirel a Jehovah er a lomekngeltengat er tir ma demerir er a irechar. Choua ike el cheldecheduch a ulterekokl el ngilsuir a Jesus ma Isak el mo ngar er a eou a rengrir el meruul a soal a Dios.​—⁠Genesis 22:​7-9; Matteus 26:⁠39.

¹⁷ A rengeleked me te dirrek el ousbech er a ungil el cheldecheduch. A rechedam ma rechedil  a kirir el osiik a taem er a chelsel a meringel el schedule er tir el mo mengedecheduch er a rengelekir. A bo lsebechiu, ngera me ngdiak molasem el mo dmak el telungalek el omengur a lsal kesai e ng tang er a ta el sils? E sel omomengur ma uriul, e ngmo er ngii a techall el kirel a ungil el cheldecheduch el sebechel el mo er ngii a utltutelel el melisiich er a klereng er a telungalek er kemiu.

¹⁸ A Alejandro, el pioneer e 20 ma derengel a rekil, a melatk el kirel a klaumededenger er a rengul er sera leteruich ma euang a rekil. Ngouchais el kmo: “A ongetikaik er a rengalek er a skuul ma resensei er ngak a uchul, e a kuluumededenger el kmo ngar er ngii a Dios ma dirrek a Biblia ngklemerang malechub e ngdiak. A demak ma delak a kmal mle klou a rengrir e chiloit a betok el sikang el mesaod aike el tekoi el obengkek. Choua ike el cheldecheduch a ngilsukak el mo mesisiich er a klaumededenger er ngak er seikid el meringel el taem er a klengar er ngak e ngdirrek el ngilsukak el mo ungil el melib aike el bo kuruul el tekoi er a chelsel a klengar er ngak.” E ngkuk ua ngerang er a chelechang? A Alejandro a melemolem el kmo: “Ak dirk kiei er a blimam. Engdi aki kmal mechesang me ngmeringel er kemam el terung ngak ma demak el mo dmak el chachedecheduch. Me chelechang e a ta el sils er a bek el sandei e aki dmak el terung el ousueleb el ngar er a urerel. Choua ike el cheldecheduch a kmal mekreos a renguk er ngii.”

¹⁹ E kid ngdiak el dirrek el doldeu a rengud er a techall el kirel a cheldecheduch er a klereng el obengterir a rekldemed el oumerang? Choua ika el techall a mo er ngii sel dengar er a miting, ma bo doldingel obliil, ma dedak el milil ma dengar er a omerael. A Paulus a kmal mle soal el mo mengedecheduch lobengterir a Rekristiano el ngar er a beluu er a Rom. Ngmilluches el mo er tir el kmo: “Le kuureng el mesekemiu . . . el kirel me kngara delongeliu e de dul kasisiich loeak sel dul kloumera er kemiu me ngak.” (Rom 1:​11, 12) A Johannes, el ta el elder el Kristiano, a melekoi el kmo: “A cheldecheduch er a klereng el obengterir a rekldemed el Kristiano a kmal klou a ultutelel el tekoi. Ngblechoel el melisiich a rengud e mengebekakl a berreded. Ak blechoel el oker er tirke el mechuodel el mo ouchais er ngak el kirel a klengar er tir e ngerang a ngilsuterir el di melemolem el blak a rengrir. Aike el mereko el betok el rak, e ak milengedecheduch er a rebetok el chad, e a derta er tir a milskak a llomesererng ma lechub a ngeso el millisiich er a klengar er ngak.”

²⁰ Ng mekerang oleko a chad a kora diak lsal soal sel omosaod er a tekoi er a klereng? Kele bochu le mechitechut a rengum. Altang mo sebechem el metik er a kuk ta er a techall er a uriul. A Solomon a dilu el kmo: “A ngesou ra ungil uldasu el medung er sel kirel blsechel a ua kolt el ringngo el ngara klebokel blatong el silber.” (Osisechakl 25:11) Mochotii a klaodengei er kau el kirir tirke el sekemerur. “A uldesuel a chad a ua ralm el ngara chelsel a tal dmolech el ido, ngdi ngkel mellomes a rengul a sebechel el otobed.” * (Osisechakl 20:⁠5) E a ngar er a uchei er a rokui, kele mkengei er a uldesuir a rebebil el mo olekebai er kau el mo mengechedecheduch el kirel aike el tekoi el omotech er a rengum.

Aike el Cheldecheduch er a Klereng a Mo Uchul a Klungiaol

²¹ A Paulus a ulemeklatk el kmo: “Lak motebedii a mekngit el tekoi ra ngeriu, ngdi lsekum ngkirel e moltobed a ungil tekoi el toketekii a klungiaol  el morar chad el orrenges, me le nguu a klengeltengat.” (Efesus 4:29; Rom 10:10) Altang mo telkib el meringel a dorrael er a cheldecheduch el mo er sel melemalt el rolel, engdi ngmo uchul a betok el klungiaol. Aike el cheldecheduch er a klereng a ngosukid el mo ochotii a klaumerang er kid el mo er a rebebil e melisiich er a klodam er kid.

²² Ma leuaisei, e me bo lsebeched el ousbech er tia el sengk er a cheldecheduch el melisiich er a rebebil e odengesii a Dios. Choua ika el cheldecheduch a mo uchul a deurreng er kid ma omelisiich el mo er a rebebil. Ma ngar er a uchei er a rokui, e ngmo odeuir a rengul a Jehovah e le ngii orrenges a cheldechedechad e ngii a dmeu a rengul sel dousbech er a cheldechedechad er a ungil el rolel. (Psalm 139:4; Osisechakl 27:11) Sel dekachedecheduch a tekoi er a klereng, e ngsebeched el ulterekokl el medengei el kmo a Jehovah a diak bo lobes er kid. Ma lolutk el kirir tirke el mesiou er a Jehovah er a chelecha el sils er kid, e a Biblia melekoi el kmo: “Misei e ar chad el meluu ra Rubak a mle chachedecheduch, e a Rubak a ulerrenges e mlo medengei a lolekoi. Me ngmelluches ra hong el ngar medal a Rubak chomerellir tirkel meluu e mengull er ngii.” (Malaki 3:16; 4:⁠5) Ngkol ua ngera el klou a ultutelel ma cheldechedechad bo luchul a omelisiich er a klereng!

[Footnote]

Ke Mekerang e Onger?

• A cheldechedechad ngngerang ochotii el kired?

• Ngera el ungil el tekoi a sebeched el chachedecheduch el kirel?

• Ngua ngera klungel a ultutelel a cheldecheduch er a chelsel a telungalek ma ongdibel er a Rekristiano?

• Ngera el klungiaol a dengai er a ungil el cheldecheduch?

[Study Questions]

1, 2. (a) Ngua ngera klungel a ultutelel a cheldecheduch er a klechad? (b) A remesiungel a Jehovah te mekerang e ousbech er a duch er tir er a cheldecheduch?

3, 4. (a) Ngera el mondai a dechelebangel er ngii kid el rokui el kirel a cheldechedechad? (b) Ngera me ngklou a ultutelel a cheldechedechad?

5. Ngmekerang a reng a klou a ultutelel el kirel a ungil el cheldecheduch?

6. Ng ngera a ultutelel a omelebedebek el kirel a cheldechedechad?

7, 8. Ngera bebil er a tekoi el ungil el kirel a ungil el cheldecheduch?

9. Ngera el omengelechel a lebilsterir a rechad er a Filipi a Paulus?

10. Ngmekerang a cheldechedechad a mo uldimukl er ngii a rokui el klemerang el tekoi?

11. Ngera aike el kuoll el tekoi el sebeched el ousbech el ngar er a cheldechedechad?

12. Sel dolatk er a uleklatk er a Paulus el mo mesaod aike el melemalt e bliochel el tekoi, e ngngera kired el mengeroid er kid er ngii?

13. Molecholt a bebil er a okesiu el kirel a cheldecheduch el mesaod el kirel aike el tekoi el kirel el mo er ngii a bltikerreng e ngar er ngii a chetengel.

14. (a) Ngkired el mekerang e ochotii a klungiaol? (b) Ngmekerang a cheldechedechad a mo uldimukl er ngii a rokui el odengesall el tekoi?

15. Ngera el llach er a Biblia a ochotii el kmo a rechedam ma rechedil a kirir el kutmeklii a ungil el cheldecheduch er a delongelir tir ma rengelekir?

16, 17. Ngera mo klubelir a rechedam ma rechedil el Kristiano er a kerebai er a Jehovah ma Abraham?

18. Mouchais er a ta el experience el olecholt er a klungiolel a ungil el cheldecheduch er a delongelel a chedam ma chedil ma rengelekir.

19. Ngera me kid el rokui a ousbech a cheldecheduch er a klereng?

20. Kede mekerang er a chad el kmal sekemerur?

21, 22. Ngera el klungiaol a dengai el oeak aike el cheldecheduch er a klereng?

[Pictures on page 8]

A ungil el cheldecheduch a ngar er a . . .

“rokui el klemerang”

“ma rokui el kuoll”

“ma rokui el odengesall”

“ma rokui el ngarngii a chetengel”

[Credit Lines on page 8]

Dekededel a video, Stalin: U.S. Army photo; Dekedekel a Creator el babier, Eagle Nebula: J. Hester and P. Scowen (AZ State Univ.), NASA

[Picture on page 9]

A temel a blengur a kmal ungil el techall el kirel a cheldecheduch er a klereng