A Ducherreng El Ngar Er A Ongarm A Odengesii A Jehovah

“Ngdi lsekum ko meruul a ungil e mukringel e outekangel el kilou a rengmiu, e ngngii a modanges ra Dios.”​​—⁠1 PETRUS 2:​20.

A REKRISTIANO a tilib a klengar er tir el mo er a Jehovah el sorir el mo meruul a soal. A bo loltaut er a telbilel a reng er tir, e te melasem er a tkurrebab el sebechir el oltirakl er a ultil a ochil ngike el Kerebai er tir, el Jesus Kristus, e olecholt er a klemerang. (Matteus 16:24; Johanes 18:37; 1 Petrus 2:21) Engdi, a Jesus ma rebebil er a reblak a rengrir el chad a milengkank a klengar er tir el ua martyr el kirel a klaumerang er tir. Tiang belkul a kmo a rokui el Kristiano a kirir el mo mad el kirel a klaumerang er tir?

² Kid el Kristiano, a muklatk el mo blak a rengud el mo lmuut er a kodall, me tia diak el belkul a kmo ngkired el mad el kirel a klaumerang er kid. (2 Timoteus 4:7; Chocholt 2:10) Tia belkul a kmo alta e kede kongei el mo chuarm​—⁠e a bo lekirel, e kede dirrek el mad​—⁠el kirel a klaumerang er kid, engdi ngdiak el belkul a kmo ngsoad el mad. Ngdiak doldeu a rengud er a ongarm ma lechub e debetik a deurreng er a ringel ma lechub e ngrur. E le ngmo er ngii a ongarm ma odechelakl, engdi, ngkired el kerekikl el melatk el kmo kede mo mekerang sel dechelebangel er ngii.

Ngblak a Rengud Sel Dechelebangel a Skeng

³ Chelsel a Biblia, e kede metik a betok el suobel el olecholt el kmo te milekerang a remesiungel a Dios er a irechar er sera bo lechebangel a blekeradel el mle sebechel el mo uchul a kodall. Aike el kakerous el tekoi el lurruul a meskid a Rekristiano a ulekrael er a chelecha el sils a bo dechelebangel aike el osisiu el omelsemai. Ka momes aike el cheldecheduch er a chelsel sel box el “Te Milekerang e Outekangel er a Odechelakl,” e mesa el kmo ngera sebechem el mesuub er tir.

⁴ Altang mle kakerous a omerellel a Jesus me tirke el bebil el blak a rengrir el mesiungel a Dios el kirel a odechelakl, el ultuil er a kakerous el blekeradel, e ngbleketakl el kmo te dimlak lebecherei a klengar er tir me bo leru er a kodall . Sera lebetik er tir el ngar er a kdekudel el blekeradel, e te mle bekeu e dirrek el mle kerekikl. (Matteus 10:​16, 23) Ngmle moktek er tir a mo ngesecheklii a ureor er a berkel a klumech e lomelemii a klaumera er tir el mo er a Jehovah. Aike el lurruul el ngar er aike el kakerous el blekeradel a mesterir a ungil el kerebai tirke el Kristiano el tir a chelebangel a ongarm ma odechelakl er a chelecha el sils.

⁵ Chelecha el taem, e a rechedal a Jehovah a blechoel el chelebangel aike el kot el meringel el blekeradel ma chelebuul e le mekemad, ma ultok, ma lechub e ngodechelakl a uchul. El ua itiang, ngar er a chelsel aike el rak er a 1960, e a kmal meringel el odechelakl a mlo er a Resioning er a Jehovah el ngar er a beluu er a Malawi. Aike el Kingdom Hall er tir, ma blirir, ma kelir, ma siobai er tir​—⁠aike el rokui el kloklir​—⁠a mlo diak. Te chilarm a chelebed ma kuk bebil er a meringel el tekoi. Me te milekerang a rudam er kid? A betok el telael a chiliis er a belurir. E a betok er tir a ulemart er tir  er a chelsel a choreomel, e a rekuk bebil a chiliis el mo er sel kmeed el beluu er a Mozambique. Altang a rebetok el blak a rengrir a uidii a klengar er tir, e a rekuk bebil a millilt el mo chemiis er sel kdekudel el blekeradel, tia melemalt el omeruul sel dolatk el kirel sel meringel el blekeradel el bla er ngii. Ma sera bo leuaisei, e tirke el odam a uleltirakl er a kerebil a Jesus ma Paulus.

⁶ Altang e tirke el odam er a Malawii a mle kirir el melukl ma lechub e tomart er tir, engdi te ulsiik e uleltirakl er a ulekrael er a Jehovah e millemolem el oltaut er a ngerechelir el Kristiano er sel tkurrebab el sebechir. Ngera mlo rsel? Uchei er a lebo er ngii a ultok er a gobelment er sera 1967 e a kot el ngar er a bab el ildisir a ruumerk er a Renged a mle 18,519. Ma ltang dirk mla er ngii a ultok e a betok a chiliis el mo er a beluu er a Mozambique, engdi sera 1972 e ngmla er ngii a beches el ngar er a bab el ildisir a republisher er a 23,398. E a bek el buil e te mle average er a betok er a 16 el sikang el ngar er a omesiou. Me ngulterekokl, a omerellir a uleldanges er a Jehovah, e a klengeltengat er a Jehovah a ngilsuterir tirke el  blak a rengrir el odam er a lengar tia el kmal meringel el taem. *

⁷ Engdi a kuk ngar er a bitang, e ng ngar er aike el beluu e a ultok a omekdubech a mondai, e ng di rebebil er a rudam a mellilt el di kiei er sel beluu, altang ngar er ngii a techellir el melukl. A bo lolukl altang sebechel el sumechokl a bebil er a mondai, engdi ngsebechel kuk mo duubech a ngodech el mondai. El ua itiang, ngmo sebechir el melemolem el obengterir a rudam er tir el Kristiano me lak bo lileakl er a tekoi er a klereng? Ngmo sebechir el lomelemii a ungil el blekerdelel a klengar er tir er a klereng sel lolasem el meleketek er a klengar er tir, altang ngar er a meteet el beluu ma lechub a beluu el ngar er ngii a techall el kirel a betok el kerruul?​—⁠1 Timoteus 6:⁠9.

⁸ A rekuk bebil a diak lolukl e le te melatk el kirel a klereng er a rudam er tir. Te melilt el mo kiei e chelebangel a ngii di el blekeradel me bo lsebechir el melemolem el omerk er a klumech el ngar er a belurir e melisiich a rekldemir el ngar er a omengull. (Filipi 1:14) A bo lolilt el uaisei, e a rebebil er tir a mlo sebechir el olengeseu el mo mesisiich er a tekoi er a llach er a belurir. *

⁹ A bo lekiei ma lechub a bo lolukl​—⁠ngdi a chad a kirel di ngii el melilt. Engdi, uchei er a bo dolilt e ng kired el ma smiik a ulekrael er a Jehovah el oeak a nglunguuch. A ngii di el tekoi a dolilt el mo meruul, e ngkired el melatk er a tekingel a Paulus el kmo: “Misei e ar derta er kid a kirir el mo mesaod er tir ra Dios.” (Rom 14:12) El ua ike el dulsaod, a Jehovah a soal a derta el mesiungel a bo loba blak el reng el ngar er a ngii di el blekeradel. A rebebil er remesiungel a chelebangel a ongarm ma odechelakl er a chelecha el sils; e a rekuk bebil a mo chelebangel er ngii er a kuk ta er a taem. Kid el rokui a mo er a omelasem, el diak a kirel el omdasu el kmo ngsebechel el mo chemiis  er ngii. (Johanes 15:​19, 20) E le kede metecholb el mesiungel a Jehovah, me ngdiak lsebeched el chemiis e le tia el tekoi a oldak er a rokui el tekoi er a eanged ma tia el chutem el kirel a kikidel a ngklel a Jehovah ma sobecheklel a omengederederel.​—⁠Esekiel 38:23; Matteus 6:​9, 10.

“Lako Moba Mekngit el Omekmad a Mekngit el Bedul a Ngiidi Ltechang”

¹⁰ A kuk ta er a klou a ultutelel el omellach el sebeched el suubii er a omerellel a Jesus ma rechapostol er ngii a sel le bo er ngii a mondai e ng diak bo domtok er tirke el oldechelakl. Ngkmal diak a bades er a chelsel a Biblia el olecholt el kmo a Jesus ma lechub a rulebengkel a kiltmeklterir el mo oumekmad er a ruldechelakl. Ngbai, “Lako moba mekngit el omekmad a mekngit el bedul a ngiidi ltechang,” a apostol el Paulus a ulemeklatk er a Rekristiano. “Kemiu el betik ra renguk, lak di le kemiu el melaitechei, e bai bechei me di le ngara cheldechuderreng ra Dios; e ngellechukl el kmo, ‘A Rubak a dmu el kmo, chomelaitechei a di ngak a meruul, ngdi ngak chomekmad.’ ” Ma lmuut el tang, “Lak bo mechitechut ra mekngit, e bai moba ungil el mo kats ra mekngit.”​—⁠Rom 12:​17-21; Psalm 37:​1-4; Osisechakl 20:⁠22.

¹¹ Tirke el kot el Kristiano a uleltaut er sel uleklatk. Ngar er a chelsel a babilengel el The Early Church and the World, e ngike el chad er a reksi el Cecil J. Cadoux a mesaod el kirel a uldesuir a Rekristiano el bedul a gobelment er a delongelel a 30-70 C.E. Ngmeluches el kmo: “Ngdiak a mera el ocholt el kmo a Rekristiano er sel taem a millasem el omtok er a odechelakl. Te bai di oltelechakl er a remerredel ma lechub e te ulemekerrau a rengrir er se er a lechiis. Engdi, a omerelir a Rekristiano el kirel a odechelakl, a dimlak lebo lemesisiich er a ungilbesul el cheldecheduch engdi te mle ulterekokl a rengrir el diak lolengesenges er aike el omellach er a gobelment el lulemdasu el kmo ngmo omtok er a blekongesenges el mo er a Kristus.

¹² Me tia el medemedek el blekerdelir ngmle melemalt e ungil el rael? A ngii di el chad el uaisei ngdiak bo lemetetoech a mederir tirke el sorir el olekngemed er tir? Ngdiak el bai kirir el mo mesebechakl er tir? Sel domes er ngii er a osengir a rechad, e ngmera el kirel el mo uaisei, Engdi, kid el mesiungel a Jehovah a kmal ulterekokl a rengud el kmo a doltirakl er a ulekrael er a Jehovah er a rokui el tekoi e tia kot el ungil el rael. Kede melatk er a tekingel a Petrus el kmo: “Ngdi lsekum ko meruul a ungil e mukringel e outekangel el kilou a rengmiu, e ngngii a modanges ra Dios.” (1 Petrus 2:⁠20) Ngkmal ulterekokl a rengud el kmo a Jehovah a kmal ungil el medengei a blekeradel e diak bo lebechei me lolemolem el mo cherechar. Kede mekerang e moterekokl a uldesued er tiang? El kirir tirke el blebaol el chedal el mlo er a Babilon, e a Jehovah a dilu el kmo: “Ngike el mo merutech er kemiu a di ua lorutech er a chelsul a medak.” (Sekaria 2:⁠8) Ngua ngera el klteketel a taem e kede mecherei a chad me ngmerutech a chelsul a medad? A Jehovah a mo meskid a ongelaod er sel  telutk el temel. E tiang, a kmal ulterekokl el mo er ngii.​—⁠2 Thesalonika 1:​5-8.

¹³ Ngar er tia el tekoi, e ngsebeched el omes el bedul a Jesus el ungil el kerebai er kid. Sera lebechititerir a recherroel me le bdechemii er a chelsel a sers er a Gethsemane, e ngdimlak lebelkul a kmo ngka dimlak lsebechel el mesebechakl er ngii. Ngbai, dilu er a redisciplo er ngii el kmo: “Malechub e komdasu el kmo ngdiak el sebechel a kulengit ra Demak, me di le mereched lodureklterir ar anghel el kuk betok ra truich ma cherul ururt? Ngdi a le uaisei, e a chedaol Llechukl el kmo ngkirel mo uaisei, ngmekera e motaut?” (Matteus 26:​53, 54) Sel otutel a soal a Jehovah a mle kot el klou a ultutelel er a Jesus, altang mle kirel el mo chuarm. Ngkmal mle ulterekokl a klaumerang er ngii er aike el tekoi er a ulaoch el ngar er a psalm er a David el kmo: “Le uchul e ngdiak mchitak me kbora belurir ar mla mad, ngdiak mchitii a betik ra rengum me le boriou ra datk.” (Psalm 16:10) A sese el rak er a uriul e a apostol el Paulus a millekoi el kirel a Jesus el kmo: “El dimlak lomekerreu a terached e outekangel ra kerus el kirel sel deourreng el ngar medal, e mlo dengchokl ra kidekmel a kingelel a Dios.”​—⁠Hebru 12:⁠2.

A Deurreng er a Dongikiid er a Ngklel a Jehovah

¹⁴ Ngmle ua ngera el deurreng a millisiich er a Jesus el okiu sel kot el meringel el ongarm? A bo dosaod er tirke el rokui el mesiungel a Jehovah, e a Jesus, el ngike el betik er a rengul el Ngelekel el Sechal, a mle kot el ngar er a uchei el delengchelel a Satan. Ma leuaisei e sel blakerreng er ngii el luluutekangel a ongarm a mo kot el ngar er a bab el nger er sel otubed a Satan el mo er a Jehovah. (Osisechakl 27:11) Ngsebechem el melatk er  sel kellungel a deurreng er a Jesus er a lebekiis er a kodall? Ngkol mlo ua ngerang a deurreng er ngii, er a bo lolechesuar el kmo nguleltaut er sel ngerechelel el cherrungel el chad e mesebechakl er a omengederederel a Jehovah e kikidii a Ngklel! Ma lmuut el tang, uriul er a bo ‘ldengchokl ra kidekmel” a Dios e ng ulterekokl el ngilai a mengasireng el klebkall ma kot el klou el uchul a deurreng er ngii.​—⁠Psalm 110:​1, 2; 1 Timoteus 6:​15, 16.

¹⁵ El mo er a Rekristiano, ngdirrek el mo uchul a deurreng er tir sel bo longikiid er a ngklel a Jehovah loutekangel a ongarm ma odechelakl, el oltirakl er a kerebil a Jesus. El ua itireke el Sioning el chilebangel a kmal meklou el ongarm er a chelsel sel kmal mekngit el kelebus el Sachsenhausen e dirrek el silobel er sel kmal meringel el omerael el mo er a kodellir er a ullebengelel sel Ongeru el Mekemedil a Beluulechad. Ngar er isel omerael, e te mle betok el telael el kelebus a mlad er a sils ma kelekolt, ma rakt, ma lechub e ngklengerenger ma lechub e te uleboes el ngar er a tkul a rael er tirke el ileakl el soldau. Engdi tirke el rokui el 230 el Sioning, a silobel e le te mle sebechir el mo kaingeseu altang mo uchul a kodellir.

¹⁶ Ngera el klisiich a luluusbech tirka el Sioning me bo el sebechir el outekangel er chou aike el kmal meringel el odechelakl? Ma uriul er a lesebelang , e te ullecholt er a deurreng er tir ma omereng el saul el mo er a Jehovah er a chelsel a babier el dai er ngii a kmo “The resolution of 230 of Jehovah witnesses from six nationalities, gathered in a forest near Schwerin in Mecklenburg.” Ngar er tia el babier, e te millekoi el kmo: “Ngmla mo merek a kmal kemanget e meringel el blsechel a omengarm e tirke el silobel, el ua lemlengai er a cheluml el ngau, a dimlak a bul a ngau er a bedengir. (Momes er a Daniel 3:27.) Te bai mui er a klisiich el mla er a Jehovah e blak a rengrir el mengiil er a beches el llach el ngar er ngike el King el kirel a ngesecheklel a tekoi er a Renged.” *

¹⁷ El ua itirke el 230 el blak a rengrir el chad, e a klaumera er kid a dirrek el mo measem, altang “direkak moutekangel lotobed a rasech.” (Hebru 12:⁠4) Engdi ngar er ngii a betok el bedengel a omelasem. Ngsebechel el mo omelenguul er a dedak el ngar er a skuul, ma lechub a orrimel er a rengar er a bita er kid el mo er a deleboes el omeruul ma kuk bebil er a mekngit el omeruul. Ma lmuut el tang, a domekiai a rasech, ma bo debechiil el di ngar er a Rubak, ma lechub a domekeroul er a rengalek el ngar er a klaumerang er a chelsel a kakerous a klaumerang er ngii el delengchokl a sebechel el mo uchul a meringel el orrimel ma ongarm.​​—⁠Rellir Ar Apostel 15:29; 1 Korinth 7:​39; Efesus 6:4; 1 Petrus 3:​1, 2.

¹⁸ Engdi, a ngii di el omelasem el me er kid, e kede medengei el kmo kede chuarm e le Jehovah ma Rengedel a kot er a chelsel a klengar er kid, e kede omes er ngii el ua klou el techall ma deurreng a bo deuaisei. Kede ngmai a omelisiich er a tekingel a Petrus el kmo: “Kom ngeltengat cho motuub el kirel a ngklel a Kristus, le isei e a Reng ra klebkall el Reng ra Dios a mo kiei er kemiu.” (1 Petrus 4:14) Ngoeak a klisichel a reng er a Jehovah, e ngngar er ngii a klisiched el mo outekangel aike el kot el meringel el ongarm, el mo kirel a klebkellel ma odengesel a Jehovah.​​—⁠2 Korinth 4:7; Efesus 3:​16; Filipi 4:​13.

[Footnotes]

Ngsebechem el Mesaod?

• Ngua ngera osengir a Rekristiano el kirel a ongarm ma odechelakl?

• Ngera klubeled er aike el le riruul a Jesus ma rekuk bebil er a reblak a rengrir el chad er a chelsel a ongarm?

• Ngera me ngungil el rolel a lak domtok sel demodechelakl?

• Ngua ngera el deurreng a millisiich er a Jesus el oeak aike el ongarm er ngii, e ngera mo klubeled er tiang?

[Study Questions]

1. E le remera el Kristiano a kmal kerekikl el oltaut er a telbilel a reng er tir, ngngera el ker a kired el melatk er ngii?

2. Ngua ngerang a osengir a Rekristiano el kirel a ongarm ma ringel?

3. Ngera el okesiu er a Biblia sebechem el ouchais er ngii el kirel a rolel e a rebebil a ulemtebechel a odechelakl? (Momes er a box el “Te Milekerang e Omtebechel a Odechelakl,” el ngar er sel ongingil el page.)

4. Ngera kede mo kmung el kirel aike el lurruul a Jesus ma rekuk bebil er a reblak a rengrir el mesiou er a lengar er a ongarm?

5. Ngmle ua ngera el oldechelakl a dilubech er a beluu er a Malawi er aike el rak er a 1960, e te milekerang a Resioning er sel beluu?

6. Ngerang a dimlak lechitii tirke el Sioning el ngar er a Malawi altang kmal mle meringel a odechelakl el mo er tir?

7, 8. Ngera ma rebebil a millilt el di kiei, altang a ultok a mlo uchul a betok el mondai er tir?

9. Ngera el tekoi a kirel el omtab er ngii a chad sel lolatk el mo kiei ma lechub e ngmo melukl e le ngodechelakl a uchul?

10. Ngera el klou a ultutelel el tekoi el lebilskid a Jesus me tirke el apostol er ngii sel doutekangel er a orrimel ma ultok?

11. Ngdilu el kmo ngerang a ta el chad er a reksi el kirel a uldesuir a rekot el Kristiano el kirel a Gobelment?

12. Ngera me ngungil a doutekangel a ongarm er a bai domtok?

13. Ngera ma Jesus a milechetiterir a recherroel me te mdechemii?

14. Ngera el deurreng a millisiich er a Jesus el oeak aike el rokui el ongarm?

15, 16. Ngera el kmal meringel el odechelakl a luluutekangel a Resioning el ngar er a Sachsenhausen, e ngera el klisiich a lengilai el mo outekangel a ringel?

17. Ngua ngera el bedengel a omelasem a lechelebangel a rechedal a Dios er a chelecha el taem?

18. Ngera el omelisiich el ngar er ngii er kid me ngmo sebeched el outekangel aike el kot el meringel el ongarm?

[Box/Pictures on page 23]

Te Milekerang e Omtebechel a Odechelakl

• Uchei er a lebo er a Bethlehem a resoldau er a Herod el mo omekoad er a rokui el ngalek el sechal el erung a rekrir el me er a eou, e ngoeak a ulekrael er a anghel e a Josef ma Maria a ngiluu ngike el tolechoi el ngelekir el Jesus e chiliis el mo er a Egipten.​​—⁠Matteus 2:​13-​16.

• Ngkmal mle betok el taem er a chelsel a omesiungel a Jesus, e a recherroel a ulsiik er a kodellel e le ngmle mesisiich el locholt. A Jesus a chiliis er tir er a bek el taem.​​—⁠Matteus 21:​45, 46; Lukas 4:​28-​30; Johanes 8:​57-​59.

• Sera lebo er a sers er a Gethsemane a resoldau ma remerredelir el mo omdechem er a Jesus, e ngmle bleketakl el olecholt er ngii, e eru el taem el uluuchais er tir el kmo: “Ngak ingii.” Ngdirrek el mirrob er a ruubengkel er a ngii di el ultok e milechetiterir me lenguu.​​—⁠Johanes 18:​3-​12.

• Ngar er a Jerusalem, e a Petrus me tirke el bebil a mludechem, e mlechelebed, e mlellach me lak lolisechakl el kirel a Jesus. Engdi, “te tilobed . . . E mle bek el sils el lolisechakl ra templo ma blai, el dimlak le meterob lomerk el kmo a Jesus a Kristus.”​​—⁠Rellir Ar Apostel 5:​40-​42.

• A Saulus, el ngike el mlo apostol el Paulus er a uriul, a blo lodengelii a uldesuir a Rechijudea el ngar er a Damaskus a mle sorir el mo mekodir, ma rudam a ngiluu el loimimii er a cheuatel el ngar er a sualo er a klebesei, me ngchiliis.​​—⁠Rellir Ar Apostel 9:​22-​25.

• A sese el rak er a uriul, e a Paulus a millilt el mo er a medal a Kaiseir, altang ngike el Gobernor el Festus ma King el Agrippa a dimlak lebetik a “ngeral tekoi el kirel a kodall” er ngii.​​—⁠Rellir Ar Apostel 25:​10-​12, 24-​27; 26:​30-​32.

[Pictures on page 24, 25]

Altang te mlorimel er a kmal meringel el odechelakl el mo chemiis, engdi a betok el telael el blak a rengrir el Sioning el chad er a Malawii a mle dmeu a rengrir el lomelemii a omesiungir er a Renged

[Pictures on page 24, 25]

Sel deurreng el kikidii a ngklel a Jehovah a millisiich er tirka el blak a rengrir el chad el oeak sel omerael er a kodall er a Renazi ma ike el kelebus er tir

[Credit Lines on page 25]

Omerael er a kodall: KZ-Gedenkstätte Dachau, mla er a USHMM Photo Archives

[Pictures on page 26]

Ngar er ngii a betok el bedengel a orrimel ma ongarm