A Telbiil a Mo Tmaut

AREKSI er a klechad a mui er a betok el dimlak lemutaut el telbiil. Ngbetok el taem ea beluu a diak lotirakl aike el telbiil el lekilengei el mo meruul e altang te mle kongei er a mederir ar betok el chad ma dirrek el buai el rokir a mlo medengei e ulemes er tir el mle saing aike el telbiil, me tiang a mlo uchul e ngomekrael er a rechad el mo er a kmal meringel el mekemad. Ma chad el Napoleon a millekoi el kmo: “A kobelment a mo otaut aike el telbiil er a di sel taem el lebo lemorimel el mo meruul er ngii, ma lechub e ngdi sel lengar er ngii a klungiolir el lengai er aike el tekoi.”

E kuk ua ngerang a telbiil er a delongelir a rederta el chad? Ngmera el mekngit el omeruul sel lsekum a chad a tibir a tekoi e diak lotireklii a tekingel! E ileakl sel lsekum ngike el chad a omodengelii e kmal loumerang er ngii. Nguaisei, ngbetok el team e a rechad a blechoel el mo diak el sebechir ma lechub e ngmo diak lekongei el loltirakl a telbilir.

Ngkmal klou a klekakerous er a telbilir a rechad ma telbilel a Dios. E le telbilel a Dios a kmal kltmokl e ulterekokl e kede oumerang el kmo ngmo mutaut. Ma ngii di el telbiil el bla ltibir a Jehovah el Dios a mo tmaut. El kmal ulterekokl el mo meketmokl. Sel domtab er sel diak leiit el tekingel a Dios el medung er a Isaiah 55:11 e ngmelekoi el kmo: “Ngdirrek el mo uaisei ngiil tikingek el kulekoi er ngii, ngdiak le iit el rullii sel kulemdasu er ngiil kirel; ngmo remuul a bek el kuldurch er ngii el mo meruul.”

Ma leuaisei, ngkirel mo ua ngerang a osenged el bedul aike el telbilel a Dios el medung el ngar er a Biblia? Kede ulterekokl el kmal ultuil a omeltked el kirel ngii el tekoi. El ua itiang, a apostol el Johanes a milluches el kmo: “Mesang, a blil a Dios chobenterir ar chad. Me ngii me ngmo obenterir el kiei, me te mo chad er ngii, ma Dios a di ngii el mo obenterir; e mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.” (Chocholt 21:​3,4) Kid el rokui a kmal sebeched el kiei el oba deurreng el kirel aika el klengeltengat a lsekum kede melemolem el oltirakl aike el tekoi el lullekoi a Jesus el kmo: “A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.”​—⁠Johanes 17:3