Ke Mekerang e Smisichii A Chebechielem

KA DI molatk er a blai el ngii a kmal mechetong me ngmla mo kirel el domekbeches er ngii. A chesbereberel a obkebkang, ma chedoel a di chemersang, ma dirrek el mekesekesel me ngcheremelang e le ngdiak a kutmeklii. Ngbleketakl el kmo, tia el blai a kmal mechetong e le ngmle cheloit el kmal meketeketang el kirel aike el betok el ses el eolt ma chull el diak a mengetmokl er ngii. Ma leuaisei e ngungil el lemeteruud? Ngdiak leuaisei. A lsekum a uchetemel a dirk ungil ma chelechedal a dirk mesisiich, e ngkmal dirk sebechel el lmuut el mutechei tia el blai el mo beches.

Ma leuaisei a blekerdelel tia el blai ngkora omeklatk er kau el kirel a chelbechiielem? Ngar er aike el mereko el betok el rak e a chebechiielem a chilarm a betok el ringel ma mondai er a klengar. Nglocha mlo er ngii a taem el blo lemekngit a rolel a chebechiieliu. Nglocha mle osisiu el ua blekeradel el lulemelechesiu er ngii a Sandy. El ngar er a chelsel a 15 el rak el chebechiielel, e ngmelekoi el kmo: “Ngkmal diak a ta el ngerang el osisiu a uldesuam el kirel engdi tia el chebechiielam e merekong. E tiang a kmal diak a ngeral lerellii.”

Ma lsekum a chebechiielem a omomelechesiu er ngii el mocha er tia el losisiu el blekeradel, e lak morreched el mo melatk el kmo ngmocha kirem el merort er ngii. E le ngdi osisiu, el dirrek el sebechel a chebechiielem el mukbeches el lmuut el meteketek. Ngoumesingd el blekerdelel a telbiliu el terung a di mo ultuil er kau ma ngike el chad el blo bechil. Ma telbiil a sebechel el ngosuir a chebechiil me ngmelemolem el dechor el mesisiich er a taem el dechelebangel a ringel. Engdi ngerang a telbiil? E mekerang a Biblia a sebechel el ngosukau el melisiich er ngii?

A Telbiil a Uldimukl er a Ngerachel

A telbiil a melutk el mo er a blekeradel el kirel a ngerachel. A lebebil er a taem, e a tekoi el telbiil a usbechall el kirel a tekoi el diak el bedul a chad, el uai a telbilel a siobai.

Malta e a chebechiil a diak le kora tekoi er a siobai, engdi a telbiil a kirel el uldimukl er a ngerachel. Me kau ma bechim a di diu el kilengei er a telbiil er medal a Dios ma rechad el mo melemolem el dmak el kiei, el mo lmuut er a bo lduubech a ngii di el tekoi. Ma Jesus a dilu el kmo: “Ngikel ulemeob a rirelleterir ar chad ra kot luchul el sechal ma redil, e sola e dula el kmo, ‘Mitiai a uchul ma chad a mecherei a demal ma delal e mo obengkel a bechil.’ ” Ma Jesus a dilechel el kmo: “Misei a uchul a ikel bla lodak a Dios, lak a chad el smaod.” (Matteus 19:​4-6) Me sel lebo er ngii a mondai, isei e ngkirel kau ma bechim el dmak  el smodii a mondai me bo luchul el mukebkall sel telbiil el kemiu el terung a tilbir. * Ma ta el bechiil el redil a melekoi el kmo: “Sera bo lak ki momdasu el kmo omerort a sebechel e ngii a kora mirrael mo ungilbesul a chebechiielam.”

Ngar er ngii a lmuut el klou er a di omerellel a ngerachel el kirel a telbilel a chebechiil. Me ngngera dirrek el uldimukl er tiang?

Kaiuerenges el Dmak el Oureor

A telbilel a chebechiil a diak el belkul a kmo tirka el teru el bechiil a diak el sebechir el mo kautok. Sel lebo er ngii a klautok er a delongelir, e ngkirir el mo sorir el mo kutmokl aike el mondai er a delongelir. Ma lolekoi el kirel a bechiil el sechal ma bechil el redil, e a Jesus a kmo: “Me ngdikea lterung, ele te ta ku el chelechad.”

Me ngngera belkul tia el mo “tal chelechad” lobengkel a bechim? A apostol el Paulus a milluches el kmo: “Me dilerrek ar sechal el mo betik a rengrir rar becherir el ua le betik a rengrir ra bedengir.” (Efesus 5:​28, 29) Me ngoeak tiang, el kmo, a “ ta el chelechad” a belkul a kmo ke kerekikl er a mo klungiolel a bechim el di uai a omkerekikl er sel mo klungiolem.

A rebebil er a diak a deurreng er tir el bechiil el chad a di bechiil e le te omdasu er a rengelekir ma lechub e ng udoud a uchul e te di bechiil. Me nguaisei el kmal ungil e le ika el chebechiil a mtekangel a ringel, engdi ngkiriu el melatk el kmo a turrekong er kemiu a mo oba klaubltikerreng er a delongeliu, el diak di mdak el mo er a diak a ullebengelel.

A Diak Longreos el Omeruul

Ngar er a chelsel a ungil e mesisiich el chebechiil, e tir el teru el obekel a olecholt er sel diak longreos el reng. Ke mekerang e mo meruul er tiang? Er a bai momdasu er a ker el kmo, ‘Ngera knguu er a chelsel tia el deleongel?’ e bai di lekau loker er kau el kmo, ‘Ngera kmeruul er ngii el mo melisiich er tia el chebechiielek?’ E morritel er a omerellem er tia el mlo merek el sandei. Ke mlo tela el moruul a ungil el mo klungiolel a bechim? Sera bo lsoal el mo mengedecheduch, e ke kora mle diak el soam el orrenges engdi kuluutekangel el orrenges? Ngtela el tekoi a omurruul el betok er ngii a mle soal a bechim er aike el mle soam el mo meruul?

A diak longreos el omeruul a smisichii a chebechielem e le ngolecholt el kmo ngklou a belkul er kau e soam el mengereomel er ngii.

A Osengel a Chebechiil el kmo Ngdiak a Ullebengelel

A Jehovah el Dios a mekreos a rengul er a blakerreng. Me nguaisei, a Biblia a kmo: “Kau e Rubak, a bekelatk el mor tirkel bekelatk.” (2 Samuel 22:26) A blakerreng el mo er a Jehovah a uldimukl er a blakerreng el mo er a ketmeklel a chebechiil el ngii a le kiltemklii er a uchelel.​​—⁠Genesis 2:​24.

A lsekum e kau ma bechim a mo oba blakerreng er a delongeliu, e ngngar er ngii a deurreng ma omelatk el kmo a delongeliu a ngar er ngii el mo er a ullebongel. Me sel molatk er aike el buil ma rak el dirk e mei, e ke mesekau kau ma bechim el dmak.

Sel sils er a obo bechiil, e kau a rirelli a telbilem el mo er a ta er a chad​​— ⁠el ngii a bechim. Me tia kirel rullii a uldesuem ma omerellem el mo ua a bechiil el chad. Ngdiak mkengei el kmo ngkirem el kiei el obengkel a bechim e le ke oumera er a klikiid el chebechiil ma dirrek el ke betik a rengum er a chad el kau a mlo bechil?

[Footnote]

[Box/Picture on page 5]

Chelsel a Chebechiil, e a Telbiil a Uldimukl er Ngii . . .

● Ngerachel “Mongkad aike el mtilib. Ngungil a lak molekoi a telbiil er a bai obo moruul a telbiil e lak mongkad.”​​—⁠Olisechakl 5:​4, 5.

● Dmak el Oureor “A reterung a kuk ungil er a di tang . . . E le a bo lubuu a tang e ngike el tang a mo omekdechor er ngii.”​​—⁠Olisechakl 4:​9, 10.

● A Diak Longreos el Reng ‘A dorous e ngbai ngeltengat ra dolai.’​​—⁠Rellir Ar Apostel 20:⁠35.

● A Diak a Ulbengelel el Ues “A bltikerreng . . . outekangel a rokui el tekoi.”​​—⁠1 Korinth 13:​4, 7.