Ngera Me Ngkired El Blechoel El Meluluuch?

“E lako mekimd el meluluuch, e moreng a saul era rokuil tekoi.”​​—⁠1 Thesalonika 5:​17, 18.

NGIKE el profet el Daniel a mle blechoel el meluluuch el mo er a Dios er a ede el taem er a bek el sils. Ngterrob el ngar er a medal a blang el tuangel er a delmerab er ngii, el mle chemau a beluu er a Jerusalem, e uleldars a nglunguchel. (1 King 8:​45-49; Daniel 6:10) E sera letobed a llach el omul a rokui el nglunguuch el mo er a ngii di el techang e ngdi ta el mle Darius, el ngike el king er a Media, a kirir el meluluuch er ngii, e a Daniel a dimlak el telkib el mo mechitechut a rengul. A bo lenguu a klengar er ngii ma lak, e ngdi ngika el chad er a nglunguuch a kmal mlo blak a rengul el meluluuch el mo er a Jehovah.

² Ngmle ua ngerang a osengel a Jehovah el mo er a Daniel? A Gabriel er sera lebo longer a chimo er a nglunguchel a Daniel, e ngmilsaod er ngike el profet el ua “ngike el kmal mekreos” ma lechub e “ngike el betik er a rengul a Dios.” (Daniel 9:​20-23; The New English Bible) Ngngar er a ulochel a Esekiel, e a Jehovah a millutk el mo er a Daniel el ua lemelemalt el chad. (Esekiel 14:​14, 20) Ngar er a chelsel a klengar er ngii, e a nglunguchel a Daniel a rirellii a kmal kmeed el deleongel er ngii ma Dios, aika el tekoi a blo lodengei a Darius.​—⁠Daniel 6:⁠16.

³ A deblechoel el meluluuch e ng dirrek el sebechel el ngosukid el mo mesisiich aike el meringel el ongarm. El ua itiang, ka molatk er a Harold King, el mle missionari el ngar er a beluu er a Sina a mlukerrekeriil el eim el rak el ngar er a ileakl el kelebus. Sera louchais el kirel a experience er ngii, e a Brother King a dilu el kmo: “Altang e ak mle ileakl er a rechad, engdi ngdiak a sebechel el meleakl er ngak er a Dios. . . . Me nguaisei, ngar er a osengel a ngii di el chad el  me chengelakl er a delemerab er ngak, e ak mloutuubuach el ede el taem er a bek el sils e milluluuch el klou a ngerek, el melatk er a Daniel, el ngike el losaod er ngii a Biblia. . . . E seikid el taem e a reng er a Dios a ulemekrael er a uldesuek el mo er aike el tekoi el mo uchul a klungiolek e dirrek milengelaod er ngak. Ngkol ua ngera el omelisiich er a klereng ma ongelaod a lebilskak el loeak a ngluluuch!”

⁴ A Biblia a melekoi el kmo: “E lako mekimd el meluluuch, e moreng a saul era rokuil tekoi.” (1 Thesalonika 5:​17, 18) Sel dolatk er tia el uleklatk, me bo dorritel aike el ker: Ngera me ngkired el mo kerekikl el melatk er a blekerdelel a nglunguched? Ngera uchul me ngkired el blechoel el meluluuch el mo er a Jehovah? E kede mekerang a lsekum e ngkora meringel er kid el meluluuch el mo er a Dios e le aike el chelitechetud a uchul?

Moleketek a Klausechelei el Oeak a Nglunguuch

⁵ Ngdiak lsoam a Jehovah a bo lolatk el kmo ke sechelil? Ngmillekoi er a Abraham el uaisei. (Isaia 41:8; Jakobus 2:23) A Jehovah a soal a bo domekeroul er choua itia el deleongel er kid me ngii. Ngouetkeu er kid el mo kmeed er ngii. (Jakobus 4:⁠8) Choua itia el omengemedaol ngdiak el le rellid el mo kerekikl el melatk er sel ileakl el ngeso el nglunguuch? Ngkmal meringel el tekoi a bo dolasem el mo mengedecheduch er a rengar er a bab el chad er a gobelment, e dolasem el mo sechelil! Engdi, ngike el Ulemeob er a eanged me tia el chutem a melisiich er kid el mo mengedecheduch er ngii el oeak a nglunguuch, er a ngii di el taem me sel dousbech a ngeso. (Psalm 37:⁠5) Sel deblechoel el meluluuch e ng ngosukid el mekurulii a kmeed el klausechelei er kid ma Jehovah.

⁶ Engdi, ngkmal beot er kid a obes el meluluuch! Aike el ongarm er a klengar er kid er a bek el sils a sebechel el mengesang a uldesued me kede obes el mengedecheduch er a Dios. A Jesus a millisiich er a redisciplo er ngii el mo ‘[melemolem el] meluluuch,’ el e ng dirrek el milluluuch. (Matteus 26:​41, NW) Altang mle mechesang er a tutau el mo klebesei, engdi ngmle blechoel el oterekeklii a taem el mengedecheduch er a Demal el ngar er a eanged. A bebil er a taem, e a Jesus a di mle “tutau e ngmilekiis ra dirke milkolk,” e meluluuch. (Markus 1:35) A kuk bebil er a taem, e ngmlo cheroid el di ngii el tang er a telia el sils me bo lsebechel el mengedecheduch er a Jehovah. (Matteus 14:23) A Jesus a mle blechoel el rullii a taem el kirel a nglunguuch, e kid me ngdirrek el kired el mo uaisei.​—⁠1 Petrus 2:⁠21.

 ⁷ Ngar er ngii a betok el techall el kirel a nglunguuch er a bek el sils sel dechelebangel a mondai, ma ongarm, ma omelilt. (Efesus 6:18) Sel dosiik er a ulekrael er a Dios er a bek el blekerdelel a klengar er kid, e a klausechelei er kid me ngii a merael el mo mesisiich. A lsekum a reteru el kausechelei a mo dmak e chelebangel a mondai, e a klisichel sel klausechelei ngdiak lluut el lmuut el mo mesisiich? (Osisechakl 17:17) A di osisiu el tekoi a klemerang sel dulsirs er a Jehovah e kede mo melechesuar a ngelsuil.​—⁠2 Kronika 14:⁠11.

⁸ Ngkol ua ngera el deurreng er kid e le Dios a dimlak le rellii a telkelel ma klemengetel ma lechub a ildisel a taem el dongedecheduch er ngii el oeak a nglunguuch! A Nehemia a mle mereched el melekoi a nglunguuch er a chelsel a rengul er a uchei er a bo lolengit a ngeso er a king er a Persia. (Nehemia 2:​4, 5) A Jesus a dirrek el millekoi a kedeb el nglunguuch er sera lolengit er a Jehovah el kirel a klisiich me bo lsebechel el okisii a Lazarus. (Johanes 11:​41, 42) Engdi, a Hanna, “a mlelemolem ra nglunguchel el mora Rubak el mle kemangel taem” er sera louchais er ngii a rokui el tekoi er a chelsel a rengul. (1 Samuel 1:​12, 15, 16) A nglunguched a sebechel el mo kedeb ma lechub e ngkemanget el di ior er a usbechall ma blekeradel.

⁹ A betok el nglunguuch er a chelsel a Biblia a ullecholt a omereng el saul el kirel sel chimong el kedidai el deruchellel a Jehovah ma ike el mengasireng el omerellel. (Exodus 15:​1-​19; 1 Kronika 16:​7-​36; Psalm 145) Ngar er a ues, e a apostol el Johanes a ulemes er a 24 el mechuodel​—⁠sel cherrungel el ildisir a rengellitel el Kristiano el ngar er a deruchellir er a eanged​—⁠el oldanges er a Jehovah, el melekoi el kmo: “Rubak e Dios er kemam, ikau a redemelel a nguu a klebkall, ma chomengull, ma klisiich, ele kau a mileob a rokuil tekoi, ma rokuil tekoi a ngarngii luleltirakl a uldesuel a rengum e ulebeob.” (Chocholt 4:​10, 11) Ngdirrek el ngar er ngii a ungil el uchul a bo deblechoel el oldanges er ngike el Ulemeob. A chedam ma chedil a mo dmeu a rengrir sel lengai a omereng el saul el mla er a chelsel a rengul a ngelekir el kirel a tekoi el riruul el mo er ngii! A dolatk er sel blekokeuii er a Jehovah e dochotii a omereng el saul er kid el kirel, a kmal ungil el rolel a dengesecheklii a blekerdelel a nglunguched.

“Lako Mekimd el Meluluuch”​ —⁠Ngera Uchul?

¹⁰ A ngluluuch a kmal klou a ultutelel el kirel  a klaumerang er kid. Uriul er a lomekesiu er a klungel a ultutelel a nglunguuch, e “dileblechoel el meluluuch e lak bo lak chomeltkir,” e a Jesus a uleker el kmo: “Ngdi sel le me Ngelekel a chad, e ngkol mesa kloumera el ngar tial belulechad?” (Lukas 18:​1-8) A nglunguuch el oeak a blakerreng, el ngar er a reng a meleketek a klaumerang. Sera lorael el mo chuodel a Abraham e dirkak lebo er ngii a ngelekel, e ngmilengedecheduch er a Dios el kirel. Sera longer, a kot e a Jehovah a ullengit er ngii me lomes el bedul eanged e a lsebechel lomechur a ildisel a bduch el ngar er ngii. E sola e a Dios a millisiich er a Abraham el kmo: “Ar uldidellel a rsechem a mo ua ildisel a btuch.” Ngera mlo rsel? A Abraham “a uluumerang ra Rubak, ma Rubak a milsechii a kloumerang er ngii el llemeltel.” (Genesis 15:​5, 6) A domkais a rengud el mo er a Jehovah el ngar er a nglunguuch, e kongei aike el omelisiich er a chelsel a Biblia, e olengesenges er ngii, e ngmo melisiich er a klaumerang er kid.

¹¹ A nglunguuch a dirrek el sebechel el ngosukid el omtebechel a mondai er kid. Ngoberaod a blekerdelel a klengar er kid er a bek el sils e meringel er kid el outekangel aike el blekeradel el dechelebangel? A Biblia a ouchais er kid el kmo: “Ke mo moterekokl aike el oberaod el ongelungel er kemiu er a Jehovah, e ngii a mo melisiich er kemiu. Ngdiak bo becherei a melemalt a rengul el mo suebek a rengul.” (Psalm 55:22) Sel dechelebangel a meringel el omelilt, e ngsebeched el oltirakl er a kerebil a Jesus. Ngmle ta el kesus el loluluuch er a uchei er a lolilt er tirke el 12 el apostol er ngii. (Lukas 6:​12-16) Me sel kesus er a uchei er a kodellel, e a Jesus a kmal mlo blak a rengul el meluluuch ma “klsbengel a mlo ua kloul ngimech el rasech el olechars ra chutem.” (Lukas 22:44) Ngera mlo rsel? “Me ngmlorenges el sel omeluu er ngii ra Dios a uchul.” (Hebru 5:⁠7) A bo leblak a rengud e de blechoel el meluluuch e ng mo ngosukid el outekangel aike el meringel el blekeradel ma ongarm.

¹² A kuk ta er a uchul e ngsoad el mo olekeed er kid er a Jehovah el oeak a nglunguuch e le ngii a mo kmeed er kid. (Jakobus 4:⁠8) Sel debekengii a rengud el mo er a Jehovah el oeak a nglunguuch, ngdiak dolechesuar el kmo ngmedengei er aike el dousbech e ngkmal kerekikl er kid? A bo leuaisei e kede melechesuar a bltikerreng er a Dios er a kmal ileakl el rolel. A Jehovah a dimlak loterekeklii tia el ngerachel el mo er a ngii di el chad me bo Lorrenges er a bek el nglunguuch el loluluuch el mo er ngii a remesiungel el ua Demerir el ngar er a eanged. (Psalm 66:​19, 20; Lukas 11:⁠2) E ngdirrek el mengemedaol er kid el mo ‘moterekokl er ngii a ikel suebek a rengud er ngii . . . [e le] Dios chomekerreu er kid.’​—⁠1 Petrus 5:​6, 7.

 ¹³ A nglunguuch a sebechel el melisiich a blakerreng er kid el kirel a odingel obliil e melisiich er kid sel bleot el reng ma lechub e ngultok el mengitechut a rengud. (Rellir Ar Apostel 4:​23-31) A nglunguuch a dirrek el sebechel omekerreu er kid er aike el “ulekbat ra diabelong.” (Efesus 6:​11, 17, 18) Sel doutekangel a ongarm er a bek el sils, e ngsebeched el blechoel el olengit er a Dios el mo melisiich er kid. A nglunguchel a Jesus a uldimukl a ongit el kmo a Jehovah a “mosobelemam era mekngit,” el Satan el Diabelong.​—⁠Matteus 6:⁠13.

¹⁴ A lsekum e kede melemolem el meluluuch el kirel a ngeso el mo omtebechel aike el kngtil a rengud, e kede mo melechesuar a ngelsuil a Jehovah. Ngngar er ngii er tia el omelisiich el kmo: “A Dios a blak a rengul, me ngdiak di lak loltaut er kemiu ra ikel medeel er kemiu lomengarm e le merekong, ngdirrek el rullemiu el mo sebechiu el mtekengelii chomengarm, e kudmeklii a rolel a chiis.” (1 Korinth 10:13) Me ngii el apostol el Paulus a milechesuar er sel ulekerreu er a omelisiich er a Jehovah el ngar er a betok el kakerous el blekeradel. Ngdilu el kmo: “Ngsebechek el meruul a rokuil tekoi el oeak a Kristus, el ngikel melisiich er ngak.”​—⁠Filipi 4:13; 2 Korinth 11:​23-29.

Mdi Blechoel el Meluluuch el Ngar er a Chelitechetum

¹⁵ A bo lemorenges a nglunguched, e ngdiak el kired el loltngeklii a uleklatk er a Tekingel a Dios. A apostol el Johanes a milluches el kmo: “Ma ikel dolengit el ngiidi le ngerang a le beskid, ele kede olab a llechul a Dios e meruul a ikel ungilbesul ra rengul.” (1 Johanes 3:22) Engdi, ngera sebechel el mo duubech, a lsekum a blekerdeled a diak lebo loltaut er a llechul a Dios? A Adam ma Eba a ulemart er tir er a uriul er a lerebet er a klengit er a chelsel a sers er a Eden. E dirrek altang soad el mo omart er kid “er a medal a Jehovah” e mo diak doluluuch. (Genesis 3:​8, NW) A Klaus, el meketeketa el overseer el oldingel er a betok el ongdibel, a melekoi el kmo: “Ak mla metik el kmo ngblechoel sel kot el cheleuid el tekoi el loruul tirkel oberius el mo cheroid er a Jehovah ma cheldebechellel a sel lebo lemetterob el meluluuch. (Hebru 2:⁠1) Tiang a mle uaisei er a José Ángel. Ngdilu el kmo: “Ngbekord el 8 el rak, e ngdimlak kululuuch el mo er a Jehovah. A renguk e ngdiak a rredemelek el mo mengedecheduch er ngii, e ng di ak dirk ousbech el kmo ng Demak el ngar er a eanged.”

¹⁶ A rebebil er kid a sebechir el melatk el kmo ngdiak lerredemelel a mo meluluuch e le ngchelitechetul a klereng ma lechub e terirebet er a mekngit el omeruul. Engdi tiai a uchul e ngkired el mo blak a rengud el ousbech er a nglunguuch. A Jonah a chiliis er a ngerechelel. Engdi ‘ng ulemekedong er ngii [el Jehovah], el ngara chelsel a chelebulel e lulenger er ngii; ngngara dmolech ra belurir ar mla mad e olengit a ngesou me ng rirengesii.’ (Jonah 2:⁠2) A Jonah a milluluuch, e a Jehovah a ulenger er a nglunguchel, e ngmlo mesisiich a klereng er a Jonah.

¹⁷ A José Ángel a dirrek el mlo blak a rengul el meluluuch el kirel a ngeso. Ngmillatk el kmo: “A kulemkais er a renguk e ullengit er a Dios el kirel a klausubes er ngii. E ngngilsukak. Ngdimlak lsebechek el lmuut el me er a klemerang a lemlak a ngelsuil a nglunguuch. Me chelechang ak blechoel el meluluuch er a bek el sils, e ak kmal oureng er sel taem.” Ngkired el blechoel el mo ouchais er a Dios el kirel aike el kngtid e mo ngar er a eou a rengud e olengit a klausubes er ngii. A King el David er sera louchais er a kngtil, e a Jehovah a uluusubes er a kngtil. (Psalm 23:​3-5) A Jehovah a soal ngosukid, el diak el lolebeakl er kid. (1 Johanes 3:​19, 20) Ma nglunguchir a remechoudel er  a ongdibel a sebechel el ngosukid er a rolel a klereng er kid, e le choua ika el nglunguuch a “ngarngii a kloul klisichel.”​—⁠Jakobus 5:​13-16.

¹⁸ Ngera el chedam a mo otngeklii a ngelekel el sechal a lenga er iou a rengul losiik a ngeso ma uleklatk er a uriul er a lrebet er a klengit? Sel okesiu el kirel ngike el ririid el ngalek a olecholt el kmo altang e kede kmal mlo cheroid er a Jehovah, engdi sel deluut el mo er ngii e ngii el Demad el ngar er a eanged a oldeu a rengul. (Lukas 15:​21, 22, 32) A Jehovah a mengelechel er a rokui el mlo er a klengit el mo omekedong er ngii, e le “ngchubechub e mereched el ousubes a klengit.” (Isaia 55:​6, 7) Altang a David a rirebet er a bebil er a oberaod el klengit, e ngulemekong er a Jehovah, el melekoi el kmo: “O Dios, mrengesii a nglunguchek; e lak momart er kau el kirel a ongtik.” Ngdirrek el melekoi el kmo: “A lekebesengei ma lemellomes ma lechodosong e ngsuebek a renguk e mekngit a renguk, e a [Jehovah] a rongesak.” (Psalm 55:​1, 17, NW) Ngmera el klou omelisiich!

¹⁹ Engdi, ngmekerang alsekum a ongtid a diak lemereched el monger? A leuaisei e ngkired el mo ulterekokl el medengei el kmo a nglunguched a oltirakl er a soal a Jehovah e mlo oeak a ngklel a Jesus. (Johanes 16:23; 1 Johanes 5:14) Me ngike el disciplo el Jakobus a millutk el mo er a bebil er a Rekristiano e a nglunguchir a dimlak lemonger e le ‘ngsorir lousbech el kirel a ngelbesel a rengrir.’ (Jakobus 4:⁠3) Sel meral rolel, e ngdiak el kired el mereched el omdasu el kmo aike el diak lemonger el nglunguuch a blechoel el olecholt el kmo a Dios a diak lekengei er kid. A bebil er a taem e a Jehovah a mechititerir a reblak a rengir el mengull er ngii me te melemolem el meluluuch el mo er ngii el telkib el taem el kirel a tekoi er a uchei er a bo longer er tir. A Jesus a dilu el kmo: “Molengit, me le beskemiu.” (Matteus 7:⁠7) Me nguaisei, e ngkired el “diblechoel meluluuch.”​—⁠Rom 12:⁠12.

Bo Blechoel el Meluluuch

²⁰ A orimel ma mondai a di merael el mo betok er a chelecha el “uriul sils,” el obengkel a “blsechel a ringel.” (2 Timoteus 3:⁠1) E a ongarm a sebechel el mo mengesang er a uldesued. Engdi, sel deblechoel el meluluuch, e ngmo ngosukid el omtebechel a klengar er kid e melemolem er a tekoi er a klereng el ngar er aike el meringel el mondai, ma ongarm, ma chelitechut el reng. A nglunguched er a bek el sils el mo er a Jehovah a meskid sel klou a ultutelel el ngeso el dousbech.

²¹ A Jehovah, el ngike el “onger a nglunguuch,” a diak el betok a chelsengul el mo uchul me lak el sebechel rongesid. (Psalm 65:⁠2) Ma leuaisei me lak derellid el mo mechesang el me bo luchul e lak el sebeched el mengedecheduch er ngii. A klausechelei er kid el obengkel a Dios a sel kot el mekreos el tekoi el dobang. Me lak bo lebeot a rengud er ngii. “Misei e doba reng ra kloumerang el olekeed er kid ra kingall ra grazia, me de nguu a klechubechub e le mer kid a grazia el ngosukid er sel kirel blsechel.”​—⁠Hebru 4:⁠16.

Ke Mekerang e Onger?

• Ngerang a klubeled el dengai er a profet el Daniel el kirel a klungel a ultutelel a nglunguuch?

• Kede mekerang e melisiich er a klausechelei er kid ma Jehovah?

• Ngera me ngkired el blechoel el meluluuch?

• Ngera me ngdiak el kired el mechei aike el kngtil a rengud me lolekebai er kid el meluluuch el mo er a Jehovah?

[Study Questions]

1, 2. A Daniel ngmilekerang e olecholt er sel omereng el saul er ngii el kirel a techall er a nglunguuch, e ngerang rirellii el mo er a delongelel ngii ma Dios?

3. El ua ochotel a experience er a ta el missionari, ngmekerang a nglunguuch a sebechel el ngosukid el oba blakerreng?

4. Ngera bebil er a ker el bo dosaod er ngii el ngar er tia el suobel?

5. A nglunguuch ngosukid el mo oldeu er a rengud el kirel er a ngera el ileakl el klausechelei?

6. A kerebil a Jesus ngngerang olisechakl er kid el kirel a klungel a ultutelel a “deblechoel meluluuch”?

7. Ngera el blekeradel a oremelid el mo mengedecheduch er a Demad el ngar er a eanged er a bek el sils?

8. Ngoeak a kerebil a Nehemia, ma Jesus, ma Hanna, ngera kede suubii el kirel a klemengetel a nglunguched?

9. Ngera ma nglunguched a kirel el uldimukl er a odanges ma omereng el saul el kirel aike el rokui el lebilskid a Jehovah?

10. Ngua ngera klungel a ultutelel a nglunguuch el kirel a omelisiich er a klaumerang er kid?

11. Ngmekerang a nglunguuch a sebechel el ngosukid el omtebechel aike el mondai er kid?

12. Ngmekerang a rolel a nglunguuch a ochotii a klemeriarreng er a Jehovah el me er kid?

13, 14. Ngera uchul me ngkired el blechoel el meluluuch?

15. Ngera sebechel el mo duubech alsekum a blekederdeled a diak lebo loltaut er a llechul a Dios?

16, 17. Mouchais a bebil er a okesiu el kmo ngmekerang a nglunguuch e sebechel el ngosukid el mo omtebechel a chelitechetul a klereng er kid.

18. Ngua ngera el ulterekokl el reng a loba remesiungel a Dios altang te mlo oberius el mo cheroid er a Jehovah?

19. Ngera me ngdiak el kired el omdasu el kmo aike el diak lemonger el nglunguuch a olecholt el kmo a Dios a mla mo diak el kengei er kid?

20, 21. (a) Ngera me ngkired el di blechoel el meluluuch er a chelecha el “uriul sils”? (b) Ngera kede mo ngmai sel debo er a medal sel grazia el kingellel a Jehovah er a bek el sils?

[Picture on page 12]

A Nehemia a millekoi a kedeb, e diak lemorenges el nglunguuch er a uchei er a bo longedecheduch er a king

[Picture on page 13]

A Hanna “a mlelemolem ra nglunguchel el mora Rubak el mle kemangel taem”

[Pictures on page 14]

A Jesus a milluluuch er a ta el kesus er a uchei er a lolilt tirke el 12 el apostol er ngii

[Pictures on page 16]

A techall el kirel a nglunguuch a ngar er ngii er a bek el sils