“Lako Mobenterir ar Diak Loumerang el Ngara Tal Ongelungel”

SEL DOMES er tiang, e a rakuda ma sechal el kerebou el dmak el mesib a kora kmal metacherbesrir. E le tia el ongelungel el longol er ngii el terung​—⁠a kirel el di mo er a charm el osisiu a meklungir ma klisichir​—⁠a remuul aika el charm el kmal mo chuarm. Ma Dios a ulechotii el kmo ngdirrek el kerekikl er a bedengel a charm el ousbech el oureor, er a lolekoi er a rechad er a Israel el kmo: “Ngdiak moruul er a sechal el kerebou ma roba el mo dmak el mesib a sers.” (Duteronomi 22:10) A osisiu el omellach a dirrek el mo er a sechal el kerebou ma rakuda.

Nguaisei, a chad er a sers a diak lomekcharm er a cheremel. Engdi lsekum ngdiak a teblo el cheremel el sechal el kerebou, e ngmocha kirel el omak a teblo el charm el ngar er ngii er ngii. Me nguaisei, ngike el chad er a sers el kiliei er a 18 el dart el rak el domes er ngii er tia el siasing a mlo uaisei er a cheremel. E le ngkakerous a meklungir ma berredir, me ngike el mechitechut el charm a mo meringel el oltirakl, me ngike el mesisiich a kuk mo klou el loberaod a urerel.

A apostol el Paulus a uluusbech er a okesiu er a diak el tabesul el chellungel el olsisechakl er kid er a klou a ultutelel el suobel. Ngii a milluches el kmo: “Lako mobenterir ar diak loumerang el ngara tal ongelungel, e ngdiak bo ltang. Ngera ra llemalt ma chelebirukel a dmak? Ma ngera klaodengei ra llomes ma ilkolk? (2 Korinth 6:14) Ngmekera Kristiano e mo er a eungel a diak el tabesul el chellungel? A ta el rolel a lsekum a Kristiano a melilt el mo bechil a chad el diak loumerang er a klemerang. Choua itia el chebechiil a mo uchul a chetituokel el tekoi, el dirrek aike el meklou a ultutelel el tekoi.

A Jehovah er a loruul er a chebechiil, e ngmilsa redil a urerel el “chelmengel.” (Genesis 2:18) Me ngdirrek, el oeak a profet el Malaki, e a Dios a mesaod er a bechiil el redil el “kldemem.” (Malaki 2:14) Ma ngike el Ulemeob er kid a soal a rebechiil el obekel el dmak el kaingeseu er a klereng el beduluchei, el kaingeseu el oltekau er a berraod e dmak el meridm a klungiaol.

Ma bo lebechiil el di “ngara Rubak,” e a Kristiano a ochotii a omengull el kirel a uleklatk er a chedam er a eanged. (1 Korinth 7:39) Tiang a mo kutmeklii a omekedecheraol el kirel a chebechiil el ngar er a kltang, el sebechel el mo oldanges e mengull er a Dios el oeak tir el terung el mesiou er ngii ‘el meral kldemek’ er a ileakl el rolel.​—⁠Filipi 4:⁠3.

[Picture Credit on page 32]

A rakuda ma sechal el kerebou: Mla er a babier el La Tierra Santa, er a Volume 1, er a 1830