A Ker el Mla er a Remenguiu

Ngkirel mo ua ngera osengir a Rekristiano el kirel a mekreos el bad el kirel a buil el lemlechell er ngii?

El kirel a kuk bebil er a siukang, e aike el mekreos el bad a ngar er ngii a belkul ngii ma buil el lemlechell er ngii a chad. Tia di mo ior er a Kristiano el kmo ngmo oukebkab er a mekreos el bad ma lechub e ngdiak. (Galatia 6:⁠5) Ma bocha lolib er a bo loruul er ngii e ngar er ngii a tekoi el ngii a kirel el melatk.

A Encyclopedia Britannica a olecholt el kmo a mekreos el bad el kirel a buil el lemlechell er ngii a chad “a mekreos el bad el melutk er a sils el lemlechell er ngii a chad, ma loukebkab er ngii e ngmsa ungil el chung ma klisichel a bedengel.” Tia el babier a dirrek el melekoi el kmo: “A remesuub a bduch a meketeketa er a bo lolekoi el kmo aika el mekreos el bad a mera el ngar er ngii a ngar er a bab el diak lemeues el klisichel.”

Mle tokubets el betok el chad er a ngar er a mong a uluumerang el kmo sel ousbech er tia el mekreos el bad el kirel a buil el lemlechell er ngii e ngmo ungil a chung er ngii. A mera el Kristiano ngoumerang er tiang? Ngdiak, e le ngmedenge el kmo a Jehovah a ouketui er tirke el chilitii e mlo oumerang er a “chelid er a Chung.”​—⁠Isaia 65:​11, NW.

Ngar er a Middle Ages, e a remengelil a mellilt a mekreos el bad el mo ua lebad er a derta el buil er a ta er a rak. Te mellisiich er a rechad el mo ousbech er a mekreos el bad er a buil el lemlechell er ngii, el leko ngmo omekerreu er tir er a tellemall. Tia lomeruul a diak el loltirakl er a Biblia me ngmekngit er a Rekristiano a bo loltirakl er a remengelil el chad, e le a Biblia ouketui er tir.​—⁠Duteronomi 18:​9-12.

Ngdirrek el mekngit a lsekum a Kristiano a omes er a kebkab el ua lengar er ngii a belkul e le a mekreos el bad er a buil a bereked er ngii. A Resioning er a Jehovah a diak loruul a tanziobi. E le uchul e tia el ileakl el sils er a omilil a kmal di melutk el mo er a di ta el chad e aike el tanziobi el louchais a Biblia a di lurruul tirike el merredel el dimlak losiou er a Dios.​—⁠Genesis 40:20; Matteus 14:​6-10

A bebil er a rechad omdasu el kmo a loukebkab er a kebkab el ngar er ngii sel mekreos el bad er a buil el lemlechell er ngii e ngsebechel el rullii a chad el mo ungil a blekerdelel. Engdi, a remera el Kristiano a diak loumerang er tiang, e le te medenge el kmo “ngike el beches el chad” a ngar er a eungel a klisichel a chedaol el reng er a Dios e dirrek el kirir el loltaut er aike el llechul a Biblia.​—⁠Efesus 4:​22-24.

A kot el klou a belkul el tekoi a sel ngar er a reng. Sel lolilt el kmo ngmo oukebkab er a mekreos el bad el kirel a buil el lemlechell er ngii e a Kristiano a kirel el di ngii el oker er ngii el kmo, ‘Ngak ngsoak el oukebkab er a kebkab e le ngklebokel, el dirrek el mekreos el bad er a buil el kmlechell er ngii? Adang ngak ak dirrek el mla ngma uldesuir tirke el oumerang a klisichel aika el mekreos el bad?

A Kristiano a kirel el mo merritel er a chelsel a rengul el kmo ngera sel ngar er a rengul el mo oremelii. “El ngar er a uchei er a ike el rokui el momekerreu, momekerreu er a rengum,” ngmelekoi a bades, “le aike el tuobed er ngii a mo uchul a klengar.” (Osisechakl 4:​23, NW). Me se el bo lolilt a Kristiano el kirel a mekreos el bad er a buil el lemlechell er ngii, e a derta el Kristiano a mo nguu a klungiaol sel leblak a rengul el merritel er sel mo uchul e ngsoal el rullii a ngerang ma omerellel ngerang a sebechel el mo rullii el kirel a di ngii ma rekuk bebil.​—⁠Rom 14:⁠13