“Mosiik Ra Deuil A Rengum Lobengkel A Rubak”

“Mosiik ra deuil a rengum lobengkel a Rubak [el Jehovah], e ngmo meskau sel msal oureng er ngii.”​​—⁠PSALM 37:⁠4.

“TE NGELTENGAT ar mechebuul a rengrir, . . . te ngeltengat ar chubechubechad, . . . te ngeltengat ar meruul a budech.” Aikang el obengkel a lmuut el elolem el tekoi a mesaod er tirke el dmeu a rengrir, e aika el tekoi a ngar er a uchelel sel merael a chisel el Osisecheklel a Jesus el ngar er a Rois, el lilechesii ngike el milluches er a Evangkelio el Matteus. (Matteus 5:​3-11) A tekingel a Jesus a olecholt el kmo ngsebeched el mo nguu a deurreng.

² A chedaol el chelitakl el lilechesii a King el David er a Israel er a irechar a olecholt er a Uchul a mera el deurreng, el ngii a Jehovah. A David a dilu el kmo: “Mosiik ra deuil a rengum lobengkel a Rubak [el Jehovah], e ngmo meskau sel msal oureng er ngii.” (Psalm 37:⁠4) Engdi ngera sebechel el rullii a klemedengei er kau el kirel a Jehovah ma blekerdelel el mo uchul a “deuil a rengum”? Ngmekerang a obo morritel er aike el bla lrruul ma ike el bo loruul el oltaut er a moktek er ngii a meskau “sel msal oureng er ngii”? A bo dekerekikl el merritel aike el dmolech el tekoi er a Psalm 37, er a 1 el mo er a 11 el kekere el bades, e ngmo meskid a nger.

“Lako Mechechei”

³ Kede kiei er sel “blsechel a ringel,” me ngkmal klou a chelebirukel el omeruul. Kede mla mesa otutel a tekingel a apostol el Paulus el kmo: “Mar mekngit el chad mar mengeblad a mengal mora mekngit, e mengeuid rar chad, mar chad a mo mengeuid er tir.” (2 Timoteus 3:​1, 13) Ngkmal beot er kid el mo mechetakl er sel kora ungilbesul el rolel a klengar er a remekngit el chad! Aike el rokui el tekoi a sebechel el mengesang er kid, me ngsebechel el mo mekngit a osenged er a klereng. Me ka momes aike el tekoi el ngar er a uchelel a Psalm 37 el omeklatk er kid el kirel el tia el telemall el kmo: “Lako bekikl el kirir ar dengerenger; lako mechechei er tirkel meruul a chelebirukel.”

⁴ A bek el sils e a chais er a beluulechad a ouchais er kid el kirel aike el betok el mekngit el omeruul el ngar er ngii. A rediak lemelemalt a rengrir el chad er a siobai a meduch el omart er tir er a chelebeldir. Ma remerechorech a mengeblad er a remechitechut el chad. Ma rumekoad el diak lebetik er tir me ngdiak bo lobals. Choua ika el okesiu er a telemellel a llemalt a sebechel el omekduch a ngasecherreng e mengesang er a budech er a rengud. Sel kora ungil el blekerdelel a klengar er a remekngit a dirrek el sebechel el omekdubech a chelechei. Engdi a klsiberreng er kid ngsebechel el mo smodii sel blekeradel? A chelechei el kirel aike el ungil el tekoi el loldeu a rengrir er ngii a remekngit ngsebechel el mo ngodechii a kerrekeriil el mo er tir? Ngkmal diak! Me ngkmal diak a ungil el uchul a bo “olengasech a rengud.” Ngera uchul?

 ⁵ Ngike el milluches er a psalm a onger el kmo: “Te mo dibus el ua chudel el mo merat; te mo mad el ua mo meualech el dellomel.” (Psalm 37:⁠2) A beches el chemadech el chudel a ltang klebokel, engdi ngdi mereched a llel el mo meualech e ngmill. Ngdirrek el uaisei el kirir a remekngit. Sel kora ungilbesul el rolel a klengar er tir a diak lulterekokl. Sel lemad, e aike el chelebirukel el kerruul er tir a dikea lsebechel el ngosuterir. A llemalt a blechoel el oltaut er a urerel el mo er a rokui el chad. “Ele uduudel ra klengit a kodall,” ngmilluches a Paulus. (Rom 6:23) A remekngit ma rokui el diak lemelemalt el chad a mo “uduudel” e merekong. Ngkol ua ngera el diak a ultutelel el rolel a klengar!​—⁠Psalm 37:​35, 36; 49:​16, 17.

⁶ Ma leuaisei, e ngungil a debecherei a kora ungilbesul rolel a klengar er a remekngit el mo mengesang er a uldesued? A suobel el mengai er aike el kot el teblo el bades er a Psalm er a 37 a tiakid el kmo: Lak mkengei er a ungilbesul el rolel a klengar er tir me lengikau el mo cheroid er se el rael el mngar er ngii el mesiou er a Jehovah. Ngbai, motaut a medam er aike el klungiaol ma turrekong er a klereng.​—⁠Osis. 23:⁠17.

“Moumera Lulsirs ra Rubak e Moruul a Ungil”

⁷ “Moumera lulsirs ra Rubak [el Jehovah] e moruul a ungil,” ngmengelechel er kid ngike el milluches er a psalm. (Psalm 37:3a) Se el bo dechebangel a sebekreng ma lechub a klaumededenger, e ngkired el mo ulterekokl a rengud el ultuil er a Jehovah. Ngii a Ngike el meskid a cherrungel el ulekerreu er a klereng. A Moses a milluches el kmo: “Ngikel mora Rubak el kirel osebechakl, me ngikel kiei er cheungel chosebecheklel a olab a bek el klisiich.” (Psalm 91:⁠1) Se el bo louedikel a rengud el kirel a obdisel a delengerenger el ngar er a chelsel tia el mekngit el blekeradel er a beluulechad, e ngmal kired el lmuut el mo ultuil er a Jehovah. Se el lsekum e ngmecheroakl a ochid, e ngkmal mo ungil a rengud er a ngelsuil a ta er a sechelid. Me ngdirrek el uaisei, se el dolasem el merael el ngar er a blakerreng, e kede ousbech er a ngelsuil a Jehovah.​—⁠Isaia 50:⁠10.

⁸ A ta el rolel a bo dosmechokl er a kngtil a rengud el kirel a ungilbesul el rolel a klengar er a remekngit a bo demechesang el osiik e dengosuterir a reua sib el mo nguu a klemedengei el kirel a moktek er a Jehovah. Me chelecha el dechelebangel a obdois el mekngit el omeruul, e ngkired el mo mui el oureor el ngosuterir a rebebil. A apostol el Paulus a dilu el kmo: “E lako mobes chomeruul lungil ma blekerurau, e a Dios a dmeu a rengul er chouaisel tenget.” Se el kot el ngar er a bab el “lungil” el sebeched el merous el mo er a rebebil a se el domerk er a mengasireng el ungil el chais er a Rengedel a Dios. A urered el omerk er a ungil el chais a mera el “tenget er chodanges.”​—⁠Hebru 13:​15, 16; Galatia 6:⁠10.

⁹ A David a melemolem el kmo: “Mkiei el ngara beluu me bo mselebechakl.” (Psalm 37:3b) A “beluu” er a sils er a David a se el basio el lebilsterir a Rengalek er a Israel a Jehovah, el Beluu er a Nglat. Se er a longedereder a Solomon e a oliochel a mla er a Dan el ngar er a diluches el mo er a Beer-sheba el ngar er a dimes. Tiaikid a mle delengcheklir a rengalek a Israel. (1 Kings 4:25) Chelecha el sils, e a ngii di lebasio el dekiei er ngii er tia el chutem, e kede omes  el bedul a taem e tia el beluulechad el rokir a mo paradis el ngar er a chelsel se el beches el beluulechad er a llemalt. Engdi chelecha el taem, e kede kiei el ngar er a ulekerreu er a klereng.​—⁠Isaia 65:​13, 14.

¹⁰ Ngmo ua ngera a ‘bo deselebechakl’? A ta el mlukreng el osisechakl a omeklatk er kid el kmo: “A betok el klengeltengat a mo er ngike el meruul a tekoi el oeak a blakerreng.” (Osis. 28:​20, NW) A bo leblak a rengud el outekangel el omerk er tia el ungil el chais el ngar er a ngii di beluu el dekiei er ngii el mo er a ngii el chad a mo uchul a omeksaul el ngar er a Jehovah el mei. El ua itiang, a Frank ma bechil, el Rose, a siliseb er a ureor er a klepioneer el ngar er a chimo el beluu er a diluches er a Scotland er a 40 el rak er a mla me mong. Me tirke el mekesai el mle semeriar er a klemerang a oketa mla mo oberius cheroid er a klemerang. Ngdimlak bo lemechitechut a rengrir, e tirke el teru el obekel el pioneer a ulemuchel el omerk er a klumech e meruul er a remo disciplo. Me chelechang e ngngar er ngii a klou el ongdibel el ngar er sel beluu. A blakerreng er tirka el obekel a mera el mlo uchul a klengeltengat er a Jehovah el mo er tir. A Frank a mesaod el kmo: “Sel kot el klou el klengeltengat a tiakid a ki dirk ngar er a klemerang e a Jehovah a dirk sebechel el ousbech er kemam.” Chochoi, se el ‘bo deselebechakl,’ e kede mo ngmai e mo oldeu a rengud er a betok el klengeltengat.

“Mosiik ra Deuil a Rengum Lobengkel a Rubak”

¹¹ A bo dolisiich er a deleongel er kid ma Jehovah e dolemolem el oumerang el ulsirs er ngii, e ngkired el ‘osiik ra deuil a rengud lobengkel a Rubak [el Jehovah].’ (Psalm 37:4a) Kede mekerang e meruul er tiang? Kede mo blechoel el melatk er a Jehovah, er a bai di deblechoel el omdasu er a blekerdelel a klengar er kid, a ltang kmal meringel. A ta el rolel a doruul er tiang a se el dechoit a temed el menguiu er a Tekingel. (Psalm 1:​1, 2) A omengiuem er a Biblia ngoldeu er a rengum? Ngmo uaisei a lsekum e se el omonguiu e ke melatk el mo mesuub a lmuut el betok el kirel a Jehovah. Ngera me ngdiak mterebengii a omengiuem el telkib e di lekau el oker er kau el kmo, ‘Tia el bades ngngerang ngulsisecheklak el kirel a Jehovah?’ Ngkmal ungil a lsekum e ngngar er ngii a babier el kmeed er kau se el omonguiu er a Biblia. Se el omtelkib el torebengii a omengiuem e momtab a belkul aike el bla mchuiu, e mlechesii se el tekoi el omeklatk er kau el kirel a ta er aike el ungil el blekerdelel a Dios. Ngar er a kuk ta er a psalm, e a David a milengitakl el kmo: “A tikingek ma uldesuek bo le betechii a rengum, Rubak el euotelek!” (Psalm 19:14) Se el bo dungil el omtab er a Tekingel a Dios a ‘metechii a rengul’ a Jehovah e mo uchul a deurreng er kid.

¹² Kede mekerang e ngmai a deurreng se el dosuub e dolebedebek aike el tekoi el dosuub? Ngsebeched el melasem el mesuub aike el rokui el sebeched el kirel a Jehovah ma rolel. A doruul el uaisei a mo meleketek er a omereng el saul er kid el kirel. Me ngdirrek el uaisei, a David a melisiich er a remelemalt el chad el kmo, a Jehovah a “mo meskau sel msal oureng er ngii.” (Psalm 37:4b) Ngmle ua itiakid a ulterekokl el reng er a apostol el Johanes el mlo uchul me ngmilluches er se el tekoi el kmo: “Sel doba ulterekokl kloumera el bedul a Dios a kmo, a dolengit a ngiidi le ngeral tekoi el oltirakl a uldesuel a Dios e ngrongesii ngiil ongtid. Ma bocha dodengei el kmo a ikel dolengit a ngiidi lengerang me le rengesid er ngii, e kede mocha medengei el kmo, a ikel dullengit ra Dios a bla de ngai.”​—⁠1 Johanes 5:​14, 15.

 ¹³ A denguu el mei er kid el blak a rengud el chad, e a kot el klou el deurreng er kid a se el bo desa sebecheklel a omengederederel a Jehovah. (Osis. 27:11) Ngdiak lebo lolsibes er a deurreng a rengud se el dosuub el kirel se el kmal klou el ureor el loruul er ngii a rudam er kid el ngar er aike el beluu el kmal meringel a omengedereder er ngii? Kede kmal ousemeriar el mo mesang a lmuut el klou el ilmokl el ngar er aike el beluu el kirel a ureor er a uchei er a ullebengelel tia el mekngit el blekeradel. A rebetok el mesiungel a Jehovah el kiei el ngar er aike el beluu er a ngebard a kmal blak a rengrir el omerk er a klumech el mo er a rengalek er a skuul, me tirke el chiliis er a belurir, ma rekuk bebil el tirke el di kiei er a beluu er a ngebard er a telkib el taem e oldeu a rengrir er a ilmokl er a omengull. Kede kmal oureng el kmo se el lleta el mo remei er a belurir tirka el chad, e bo lolemolem el dmiich a llemesir er a klemerang er a chelsel a klou el ilkolk el ngar er a belurir.​—⁠Matteus 5:​14-16.

“Modersau el Mora Rubak”

¹⁴ Ngkol ua ngera el deurreng se el dodengei el kmo aike el rokui el sebekreng er kid ma aike el tekoi el ko er a omekberaod er kid a mo mengai el mo diak! Ngmekerang? A David a melekoi el kmo: “Modersau el mora Rubak; moumera lulsirs er ngii, e ngmo ngosukau.” (Psalm 37:⁠5) Ngar er aike el ongdibel er kid, e ngar er ngii a betok el ocholt el kmo a Jehovah a mera el ngosukid. (Psalm 55:22) Tirke el ngar er a mui-el-taem el omesiou, el pioneer, ma ruuldingel a betok el ongdibel, ma remissionari, ma remesiou el ngar er a Bethel, a sebechir el rokui el olecholt er a ulterekellel a ulekerreuil a Jehovah. Ngera me ngdiak moker er tirke el modengelterir el kmo ngmilekerang a Jehovah a ngilsuterir? Ke ulterekokl el mo orrenges a betok el experience el olecholt el kmo ngdirrek el ngar er a chelsel a meringel el blekeradel, e a chimal a Jehovah a kmal diak lekedeb. Ngii a blechoel el meskid aike el dousbech er a klengar er kid.​—⁠Psalm 37:25; Matteus 6:​25-34.

¹⁵ Se el bo dultuil er a Jehovah e doumera er ngii, e ngsebeched el melechesuar a tekingel ngike el milluches er se el psalm el kmo: “Ngmo rullii a klungiolem me ngmo dmiich el ua llomes, ma llemeltem a mo ua sils a le chedecheos.” (Psalm 37:⁠6) Kid a Resioning er a Jehovah, a blechoel el ngar er ngii a cheluid el tekoi er a uldesuir a rechad el kired. Engdi a Jehovah a omok a osengir a remelemalt  a rengrir e ngosuterir el mo medengei el kmo a omesiunged el ngar er a buai a oeak a bltikerreng er kid el kirel a Jehovah ma rengar er a bita er kid. E osisiu el taem, a ungil el blekerdeled, altang ngcheluid er a osengir a rebetok, e kmal diak el sebechel lobart. A Jehovah a omekerreu er kid er a chelsel a bek el bedengel a ultok ma odechelakl. Me seikid, e a llemalt er a rechedal a Dios a dmiich el ua sils a lecheldecheos.​—⁠1 Petrus 2:⁠12.

“Bo Mchelellakl . . . , e Moba Kllourreng el Mengiil”

¹⁶ A ongingil el tekingel ngike el milluches er se el psalm a kmo: “Bo mchelellakl er medal a Rubak [el Jehovah], e moba kllourreng el mengiil er ngii el mo meruul ra ngerang; lako bekikl el kirir tirkel mo ungil ra loruul malechub e tirkel mo ungil el ngara ikel mekngit luldesuir.” (Psalm 37:⁠7) Ngar er tiang e a David a melisiich er a klungel a ultutelel a bo leklou a rengud el mengiil er a Jehovah el mo oltaut er a uldesuel. Altang a ullebengelel tia el mekngit el blekeradel a dirkak lemei, e ngdi ngdiak el kired el mengeremrum. Ngdirk desa el kmo a klechubechub ma kllourreng er a Jehovah a kuk lmuut el klou er se el dulemdasu er ngii? Me chelechang e kele lebai lungil a dolecholt el kmo kid a dirrek el sebeched el kilou a rengud el mengiil e mechesang el omerk er a klumech er a uchei er a lemei a ullebongel? (Markus 13:10) Chelechang e ngbai ungil el taem el diak dorreched el meruul a tekoi el sebechel el tomellii a deurreng ma ulekerreu er a klereng er kid. Ma dirrek el bai ungil taem el bo demesisiich el omtok aike el mekngit el ongetikaik er tia el beluulechad er a Satan. E kmal ungil taem el bo dolemolem el kliikid a blekerdeled me lak de temellii se el melemalt el deruchelled er medal a Jehovah. Me bo dolemolem el oltngakl aike el mekngit el uldasu e dongeroid er kid er aike el ko er a mekngit el omeruul el bedul a redil ma lechub e ngsechal.​—⁠Kolose 3:⁠5.

¹⁷ A David a mellach er kid el kmo: “Lak lochedechudel a rengum, e lak lolengasech a rengum! Lak lsebek a rengum, e ngdiak a ngeral ungil el le rellii er kau. Tirkel oumera lulsirs ra Rubak a mo ungilbesrir el kiei ra chelsel a beluu, ngdi ar dengerenger a mo modik.” (Psalm 37:​8, 9) Chochoi, ngsebechel el mo ulterekokl a rengud e omes el bedul a taem​—⁠el kmal kmeed er a chelechang​—⁠e a Jehovah a mo olekngemed er a rokui el mekngit me tia el chutem me tirke el meruul er ngii.

“Ngdi Telkib Kung”

¹⁸ “Ngdi telkib kung, e ar dengerenger a mo dibus; ke me osiik er tir, ngdi mo diak ke betik er tir.” (Psalm 37:10) Aika el tekoi a kmal melisiich er kid er a chelecha el dechelebangel er a okngemedel tia el mekngit el blekeradel ma aike el rokui el tekoi el ileakl er a Jehovah! A rokui el gobelment ma omerredel el lulengetmokl a rechad a di mlo mekngit el rokui. Me chelechang e kid a kmeda er se el taem el Dios a lmuut el mo mengedereder, er se el mera el omerredel er a Dios, el Rengedel a Jehovah el ngar er a chimal a Jesus Kristus. Ngmo mengedereder er a rokui el tekoi el ngar er tia el beluulechad e mokngemed er tirke el rokui el omtok er a Rengedel a Dios.​—⁠Daniel 2:⁠44.

¹⁹ Ngar er a chelsel se el beches el chutem er a eungel a Rengedel a Dios, altang e ke kmal mo osiik er ngii, e ngdi ngmo diak el sebechem el metik er “ar dengerenger.” Nguaisei, a ngii di el chad el mo omtok er a Jehovah er isel taem a mo mereched el mengai el mo diak. Ngdiak a mo omtok er a omengederederel ma lechub e ngchetil el mo chederedall er a omerredelel a Dios el mo medechel er isei. A rokui el tonari er kau a mo uai kau el sorir el mo odeuir a rengul a Jehovah. Ngkol mo ua ngera el ulekerreu el mo er ngii​—⁠ngmo diak a cheseches, ma chelsimer, e mo diak a ngerang el mo melemall er a cherrungel el klaumerang ma deurreng!​—⁠Isaia 65:20; Mika 4:4; 2 Petrus 3:⁠13.

 ²⁰ E seikid, “ngdi tirkel medemedemek a mo ungilbesrir el kiei el ngara beluu.” (Psalm 37:11a) Engdi te rua techang “tirkel medemedemek”? Se el tekoi el mloiuid el kmo “medemedemek” a mengai er a tekoi el belkul a kmo “omekcharm, ma lechub e ngngareou a rengul, ma lechub e ngorretert.” Chochoi, “tirkel medemedemek” a tirke el ngar er a eou a rengrir el mengiil er a Jehovah el mo omeklemalt aike el rokui el chelebirukel el tekoi el merruul el mo bedul tir. Ngmo “ungil a rengrir ra cherrungel budech.” (Psalm 37:11b) Me chelecha el taem e kede dirrek el metik a cherrungel el budech el ngar er tia el paradis er a klereng el ngar er ngii er se el mera el ongdibel er a Rekristiano.

²¹ Altang e kede dirk chuarm a ringel, engdi kede kaukerreu e mengelaod er tirke el mekngit a rengrir. Me nguaisei, ngngar er ngii a mera el ongelaod er a delongelir a rechedal a Jehovah. A rudam el mlengilt el mo klekar a oba bltikerreng e oureor el kirel aike el dousbech er a klereng er kid​—⁠ma bebil er a taem el kirel aike el dousbech er a klechad er kid​—⁠el ngosukid el mo outekangel a ongarm el kirel a llemalt. (1 Thesalonika 2:​7, 11; 1 Petrus 5:⁠2, 3) Ngkol ua ngera el mekreos el tekoi tia el budech! Ngdirrek el ngar er ngii er kid a omelatk er a diak a ullebengelel el klengar el ngar er se el mereku el Paradis er a budech. Ma leuaisei, e me bo lsebeched el oukerebai er ngike el Klou el David, el Kristus Jesus, el blakerreng er ngii el kirel a Jehovah a uleremelii el mo blak a rengul el mesiou el mo lmuut er a ullebongel. (1 Petrus 2:21) A bo deuaisei, e kede mo melemolem el dmeu a rengud, el oldanges er ngike el ngii a deuil a rengud, el Dios er kid, el Jehovah.

Ngsebechem el Onger?

• Ngera el suobel a omsiluub er a Psalm 37:​1, 2?

• Ke mekerang e “mosiik ra deuil a rengum lobengkel a Rubak [el Jehovah]”?

• Ngera el ocholt a meketeklii el kmo ngsebeched el ultuil er a Jehovah?

[Study Questions]

1, 2. Ngtecha ngike el Uchul a mera el deurreng, e milekerang a King el David el ochotii tia el tekoi?

3, 4. El ua llechukl el ngar er a Psalm 37:​1, ngera el uleklatk a lebeskid a David, e ngera me ngungil a doltirakl er ngii er a chelecha el sils?

5. Ngera ma remekngit el chad a uai a chudel?

6. Ngera el suobel a denguu er a Psalm 37:​1, 2?

7. Ngera me ngkired el oumerang er a Jehovah?

8. Ngmekerang e a bo deteloi er a omesiou er a Rekristiano a sebechel el ngosukid me ngdiak desal el mo mekngit a rengud el kirel a ungilbesul el rolel a klengar er a remekngit?

9. Mosaod er a tekingel a David el kmo “kiei el ngara beluu.”

10. Ngera mo er ngii se el “bo deselebechakl”?

11, 12. (a) Kede mekerang e “osiik ra deuil a rengum lobengkel a Rubak [el Jehovah]”? (b) Ngera el turrekong a sebechem el meruul el kirel a di omesubem, e ngera sebechel mo duubech?

13. Ngar er aike el mereko el sesei el rak, ngera el omenglou er a ureor er a berkel-a-Renged a mlo er ngii er a betok el beluu?

14. Ngera el ocholt a meketeklii el kmo ngsebeched el ultuil er a Jehovah?

15. Ngmekerang a llemalt er a rechedal a Dios a dmiich?

16, 17. A doltirakl er a Psalm 37:​7, e chelechang e ngtaem el kirel a ngerang, e ngera uchul?

18, 19. Ngera el omelisiich a omnguu er a Psalm 37:⁠10?

20, 21. (a) Te rua techang “tirkel medemedemek” el losaod er tir er a Psalm 37:​11, e te metik a “cherrungel budech” er ker? (b) Ngera el klengeltengat a me er kid a lsekum e kede oukerebai er ngike el Klou el David?

[Picture on page 21]

A Rekristiano ‘diak lemechechei er tirkel meruul a chelebirukel’

[Picture on page 22]

“Moumera lulsirs ra Rubak [el Jehovah] e moruul a ungil”

[Picture on page 23]

Bo ldeu a rengum er a Jehovah se el mosuub aike el sebechem el kirel

[Picture on page 24]

“Ngdi tirkel medemedemek a mo ungilbesrir el kiei el ngara beluu”