Sel Uchul E Te Mo er a Eklesia

“CHELECHANG e a Republic er a Korea a ngar er ngii a rechedal a klechelid er a Presbyterian el kmeed el eua el chachisois a ildisir el kuk betok er tirke el ngar er a beluu er a Merikel.” Tia el tekoi a mla er a Newsweek el magazine e kmal chilas a rengrir a rebetok el menguiu el chad, e le oumesingd el chad a omdasu el kmo a meklou el klechelid er a Korea a Confucian ma Buddha. Chelechang, e a meleboteb el chad a sebechel el metik a kmal betok el Eklesia er a “Rekristiano” el ngar er isei, el mocholt el ousbech er a kmard el bekerekard el kerus. Me sel bo Lesandei, e a derterung ma dertedei el chad, a merael el mo er a Eklesia, e lolab a Biblia. Ma doltirakl er a omesuub el mla er ngii er a 1998, e ngmhgar er ngii a kesai er a 30 el basent er a rechad er a Korea el chad er a Katolic ma lechub e te Protestant, el kuk betok er tirke el melekoi el kmo te chad er a Budda.

Me chelecha el taem, e ngdiak desal mesa choua itia el klou el ildisir a rechad er a ngii di leker el blechoel el mo er a Eklesia. Me nguaisei, engdi tia diak di lengar er ngii er a Korea e lemerekong, ngdirrek el ngar er ngii er a bebil er a beluu er a Asia, el mo lmuut er a beluu er a Africa ma Latin America. Malta e beluulechad el rokir e ngbetok a kor beot a rengrir ma diak er a rengrir el kirel a klechelid engdi ngera uchul me te dirk ngar er ngii a rebetok el chad el kmo te oumerang er a Dios? Ngera uchul me te mo er a eklesia?

A ulecherangel er a uldesuir a rechad er a Gallup a ochotii el kmo a kuk betok er a 50 el basent el chad er a Korea el mo er a eklesia a osiik a budech er a reng; e a bekord el ta er a edeitiud a melatk er a diak a ullebengelel el klengar er a uriul er a kodall; ma tang er a chelsir a reteruich el chad a osiik a klisichel a bedengir, ma kerruul ma ungilbesul el klengar.

A betok el chad er a Sina a mo er a eklesia e le te melatk el mo omekeek er sel rengerir el ua lebechachau er a tekoi er a klereng el mlo er ngii er a rengrir er sera a lemutechei a amt er a Kiosanto engdi chelechang e ngchederdall er a telbiil er a keisai. A bek el rak, e a betok el milliol el oidel a Biblia a loluches e merous er a beluu er a Sina, ma rechad a blak a rengrir el menguiu er ngii el di ua isera longuiu er sel kekere el bekerekard el babier er a Mao.

Ma ikang el rokui a olecholt el kmo altang a klou el ulecherengelir a rechad a dirk oumerang er a Dios, engdi, oumesingd er tir a di melatk aike el sebechir el melai er a chelechang er a bai lolatk aike el mo er ngii er a ngar er a mederir​—⁠ma dirrek el ka lolatk el kirel al Dios.