A Jehovah A Mui Er A Diak Lemekimd El Bltikerreng

“A Rubak [el Jehovah] a . . . mui ra diak le mekimd el bltikerreng.”​​—⁠PSALM 145:⁠8.

“A DIOS a bltikerreng.” (1 Johanes 4:⁠8) Tia el tekoi a olecholt el kmo a rolel a longedereder a Jehovah a okiu a bltikerreng. Nguaisei, mo lmuut er a rechad el diak lolengesenges er ngii me te dirrek el ngmai a klungiolir er a sils ma chull el lebeskid el oeak a bltikerreng er ngii! (Matteus 5:​44, 45) A bltikerreng er a Dios el kirel a klechad el ngar er a beluulechad a uchul, e a recherroel a dirrek el sebechir el mo obult, e mo kmeed er ngii, e mo nguu a diak a ullebengelel el klengar. (Johanes 3:16) Engdi, di kmedung, e a Jehovah a mo olekngemed er a rokui el mekngit me bo lsebechir a rokui el chad el betik a rengrir er ngii el mo oldeu a rengrir er a diak a ullebengelel el klengar er a chelsel a melemalt el beches el beluulechad.​—⁠Psalm 37:​9-11, 29; 2 Petrus 3:⁠13.

² A Jehovah a olecholt er a bltikerreng er ngii el kirir a remera el mengull er ngii el oeak a mekreos, e diak a ullebengelel el rolel. Choua itia el bltikerreng a mlocholt el oeak a tekoi er a Hebru el mloiuid el kmo ‘blekokeuii el bltikerreng,’ ma lechub e ng “diak lemekimd el bltikerreng.” A King el David er a Israel er a irechar a kmal mle medengelii a klungel a ultutelelel sel blekokeuii—el—bltikerreng er a Dios. Ngoeak a experience er ngii ma omelebedebekel el kirel a omerellel a Dios el mo er a rebebil, e a David a mle sebechel el mo ulterekokl a rengul el mengitakl el kmo: “A Jehovah a . . . mui er a diak lemekimd el bltikerreng [ma lechub, e ng “blekokeuii el bltikerreng”].​—⁠Psalm 145:⁠8, NW.

Mo Dongcheterir a Reblak a Rengrir el Chedal a Dios

³ A delal a profet el Samuel, el Hanna, a millekoi el kirel a Jehovah el kmo: “Ngmesebechakl a klengar rar bekelatk [ el “blak a rengrir,” NW] el chedal.” (1 Samuel 2:⁠9) Te rua techang tirke el “blak a rengrir”? A King el David a meskid a nger. Uriul er a loldanges el kirel aike el mengasireng el blekerdelel a Jehovah, e ngmelekoi el kmo: “A rokuil blebelem [el “blak a rengrir,” NW] e Rubak, a mo oldanges [“omekngeltengat,” NW] er kau.” (Psalm 145:10) Ke locha mo omdasu el kmo te mekerang a rechad el omekngeltengat er a Dios. Te omekngeltengat er ngii sel oldanges er ngii ma lechub e te melekoi a ungil el kirel.

⁴ Ngsebeched el dongcheterir tirke el blak a rengrir el chedal a Jehovah e le te ousbech a ngerir el melekoi a ungil el kirel. Sel ledak el milil ma lengar er aike el miting er a Rekristiano, e ngera el tekoi a leblechoel el mesaod er ngii? Choi, a Rengedel a Jehovah! A uldesuir tirke el blak a rengrir el mesiungel a Dios a di ua uldesuel a David, el milengitakl el kmo: “Te mo melekoi ra klebkellel a rengedem [er a Jehovah], e ouchais ra klisichem.”​—⁠Psalm 145:⁠11.

⁵ A Jehovah ngorrenges sel oldanges er ngii tirke el blak a rengrir el chedal? Chochoi, ngorrenges a tekingir. Ngar er a ulaoch el melutk el kirel a mera el omengull er a chelecha el sils er kid, e a Malaki a milluches el kmo: “Misei e ar chad el meluu ra Rubak a mle chachedecheduch, e a Rubak a ulerrenges e mlo medengei a lolekoi. Me ngmelluches ra hong el  ngar medal a Rubak chomerellir tirkel meluu e mengull er ngii.” (Malaki 3:16) Ngkmal omotech er a rengul a Jehovah sel lolekoi a ungil el kirel tirke el blak a rengrir el chedal e ngii a melatk er tir.

⁶ Ngdirrek el sebeched el mo dongcheterir tirke el blak a rengrir el mesiungel a Jehovah el oeak a blekeu ma blakerreng er tir el mengedecheduch er tirke el diak longull er ngike el mera el Dios. Nguaisei, a ‘rokui el chad a mo medengei a klisichel chomerellel, ma kebkall el klengarbab ra rengedel’ el oeak a urerir tirke el blak a rengrir el chedal a Dios. (Psalm 145:12) Kau ke osiik e dirrek el ousbech a bek el techall el mengedecheduch er a rengodech el chad el kirel a omerredelel a Jehovah? A omerredel a diak leua ike el omerreder er a klechad, el di kmedung el mo nguemed, e a omerredelel a mo medechel el mo cherechar. (1 Timoteus 1:17) Ngkmal orechudel el kirir a rechad el mo mesuub el kirel sel diak a ullebengelel el omerredelel a Jehovah e mo mesisiich el dechor el kirel. A David a milengitakl el kmo: “A rengedem a diak a ullebengelel, me kau a king el mo cherechar.”​—⁠Psalm 145:⁠13.

⁷ Sera 1914 el mei, e ngmla mo er ngii a lmuut el betok el uchul e ngkired el mengedecheduch el kirel a omerrederel a Jehovah. Ngar seikid el rak, e a Dios a dillemii a Rengedel a Messias el ngar er a eanged el obengkel a Jesus Kristus, el Ngelekel a David, el mo King. Me nguaisei a Jehovah a uleltaut er a telbilel el kmo a omerrederel a David a mo medechel el mo cherechar.​—⁠2 Samuel 7:​12, 13; Lukas 1:​32, 33.

⁸ A ocholt el kmo a Jehovah a mengedereder er a chelechang el okiu sel Rengedel a Ngelekel, el Jesus Kristus, a desang er a otutel sel olangch el kirel a demiel a Jesus. Sel kot el klou el telengtengil sel olangch a sel ureor el lullekoi er ngii a Jesus el bo loruul er ngii a rokui el blak a rengrir el chedal a Dios er a ledu el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.” (Matteus 24:​3-14) E le reblak a rengrir el chedal a Dios a kmal blak a rengrir el oltaut er sel ulaoch, ma uchul a kuk betok er a elolem el milliol el sechal, ma redil, ma rengalek a meruul er tia el kmal klou, el diak-lluut-el-mo-er-ngii el ureor. Ngkmal di kmedung e ngmei a ullebongel er tirke el rokui el omtok er a Rengedel a Jehovah.​—⁠Chocholt 11:​15, 18.

Aike el Klungioled er a Omengederederel a Jehovah

⁹ A lsekum e kede mla tuib a rengud el Kristiano, e a deleongel er kid me ngike el Chimong el Kedidai el Rubak el Jehovah a meskid a betok el klungiaol. (Psalm 71:5; 116:12) E le kede medakt er a Dios e meruul a llemalt, misei e kede oldeu a rengud er a kengei er ngii e kmeed er ngii er a rolel a klereng. (Rellir Ar Apostel 10:​34, 35; Jakobus 4:⁠8) Ngdi sel kuk domes er tirke el olab a klisichel omerreder er a klechad, e tir a blechoel el obengterir tirke el ngar er a bab el chad, el ua remerredel er a resoldau, ma remerau el chad er a siobai, ma lechub e te merael a chisir el chad er a klekool ma rechad er a mubi. A chimo el simbung el Sowetan a ngklel er a beluu er a Africa, a mesaod el kirel a ngar er a bab el chad er a gobelment el millekoi er tia el tekoi el kirel a chelebuul el ngar er a belual el kmo: “Ak medengelii a uchul e a oumesingd er kid a diak lsoad el mo er aike el mechebuul el basio. E le ngbai soad el obes el kmo ngar er ngii choua ika el blekeradel er a beluad. Ngmeringel a ukltked e kede kora merur e le kede omekall aike el meringel a cheral el mlai e a chelebuul er a beluu a kmal klou.”

¹⁰ Nguaisei, te ngar er ngii a rebebil er a rulab a klisichel omerredel er a beluu el kmal kerekikl er a klengar er a rechad er a belurir. Engdi ngmo lmuut er tirke el kot el ungil el merredel er a delongelir a diak lsal ungil el medengelterir a rechederir. Me nguaisei, ngsebeched el oker el kmo: Ngngar er ngii a merredel el kmal kerekikl er a rokui el chedal me ngblechoel el mereched el mo olengeseu er a derta er tir a bo lemetacherbeserir? Chochoi, e ngngar er ngii. A David a milluches el kmo: “Ngolengeseu ra rokui el ngara chelebuul; e mengedidai ra rokuil ngar iou a rengrir.”​—⁠Psalm 145:⁠14.

¹¹ A betok el ringel ma tellemall a duubech el mo er a reblak a rengrir el chedal a Jehovah el Dios e le te diak lemecherrungel e dirrek e le te kiei er a beluulechad el ngar er eungel a klisichel a Satan,  el “ngikel mekngit.” (1 Johanes 5:19; Psalm 34:19) A Rekristiano a osiuekl a odechelakl. A rebebil a chuarm er a meringel el secher ma lechub a klengiterreng. A bebil er a taem, e aike el cheleuid el tekoi el lurruul a reblak a rengrir el chedal a Jehovah a sebechel rulleterir el mo ‘terrob’ el ngar er a chelitechut el reng. Engdi, a ngii di lengera el ringel el bo lechelebangel, e a Jehovah a blechoel el kltmokl el mo mesterir a omelaod e melisiich er a klereng er a derta er tir. Ngike el King el Jesus Kristus a oba osisiu el klemeriarreng el kirir tirke el blak a rengrir el chedal.​—⁠Psalm 72:​12-14.

A Ungil el Kall el Mechii a Blsechel

¹² Ngoeak a klou el blekokeuii-el-bltikerreng er ngii, e a Jehovah a mesterir a remesiungel aike el rokui el ousbech. Tia uldimukl er a ungil el kall. A King el David a milluches el kmo: “A rokuil di ngar choba chomelatk el omes er ngii [Jehovah], me ngmesterir a kall sel lousbech. Ngmesterir a ungil a ildisel; ngmesterir a rokui a ikel lousbech.” (Psalm 145:​15, 16) Ngmo lmuut er a blsechel a tellemall, e a Jehovah a sebechel el mengedechuul a blekeradel me ngmo sebechir a reblak a rengrir el mesiungel el mo ngmai a “kelel a tal sils.”​—⁠Lukas 11:3; 12:​29, 30.

¹³ A David a millekoi el kmo “a rokuil di ngar” a mo ngmai aike el lousbech. E tia dirrek el uldimukl er a charm. A lsekum ngdimlak aike el betok el kakerous el dellomel er a chutem ma dellomel er a daob el ngar er tia el beluulechad, e aike el charm er a daob, ma ike el suebek el charm, ma ike el charm el ngar er a beluu a mo diak a oxygen lousbech el outeliil ma lechub a kall el longang. (Psalm 104:14) Engdi, a Jehovah a kmal kerekikl ma ike el rokui el ousbech a di ngar er ngii.

¹⁴ A rechad a diak leua charm, e le rechad a ousbech a tekoi er a klereng. (Matteus 5:⁠3) A Jehovah a omotech a rengrir a reblak a rengrir el chedal el kirel a tekoi er a klereng er a mengasireng el rolel! Uchei er a kodellel, e a Jesus a tilbir el kmo a “blak a rengul e mellomes a rengul mesiou” a mo mesterir a ruultirakl er a Jesus a “kelir [er a klereng] el mechii a blsechel.” (Matteus 24:45) Me tirke el dirk medechel er tirke el 144,000 el ngellitel a chedal sel cheldebechel el mesiou er a chelecha el sils. Ngoeak tir, e a Jehovah a mera el omeskid a betok el okelel a reng.

¹⁵ El ua itiang, a oumesingd er a rechedal a Jehovah a ngmai a klungiolir er a chelechang er sel beches e melemalt a oidel el Biblia el ngar er a tekingir. Ngkol ua ngera el klengeltengeted sel New World Translation of the Holy Scriptures! Ma lmuut el tang, a betok el milliol el ngeso er a omesubel a Biblia a dirk lolemolem el loltobed el ngar er a kuk betok er a 300 el omelekoi. Choua ike el rokui el okelel a reng a klou el klengeltengat el kirir a remera el mengull el meliuekl er a beluulechad el rokir. Ngtechang a rredemelel a mo nguu odanges el kirel aike el rokui el tekoi? Ng Jehovah el Dios. Ngoeak a klou el blekokeuii-el-bltikerreng er ngii, e ngmla chudechulii a tekoi me bo lsebechir tirke el omtechei er ngike el mesiou el mo merous a “kall sel lousbech.” Ngoeak choua itia el rolel, e “ngmesterir ra rokui a ikel lousbech” el ngar er a chelsel tia el paradis er a klereng er a chelecha el sils. E ngkol mo ua ngerang a deurreng er a remesiungel a Jehovah el kirel sel omelatk  el di kmedung e tir a mo omes er tia el chutem el mo obult el mo mera el paradis!​—⁠Lukas 23:​42, 43.

¹⁶ Ka me bo dosaod er a klou el okesiu er a okelel a reng el dengiluu el mechii a blsechel. Sera 1939, e ngulemuchel a Ongeru el Mekemedil a Beluulechad el ngar er a beluu er a Europe. Ngar er sel osisiu el rak, e sel November 1 el babier er a Ongkerongel a mla er ngii er ngii a suobel el dai er ngii a kmo “Neutrality.” Ngoeak isel bleketakl el suobel, e a Resioning er a Jehovah el meliuekl er a beluulechad el rokir a milsa klungel a ultutelel a lak bo loba bitang ma ka lebitang er a urerir er a klaumekemad er aike el renged. Tiang a mlo uchul a cheldechuderreng er a gobelment er a bitang ma bitang er sel elolem-el-rak el mekemad. Altang te mla er a chelsel a ultok e dirrek el mlodechelakl, engdi, tirke el blak a rengrir el chedal a Dios a millemolem el omerk er a ungil el chais er a Renged. Me sera 1939 el mo er a 1946, e te mlukngeltengat er a kmal klou el ngelsecheklel a ildois er a rechad er a 157 el basent. Ma lmuut el tang, sel bleketakl el chais el kirel a blakerreng er tir er a blsechel a mekemad a melemolem el ngosuterir a rechad el mo dongchii sel mera el klechelid.​—⁠Isaia 2:​2-4.

¹⁷ A okelel a reng el lebeskid a Jehovah a diak ldi lebechii a mera el blsechel e lemerekong e ngdirrek el kmal ungil. Aike el renged er a lengar er a meringel el klaumekemad er sera Ongeru el Mekemedil a Beluulechad, e a rechedal a Jehovah a mlungeseu el mo melelem el kirel a tekoi el kuk lmuut el klou a ultutelel er a di osobelir. A Jehovah a ngilsuterir el mo medengei el kmo sel kot el klou a ututelel el tekoi, el uldimukl er ngii a eanged me tia el chutem, a ngar er ngii a delongelel ngii ma omengederederel a Jehovah. Ngkol ua ngera el deurreng el dobang sel dodengei el kmo ngoeak a blakerreng er a derta el Sioning er a Jehovah e ngngar er ngii a techellir el mo mesebechakl er a omengederederel a Jehovah e olecholt el kmo a Diabelong a bulak! (Osisechakl 27:11) Te diak leua Satan, el ngike el oltuub er a Jehovah ma rolel a longedereder, e a reblak a rengrir el chedal a Jehovah a bai melemolem el ouchais el ngar er a buai el kmo: “A Rubak [el Jehovah] a melemalt el ngara ikel rokui el loruul.”​—⁠Psalm 145:⁠17.

¹⁸ A kuk ta er a okesiu el mechii a blsechel, e ungil el okelel a reng a sel babier el Draw Close to Jehovah, el tilobed el ngar er aike el betok el dart el “A Reblak a Rengrir el Omerk er a Renged” el District Convention el mla er ngii er a beluulechad el rokir er sera 2002/03. Tia el babier, el lulluches er ngii “ngikel blak a rengul e mellomes a rengul mesiou” el uleltobedii a Resioning er a Jehovah, a olecholt aike el mengasirng el blekerdelel a Jehovah el Dios, el uldimukl er aike el tekoi losaod er ngii a Psalm 145. Tia el kmal ungil el babier a ulterekokl el mo klou el ngosuterir a reblak a rengrir el chedal a Dios el lmuut el mo kmeed er ngii.

A Taem el Dolekeed er Kid el Mo er a Jehovah

¹⁹ A kmal klou a ultutelel el taem el kirel a omesodel a omengederederel a Jehovah a kmedang. El ua lulemlaoch a Esekiel er a 38 el klou el bliongel, ngdi kmedung e a Satan a mo churrengelii a ngerechelel el ua “Gog er a beluu er a Magog.”(NW)  Tiang a mo uldimukl er ngii a odechelakl el mo er a rechedal a Jehovah er a beluulechad el rokir. A Satan a mo melasem er a tkurrebab el sebechel el melemall er a klaumerang er a reblak a rengrir el chedal a Dios. Ngkmal dimlak leuaisei er a ngar er a mong el me er a chelechang, e a remengull er a Jehovah a kmal kirir el mo blak a rengrir el omekedong er ngii, el dirrek el mo lmangel el olengit er a ngelseuil. A dektir el kirel a Dios ma bltikerreng er tir el mo er ngii ngmo diak a belkul? Ngdiak, e le Psalm 145 a melekoi el kmo: “Ngkmeed er tirkel rokui el omekedong er ngii, el tirkel omekedong er ngii el ngara klemerang. Ngmesterir a lousbech tirkel rokui el meluu er ngii; ngorrenges chongterir e olsobel er tir. Ngmesebechakl er tirkel betik a rengrir er ngii, ngdi mo tomelleterir a rokuil dengerenger.”​—⁠Psalm 145:​18-20.

²⁰ Ngkol mo ua ngera el deurreng a bo dolechesuar el kmo ngkmal di kmedung e a Jehovah ma klisichel el mo olsobel er sel bo lokngemedeterir a rokui el dengerenger! Me tia el klou a ultutelel taem el di ua ngera el kmal kmedang, e a Jehovah a di mo orrenges er “tirkel omekedong er ngii el ngara klemerang.” Ngkmal diak bo lorrenges er a recheblad el chad. A Tekingel a Dios a kmal bleketakl el olecholt el kmo a bo lousbech er a ngklel el ngar er tia el ullebengelel a taem a remekngit a blechoel el mlo chemolt el kmo ngmo diak a belkrir.​—⁠Osisechakl 1:​28, 29; Mika 3:4; Lukas 13:​24, 25.

²¹ Chelecha el taem a kmal orechudel el taem el kirir tirke el medakt er a Jehovah el mo “omekedong er ngii el ngara klemerang.” Tirke el blak a rengrir el chedal a kmal dmeu a rengrir el ousbech er a ngklel sel loluluuch me sel longer el ngar er aike el miting er tir. Te ousbech er sel chedaol el ngakl sel di letir el chachedecheduch. E te bekeu el ouchais er a ngklel a Jehovah el ngar er a omesiungir el ngar er a buai.​—⁠Rom 10:​10, 13-15.

²² A bo dolemolem el melai a klungioled el okiu sel kmes el deleongel er kid ma Jehovah el Dios, e ngdirrek el kmal klou a ultutelel a dolemolem el omtok aike el tekoi el sebechel el melemall a klisichel a klereng er kid el ua ngibes er a kerruul, ma mekngit el omilil, ma reng el diak lsoal el ousubes, ma lechub a bleot el reng el kirir a remechebuul. (1 Johanes 2:​15-​17; 3:​15-​17) A lak bo lemuklemalt, e choua ike el uldasu ma blekeradel a sebechel el mo uchul a omerellel a klengit e mo uchul a oridel a kengei er a Jehovah. (1 Johanes 2:​1, 2; 3:⁠6) Ngrolel a llomeserreng a bo domdasu el kmo a Jehovah a mo melemolem el olecholt er a blekokeuii-el-bltikerreng, ma lechub a diak lemekimd el bltikerreng, el me er kid a lsekum e kede melemolem el blak a rengud el mo er ngii.​—⁠2 Samuel 22:⁠26.

²³ Ma leuaisei e me bo deblechoel el melatk er sel mengasireng el ngar er a medad el klebesei el longiil er ngii a rokui el blak a rengrir el chedal a Jehovah. A bo deuaisei, e ngmo er ngii a kmal klou el techelled el mo teloi er a delongelir tirke el mo mengedidai, e mengebkall, e oldanges er a Jehovah er a “bek el sils” ma “diak a ullebengelel el mo cherechar.” (Psalm 145:​1, 2) Ma leuaisei e me bo lsebeched el ‘momekedelad er kid ra chelsel a bltikerreng ra Dios, el dimerkmo a bo denguu a diak a ullebengelel klengar.’ (Judas 20, 21) Sel dolemolem el melai a klungioled er aike el mengasireng el blekerdelel a Demad el ngar er a eanged, el uldimukl er sel klou el blekokeuii-el-bltikerreng el ngii ochotii el bedul tirke el betik a rengrir er ngii, me bo lsebechel a uldesued el mo ua ike el uruil el tekoi lulsaod a David el ngar er a Psalm 145 el kmo: “Ak di mo blechoel el oldanges ra Rubak; a rokuil bleob bo loldanges ra chedaol ngklel el mo cherechar.”

Ke Mekerang e Onger?

• Ngmekerang a Psalm 145 a ngosukid el mo dongcheterir a reblak a rengrir el chedal a Dios?

• A Jehovah ngmekerang e “mesterir a rokui a ikel lousbech”?

• Ngera me ngkired el olekeed er kid el mo er a Jehovah?

[Study Questions]

1. Ngua ngerang a kllungel a bltikerreng er a Dios?

2. Ngera el ileakl el rolel a bltikerreng a lochotii a Jehovah el mo er tirke el mla tuib a rengrir el mo er ngii?

3, 4. (a) Ngmekerang a Psalm 145 a ngosukid el mo dongcheterir tirke el blak a rengrir el chedal a Jehovah? (b) Te mekerang a reblak a rengrir el chedal a Dios el “omekngeltengat” er ngii?

5. Kede mekerang e medengei el kmo a Jehovah a kmal medengei sel lolekoi a ungil el kirir tirke el blak a rengrir el chedal?

6. Ngera el ureor a ngosukid el dongcheterir a reblak a rengrir el chedal a Dios?

7, 8. Ngera dilubech er sera 1914, e ngera el ocholt a meketeklii el kmo chelecha el taem e a Dios a mengedereder el oeak sel Rengedel a Ngelekel?

9, 10. Ngera el klekakerous a ngar er ngii er a delongelel a Jehovah ma remerreder er a beluulechad?

11. Ngera el ongarm a lechelebangel er ngii a reblak a rengrir el chedal a Dios, e ngera el ngeso a sebechel el mo er tir?

12, 13. A Jehovah ngua ngera rolel a lomesterir a “rokuil di ngar” aike el ousbech?

14, 15. Ngmekerang e meketmokl e merous a okelel a reng er a chelecha el sils?

16, 17. (a) Ngera el okesiu a olecholt el kmo a okelel a reng a mlo er ngii el mechii a blsechel? (b) Ngmekerang a Psalm 145 a ouchais er a uldesuir a reblak a rengrir el chedal a Dios el kirel sel kot el klou a ultutelel el tekoi el ulemekdubech er ngii a Satan?

18. Ngera el okesiu el mlo er ngii er a chelecha el taem el kirel a okelel a reng el mlo mechii a blsechel e dirrek el kmal ungil?

19. Ngera el orechudel el taem a kmal kmedang, e kede mekerang e kutmeklid el kirel?

20. Ngmekerang aike el tekoi el ngar er a Psalm 145:​18-​20 a mo klemerang er a di kmedung el taem er a ngar er a medad el klebesei?

21. Te mekerang a reblak a rengrir el chedal a Jehovah el olecholt el kmo ngdmeu a rengrir el ousbech er sel chedaol el ngakl?

22. Ngera me ngklou a ultutelel a bo dolemolem el omtok er aike el uldasu ma ngibes er tia el beluulechad?

23. Ngera el mengasireng el taem er a ngar er a medad el klebesei a longiil er ngii a rokui el blak a rengrir el chedal a Dios?

[Picture on page 15]

A remesiungel a Jehovah a bekeu el olengeseu er tirke el diak lodengelterir el chad el mo mesuub el kirel a klebkellel a omengederederel

[Picture on page 16]

A Jehovah a mesterir a reblak a rengrir el chedal a klisiich ma ulekrael, el tirke el osiik er a ngelsuil el ngar er a nglunguuch