A Melemalt el Uklatk

SERA lengar er a omerollel el mo remei el mla er a urerel er a ta er a klebesei, e a Charles, a chad el oureor er a university el ngar er a Kenya, a urridii a cell el dengua er ngii. Ngar er a beluu er a Kenya, e aikang a kmal dirk meringel a cheral el klalo.

A Charles a dilu el kmo: “Ngdimlak kulatk el kmo a chad a mo olutii ngii el dengua.” Engdi, a sese el klebesei er a uriul, e ngkmal mlo mechas a rengul er a lenguu a okedong er a dengua el mla er a obis er a branch er a Resioning er a Jehovah el ngar er a Kenya. Ngkmal kilebetiekl er a loleker er ngii el mo melai er tia el cell el dengua er ngii! Ngmlo medengei el kmo a ta er a mui-el-taem el minister er a Resioning er a Jehovah a mla er sel osisiu el mlai ngii ma Charles e ngii a miltik er sel dengua. Ngmle soal el osiik er ngike el ouklalo er sel dengua, me ngngiluu el mo er a obis er a branch, ma rechad er a ureor er a branch a miltik er a lambang er a Charles el ngar er a chelsel a dengua er ngii.

A Charles a milluches a babier el mo er a obis er a branch el dilu el kmo: “Ak kmal oureng a suliu el kirel a meringel el ureriu el osiik er ngak. Ngkmal soak el oureng a sulir tirke el chedemiu el ngar er a cheldechebecheliu el miltik er a cell er ngak, e ulsiik er ngak e miltik er a lambang er a dengua er ngak, e mla olutii. Ngdiak lebeot a debetik er a remelemalt a rengrir el chad er a chelecha el sils, engdi tia kmal melisiich er ngak e le te ngar er ngii a remekesai el kmal ileakl el mera el Sioning er a Jehovah el Dios.”

A Resioning er a Jehovah er ker ma ker a lodengelterir a rechad el kmo ngmelemalt a blekerdelir. Te oukerebai er a apostol el Paulus, er a ledu el kmo: “A ki oumera el kmo a ki oba klikiid lukltkam, me ngsomam el melemalt loureor el kirel a ngiidil tekoi.” (Hebru 13:18; 1 Korinth 11:⁠1) Te medengei el kmo choua isel omeruul a mengebkall er a Jehovah el Dios, el di ua lullekoi a Jesus el kmo: “Ma llemesiu le uaisei el dmiich er mederir ar chad, me lomes a ungil lomerelliu e lodengesii a Demmiu el ngara eanged.”​—⁠Matteus 5:16.