Aike El Telbiil el Sebechem el Oumerang

A PROFET er a Dios el Mika a mle medenge el kmo ngdiak el sebeched el ultuil er a telbilir a rechad. E sera lekiei, eng molmuut er ngike el kmal ngar sechelim me ngdiak el sebechem el mo oumerang a tekingel. Ma Mika uluuchais el kmo: “Lak moumera er a ngar er a bita er kau. Lak moumera er a kmal sechelim. Me ngike el mechiuaiu el chelebtanget er a ulum bo mongkar a tekoi el tuobed er a ngerem.”​—⁠Mika 7:⁠5, NW.

A Mika ngmilecherei tia el blekeradel meng rullii el mo diak loumerang a rokui el telbiil? Ngkmal Diak! Ngullecholt a cherrungel el klaumerang el kirel a telbilel a Dios er ngii, el Jehovah. “Engdi ngak,” ngmelluches a Mika, “ngdi ta el Jehovah a kumes el bedulngii. A kuchotii a omengiil el blekeradel el kirel a Dios el osebelek.”​—⁠Mika 7:⁠7, NW.

Ngera uchul ma Mika a kmal mle cherrungel a klaumera er ngii? Ngmle medenge el kmo a Jehovah blechoel el loltaut a tekingel. Aike el rokui el ledilu Dios el mo er a ruchelel a Mika a di tilaut. (Mika 7:20) Sel blakerrreng er a Jehovah er a ngar er a mong a mlo uchul ma Mika a uluumerang el kmo ngmo oltaut a tekingel er a ngar er a medal el klebesei.

 “Ngdiak a Di Chimo el Tekoi . . . el Dimlak Lemotirakl”

A Mika mle medengei, el ua itiang el kmo, a Jehovah ngilbeteterir a Rengelekel a Israel er a kelsibai er a Egipten. (Mika 7:15) A Josua, el mla er a chelsel a taem er a ngebetir, a mlengelechel er a rekeldemel el Ngelekel Israel el mo oumerang er aike el rokui el telbilel a Dios. El okiu a ngerang? A Josua a ulemeklatk er tir el kmo: “Ko mungil el medengei er a chelsel a rengmiu ma klengar er kemiu el rokir el kmo ngdiak a di chimo el tekoi el tilobed er aike el rokui el ungil el cheldechedechal a Jehovah el Dios el lekor rekemiu el dimlak lemotirakl. Ngii el rokui el a mlutaut el eko er kemiu. Ngdiak a chimo el tekoi er a chelsel el dimlak lemotirakl.”​—⁠Joshua 23:⁠14, NW.

A rengelekel a Israel a mle ungil medengei el kmo a Jehovah a riruul a ungil tekoi el mo er tir. Ngii a uleltaut er sel telbilel el mo er ngike el medakt-er a-Dios el uchelir el Abraham el kmo a klengelakel er ngii a mo obdois el ua ildisel a btuch er a eanged e dirrek el mo nguu a beluu er a Kanaan el mo kloklir. A Jehovah dirrek el dilu er a Abraham el kmo a ruldidellel a mo chuarm er a ringel el 400 el dart el rak e ngdi te lmuut el mo er a Kanaan “er a chelsel ongeua el telecheroll.” Aika el rokui a mlutaut el mo er ngii.​—⁠Gensis 15:​5-16; Exodus 3:​6-8

A rengelekel a Israel a lulengemedaol er tir a rechad er a Egipten er a lekiei a Josef el ngelekel a Jakob. Uriul e a rechad er a Egipten a ulerrimel er tir el mo era kelsibai lureor, eng di loltirakl er a telbilel a Dios, el ngar er a chelsel a eua el telecheroll, er a temir er a bel siseb er a Egipten, e tirka luldidellel a Abraham a mlengubet era kelsibai er a Egipten. *

Ma chelsel aike el 40 el rak, ea rengelekel a Israel a liluut el ngmai a betok lolechotel a kmo a Jehovah a blechoel el loltirakl a telbilel. A rechad er a Armalek er sera bo loumekemad er a rengelekel a Israel el dimlak a ungil uchul, ea Dios a uluumekemad el kirir a rechedal e ulemekerreu er tir. Ngmilsterir aike el rokui el luluusbech el kirel a bedengir er isel 40-el-rak er a lengar er a belngel a ked e ulebeteterir el mo lmuut er a bocha lekie er a Beluu er a Nglat. Ma Josua er a bocha lomelekl a rokui lomerellel a Jehovah el bedul tirka el uldidellel a Abraham, e ngmle sebechel el dmu el kmo: “Ngdiak a chimo el telbiil el dimlak el mutaut er a chelsel aike el rokui el ungil el telbiil el Jehovah riruul el mo er a blai er a Israel; Ngii el rokui el di mlotaut.”​—⁠Josua 21:45.

Mteketekii a Klaumerang el kirel a Telbilel a Dios

Ke mekera mekerulii a klaumerang er kau er a telbilel a Jehovah, el ua Mika ma Josua? Ke mekerang e mo sebechem el oumerang er a rebebil? Ngkirem el mo ungil medengelterir. El ua itiang, ke mo medenge el kmo ngsebechem el ultuil er tir e le komes er tir el blak a rengrir el oltaut a telbilir. Ma loleketek a klaodengei er kau er tirka el chad, e a klaumerang er kau el mo er tir a merael el mo klou. Ngsebechem el meruul el uaise omoleketek er a klaumerang er kau el kirel a telbilel a Dios.

A ta er a rolel el sebechem el rullii tiang a sel bo molatk aike el blebelel ma llach el mengedereder aika el bleob. A rescientist a oumera aikaikid el llechul a bleob, el uai a chimo el cell er a bedengel a chad, el obii el mo betok el trilliol e kuk omdois el rullii a bedengel a chad. Nguaisei,  ma llach el mengedereder er a teletelel a klekedall er a beluulechad ma klisiich el ngar er tia el eanged ma chutem a mleketmokl el cherrungel el ultuil er a chad er a llach. Ke ulterekokl el sebechem el oumerang a telbilel, el di ua lengar er ngii a klaumerang er kau er aike el llach el mengedereder er a blebelel.​—⁠Psalm 139:​14-16; Isaia 40:26; Hebru 3:⁠4.

Nguleak a Profet el Isaia, el kikie er a taem er a Mika, e a Jehovah a uluusbech er sel blekerdelel a eanged ma temel ma blekerdelel a chull el omekesiu er ngii er a tekingel. A bek el rak el lengar er ngii a chull. El ruebet el me melubs er a chutem me ngmo sebechir a rechad el melalem a tane e mo meridm a redechel. Me nguaisei, e a Jehovah dilu el kmo: “A tikingek a ua yuki ma chull el ngara milidiul el me metengel el me melubs ra belulechad. Ngmeruul a dellomel me ngduubech; e mekdubech a tane el kirel chomelalem ma kall el mongang. Ngdirrek el mo uaisei ngiil tikingek el kulekoi er ngii, ngdiak le iit el rullii sel kulemdasu er ngiil kirel; ngmo meruul a bek el kuldurch er ngii el mo meruul.”​—⁠Isaia 55:​10, 11.

A Ulterekokl Telbiil el Kirel a Paradis

A omesubel a bleob a sebechel el mekerulii a klaumerang el mo er a Ulemeob, engdi ngelmuut el betok a usbechall a lsoam el mo medengei aike el telbiil el telengtengil a “ngiil tikingek el kulekoi er ngii.” Ma obo mosuub aika el telbiil me bo lsebechem el mo oumerang er ngii, e ke ousbech el mo menguiu er a chedaol el llechukl el ngii a olecholt er a moktek er a Dios el kirel a beluulechad ma omerellel el mo er a rechad.​—⁠2 Timoteus 3:​14-17.

A prophet el Mika a mle mui a klaumerang er ngii er a telbilel a Jehovah. E kau a olab a lmuut el betok el mlukreng er a Dios el llechukl el kuk betok er a ike lullab a Mika. Ma omonguiu er a Biblia e momtab er ngii, e kau a dirrek el meleketek er a klaumerang er kau el kirel a otutel a telbilel a Dios. Aika el telbiil a diak di luldimukl er a ruldidellel a Abraham el lemerekong, e ngbai dirrek el kirel a klechad el rokir. A Jehovah tilbir el mo er ngka el medakt-er-a-Dios el rubak el kmo: “Ma bek el beluu era belulechad a mo olengit er ngak el mo omekngeltengat rar uldidellel a rsechem, ele uchul e kullengesenges a tikingek.” (Genesis 22:18) Ngike el kmal “tane,” ma lechub e nguldidellel, a Abraham a Mesias, el Jesus Kristus.​—⁠Galatia 3: 16.

Ngoeak a Jesus Kristus, e a Jehovah mla olterekokl a klengeltengat el mo omaoch el mo er a rulengesenges el klechad. E a Dios ngngera telbilel el kirel chelecha el taem? A Mika 4:​1, 2 a meskid a nger el ngar er aika el ulaoch el kmo: “Aikel ngarmedad el sils e a rois el le dechor er ngii a templo a mo kot el kididai ra rois el rokui. Ngbetok el beluu a mei el mo ketitech er ngii. Mar chad er tir a mo melekoi el kmo, ‘Mei me bo dengasech ra bukl ra Rubak, el mora templo ra Dios ra Israel. Kede mo medengelii sel soal a doruul er ngii; e mo merael ra ikel rael el bla le ngilt.’ ”

Tirke el mo mesuub er a rolel a Jehovah a “mo toiot a saider er tir el mo osib, ma biskelengir a lteot el mo oles er chomengemkimd el dellomel.” Ngii di el blekerdelir el sorir el moumekemad a mo diak. Ngdi kmedung e a beluulechad a mo meseked er a remelemalt el chad, e diak a mo omekdakt er tir. (Mika 4:​3,4) Ochoi, a tekingel a Dios a a tibir el kmo ngar er a omengederederel a Renged el ngar er a chimal a Jesus Kristus, e a Jehovah mo olekngemed er tirke el omekcharm er a rechad.​—⁠Isaia 11:​6-9; Daniel 2:44; Chocholt 11:⁠18.

El mo lmuut er tirke el mlo chuarm e mlad el ultok er a rechad el mo er a Dios a uchul a mo mekiis el mo nguu a techall el mo kiei el mo cherechar el ngar er tia el chutem. (Johanes 5:​ 28, 29) A Satan ma remengelengalek el reng er ngii, el uchul a rokui el mekngit, a mo dibus, maike el telemellel a Adam el mla er a kngtil el mei, a mo diak loeak a olubet el tengetengel a Jesus. (Matteus 20:28; Rom 3:​23, 24; 5:12; 6:23; Chocholt 20:​1-3) Ngngera mo blekeradel el kirir a rebekongesenges el klechad? Chochoi, te mo mukngeltengat er a diak a ulebengelel el klengar el cherrungel a klisichel a bedengir el ngar er a paradis el chutem!​—⁠Psalm 37:​10, 11; Lukas 23:43; Chocholt 21:​3-5.

Ngkol ua ngera el kmal ungil aika el telbiil! Ngdi ngsebechem el mo oumerang er ngii? Ngkmal sebechem. E le ika diak el telbilir a rechad el ungil a uldesuir engdi diak a klisichir el lotirakl. Aikang a telbilel a Cherengelel a klisiich el Dios, el diak el sebechel el oumulak el “diak lomekmeoud er chotutel a telbiil.” (2 Petrus 3:9; Hebru 6:​13-18) Ngsebechem el mo mui el oumerang aike el rokui el telbiil el ngar er a Biblia, el le ngmla er a “Jehovah el Dios er a klemerang.”​—⁠Psalm 31:⁠5, NW.

[Footnotes]

[Blurb on page 6]

“Ngdiak a di chimo el tekoi el tilobed er a ike el rokui el ungil cheldechedechal a Jehovah el Dios el lekor kemiu el dimlak lemotirakl.”​—JOSUA 23:⁠14

[Pictures on page 4, 5]

A Jehovah a uleltaut a telbilel el mo er a Israel el ngar er a Bekerekard el Daob ma ngar er a ked

[Picture on page 7]

A Jehovah a uleltaut a telbilel el mo er a Abraham. A Uldidellel a Rsechel, el Jesus Kristus, a mo omekngeltengat er a klechad