Ngtelbilel a Techang a Sebechem el Oumerang er Ngii?

“AIKE el telbilel, a mle ua ingii, el mle mesisiich, engdi a omerellel a mla mo mechitechut, el ua ingii er a chelechang, el mechitechut.”​—⁠King Henry the Eighth, er a William Shakespeare.

Aike el mesisiich el telbiil el lullekoi er ngii a William Shakespeare a mle telbilel a cardinal el Thomas Wolsey er a beluu er a England, el mle klou a klisichel er a tekoi er a politiks er a Ongeteruich ma Ongelolem el dart el rak. A rebebil a dirrek el melekoi el kmo a tekingel a Shakespeare a melutk el mo er a oumesingd el telbiil el lorrenges a rechad er a chelechang el taem. Ngbetok el taem, e a betok el telbiil a medung el mo er a rechad, engdi te ngmai a di mekesai er ngii. Sei a uchul, me ngdiak lemeringel a bo dodengelii a uchul me te mo oumededenger er a ngii di el telbiil er a chelechang.

Ngbetok a Telemellel a Uldasu

El ua itiang, ngar er sel meringel el odechelakl er a beluu er a Balkan er a 1990, e a United Nations Security Council a melsubed el kmo sel beluu er a Srebrenica er a Bosnia a mla mo “ulekerreu el basio.” Tial tekoi a blo loumerang er ngii aike el beluu el chedal a cheldebechel er a United Nations. Me tirke el betok el telael el chad er a Muslim el mla er a beluu er a Srebenica a ulemdasu el uaisei. Engdi, uriul er tiang, e tia el telbiil el kirel a ulekerreu a mlo diak a belkul. (Psalm 146:⁠3) Sera July er a 1995, e a urrurt el mlo oldechelakl a ultitecheterir a resoldau er a UN e mlo soiseb el lodelecheklii a beluu. A kuk betok er a elolem el telael el Muslims a ririid, e a bekord el ta el telael ma eru el dart el Muslim el di chad er a beluu a lulekodeterir.

A betok el blekerdelel a klengar a mui er ngii a mla metemall el telbiil. A rechad a melechesuar a chelebelderir tirke el “betok el taem el longesuseu er tir el oeak a cheleblad el omeruul” el kmal klou el omeruul er a chelecha el taem. Ngseselk a rengrir er aike el “telbilir a rebetok el telael el chad er a politics el diak bo lemotaut.” (The New Encyclodaedia Britannica, er a Volume 14, er a page 37) Ma remengeteklel a klechelid el iaksok el mo omekerreu er a delebechel er tir e dirrek el omekcharm er tir er a kmal mekngit el omeruul. Ma dirrek el mo lmuut er a ureor er a school ma ukeruul​—⁠el kirel lolecholt a klechubechub ma omelatk el mo er a rebebil​—⁠e te ngar er ngii a remla tomellii sel klaumerang er a rechad el mo er tir, e omekcharm el mo lmuut er a lomekoad er tirke el kirir el omekerreu er tir. Misei a uchul ma Biblia a omeklatk er kid el kmo lak moumera er a bek el tekoi!​—⁠Osisechakl 14:⁠15.

 A Telbiil el Motaut

Ochoi, te ngar er ngii a rebetok el chad el oltaut a telbilir, el bebil er a taem a loltaut er ngii e ngsebechel el mo meringel er tir engdi totireklii. (Psalm 15:⁠4) A iaksok er tir a ulterekokl, me te mo rullii. A rebebil a meruul a telbilir e mera el sorir el mo oltaut aike el tekingir. Me te kltmokl e sorir el mo meruul aike el bla el tib engdi meringel er tir a mo remuul. A blekeradel ma teletael a sebechel mo tomellii a tekoi el bla dolib el mo meruul er ngii.​—⁠Olisechakl 9:⁠11

Me ngngar er ngii a betok el uchul, ma rebetok el chad a meringel er tir a mo oumerang a telbilel a ngiidi el chad. Ma ker a kmo: Ngngar er ngii a telbiil el sebeched el mo oumerang er ngii? Ochoi. Ngsebeched el mo oumerang a telbiil el debetik er a chelsel a tekingel a Dios, el Biblia. Ngera me ngdiak bo mesa sel ongingil el suobel el mo mesaod er tia el tekoi? Ngsebechem el loia er a rengum, el di uai a rebetok el milliol el chad, el medenge el kmo ngmera el sebeched el oumerang a telbilel a Dios.

[Picture Credit on page 3]

AP Photo/Amel Emric