666 Ngdiak el Kora Kuk Di Ta er a Berrotel el Tekoi

“E tirikel diak er tir tial olangch, el ngklel ngiil charm malechub e ngochur ra ngklel, a le rirelleterir el mo diak el sebechir lomchar malechub e lolterau a ngerang. Tia chousbech a llomeserreng; me ngikel ngarngii a llomeserreng er ngii bo loledaes er chochur er ngiil charm, e ngiil ochur a melutk ra chad, e sola e elolem el dart ma chokolem ma chelolem ngiil ochur.”—Chocholt 13:​17,18.

MEKESAI el suobel er a Biblia a mla okar a klemeriarreng ma uldesuir a rechad el uai a ulaoch er a berrotel el olangch ma lechub a ngklel a “tebelik el charm”​—⁠el ngii a chochur el 666. Ngar er a TV ma Internet, ma dirrek el katsudo, ma hong, ma magazine, e tia el olengchelel ngika el tebelik el charm a uchul a betok el diak a ullebengelel el omesaod.

A rebebil a oumerang el kmo tia el 666 a olengchelel ngike el olekoi er ngii a Biblia el kmo antikristus. A rebebil a kuk melekoi el kmo ngolecholt er a ulterekokl el olangch el mo kirel a chad el obang el ua delngod er a bedengel ma lechub e ngmicrochip el obang el ochur el ngar er ngii a mo olengchelel ngii el chad el kmo ngmesiungel a tebelik el charm. E lmuut el dirrek el ngar er ngii a rebebil el loumerang el kmo tia el 666 a olengchelel ngike el pope er a klechelid er a Katolik. Sel ousbech a ochur er a Rom el omtechei aike el llechukl el kirel sel dial a pope el Vicarius Filii Dei (Vicar er a Ngelekel a Dios) el telkib el ngmodech a blechebechel e ngsebechir el lotebedii tia el ochur el 666. Te dirrek el ngar er ngii a rebebil er a rechad el melekoi el kmo ngsebeched el lotebedii tia el osisiu el ochur er a tekoi er a Latin el ousbech er a ngklel a Emperor er a Rom el Diocletian ma dirrek el sel tekoi er a Hebru el ngklel a Kaiser el Nero.

Engdi aika el uldasu el di ulebeob er a uldesuir a rechad, a kmal ngodech er sel lolekoi er ngii a Biblia el kirel a olengchelel a tebelik el charm, el ua bo desang er tia el ongingil el suobel. A Biblia a mera el olecholt el kmo tirke el ngar er ngii a olengchelel a tebelik el charm er tir a mo chuarm er a cheldechuderreng er a Dios sel bo lolemall er tia el mekngit el blekeradel er a beluulechad. (Chocholt 14:​9-11; 19:20) Ma bo dodengelii a belkul a 666 e ngkuk klou el tekoi er a di domcheritem er a belkul a berrotel el tekoi el lesemeriar a rechad el mo medengelii a belkul. Ngdmeu a rengud, e le Jehovah el Dios, el ngii a ngar er a bab el okesiul a bltikerreng e Uchul a llomes er a klereng, a dimlak lebechititerir a remesiungel me lengar er a ilkokl el kirel tia el kmal klou a ultutelel el tekoi. ​—⁠2 Timoteus 3:16; 1 Johanes 1:5; 4:⁠8.