“El Churrengelii Chomesiungem”

“Mrellii a omesiungem el rokir.”​—⁠2 TIMOTEUS 4:⁠5, Byington.

KAU ke chad el omerk er a klumech el kirel a Renged? A lsekum nguaisei, e moreng a sulel a Jehovah el Dios el kirel tia kmal mengasireng el techall er a omesiou. Kau ke ta er a remechuodel er a ongdibel? Tia ta er a dechelel a techall er a omesiou el mla er a Jehovah. Engdi ngkmal diak el kired el obes er tia el tekoi el kmo ngka lengar er a bab el skuul ma ka leduch er a omengedecheduch a rullid el mo rredemelel a ureor er a berkel a klumech ma lechub a ngerachel er a tebechelel a ongdibel. A Jehovah ingii a omeskid a duch er kid el kirel a ureor er a berkel a klumech, ma blekerdelel a klengar er a rebebil er a rsechal el ngar er a delongeled a ruedem a lolekoi a Bades a uchul me ngsebechir el mo olab a techall er a omesiou el ua ruungerachel er a ongdibel.​—⁠2 Korinth 3:​5, 6; 1 Timoteus 3:​1-7.

² A rokui el mla tuib a rengrir el mo mesiou er a Dios el Kristiano a meruul er a ureor er a berkel a klumech, engdi ngileakl el tirke el mechuodel el omtebechel er a ongdibel, a kmal kirir el mo kutmokl a ungil el kerebai el kirel tia el ureor. A remechuodel el “chorma loureor el kirel a berekel a tikingel a Dios ma chosisechakl” a lodengelterir a Dios ma Kristus, ma dirrek el kldemir el Sioning er a Jehovah. (1 Timoteus 5:17; Efesus 5:23; Hebru 6:​10-12) Ngar er a cheungel a ngii di el blekeradel er a osisecheklel, e a chuodel er a ongdibel a kirel el melisiich er a klereng er a ruurrenges er ngii, e le apostol el Paulus a milengelechel er a Timoteus el ngii a mle ta er a chuodel el omtebechel er a ongdibel el kmo: “E ngmorngii a taem el mo diak el sebechir ar chad el kilou a rengrir ra diak a rekdel losisechakl, me te ngara ikel di sorir el mengidb rar sensei el leko longedecheduch a ikel ungil er chorenges er tir, me tolechib a dingerir era klemerang e obult el mora delbochel cheldecheduch. E ngdi kau bo mulserechakl ra ngiidil tekoi, e moutekangel ra ringel, e moruul a urerel chomerk ra evangkelio, el churrengelii chomesiungem.”​—⁠2 Timoteus 4:​3-5.

³ Ma loterekeklii el kmo ngdiak a klsuul el osisechakl el me melemall er a klereng er a ongdibel, e a overseer a kmal kirel el oltirakl a omengelechel er a Paulus sel ledu el kmo: “Bo mulserechakl er a ngiidil tekoi, el churrengelii chomesiungem.” (2 Timoteus 4:⁠5) Chochoi, a chuodel el omtebechel er a ongdibel a kirel el ‘churrengelii a urerel’ ma lechub e ngrullii el rokir el mo er sel tkurrebab el telkelel. A chuodel el omtebechel er a ongdibel a kerekikl el omes aike el rokui el ngerechelel, el diak a dita er ngii el lechitii ma lechub el becherei me ldi ltedobech a ketmeklel er ngii. Chouaisei el chad a blak a rengul el mo lmuut er a mekekerei el tekoi.​—⁠Lukas 12:48; 16:⁠10.

⁴ A dechurrungel a omesiunged a diak el belkul a kmo kede blechoel el mengoit er a klou el taem el kirel, e ngbai belkul a kmo kede ungil el ousbech aike el taem el dechoit. A tabesul e ulterekokl el omerellel a tekoi a sebechel el ngosuterir a rokui el Kristiano el mo cherrungel a omesiungir. A bo longoit er a klou el taem el kirel a ureor er a berkel a klumech, e a chuodel er a ongdibel a kirel el rullii a ungil el bldeklel a tekoi el loruul me bo ltabesul a schedule er ngii e mo medengei el kmo ngera el ngerachel a sebechel el loterekokl er a rebebil e mekera loruul el uaisei. (Hebru 13:17) Me nguaisei, engdi a kuoll el chuodel a dirrek el remuul a blingelel er a ureor, el ua Nehemiah, el ngii a mlo teloi er a ureor er a okedecherul a cheuatel er a Jerusalem. (Nehemiah 5:16) Ma rokui el mesiungel a Jehovah a kmal kirir el mo blechoel el teloi er tia el ureor er a berkel a klumech el kirel a Renged.​—⁠1 Korinth 9:​16-18.

⁵ Kid a rumerk er a klumech a ngar er ngii er kid tia el kmal omotech a rengud el ngerachel el mo ouchais el kirel a mla meketmokl el Renged el ngar er a eanged. Me ngulterekokl el kmal dmeu a rengud er tia el techall el mo omerk er tia el ungil el chais el mo er a rokui el kiei er a bebul a chutem er a uchei er a lemei a ullebongel. (Matteus 24:14) Alta ngdiak demecherrungel, engdi ngsebeched el mo mesisiich a rengud el oeak a tekingel a Paulus el kmo:  “Ngdi kid a ngarngii er kid tial mekreos el klalo el ngara blil el chutem, el kirel me lemocholt el kmo sel diak lemetuk el klisiich a kloklel a Dios, el dimlak ltobed er kid.” (2 Korinth 4:⁠7) Chochoi, ngsebeched el remuul a ungil el omesiou el lekengei a Dios​—⁠engdi ngdi sebeched el meruul el uaisei el oeak a klisiich ma llomeserreng el omeskid a Dios.​—⁠1 Korinth 1:​26-31.

Kede Olecholt er a Klebkellel a Dios

⁶ A losaod el kirir tirke el ngellitel el Kristiano, e a Paulus a melekoi el kmo a Dios a “milskemam a duch e mla rullemam el mo mesiou ra beches el telbiil.” Ngika el apostol a ulemekesiu er a beches el telbiil el merruul el obengkel a Israel er a reng el oeak a Jesus Kristus ma mechut el telbiil er a Llach el merruul el obengkel a Israel er a tech el oeak a Moses. A Paulus a dilechelii a tekingel el kmo a Moses er a be lmetengel er a Rois er a Sinai el olab a taber el mla er ngii a Teruich el Llach, e a medal a diliich ma rengalek er a Israel a dimlak el sebechir el kelekall el ngellomel er ngii. E a lorael a taem el mong, e ngmla er ngii a lmuut el oberaod el tekoi el dilubech e le “uldesuir a mle cheldeng” ma dekedek a dilekedek a rengrir. Engdi sel lobult el mo er a Jehovah el oba blakerreng el ngar er a rengrir el rokir, e sel dekedek a mengai. E a ongingil er a bocha lolekoi el kirel a ureor el lebilsterir a rengar er a beches el telbiil, e a Paulus a dmu el kmo: “Me kid el rokui lak le delekedokel a medad e domes ra klebkellel a Rubak el ua domes er ngii ra dirk.” (2 Korinth 3:​6-8, 14-18; Exodus 34:​29-35) A kuk “ngodech el chermek el sib” er a Jesus er a chelecha el sils a dirrek el ngar er ngii a techellir el mo olecholt er a klebkellel a Jehovah.​—⁠Johanes 10:⁠16.

⁷ Te mekerang a rechad el ngar er a klengit el sebechir el olecholt er a klebkellel a Dios, a lsekum ngdiak a ta el chad el sebechel el mesa medal e melemolem el ngar? (Exodus 33:20) Ngkired el medengei el kmo, obengkel a klebkellel a Dios, e ngdirrek el ngar er ngii a kebkall el moktek er ngii el mo mengebkall er a klisichel a omengederderel el oeak a Rengedel. A klemerang el kirel a Renged a telkib er aike el “kloul urerel a Dios” el blo omuchel el ouchais tirke el mloitel a chedaol el reng er bebrir er a Pentekost 33 C.E. (Rellir Ar Apostel 2:11) Me ngoeak a ulekrael er a chedaol el reng, e ngmle sebechir el churrungel a ngerachel er a omesiou el mloterekokl er tir.​—⁠Rellir Ar Apostel 1:⁠8.

⁸ A Paulus a mle blak a rengul e dimlak lebechei a ngii di lengerang me lterebengii me lak lecherrengelii a omesiungel. Ngmilluches el kmo: “Misei e kede ngiluu a klechubechub ra Dios e ngar tial omesiou, me ngdiak le moalech a rengud. Me kede mengoit a ikel berrotel el de merur er ngii el tekoi; e diak dorael ra cheleblad e diak dongeuid a tikingel a Dios, e meketeklii a klemerang e olecholt a klungioled era ukltkir a rokuil chad er medal a Dios.” (2 Korinth 4:​1, 2) Ngoeak sel lolekoi er ngii a Paulus el kmo “tial omesiou” e a klemerang a obeketakl ma llomes er a klereng a oberk.

⁹ A Paulus a milluches el kirel ngike el uchul a llomes el domes er ngii ma llomes er a klereng, el kmo: “Ele ngikel Dios el dilu el kmo, ‘A llomes le diich ra ilkolk,’ a milekllomes a rengmam el kirel lomeketakl ra klemedengei era klebkellel a Dios el dmiich ra klidm ra Kristus.” (2 Korinth 4:6; Genesis 1:​2-5) Me chelecha el bla denguu tia el diak el mokesiu el techall el mo mesiou er a Dios, e bo lsebeched el melemolem el mengikiid er kid me bo lsebeched el ua dirk el olecholt er a klebkellel a Jehovah.

 ¹⁰ A rechad el ngar er a ilkolk er a klereng a diak el sebechir el mesa klebkellel a Jehovah ma lechub e lesa llechul ngii el klebkall er a Jesus Kristus, el ngii a Ngar er a Bab el Moses. Engdi kid a remesiungel a Jehovah, a melai er tia el kebkall el llomes el mla er a Bades e olecholt er ngii el mo er a rebebil. Tirke el ngar er a ilkolk er a klereng er a chelecha el taem a lsekum ngsorir el chemiis er a tellemall, e te ousbech er a llomes el mla er a Dios el mei. Me kede oba klou el deurreng ma blakerreng, e olengesenges er a omellach er a Dios el mo mecherei a llomes me ngdmiich el me tuobed er a ilkolk el kirel a klebkellel a Jehovah.

A Llemesem a Ldiich Sel Omngar er a Omesubel a Biblia el Obengterir a Rechad

¹¹ A Jesus a dilu er a ruleltirakl er ngii el kmo: “Kemiu a llomes ra belulechad. A mats el ngar bebul a rois a diak el sebechel lobart. E dirrek el diak a chad el mekerdii cholbidel e nguu el loia er cheungel chorsachel, ngbai loia er bebul cholsechelel, me ngdmiich er tirikel rokui el ngara chelsel a blai. Ma llemesiu le uaisei el dmiich er mederir ar chad, me lomes a ungil lomerelliu e lodengesii a Demmiu el ngara eanged.” (Matteus 5:​14-16) A ungil el blekerdeled a sebechel el rulleterir a rebebil el mo mengebkall er a Dios. (1 Petrus 2:12) Ma kakerous el telengtengil a urered er a berkel a klumech a sebechel el meskid a betok el techelled el mo dmiich a llemesed. A ta er a klou el tekoi el soad el meruul er ngii a mo olecholt er a llomes er a Tekingel a Dios el oeak a dungil el mesuub a Biblia el obengterir a rebebil. Tiang a kmal klou a ultutelel el rolel a decherrengelii a omesiunged. Ngera el tekoi a sebechel el ngosukid er a rolel a omesubel a Biblia el ngii a sebechel el remutech a rengrir a rechad el osiik er a klemerang?

¹² A nglunguuch el mo er a Jehovah el kirel tia el tekoi a olecholt er a mera el urunguled el mo mesuub a Biblia el obengterir a rebebil. Ngdirrek el olecholt el kmo ngsebeched el mesa klungel a ultutelel a dolengeseu er a rebebil el mo ngmai a mera el klemedengei er a Dios. (Esekiel 33:​7-9) A Jehovah a ulterekokl el mo onger a nglunguched e mo omekngeltengat a blakerreng er kid el kirel tia el ureor er a omesiou. (1 Johanes 5:​14,15) Engdi kid a diak doluluuch me di bo lsebeched el metik er a chad el bo dosuub a Biblia el obengkel. Uriul er a lemeketmokl a omesuub el obengkel ngii el chad, e a nglunguuch ma dmolech el omelebedebek el kirel a usbechellel ngika el chad el dosuub er a Biblia el obengkel a mo ngosukid el mo meruul a bek el blsechel a omesuub el mo er ngii a ultutelel.​—⁠Rom 12:⁠12.

¹³ A bo dungil el mesuub a Biblia el obengterir a rechad, e ngkmal kired el mo ungil el mengetmokl el kirel a bek el omesuub. A lsekum kede omelechesiu er kid el ua dekora olengesonges, e ngungil el domes er a blekerdelel ngike el chuodel el oungerachel er a omesuub er a Book Study el kmo ngmekera lorekui aike el blingelel a suobel el kirel el mo motobed el suobel er sel sandei. Ngdirrek el bebil er a taem, e ngsebeched el obengterir a rebebil er a rumerk er a klumech el tir a mla mo er ngii a klou el duch er tir er a omesubel a Biblia el obengterir a rechad. E kmal ulterekokl el ike el ungil el blekerdelel a Jesus Kristus ma rolel a lolisechakl a kmal kirel el suobel.

¹⁴ A Jesus a mle dmeu a rengul el meruul a soal a Demal el ngar er a eanged e dirrek el mengedecheduch er a rebebil el kirel a Dios. (Psalm 40:⁠8) Ngmle ngar er a eou a rengul e mle sebechel el remutech a rengrir a rechad el ulerrenges er ngii. (Matteus 11:​28-30) Me bo lsebeched el mo er sel tkurrebab el klisiched el melasem el mo merutech a rengrir a rechad el dosuub a Biblia el obengterir. A bo doruul el uaisei, e ngbelkul a kmo kede melatk aike el ousbech ngika el chad el dosuub el obengkel sel dongetmokl er kid el kirel a bek el omesuub. El ua tiang, a lsekum ngii el chad a mlukeroul er a blekeradel el dimlak el ousbech er a Biblia, e a kot e ngkired el melasem el rullii el mo sebechel el oumerang el kmo a Biblia a klemerang. Me tiang a belkul a kmo, nglocha mo kired el menguiu a betok el bades e mesaod a belkul el mo er ngii.

Mngosuir a Chad el Mesuub el Mo Medengei a Belkul a Okesiu

¹⁵ A chad el mesuub a Biblia a locha diak lodengelii  a belkul a ta er a okesiu el ousbech er ngii a Bades. El ua tiang, nglocha diak bo lodengei el kmo ngera mle belkul a tekingel a Jesus er a lolekoi el kmo mnguu olbidel el loia er a olsechelel a olbidel. (Markus 4:​21, 22) A Jesus a millekoi er a olbidel el ousbech a cheluch ma lechub e nglambei er a irechar el kmard a llut er ngii. Chouaisei el olbidel a mla er ngii a olsechelel el lia er ngii e ngsebechel el mekerdii a telkib er a blai el mo mellomes. A omerritel er a tekoi el “Lamp” ma lechub e ng “Lampstand” el ngar er a chelsel a babier el Insight on the Scriptures a locha bo mousbech er ngii el mo omeketakl er a belkul a okesiu el uluusbech er ngii a Jesus. * Engdi ngkol ua ngera el klungiaol a mo er ngii a lsekum e kau a mlo er ngii el blsechel omesuub el mle kltmokl el olab a omesaod el ngii a beot el mo bleketakl er a rengul a chad el omosuub el obengkel.

¹⁶ A babier el mosuub er ngii a locha ousbech er a okesiu el meringel el bo lodengelii a chad el omosuub el obengkel. Mousbech a taem el mo ungil el mesaod er ngii, ma lechub e mousbech er a kuk ta er a okesiu el ngii a sebechel el smisichii a osisiu el tekoi el momeketakl er ngii. El ua tiang, a babier el mosuub er ngii a sebechel el mesaod er a tekoi el kmo a ungil el chad el debechil ma dirrek a lengar er ngii a klaodengei er ngii er a tekoi el doruul, a blekeradel el meklou a ultutelel er a chelsel a chebechiil. E a lomeketakl er tia el tekoi, e ngsebechel a suobel el ngar er ngii a okesiu el kirel a chad el omtar er a trapeze, e ngar er a melidiul e chemoit a chimal e suebek e ultuil er a kuk ta er a chad el ledak el omtar el omed er ngii me ngdiak el rebet. Engdi obo momeketakl er a klungel a ultutelel a kltarreng er a rechad el dmak el oureor el meruul er a ta el tekoi e ke locha mo mesaod el kirir a rechad el chachuchau e dmak el oureor el kaiseseuul a klalo el oltengel er a bos.

¹⁷ A bo lsebechem el ousbech a kuk ngodech el okesiu el kirel a omesodel a tekoi e ngkirem el mengetmokl er kau er a uchei. Engdi, tiaikid a rolel e kede olecholt a klemeriarreng er kid er a rechad el dosuub a Biblia el obengterir. A Jesus a uluusbech a beot el okesiu el mesaod a meringel el suobel. A cheldechedechal el ngar er a Rois a meskid a ungil el okesiu el kirel tia el tekoi, ma Biblia a olecholt el kmo a osisecheklel a mla er ngii a ungil el rellii er a rechad el ulerrenges er ngii. (Matteus 5:​1–7:29) A Jesus a mle klou a rengul e milsaod a tekoi el mo er a rechad e le ngmera el mle semeriar er a rebebil.​—⁠Matteus 16:​5-12.

¹⁸ A klemeriarreng er kid el kirir a rebebil a rullid el mo ‘ousbech a bades’ el mengedecheduch. (Rellir Ar Apostel 17:​2, 3) Tiang a belkul a kmo ngkired el ngar er a nglunguuch sel dosuub e mo olecholt a llomeserreng el oeak sel dungil el ousbech aike el babier el mesaod er a Biblia el omeskid a “blak a rengul mesiou.” (Lukas 12:​42-44) El ua tiang, sel babier el Knowledge That Leads to Everlasting Life a ousbech a betok el tekoi el debetik er a bades. * Ngelsonges er a basio el loluches er a chelsel a uchul, e a bebil er a bades a di lomades. Sel taem er a omesuub e ngklou a ultutelel el lemechuiu e lemesaod a bebil er aikaikid el bades. E le chuchetemel a osisechekled a mlengai er a Tekingel a Dios, e ngii a ngar er ngii a klou el klisichel. (Hebru 4:12) Bo blechoel el ousbech er a Biblia er sel taem el mosuub, e mimokl el ousbech aike el bades el llechukl er a chelsel aike el bek el paragraph. Mngesuir a chad el mosuub el obengkel el mo sebechel el mes a lolekoi a Biblia el kirel a derta el suobel ma lechub e ngblekeradel el mosaod. Molasem el ochotii el kmo ngmo klungiolel a bo lolengesenges er a Dios.​—⁠Isaia 48:​17,18.

 Moker a Ker el Rullii Me Ngmo Omdasu

¹⁹ A duch er a Jesus el uluusbech a ker a ngilsuterir a rechad el mo omdasu. (Matteus 17:​24-27) A lsekum kede oker a ker el diak el omekrur er a chad el dosuub a Biblia el obengkel e rullii me ngolecholt a uldesuel, e a nger er ngii a sebechel el olecholt a uldesuel el kirel a derta el suobel. Nglocha mo sebechem el metik er ngii el kmo ngdirk urrekodel a bebil er a uldasu el diak lengar er a Biblia. El ua tiang, ng locha oumerang er a osisechakl er a Trinity. Ngar er a Knowledge el babier er a ongedei el bliongel, e ngomeketakl el kmo a tekoi el “Trinity” a diak debetik er ngii er a chelsel a Biblia. Tia el babier a ousbech a tekoi el debetik er a bades el olecholt el kmo a Jehovah a ileakl el chad er a Jesus ma chedaol el reng a di klisichel a Dios, el diak el chad. A omengiuel ma omesodel aika el bades a locha sebechel el di aikeikid e ungiang. Engdi mekerang a lsekum ngii el chad a ousbech er a lmuut el klou el omesaod? Seikid e sel ongingil el taem el bo mosuub, e nglocha sebechiu el chemoit a sesei el taem el mo ousbech a bebil er a babier el uleltobed a Resioning er a Jehovah, el mo mesaod er tia el suobel el ua ike el ngar er sel brochure el Should You Believe in the Trinity? E a uriul er isei, e kom kuk mo melemolem er a omesubiu er a Knowledge el babier.

²⁰ E a lsekum a nger er a chad el mesuub a dekora kilebetiekl er ngii ma lechub e ngkora mlo moalech a rengud el kirel. A lsekum ngtekoi er a omeloko el dekool, ma lechub e ngkuk bebil er a okedeldaol el tekoi a dosaod, e ngsebeched el melekoi me dolemolem er a omesuub e ngii el tekoi a deluut el mo mesaod er ngii er a uriul el taem. A lsekum kede medengei el kmo a chad el dosuub el obengkel a dirk meloko e tia el tekoi a sebechel el rullid me kede mo osiich a babier el mla tuobed el ngar er ngii a suobel el sebechel el ngosuir ngii el chad el mo olengeriakl er a tekoi er a klereng. Me sel dolemolem el osiik a cheldechulel e deretechii a rengul a chad el dosuub el obengkel, e ngsebeched el meluluuch el mo er a Jehovah me ngmo olengeseu er ngii el mukeroul er a klereng.

²¹ Ngoeak a ungil el omengetmokl ma ulengesuil a Jehovah, e ngulterekokl el sebeched el mesmechokl a blekerdelel a dolisechakl el mo chatter er a usbechir a derta ma derta el chad el mesuub a Biblia. E a lorael a taem el mong, e nglocha mo sebeched el ngosuir el mo omekeroul er a dmolech el bltikerreng el mo er a Dios. Ngdirrek el locha sebeched el toketek a omengull ma omereng el saul er tir el mo er a cheldebechelel a Jehovah. E kol ua ngera el deurreng a bo dolechesuar er ngii sel desterir a rechad el mesuub a Biblia el mo kongei el kmo a ‘Dios a meral ngara delongeled!’ (1 Korinth 14:​24, 25) Me bo lsebeched el rokui el mo meruul a ungil el omesubel a Biblia el obengterir a rechad e debo er sel tkurrebab el sebeched el olengeseu er a rebebil el mo disciplo er a Jesus.

A Daisang el kirel el Mo Betik a Rengud el Omecheliu er Ngii

²² A bo dechurrengelii a omesiunged, e ngkmal kired el ultuil er a klisiich el mla er a Dios el mei. A Paulus a milluches el mo er a rekldemel el ngellitel el Kristiano el mesaod er a ureor er a berkel a klumech, el kmo: “Ngdi kid a ngarngii er kid tial mekreos el klalo el ngara blil el chutem, el kirel me le mocholt el kmo sel diak le metuk el klisiich a kloklel a Dios, el dimlak le tobed er kid.”​—⁠2 Korinth 4:⁠7.

²³ A deteloi er a rengellitel ma lechub e deteloi er a “ngodech el cheremek el sib,” me kid a di ua mechitechut e obebeu el bekai el lruul er a chutem. (Johanes 10:16) Me nguaisei, el ngii di el orimel el bo dechelebangel ma Jehovah a di sebechel el meskid a klisiich el ngii a dousbech er ngii el mo churrungel a omesiunged. (Johanes 16:13; Filipi 4:13) Me bo lsebeched el lotuil a klaumerang er kid er a Jehovah, e domes er a techall er a omesiou el dobang el kmo ngmekreos el tekoi, e dechurrungel a omesiunged.

[Footnotes]

Ke Mekerang e Omonger

• Ngera sebechir a remechuodel el meruul er ngii me bo lsebechir el churrungel a omesiungir el rokui?

• Kede mekera e ongesechekl a duch er kid er a omesubel a Biblia el obengterir a rechad?

• Ngera sebechem el meruul er ngii a lsekum a chad el mesuub a dimlak lebleketakl er a rengul a okesiu ma lechub e nguluusbech a lmuut el betok el omesaod el kirel a ta el suobel?

[Study Questions]

1, 2. Alta rokui el Kristiano a omerk er a klumech, engdi ngngera ngerechelir a remechuodel el kirir el meruul er ngii a doltirakl er a Bades?

3. Ngera kirel el ruoll me lak bo lsebechel a klsuul el osisechakl el me tomellii a klisichel a klereng er a ongdibel?

4. Ngera sebechel el ngosukid el mo churrengelii a urered er a berkel a klumech el rokir?

5. Ngkirel el mo ua ngera osenged el kirel a berkel a klumech?

6. Ngera mlo er ngii el klekakerous er a delongelel a Israel er a tech ma Israel er a reng?

7. Te mekera rechad e sebechir el olecholt er a klebkellel a Dios?

8. A Paulus, ngmle blak a rengul el mekerang er a urerel er a berkel a klumech?

9, 10. Ngmekera e sebeched el dmiich el olecholt er a klebkellel a Jehovah?

11. Ngerang millekoi er ngii a Jesus el kirel a debechei a llemesed me ldiich, e ngera ta er a rolel e kede meruul er tia el tekoi el ngar er a urered er a berkel a klumech?

12. Ngmekera dousbech er a nglunguuch er a chelsel a urered er a omesubel a Biblia el obengterir a rebebil?

13. Ngera sebechel el ngosukid el mo ungil el mesuub a Biblia el obengterir a rebebil er a rechad?

14. Ngmekera e sebeched el remutech a rengrir a rechad el dedak el mesuub el obengterir?

15, 16. (a) Kede mekerang e ngosuir a chad el mesuub el ngii a diak el bleketakl er a rengul a okesiu el ousbech er ngii a Biblia? (b) Ngera sebeched el meruul er ngii a lsekum a ta er a babilenged el dosuub er ngii a ousbech a okesiu el diak el bo lebleketakl er a rengul a chad el dosuub el obengkel?

17. Ngera sebeched el suubii er a Jesus el kirel a okesiu?

18. Ngera ungil el doruul er ngii el kirel aike el bades el di lomades er a chelsel a babilenged?

19, 20. (a) Ngera me kede ousbech a ker el kirel a uldesuel a chad el dosuub el obengkel? (b) Ngera sebeched el meruul er ngii a lsekum a suobel el dulsaod er ngii a ousbech er a lmuut el klou el taem el kirel a omesaod?

21. Ngera sebechel el mo duubech a deruul a blekerdelel a osisechekled el mo chatter er a lousbech er ngii a chad el dosuub el obengkel?

22, 23. Ngera kede ousbech er ngii me bo lsebeched el churrengelii a omesiunged el rokir?

[Picture on page 24]

A rekristiano el mechuodel a olisechakl er a chelsel ongdibel e dirrek el olengeseu el olisechakl er a rekldemir er a klaumerang sel lomerk er a klumech

[Picture on page 26]

A dosuub a Biblia el obengterir a rechad e ngta er a rolel e a llemesed a mo dmiich er a mederir a rechad