Mo Dongchii a Tebelik el Charm ma Olengchelel

KAU KE semeriar el osiik a omesodel a berrotel el tekoi? Ngulterekokl el omoruul el uaisei, e a kot e ngkirem el osiik a tekoi el ngii a mo olengeseu er kau el mo omcheritem er a nger. Ngar er a mlukreng el Tekingel, e a Dios a meskid a tekoi el ngii a ngosukid er a omesodel tia el ochur el 666, el ngii a ngakl, ma lechub e ngolengchelel a tebelik el charm el ngar er a Chocholt er a 13 el bliongel.

Ngar er tia el suobel, e kede mo omes a eua el rolel a omesaod​—⁠el ngii a meklou a ultutelel el tekoi​—⁠el kirel a ochotel a belkul tia el olangch er a tebelik el charm. Kede mo omes er a kmo (1) ngmekera a lolilt a ngakl er a Biblia sel bebil er a taem, e a (2) ngika el tebelik el charm ngomtechei er a ngerang, e a (3) ngera belkul a 666 el ngii a “ochur er a rechad,” ma (4) e tia el ochur el 6 ngera belkul e ngera uchul me ngedei el chachisois el ousbech er ngii, el 600 ma 60 ma 6, ma lechub e ng 666.​—⁠Chocholt 13:⁠18.

A Ngakl er a Biblia​—⁠A Diak Di Lolangch el Merekong

A ngakl er a chelsel a Biblia a blechoel el ngar er ngii a ileakl el ultutelel, el tokubets a lsekum ngii el ngakl a meldibech er a Dios. El di ua tia el olechotel, a Abram el ngii a mlo demerir a rebetok el renged, a uchul ma Dios a ngildechii a ngklel a Abram el mo Abraham, el belkul a kmo “Demerir a Rubdois el Chad.” (Genesis 17:⁠5) A Dios a dilu er a Joseph ma Maria el kmo te mo mengeklii a ngalek el ble ldioll er ngii a Maria el Jesus, el belkul a kmo “A Jehovah a Osobel.” (Matteus 1:​21; Lukas 1:​31) Ma loltirakl er tia el kmal klou a belkul el ngakl, e nguleak a urerel a Jesus er a berkel a klumech ma tenget el kodellel, e a Jehovah a kiltmeklii a rolel osobel el kired.​—⁠Johanes 3:⁠16.

Me ngdi osisiu el blekeradel, a Dios er a lebsa ngakl​—⁠ el​—⁠ ochur el 666 a tebelik el charm e ngulterekokl el omtechei er a lulsa Dios el ileakl el blekerdelel ngii el tebelik el charm. Ma uchei er a bo dodengei ngii el blekeradel, e a kot e ngkired el mo medengelii ngii el tebelik el charm el kmo ngngerang e ngera el tekoi a loruul.

A Tebelik el Charm a Medangch

A babier er a Daniel er a Biblia a meskid a betok el tekoi el ochotii a belkul aika el tebelik el charm el kmo ngera ngomtechei er ngii. Ngar er a 7 el bliongel e ngngar er ngii a kmal bleketakl el siasing er a “kleuang el tebelik el charm”​—⁠el laion, ma kuma, ma leopard, ma kdekudel el tebelik el charm el deel a ungelel. (Daniel 7:​2-7) A Daniel a subedid el kmo aika el tebelik el charm a omtechei er a “reking,” ma lechub e ngrenged er a politiks, el blechobech a omengederderel er a kmal meklou el beluu.​—⁠Daniel 7:​17, 23.

El kirel ngike el tebelik el charm el ngar er a Chocholt 13:​1,2, e a The Interpreter’s Dictionary of the Bible a melekoi el kmo “ngodak a blekerdelir aike el kleuang el tebelik el charm er a ues er a Daniel . . . Me nguaisei, ngke el kot el tebelik el charm [er a Chocholt] a omtechei a uldekial a rokui el omengederedel er a politiks el omtok er a Dios el ngar er tia el beluulechad.” Tia el omesaod a lolisiich er ngii a tekoi el donguiu el ngar er a Chocholt 13:​7, el melekoi el kirel a tebelik el charm el kmo: “Ma klisichel chomerreder el mengedereder ra bek el kebliil rar chad, ma bliongel rar chad, ma chomelekoi, ma renged a le bilsang.”

A Biblia a dirrek el melekoi el kmo a “dragon [el Satan] a ngiluu a klisichel ma kingellel ma kloul klisichel chomerreder el msa ngiil charm.” (Chocholt 12:9; 13:⁠2) Misei a uchul, e a omerredel er a klechad a mla er a Diabelong el mei, me ngolecholt a blekerdelel a tebelik el charm ma blekerdelel a dragon. (Johanes 8:44) Ngoeak a omengetikaik er a Diabelong, e ngdiak a ta el chad ma lechub e ngcheldebechel er a  klechad el mla sebechir el kutmeklii a mera el budech ma ulekerreu el kirir a rechad er a beluulechad. *​—⁠Johanes 12:⁠31.

“Ngochur er a Rechad”

A ongedei el tekoi el mo ngosukid el mo medengelii a belkul a 666 a debetik er ngii er sel tekoi el kmo “ngiil ochur a melutk ra chad” ma lechub e ngua ike el lolekoi a The Amplified Bible el kmo, “ngochur er a rechad.” Tia el tekoi a diak el sebechel el melutk el mo er a ta el chad e le ng Satan​—⁠el diak el ngii di el chad​—⁠ingii a ngar er ngii a klisichel el mengederedel er ngka el tebelik el charm. (Lukas 4:​5, 6; 1 Johanes 5:19; Chocholt 13:​2, 18) Ngbai, ngika el tebelik el charm el oba “ochur er a rechad,” ma lechub a olangch, a belkul a kmo a blekerdelel a mlukdubech er a rechad, el diak el reng ma lechub el mekngit el reng, me seikid e ngolecholt a bebil er a blekerdelir a rechad. Aikang locha ngera el blekeradel? A Biblia a onger, el kmo: “Le rokuil chad a mlora klengit, ma uchul e ngdiak el sebechir el nguu a klebkellel a Dios.” (Rom 3:23) Me ngika el tebelik el charm el loba “ochur er a rechad,” a olecholt el kmo aika el kabelment a olecholt er tia el rirebet el blekerdelir a rechad, el ngii a olengchelel a klengit ma diak el chelerrungel.

Me chelecha el bla dedengchii ngika el tebelik el charm e mla mo medengei el kmo ngua ngera osengel a Dios el kirel, e ngmocha sebeched el merritel el mo medengelii sel ullebongel el tedebechel tia el berrotel el tekoi​—⁠el ngii sel ochur el elolem ma ngera uchul me ngmle llechukl el edei el taem​—⁠el 666, ma lechub e ng 600 ma 60 ma 6.

A Elolem el Omelekl el Ede el Taem​—⁠Ngera Uchul?

Ngar er a chelsel a Bades, e a usbechellel a bebil er a ochur a ngar er ngii a ileakl el belkul. El ua tiang, a ochur el euid, a leblechoel el ousbech er ngii el melutk aike el mla mecherrungel el tekoi, er a osengel a Dios. El ua sel sandei er a lomeob a Dios el uldimukl er ngii a cheuid el ‘sils’, ma lechub e ngklemengetel a taem, el Dios a milengerrungel er a moktek er a omebelel er tia el chutem. (Genesis 1:​3–2:⁠3) A “tekingel” a Dios a ua silver el mla “obiich el euid el taem,” me ngkmal bliochel el cherrungel. (Psalm 12:6; Osisechakl 30:​5, 6) Ngike el chebedes el Naeman a ldilu er ngii me ngmo melecholb er a omoachel er a Jordan el euid el taem e uriul er isei e ngmlecherrungel a klungiolel a bedengel.​—⁠2 Kings 5:​10, 14.

A elolem a olengesonges er a tang er a euid. A leuaisei e tiang diak bai lungil el okesiul a tekoi el olengesonges, ma lechub e ngdiak el cherrungel, er a osengel a Dios? Chochoi, ngkmal uaisei. (1 Kronika 20:​6, 7) E lmuut kung, ma elolem el omelekl er ngii el edei el taem, el ua 666, a kmal mesisiich el melisiich er isel olengesonges ma lechub e ngdiak el cherrungel el blekeradel. Choua itia el omesaod a sebeched el kmo ngmelemalt e le ngmongeseu er sel tekoi el kmo tia el 666 a “chochur er a rechad” el ua ikel bla desaod. Me seikid, e aike el omerellel ngka el tebelik el  charm, er a ngar er a mong el mei, a “chochur er a rechad”, e ngii el ochur el 666 a melutk el mo er a dita el tekoi el kmo​—⁠ngkmal olengesonges e urrebetakl er a osengel a Jehovah.

A Olangch a Medangch

Uriul er a lolekoi el kirel tia el ochur el 666, e a Chocholt a di mereched el mo melekoi el kirir a 144,000 el oltirakl er a ngelekel a sib, el Jesus Kristus, el tir a ngar er ngii a ngklel ma ngklel a demal, el Jehovah, el llechukl er a medal a bderrir. Aika el ngakl a omeketakl er tirke el olab el kmo te kloklel a Jehovah ma ngelekel, el tir a lsal dmeu a rengrir el omerk el kirir. Me ngdi osisiu, tirke el olab olangch er a tebelik el charm a belkul a kmo ngbleketakl el olecholt el kmo te mesiou er a tebelik el charm. Me seikid, e ngii el olangch, a lengar er a kidekmir ma lengar er a medal a bderrir, me ngii a di okesiu el olecholt er ngke el oba ngii el olangch el kmo, ngua longull el mesiou er ngike el ua tebelik el charm el cheldebechel er a politiks er tia el beluulechad. Tirke el oba tia el olangch a omsa “Kaiser” aike el ngii a mera el kloklel a Dios. (Lukas 20:25; Chocholt 13:​4, 8; 14:⁠1) Ngmekera loruul er tiang? Ngoeak sel lomsa odanges a klisichel a politiks er a beluu, ma olengchelel, ma klisichel er a mekemad, el ngii a lomes el bedulngii el kirel omelatk ma osobel. Ma ngii di el omengull el leko te omsa mera el Dios a kmal di tekoi er a ngor e merekong.

Engdi, Biblia a kmal mengelechel er kid el kmo: “Lak multuil a omeltkiu er a remellomes a rengrir ma rengelekir a rechad, e le osobel a diak el ngar er tir. E le reng er ngii a tuobed, e ngii a moluut el mo er a chutem; e seikid el sils e a uldesuel a mokngemed.” (Psalm 146:​3, 4, NW) Tirke el kerekikl el oltirakl er tia el ulekrael a diak el bo lemekngit a rengrir sel lsekum a kabelment a mo diak el sebechel el oltaut a telbilel ma lechub a rulab a deruchall el chetengakl el chad a mo outerached e ruebet er osengir a rechad.​—⁠Osisechakl 1:33.

Tiang a diak el belkul a kmo a Rekristiano a diak a ngera el loruul er ngii el kirel tia el klechad. Te bai kmal blak a rengrir el omerk el kmo, sel di chimo el kabelment el sebechel mo sumechokl a mondai er a klechad el rokui​—⁠a Rengedel a Dios el ngii a lomtechei er ngii.​—⁠Matteus 24:⁠14.

A Rengedel a Dios​—⁠Di Ta el Omelatk el kirir a Rechad

Sera lengar tia el beluulechad, e a Jesus a rirellii a rengedel a Dios el mo dai er a berkel a klumech el lurruul er ngii. (Lukas 4:43) Ngar sel kerebai el nglunguuch, el lebebil e te omekedong er ngii el kmo Nglunguchel a Rubak, e a Jesus a ullisechakl er a rulebengkel el mo meluluuch el kirel a Rengedel a Dios me lemei ma uldesuel a Dios lemeruul er a beluulechad. (Matteus 6:​9, 10) A Renged a kabelment el ngii a mo mengederedel er a beluulechad el rokir, el diak el ngar er tia el beluulechad, e ngmo mengederedel el ngar er a eanged. Me seikid a uchul, ma Jesus a ulemekedong er ngii el kmo “rengedel a eanged.”​—⁠Matteus 11:⁠12.

A Rengedel a Dios a mo mesterir a budech tirke el rokui el olengesenges e oltirakl er ngii. (Psalm 37:​11, 29; 46:​8, 9) A Jesus, el ngii a King er tia el Renged, a mo okngemedii a Satan, e tiang a tekoi el diak a ngii di el chad el sebechel el rullii. Ngmo lmuut er a klengiterreng, ma ringel, ma kodall me ngmo diak. Ngkol ua ngera el lungil el omelatk tiang el kirir tirke el chad el melemolem el mimokl el diak loba olengchelel a tebelik el charm.​—⁠Chocholt 21:​3, 4.

[Box on page 5]

A Tekoi el Ngosukid el Mo Dongchii a Belkul a 666

1. A ngakl er a Biblia a blechoel el ngar er ngii a lolecholt er ngii el kirel a blekerdelel ma klengar er ngke el oba ngii el ngakl, el ua blekerdelel a ngklel a Abraham, ma Jesus, ma lmuut el betok. Me ngdi osisiu, a ochur-el-ngklel ngike el tebelik el charm a olecholt er a blekerdelel ngii el charm.

2. Ngar er a chelsel a babier er a Daniel er a Biblia, e aike el kakerous el tebelik el charm a ulemtechei a omengederedel er a kakerous el renged, ma beluu. Ngike el tebelik el charm el uldekial aika el rokui el ngar er a Chocholt 13:​1, 2, a omtechei er a cheldebechel er a politiks er a beluulechad el rokir, el melai a klisichel e chederdall er a Satan.

3. Ngike el tebelik el charm el oba “chochur er a rechad” a olecholt el kmo ngcheldebechel er a klechad, me ngdiak el mekngit el reng. Me seikid, e ngolecholt a ngelsengesir a rechad el ngii a mlukdubech el uleak a klengit ma diak el cherrungel el blekeradel.

4. Ngar er a osengel a Dios, e a ochur el elolem, el ngii a ngesonges er sel cherrungel el ochur er a Biblia, el euid, a melutk el mo er a diak el cherrungel el blekeradel. Me sel olangch el 666 a melisiich er ngii el ngelsonges el oeak sel omelekl el melekoi er ngii el edei el taem.

[Footnote]

[Picture Credit on page 6]

Songerenger el ngalek: UNITED NATIONS/Photo by F. GRIFFING

[Picture on page 6]

A omengederderel a klechad a mla obeketakl el kmo ngkmal olengesonges, me ngkmal ungil el okesiul er a ochur el 666