Multuil Er A Reng Er A Dios Obo Mchebangel A Mengedengodech El Blekeradel Er A Klengar

“Bo le blak a rengum lodersau ra Dios.”​—⁠2 TIMOTEUS 2:⁠15.

A BELUULECHAD el iliuekl er kid a melemolem el mengedengodech a blekeradel er a chelsel. Ngsebeched el mesa ngelsecheklel a tekoi er a science ma omebelel a beches el klalo el lobengkel a mesisiich el rebetel a tekoi er a kldung ma ungil el blekeradel. Me ngua ike el dulsaod er sel mlo merek el suobel el kmo, a Rekristiano a kirir el melemolem el oltngakl er sel lomtok er a Dios el reng er a beluulechad. Engdi, sel lemengodech a blekeradel er a beluulechad, me kid me kede dirrek el mengodech el oeak a betok el rolel. Kede engelakl er a klengeasek el mo meklou el chad. Ngsebeched el korker a kerruul ma lechub e kede kuk oriid, ma klisichel a bedenged, ma lechub a rebetik er a rengud. Betok er a choua ika el omelodech a diak a klisiched el mekerang, e ngii el omelodech a sebechel el mekdubech a beches e meklou el omelsemai el kirel a klisichel a klereng er kid.

² Te mekesai el chad a mo chelebangel a kmal meklou el omelodech er a klengar er tir el ua David, el ngelekel a Jesse. A David a kmal mle mereched el  mengodech er a dimlak a chad el medengelii el klekar a sib el buik el mo er a merael a chisel el bekeu el soldau el beluu el rokir a omes el bedulngii. Uriul e ngmlo chad el di ngar er a chiis, e le mechechei el king a osiik a kodellel el ua blekerdelel a charm. Uriul er aika el taem, e a David a mlo king e mlo mesisiich er a betok el mekemad el lemla er ngii. Ngdirrek el mle kirel el outekangel er a telemellel a oberaod el klengit el lerirellii. Ngdirrek el mle kirel el outekangel a chelebuul ma klekakeakl el dilubech er a chelsel a telungalek er ngii. Ngmlo er ngii a kerruul er ngii, e mlo chuodel, e dirrek el mlo chuarm er a chelitechetul a cheluodel. Ma ltang kmal betok el lomelodech a mlo er ngii er a klengar er ngii, engdi, a David a millemolem el olecholt er a klaumerang er ngii er a Jehovah ma reng er Ngii. Ngmlo er sel tkurrebab el klisichel el “lodersau ra Dios”, ma Dios a ulemekngeltengat er ngii. (2 Timoteus 2:15) Alta blekerdelel a klengar er kid a ngodech er a blekerdelel a David, engdi ngsebeched el mesuub er a rolel a David er a lechelebangel a derta ma derta el tekoi er a klengar er ngii. A kerebai er ngii a sebechel el ngosukid el mo medengei el kmo kede mekerang e melemolem el oba ulengeseuil a chedaol el reng er a Dios sel bo dechebangel a omelodech er a klengar er kid.

A Klengareourreng er a David​—⁠A Kmal Ungil el Kerebai

³ Sera lebuik, e a David a dimlak lorael a chisel el mo lmuut er a chelsel a telungalek er ngii me ngmle uaisei. A profet el Samuel er a lemei er a Bethlehem, e a demal a David a ultebedeterir a reteuid er tirka el teai el ngelekel el sechal el mo omes er ngii. A David, el ngii a mle kot el kekerei el ngelekel el sechal, a mla medechel el klekar a sib. Me nguaisei, engdi Jehovah a mla ngiltii a David el ngii a mo mengederedel er a Israel el ua king er a ngar er a mederir. Te mocha mekodongii a David er a ked el mei. Ongingil, e a Biblia a melekoi el kmo: “Ma Samuel a ngiluu a cheluchul olive e chileltii a David er mederir ar ubekul. Ma David a miltuchel ra Reng ra Rubak er isel sils el mong.” (1 Samuel 16:​12, 13) A David a mlo ultuil er ngii el reng er a chelsel a klengar er ngii el rokir.

⁴ Ngdi mle telkib e ngka el klekar a sib el buik a ngilsechekl el mo merael a chisel el chad er a beluu el rokir. Ngmlokedong el mo mesiou er a king e ousekool a tumetum el mo er ngii. Ngmilekodir a mesisiich el chad er a mekemad el Goliath, el ngii a kmal mle mesisiich el soldau me ngmo lmuut er a remeketeket el soldau er a Israel me te mle medakt el mengebangel er ngii er a mekemad. A lengiltii el mo mengetakl er a resoldau, e a David a mlo mesisiich er a mekemederir er a rechad er a Filistia. A rechad er a beluu a kmal mlo betik a rengrir er ngii. Te mlo melibech a chelitakl el oldanges er ngii. Uchei er tiang, e a ta er a adviser er a King el Saul a milsaod er a David el kmo ngdimlak di el “meduch loutumetum” a harp, e ngdirrek el mle “bekeul chad, e ungil soldau, e chad ra cheldecheduch, e klamiokel el chad.”​—⁠1 Samuel 16:18; 17:​23, 24, 45-51; 18:​5-7.

⁵ Ngmerael a chisel, e ungil el sechal, e ngeasek, e meduch el mengedecheduch, e dachelbai el outumetum, e meduch el soldau, e mla er ngii a kengei er a Dios er ngii​—⁠sel domes e a rokui el klungiaol a ua lullab a David. Ngmle sebechel a di ta er aikang el rullii me ngmo kedidai a rengul, engdi ngdimlak a ta er ngii el rullii el mo uaisei. Ka momes a nger er a David el mo er a King el Saul, el ngii a dilu er a David el kmo ngsebechel el mo bechil a ngelekel el redil. A David a uleba mera el klengareourreng, e ulenger el kmo: “Ngak ak techang, ma kleblillek ngkuk ngeral ngara Israel me ngkirek el mo bechil a ngelekel a king?” (1 Samuel 18:18) Ngar er ngii a ta el chellimosk er a omesubel a Biblia, el melekoi el kirel tiang el kmo: “A belkul a tekingel a David a kmo ngka loeak a duch er ngii er a kmung ngerang, ma ka loeak a delecherul er a buai, ma ka loeak a uldidellel a resechel, e le kora mo er ngii a telkib el uldesuel el kmo ngredemelel a mo bechil a ngelekel a king.”

 ⁶ A uchetemel a klengareourreng er a David a mla er a klemedengei er ngii el melechesuar er a Jehovah el kmo ngcheroid el ngar er a bab er a rediak el mecherrungel el chad er a bek el tekoi. A David a mle mechas a rengul er a Dios er a lekerekikl el omes er a rechad. (Psalm 144:⁠3) A David a dirrek el mle medengei el kmo a ngii di el klungiolel a tekoi el lurruul a mlo er ngii e le Jehovah el ullecholt er a klengareourreng, e mlo oltubokl er ngii, el mo melisiich, e omekerreu er ngii. (Psalm 18:35) Ngkol ua ngera el klebokel el suobel el kired! A duch er kid, ma ike el deketmokl el tekoi, ma techelled er a omesiou a rokui el diak el kirel el rullid el mo mekididai a rengud. A apostol el Paulus a milluches el kmo: “Ma ikel ngarngii er kau ngngera er ngii a dimlak mnguu? Cho mngilai, e ngera me komkuuk el ua le mlak mngai?” (1 Korinth 4:⁠7) A bo doba chedaol el reng er a Dios e doldeu a rengud er a kengei er ngii, e ngkmal kired el omekeroul e urrekodel er a blekeradel er a klengareourreng.​—⁠Jakobus 4:⁠6.

“Lak Di Lekemiu el Melaitechei”

⁷ Malta e a merael el chisel a David a dimlak lrellii el mo kedidai a rengul, engdi ngmilekedebechii a mesisiich el chelechei er a rengul a King el Saul el mlo soal lomekoad, e le sel reng er a Dios a mla choitii. Malta David a dimlak a ngera el mekngit el lerirellii, engdi ngchiliis el kirel a klengar er ngii e mlo kiei er a ked. Ngar er a ta er a taem, el oltoir er a David, e a King Saul a siliseb er a chelsel a ii, e dimlak lodengei el kmo a David ma rechedal a mle blart er isei. A rechedal a David a millisiich er ngii me lenguu isel techall el ua lemlodurokl er a Dios el mo er tir e lokodir a Saul. Ngkmal sebeched el kora mesterir el blart er a milkolk e mengelulau er a David el kmo: “Tiaikid a techellem! A Rubak a dilu er kau el kmo ngmo olterekokl ra cherrouem er a chimam, me ngsebechem el mor sel soam er ngii.”​—⁠1 Samuel 24:​2-6.

⁸ A David a dimlak lekengei el melemall er a Saul. Ngullecholt er a klaumerang ma kllourreng, e mle dmeu a rengul el mechei a rokui el tekoi er a chimal a Jehovah. Uriul er a king er a ltobed er a ii, e a David a ulemekedong el mo er ngii el kmo: “Ma Rubak bo lomiich el kmo ngtecha er kid a mekngit! Bo lomals er kau er chomerellem el kirek, ele ngak a kmal diak bo ktemellau.” (1 Samuel 24:12) Altang mle medengei el kmo a Saul a mle cheleuid a omerellel, engdi David a dimlak lolasem el di ngii el melaitechei; ma ka ble lemekngit a omelekingel el mo er a Saul ma lechub e lullekoi a mekngit el kirel. Ngmla er ngii a lmuut el bebil er a taem, el David a ulerreked er ngii me lak bo loruul a tekoi el mo melaitechei. Ngbai, mle ultuil er a Jehovah el mo omeklemalt a tekoi el kirel.​—⁠1 Samuel 25:​32-34; 26:​10, 11.

⁹ Me ngua David, e kau me ke locha mo metik er kau a lebebil er a taem el mo chelebangel a meringel  el blekeradel. Alta te omtok er kau ma lechub e te omekringel er kau a rechad el omdak el ngar er a skuul, ma lechub a rekeldemem er a ureor, ma lechub a telungalek er kau, ma lechub a rebebil el tir a diak loumerang a tekoi el moumerang. Lak molekoi ma lechub e moldechelakl el omtok er tir. Mongiil er a Jehovah, e molengit er a chedaol el reng er ngii me lengesukau. Alta omuaisei e te mo er ngii a rediak loumerang el mo mechas a rengrir er a omerellem e mo oumerang. (1 Petrus 3:⁠1) Engdi a ngii di el ngerang el mo duubech, e modengei el kmo a Jehovah a omes a blekerdelem e ngar er ngii a bo lrellii el kirem er sel temel er ngii. A apostol el Paulus a milluches el kmo: “Kemiu el betik ra renguk, lak di le kemiu el melaitechei, e bai bechei me di le ngara cheldechuderreng ra Dios; e ngellechukl el kmo, “A rubak a dmu el kmo, chomelaitechei a di ngak a meruul, ngdi ngak chomekmad.’ ”​—⁠Rom 12:⁠19.

“Morrenges Chomellach”

¹⁰ Ngilengelakl a betok el rak. E a David a mlo ungil el king el kmal mirrael a chisel. A blakerreng el lullecholt er ngii er a klengar er ngii, ma ike el kmal klebokel el chelitakl el lulluches el oldanges er a Jehovah, a sebechel el beot el rullid el mo melatk el kmo ngikang a chad el diak el ta el bo lrebet er a oberaod el klengit. Engdi, ngii a dirrek el rirebet er a klengit. A ta er a klebesei, e ngii el king a mla er a chedeuel a blil e ulemes er a ta el klebokel el redil el millecholb. Ngmlo okerker el kmo ngtecha ngii el dil. Sera bo lodengei el kmo a ngklel ngii el redil a Batseba, e a bechil, el Uriah, a dibus el ngar er a mekemad, e nguleldurch el mo omekedong er ngii el redil el mei er a blil e mlo bad el obengkel. Uriul, e ngmlo medengei el kmo ngii el redil a dioll. Ngkol ua ngera el terached a bo lodengelii tia el tekoi a rechad! Ngar er a eungel a llach er a Moses e a laokreng a kmal mle klou el klengit. Ngii el king a locha ulemdasu el kmo tia el klengit a mle sebechel el lobart. Me ngultebedii a tekoi el mo er a urrurt er a resoldau el kmo, mo lutii a Uriah el me er a Jerusalem. A David a millatk el kmo a lemei a Uriah e alta ngmo bad el obengkel a Batseba, engdi lechub e ngdimlak. Chelechang dikea cheldechulel, ma David a luueta el lodureklii a Uriah el mo er a mekemad el oba babier el mo er a Joab, el ngii a mle mengeteklir a resoldau. Ngii el babier a millekoi el kmo te mo loia Uriah er a basio er a mekemad el mo uchul e ngsebechel el mad. A Joab a ullengesenges, ma Uriah a mlad er a mekemad. Uriul er a Batseba er a lrekui a klsel a omengeiung, e a David a ngiluu me ngmo bechil.​—⁠2 Samuel 11:​1-27.

¹¹ Tia el tekoi a kora ua luluureor, engdi David a bai mle kirel el medengei el kmo a rokui el lurruul a mle chemolt er a osengel a Jehovah. (Hebru 4:13) Betok el buil a mlo chuib, e a ngalek a mlechell. E seikid, e nguleak a ulekrael er a Dios, e a Nathan el profet a mlo duum er a David. Ngika el profet a dilu er a king el kmo ngngar er ngii a blekeradel el dilubech el ta el merau el chad el betok a chermel el sib a ngiluu e milekodir a di tang el betik er a rengul el chermel a chebuul el chad. Tia el cheldecheduch a ulekerngii a mesisiich el uldesuel a David el kirel a llemalt engdi ngkmal dimlak lutebengii a berrotel el belkul ngii el cheldecheduch. Ma David a kmal di mle mereched el oukerrekeriil er ngike el merau el chad. Me ngkmal kesib a rengul, e melekoi er a Nathan el kmo: “Ngikel chad el rirellii itiang a kirel el mad!”​—⁠2 Samuel 12:​1-6.

¹² Ma profet a dula el kmo: “Kau ingiil chad!” A David a di mle ngii el mla oukerrekeriil er ngii. Ngulterekokl, el ngesechel a rengul a David a di mle mereched el mengodech el mo klou el rur ma klengiterreng. Me  ngkmal mechas a rengul, e orrenges er a Nathan a louchais er ngii er a diak el sebechel el chemiis er ngii el kerrekerilel a Jehovah. Ngdimlak a tekoi er a ongelaod el kirel. A David a uluuketui a tekingel a Jehovah er a bo loruul a mekngit. Ngika ngdimlak lokodir a Uriah el oba saider er a cherraro? Me seikid a uchul ma saider a diak bo lecheroid er a blil a David. Ngikang dimlak lebertii el mo bad el obengkel a bechil a Uriah? A osisiu el mekngit el omeruul a mo duubech el mo er ngii, engdi ngdiak leberrotel, e ngbai di mo chemolt er a buai.​—⁠2 Samuel 12:​7-12.

¹³ Ngmle klungiolel a David, e le ngdimlak lolasem el melubet er ngii er aika el omerellel. Ngdirrek el dimlak lolekoi el omtok er ngika el profet el Nathan. Ngdirrek el dimlak loltelechakl er a rebebil ma dirrek el dimlak lolasem el mesaod er ngii el omekbeot a tekoi el leriruul. Sera bocha el chebangel a kngtil, e ngii el David a kilengei el rokui e millekoi el kmo: “Ak mlo ra klengit lomtok er a Jehovah.” (2 Samuel 12:13) A Psalm er a 51 a olecholt er a rengelel a uldesuel el ngar er a klou el klengiterreng el kirel a kngtil ma dirrek el dmolech el beltel a reng el leblo er ngii. Ngmilluluuch el mo er a Jehovah el kmo: “Lak mongeroid er ngak er medam; e lak mcheridii er ngak a Chedaol Reng er kau.” Nguluumerang el kmo a Jehovah, el ngar er a klechubechub er ngii, e ngulterekokl el diak bo louketui er a “reng el chelemuul e telemall” el kirel a klengit. (Psalm 51:​11, 17) A David a millemolem el oumerang el ultuil er a reng er a Dios. Ma lta Jehovah a dimlak lomekerreu er a David me lak bo lechebangel a meringel el tekoi el dilubech el klengit a uchul, engdi nguluusubes er ngii.

¹⁴ Kid el rokui a diak demecherrungel, e rokui el mo er a klengit. (Rom 3:23) A lebebil e kede mo ruebet er a oberaod el klengit, el ua David. Me ngdi ua betik a rengul el chedam el mellach er a rengelekel, e a Jehovah a omeklemalt er tirke el osiik el mo mesiou er ngii. Ma lta omellach a klou a ultutelel, engdi, ngdiak el beot el dekengei. A lebebil er a taem, e nguchul a “klengiterreng.” (Hebru 12:​6, 11) Me nguaisei, engdi a lsekum kede “morrenges a ikel mosisechakl er ngii,” e ngsebeched el lmuut el mesumech er a deleuill er kid ma Jehovah. (Osisechakl 8:33) A bo doldeu a rengud er a melemolem el klengeltengat er a reng er a Jehovah, e ngkmal kired el kongei a uklemalt e mo oureor el mo melai er a kengei er a Dios.

Lak Moltuil Omeltkiu er a Diak Lulterekokl el Kerruul

¹⁵ Ngdiak a olechotel a kmo a telungalek er a David a mla er ngii a deruchellir er a buai ma lechub e ble lemerau. Engdi, sel taem er a kleking er ngii, e a David a mlo er ngii a kerruul er ngii e kmal mlo merau. Ko mlocha medengei el kmo, a remerau a blechoel el omatek a kerruul er tir, el merechorech a rengrir, el sorir el lmuut el menga el omdois, ma lechub e te mengoit el di kirel a ngelbesel a rengrir. A rebebil a kuk ousbech a kerruul er tir el mengebkall er a di tir. (Matteus 6:⁠2) A David a uluusbech a kerruul er ngii er a ngodech el rolel. Ngkmal mle soal el mengebkall er a Jehovah. Ma David a uluuchais er a Nathan er a urungulel el mo omekedechor er a templo el kirel a Jehovah, el bo lia sel ark er a telbiil er a chelsel, el ngii er seikid el taem e ngmla er a Jerusalem el “ngara tento.” A Jehovah a kmal mle dmeu a rengul er a uldesuel a David engdi ngdilu er a David el okiu a Nathan el kmo a okedecherul a templo a bo loruul er ngii a ngelekel a David er a Solomon.​—⁠2 Samuel 7:​1, 2, 12, 13.

 ¹⁶ A David a iludel a klekedall el blo lousbech el kirel tia el klou el ureor er okedecherul a templo. E dilu er a Solomon el kmo: “Ak mla kudmokl el kirel a blil a Jehovah a dart el telael el ludoud el kolt ma tal milliol el udoud el silber, ma sintsiu ma deel a diak a rolel e lemedebodeb leng kmal imis el betok a ildisel; ma kerrekar ma bad a blak ketmokl, engdi ngii el rokui a chobomolechel.” E mla er a chelsel a di kerruul er ngii, e nguleldars a 3,000 el udoud el kolt ma 7,000 el udoud el silber. * (1 Kronika 22:14; 29:​3, 4) Aika el uleldars a David a dimlak lousumecholt el di kirel a ues, e ngbai mle ochotel a klaumerang ma mesisiich el blakerreng er ngii el mo er a Jehovah el Dios. Ngmle medengelii a uchul me ngmle merau, me ngdilu er a Jehovah el kmo: “A rokui el tekoi a mla er kau el mei, ma ki di ngmai er a chimam el lmuut el lodars leko er kau.” (1 Kronika 29:​14, NW) A bekerurau el rengul a David a uldbechii el mo meruul aike el rokui el sebechel el mo melisiich er a bliochel el omengull.

¹⁷ Me ngdi osisiu, mei me bo lsebeched el ousbech aike el ngar er ngii er kid el mo meruul a ungil. Me ngbai diak di dosiik a rolel a klengar el di oltoir a kerruul, e ngbai ungil a bo dosiik a kengei er a Dios​—⁠tiaikid a rolel a mera el llomeserreng ma deurreng er a klengar. A Paulus a milluches el kmo: “Mongelechel rar merau er tial belulechad, me lak le borbab a rengrir, ma ka lulsirs chomeltkir ra diak lulterekokl kerruul, e bai lolsirs chomeltkir ra Dios, el ngii a kudmokl a bek el tekoi el kired el olsibes el oldeu a rengud. Mdu er tir me loruul a ungil, e bo le merau ra ungil lurreor, e le bekerurau, e lorous el diak longreos, me lsmecheklii a ungil lomekedecheraol el kirir el kudmeklii a ngar medad, me bo lsebechir el nguu a klengar, el meral klengar.” (1 Timoteus 6:​17-19) Ma ngii di el blekeradel er a keizai el bo dechelebangel er ngii, e mei me dolemolem el ultuil er a reng er a Dios e dolemolem er a klengar el ngii a rullid el mo “merau el bedul a Dios.” (Lukas 12:21) Ngdiak a ngii di el ngerang el lmuut el klou a ultutelel er sel lekengei er ngii el ungil el delecherud er medal a betik a rengul el Demad el ngar er a eanged.

Modersau er Medal a Dios

¹⁸ Ngar er a klengar er ngii el rokir, e a David a ulsiik a kengei er a Jehovah. Ngar er a chelsel a cheliteklel, e ngelmangel kmo: “Mochotii a kengei er kau er ngak, O Dios, mochotii a kengei er kau er ngak, e le klengar er ngak a chulsiik chomertelel er kau.” (Psalm 57:⁠1, NW) A klaumerang er ngii lultuil er a Jehovah a dimlak bo lak a ultutelel. A David a mlo chuodel, el “dmeu a rengul er a sils er ngii.” (1 Kronika 23:⁠1, NW) Malta David a rirebet er a oberaod el klengit, engdi ngsebeched el melatk el kirel el kmo ngta er a mesiungel a Dios el ullecholt er a kmal ngar er a bab el blakerreng.​—⁠Hebru 11:⁠32.

¹⁹ Me sel omchebangel a mengedengodech el blekeradel er a klengar er kau, e molemolem el melatk el kmo a Jehovah a ulemekerreu, e millisiich, e ulemeklemalt er a David, me ngdirrek el sebechel el mo meruul er a osisiu el tekoi el eko er kau. A apostol el Paulus, el mle ua David, a dirrek el chilebangel a betok el omelodech er a klengar. Me nguaisei, engdi ngii me ngdirrek el di millemolem el blak a rengul el oeak sel lultuil er a reng er a Dios. Ngmilluches el kmo: “Ngsebechek el meruul a rokui el tekoi loeak ngikel melisiich er ngak.” (Filipi 4:​12, 13) Ma dultuil er a Jehovah, e ngulterekokl el ngosukid el mo ungil er aike el doruul el tekoi. Ngsoal a bo dungil. Ma dorrenges er ngii e dolekeed er kid er ngii, e ngmo meskid a klisiich el mo meruul a soal. Ma dolemolem el ultuil er a chedaol el reng er a Dios, e ngsebeched el mo ‘odersid er medal a Dios’ er chelechang el mo cherechar.​—⁠2 Timoteus 2:⁠15.

[Footnote]

Ke Mekerang Omonger?

• Kede mekera e kokerengid er a kldidaierreng?

• Ngera uchul me ngdiak el kirel el di kid el melaitechei?

• Ngera el uldasu el kirel a omellach a kired el mo obang?

• Ngera uchul me ngkired el otuil a klaumerang er kid er a Dios el diak el kerruul?

[Study Questions]

1. Ngera el omelodech a mo uchul a omelsemai el kirel a klisichel a klereng er kid?

2. Ngmle ua ngera omelodech el mla er ngii er a klengar er a David?

3, 4. Ngmilekerang a David e ngilasech er a diak a rechad el medengelii el klekar a sib el buik el mo merael a chisel el chad er a beluu?

5. Ngera mle sebechel el rullii a David el mo kedidai a rengul, e kede mekerang e medengei el kmo ngdimlak el bo leuaisei?

6. Ngera uchul me ngungil el domekeroul er a klengariourreng?

7. Ngera el techall el mo omekoad er a King el Saul a mlo er ngii er a David?

8. Ngera uchul ma David a dimlak lolaitechei?

9. Ngera uchul me ngdiak el kired el melekoi ma lechub e doldechelakl el omtok sel bo dechebangel a ultok ma odechelakl?

10. Ngmilekerang a David e ruebet er a klengit, e milekerang er a lolasem el omart er a kngtil?

11. Ngera el blekeradel a lulsaod er ngii a Nathan el mo er a David, e mlo ua ngera blekerdelel a David el kirel tiang?

12. Ngera mle kerrekerilel a Jehovah el mo er a David?

13. Ngmle ua ngera blekerdelel a David el kirel a omellach el mla er a Jehovah?

14. Ngkirel el mo ua ngera blekerdeled el kirel a omellach el dengai el mla er a Jehovah?

15. (a) A rebebil er a rechad te mekera el ousbech a kerruul er tir? (b) A David nguluureng el mo ousbech a kerruul er ngii er a ngera el rolel?

16. Ngera el omengedmokl a lriruul a David el kirel a ureor er a okedecherul a templo?

17. A omellach el ngar er a 1 Timoteus 6:​17-19 ngmekera le dul motaut el mo er a remerau ma remechebuul?

18. Ngoeak a ngera el rolel e a David a kiltmeklii a ungil el kerebai el kirir a Rekristiano?

19. Kede mekera e odersid er a medal a Dios?

[Picture on page 14]

A David a mle ultuil er a reng er a Dios e ulsiik a kengei er a Dios. Kau ke meruul a osisiu el tekoi?

[Picture on page 16]

“A rokui el tekoi a mla er kau el mei, ma ki di ngmai er a chimam el lmuut el lodars el leko er kau”