Ngsebeched el Omekedong er a Rechanghel el kirel a Ngeso?

NGDI ungil a domekedong er a er a rechanghel er a taem er a mondai? A rebetok el chad a omdasu el kmo ngungil. A mera er ngii, sel babier el New Catholic Encyclopedia a melekoi el kmo: “A chad a meluluuch el mo er a rechanghel el di ultuil er sel uldasu el kmo te omtechei er kid er a medal a Dios.” Ma leuaisei, ngsebeched el omekedong er a rechanghel el mo omtechei er kid er a medal a Dios?

A Tekingel a Dios a meskid a ngklir a redi teru el blak a rengrir el anghel er a Dios, el Mihael, ma Gabriel. (Daniel 8:​16; 12:1; Lukas 1:​26; Judas 9) E le aika el ngakl a meldung er a chelsel a Biblia, kede mo omtab el kmo a derta el anghel a ileakl el reng el ngar er ngii a ngklel el diak el di el klisiich el diak dodengelii. Engdi, ngmla er ngii a bebil el anghel el dimlak el lemocholt a ngklir. El di ua itiang, a Jakob er a loker er a ngklel ngike el anghel el mlo omes er ngii, e ngdimlak louchais er ngii. (Genesis 32:29; Mengeteklel 13:​17, 18) Ngdiak a beldukl el ngklir a rechanghel el ngar er a Biblia, el mo uchul ma rechad a diak lebesterir a omengull el tir a diak lerredemelel.

A mo uldimukl er aike el ngerechelir a rechanghel a ouchais a klumech er a Dios el mei er a rechad. A mera er ngii, e aike el uchul a tekoi er a Hebru ma Griik el “anghel” a moiuid el mo “ngoderuchel.” Engdi, a rechanghel a diak lomtechei er kid el olab a nglunguched el mo er a kingellel a ngike el Kot el Kedidai. A Dios a mla oterekeklii el kmo a nglunguuch a kirel el mo er ngii el di oeak a ngklel a di ta el ngelekel el Jesus Kristus, el dilu el kmo: “Cho molengit a ngiidi le ngerang ra Chedam loba ngklek, e ngmeskemiu.”​—⁠Johanes 15:16; 1 Timoteus 2:⁠5.

A Jehovah el Dios a diak el di lemechesang me lak el sebechel el orrenges er kid sel debo er ngii el ngar er a melemalt el rolel. A Biblia a ouchais el kmo: “[A Jehovah el Dios a] kmeed er tirkel rokui el omekedong er ngii, el tirkel omekedong er ngii el ngara klemerang.”​—⁠Psalm 145:18.