A Uldesuel a Rengul a Dios Ngmla Meketmokl?

“A uldesuel a rengum le meruul ra belulechad el ua chomerellel ra eanged.”​​—⁠Matteus 6:​10.

AJULIO ma Christina a dilechor el ngellomel e teleu a ngerir el omes er a reteua el ngelekir er a lemedul e lemad. A chad el cheltelaol a ulemekall el mei el tuchelii a mlirir el mle stob me ngdi ulebuu el kmard el mo ngau. A ongeim el ngelekir, el Marcos, a lulselebii er tia el kmal mekeald el ngau, engdi a ngau a dirrur a bedengel el el kmal mlo klou el telemall. Ngmle etiu a rekil. A demal a kmal el mlo mekngit a rengul. Ngmilengelaod er ngii ma telungalek er ngii el olab aika el tekoi el kmo: “Tiang a kuk mle soal a Dios, me ngkired el mo medengei el kmo, a lungil, ma lemekngit, ma lechub e ngngii di el ngerang a mo duubech me ngdi mle soal a Dios.”

Sel bo dechelebangel a kmal el chetituokel el tekoi el ua itiang, e a rebetok el chad a oba osisiu el uldasu. Te omdasu el kmo, ‘A lsekum a Dios a klou a klisichel e omekerreu er kid, e aika el mla duubech el tekoi a kirel el mo uchul a klungioled er a bebil er a rolel, altang ngko er a mo meringel er kid el mo omtab er ngii.’ Kau ke dirrek el omdasu el uaisei?

Tia el uldasu el kmo a ngii di el ngera el duubech, a lungil ma lemekngit, me ngdi olecholt er sel soal a Dios a mlengai er a tekingel a Jesus er sel okedongall el kmo Nglunguchel a Rubak, el ua llechukl er a bab. A uldesuel a rengul a Dios a meketmokl er a eanged, adang uaisei ngdiak? Me sel bo doluluuch el kmo, ‘A uldesuel a rengum le meruul er a beluulechad,’ ngdiak dekengei el kmo aike el rokui el duubech er tia el beluulechad a ngar er a uldesuel a rengul a Dios el mei?

A rebetok el chad a diak lsal ungil a rengrir el kirel tia el uldasu. Ngoeak sel kuk osengir, e tia el uldasu a ochotii a Dios el kmo ngdiak lomekerreu aike el ngar er a rengrir a reblebelel el chad. Te oker el kmo, ‘Ng mekera e a kmal el betik a rengul el Dios a soal a kdekudel el mo er a diak a telemellir el chad? ‘A lsekum e ngngar er ngii a suobel el sebeched el suubii, e ngkmal ngera tia el suobel?’ Ke locha dirrek el uaisei a uldesuem.

El kirel tiang, e a ochellel a Jesus, el disciplo el Jakobus, a milluches el kmo: “Me ngikel osiueklii a chongetikaik lak el du el kmo, ‘Tial ongetikaik a mlara Dios el mei,’ ele Dios a diak el sebechel mechetikaik ra mekngit, e dirrek el diak longetikaik ra chad el mora mekngit.” (Jakobus 1:13) A Dios a diak el ngii a uchul a mekngit. Ma leuaisei, ngbleketakl el kmo, ngdiak el rokui el tekoi el duubech er a chutem er a chelecha el sils a soal a Dios. A Bades a dirrek el melekoi el kirel a soal a chad, ma soal a renged, el mo lmuut er a soal a Diabelong. (Johanes 1:13; 2 Timoteus 2:26; 1 Petrus 4:⁠3) Kau ke kongei el kmo sel dilubech el mo er a telungalek er a Julio me a Christina a diak el sebechel el ngii a sel mle soal ngike el betik a rengul el Demad er a eanged?

Ma leuaisei, ngera mle belkul sel osisecheklel a Jesus el mo er a rediscplo er ngii el mo meluluuch el kmo: ‘A uldesuel a rengum le meruul’? Tiang di mle ongit el mo er a Dios el mo soiseb er a ileakl el tekoi el duubech er a klengar er kid, ma lechub e a Jesus a ulsisecheklid el mo meluluuch el kirel a kuk klou e kuk ungil el tekoi, a omelodech el kid el rokui a sebeched el melatk el kirel? Me deluut el mo mesa el kmo ngerang dmung a Biblia el kirel tiang.

[Picture Credit]

Car: Dominique Faget-STF/AFP/Getty Images; child: FAO photo/B. Imevbore