Doltoir Er A Blekokeuii El Ngar Er A Chelsel A Meringel El Beluulechad
Doltoir Er A Blekokeuii El Ngar Er A Chelsel A Meringel El Beluulechad
“A klungiolel a chad a blekokeuii el bltikerreng er ngii.”—OSISECHAKL 19:22, NW.
KAU ke omdasu er kau el kmo ke bekokeuii el chad? A lsekum nguaisei, e a delengchokl el ngar er tia el beluulechad er a chelechang a kmal meringel el kirem. Ngklemerang, el blekokeuii a blekeradel el losaod er ngii a Biblia el uldimukl er a “rodech ra reng”, engdi ngera uchul me ngkmal meringel a lolecholt er tia el blekeradel el mo lmuut er a chelsel aike el lekong Kristiano el beluu? (Galatia 5:22) Ngdi ua ike el melsaod er a chelsel sel suobel er a uchei er tiang, a nger er ngii a sebeched el metik er a telkib er ngii er a chelsel a tekoi el lulluches a apostol Johanes—el kmo a beluulechad a chederdall er ngike el mekngit el reng el Satan el Diabelong. (1 Johanes 5:19) A Jesus a dilengchii a Satan el kmo ng “merreder er tial belulechad.” (Johanes 14:30) Me seikid e tia el beluulechad a blechoel el mesuub a omerellel ngike el omtok el merredelel, el blekerdelel a blechoel el meringel lomekcharm.—Efesus 2:2.
2 Ngklou a ltemellii er a klengar er kid a lsekum a rechad a mekngit a omerellir el me er kid. A diak a blekokeuii er ngii el blekerdelir a rechad a sebechel el mocholt er a mekngit el omelekingir a rechad el kiei er a bita er kid, ma lechub a mekngit a omerellir el chad er a rael el diak dodengelterir, ma lechub e te sechelid ma rechad er a blid el lebebil er a taem e te meruul a tekoi el di diak lungil el omdasu. A orimel el dolechesuar sel dobengterir a rechad el mekngit a omerellir e oldiu e melius er a tang ma tang a uchul a klou el klengiterreng. Choua isel diak a blekokeuii er ngii el omerellir a rechad el mei er kid a rullid me ngmo soad el mo mekngit a blekerdeled el dirrek, me ngsebeched el mo melatk el mo omtechei a mekngit el omerellir el olab a mekngit el omeruul. Choua isel luldasu el bo dolab a sebechel el mo uchul a secherel a klereng er kid ma dirrek el secherel a bedenged.—Rom 12:17.
3 A meringel el blekeradel er a klengar er a beluulechad a dirrek el rullii me ngmo meringel er kid el olecholt er a blekokeuii. El ua tia el olechotel, tia el klechad a kmal mla mo mesaul e meringel a uldesuir er a kdekdelel a omerellir a reterorist, ma dirrek el techall er a bebil er a beluu el sebechir el mo melemall er a klechad el ousbech a baiking ma lechub e ngkensibakudang. Ngdirrek, el kmal betok el milliol el chad a kmal metacherbeserir, el kmal di ngesonges a kelir, ma blirir, ma bilir ma rolel a ukeruul el kirir. Me ngmo meringel el omelsemai a bo doltoir er a blekokeuii a lsekum kede ngar er a chelsel a blekeradel el kora kmal diak desa el kmo ngmekera e mo ungil.—Olisechakl 7:7.
4 Ngsebechel a chad el beot el melekoi el kmo ngdiak el klou a ultutelel el dolecholt a blekokeuii e dirrek tia el blekeradel a sebechel el mo chelitechetul a chad. Ngsebechel el mo melechesuar el kmo a rechad a di ousbech er ngii e mekngit a omerellir el diak el omekerreu el kmo ngmetemall a rengul ma lechub e ngdiak. (Psalm 73:2-9) Engdi, a Biblia a meskid a melemalt el ulekrael sel ledu el kmo: “A medemedemek el nger a cholleklii a ngasechereng, e ngdi medecherecher el nger a cholengasechereng.” (Osisechakl 15:1) A delemedemek ma blekokeuii a eru el blekeradel el uldimukl er a rodech er a reng el ngii a kaiuekeed a belkul el kmal ungil el dousbech el mengellakl a meringel el blekeradel.
5 Ma lsekum a ochotel a rodech er a chedaol el reng er a Dios a kmal meklou a ultutelel el kirir a Rekristiano, e ngkmal kired el mo melebedebek el kmo kede mekera e mo olecholt er a ta er ngii el blekeradel el ngii—a blekokeuii. Ngbeot el doltoir er a blekokeuii er a chelsel tia el meringel el beluulechad? A leuaisei e ngera bebil er a blekeradel el sebeched el ochotii el kmo ngdiak debecherei a ongetikaik er a Satan me lterbengid me bo lak dolecholt a blekokeuii, el ileakl sel dechelebangel a kora meringel el blekeradel? Me bo dolatk a mo olecholt a blekokeuii el mo er a rechad er a blid, ma basio el doureor er ngii, ma skuul, ma rekiei er a bita er kid, ma dengar er a urered er a berkel a klumech, ma deteloi er a rekldemed el ngar er a klaumerang.
Ochotel a Blekokeuii er a Chelsel a Telungalek
6 A bo dolai a klengeltengat ma ulekrael er a Jehovah, e a rodech er a reng a kmal klou a ultutelel e kmal kired el omekeroul el mo mesisiich er a klengar er kid. (Efesus 4:32) Ka me bo dosaod er a usbechellel a blekokeuii el mocholt el mo er a tang ma tang er a chelsel a telungalek. A bek el sils, e a bechiil el sechal ma bechiil el redil a kmal kirir el olecholt er a blekokeuii ma reng er a ulekerreu er a delongelir ma dirrek el mo er a rengelekir. (Efesus 5:28-33; 6:1, 2) Choua isel blekokeuii a mocholt er a delongelir a rengar er a ta el telungalek sel lechachedecheduch er a delongelir, ma rengalek el mengebkall e mengull er a redemerir ma rederrir ma dirrek el chedam ma rechedil el melemalt a omerellir el mo er a rengelekir. Bo mereched el chemat, e meoud el oltelechakl.
7 A debekokeuii el mo er a rechad er a telungalek er kid a uldimukl er a omengelechel el lullekoi a apostol el Paulus el kmo: “Kom chemoit aikal tekoi: el ngasechereng, ma klsiberreng, ma mekngit luldasu el bedul a chad, ma chomelaes, ma de merur er ngii el tekoi el tuobed ra ngeriu”. Ngbek el sils, e a telungalek er a Rekristiano a kirir el ungil el chadecheduch el kakull er a delongelir. E ngera uchul? E le ungil el cheldecheduch a ua rasech el omekngar er a mesisiich el diak a rekdel el telungalek. Sel lebo er ngii a klautok er a uldasu, e molasem el mesmechokl er a mondai e lak bai di molasem el mo mesisiich er a teloketok. A redmeu a rengrir el chedal a telungalek a blak a rengrir el melisiich er a blekokeuii ma ungil el uldasu el mo er a tang ma tang er a chelsel a telungalek.—Kolose 3:8, 12-14.
8 A blekokeuii a ungil el blekeradel e rullid me ngmo soad el meruul a ungil el mo er a rebebil. Me kede mo osiik el soad el mo usbechall er a rebebil, e blechoel el melatk a uldesuir a rebebil, e olengeseu el ngar er a blekeradel el lekengei er ngii a rebebil er a rechad er a chelsel a telungalek. Me ngousbech er a klisichel a tang ma dirrek el uldekial a klisichir el rokui me bo lsebechir el mo olecholt er a blekokeuii el ngii a mo sebechel el ungil el olengchelel a telungalek er tir. E seikid, e ngdiak di lengai a klengeltengat er a Dios el merekong, e ngdirrek el ngar er a chelsel a ongdibel ma chelsel a buai, e te mo mengebkall er a Dios er a blekokeuii, el Jehovah el Dios.—1 Petrus 2:12.
Ochotel a Blekokeuii el Ngar er a Basio er a Ureor
9 A Kristiano, el bek el sils e ngmo oureor a chelebangel er a omelsemai er a ochotel a blekokeuii el mo er a rechad el ledak el oureor. A klakemeai er a delongelir a rechad el oureor a sebechel el mo uchul a telemellel a urerel a chad el oeak a chelebeldil ma lechub e ngmekngit el omerelled a kuk tang el ledak el oureor, el mo melemall a chisel a chad er a merredelir. (Olisechakl 4:4) Choua iseikid el taem e ngkmal diak el beot el bo dolecholt a blekokeuii. Me nguaisei, engdi ngkired el melemolem el melatk el kmo a blekokeuii el mocholt a di blechoel el melemalt el blekeradel el mocholt, ma mesiungel a Jehovah a kmal kirel el melasem el mo er sel tkurrebab el sebechel el meruul er a ungil el deleuill er ngii ma rechad el tir a telkib el meringel el dobengterir. A dolecholt el kmo kede omekerreu a tekoi el duubech el mo er a rechad a sebechel el olengeseu. Nglocha sebechem el olecholt el kmo ke kerekikl sel bo lsecher a chad el omdak el oureor ma lechub e ngar er ngii a chad er a blil el smecher. Ngmo lmuut er a di doker el kmo ngua ngerang ngii el chad el smecher me ngkmal ngar er ngii a ungil el rellii el mo er a chad. Chochoi, a Rekristiano a kmal kirir el osiik el mo melisiich er a kltarreng ma budech a lsekum ngii el tekoi a ultuil er tir. A lebebil er a taem e a bekokeuii el tekoi el medung el olecholt el kmo ngbetik a rengum e kerekikl el melatk a kmal sebechel el ngosuir a blekeradel el ngar er ngii.
10 A lebebil er a taem, e a merredel er a ureor a mo orrimel er a uldesuel el soal a rechad el ngar er a cheungel a bo loltirakl e locha mo soal a rokui el chad a bo loruul er a kmung ngerang el kirel a omelisiich er a omengull el mo er a beluu ma lechub e ngungil el klebesei el uchetemel a diak lengar er a Biblia. Sel lsekum a ukltkel a Kristiano a mo diak el kengei er ngii el mo teloi er a choua ike el omeruul e ngsebechel tia el tekoi el mo uchul e ngmo chelebangel a mesisiich el omelekoi el mla er a merredelel. Tiaikid el taem e ngdiak el ungil el taem el losaod el mo komakai el kmo ngera uchul me ngkmal cheleuid a bo loltirakl a uldesuel ngii el merredelel. E le ngar er a osengir a rechad el diak el Kristiano, e a tekoi el bo loruul er ngii a kmal melemalt el tekoi el kirel ruoll. (1 Petrus 2:21-23) Nglocha sebechem el oeak a blekokeuii e ke di smodii a uchul me ngdiak bo mteloi er tir. Lak molekoi a mekngit el omtechei a mekngit el omelekoi. Ngkmal ungil a Kristiano a bo loltirakl a ulekrael el medung el ngar er a Rom 12:18 el kmo: “Bo budech kemiu ma rokuil chad el mor sel sebechiu.”
Ochotel a Blekokeuii el Ngar er a Skuul
11 A lebebil e ngkmal klou el omeasem el kirir a rengeasek el mo olecholt a blekokeuii el mo er tirke el ledak el ngar er a skuul. A rengeasek a blechoel el sorir tirke el ledak el ngar er a skuul a lekengei er tir. A rebebil er a rengalek el sechal a blechoel el mo meruul a tekoi el kora olecholt a klisichir el lebebil er a taem e te mo omcheracheb er a rebebil e leng sorir a bo lechat er tir a rebebil er a rengalek er a skuul. (Matteus 20:25) E a rekuk bebil er a rengeasek a sorir el mo merael a chisir el kirel a duch er tir er a suobel, ma lechub e ngklekool, ma kuk bebil er a tekoi. Ma chelsel aikaikid el taem el leuaisei el olecholt a duch er tir, e te blechoel el mo diak lebekokeuii el mo er a rebebil er a rengalek er a skuul, e cheleuid el omdasu el kmo a leuaisei e ngrulleterir el mo ngar er a bab er a rebebil. A ngeasek el Kristiano a kmal kirel el mo kerekikl me ngdiak bo losuub a blekerdelir a ruaisei el chad. (Matteus 20:26, 27) A apostol el Paulus a dilu el kmo, a “bltikerreng a choba kllourreng ma blekokeuii” e dirrek el bltikerreng a “diak lolengesechekl er ngii e diak lomkuuk.” Me seikid, e ngngerechelel a Kristiano, el diak bo loltirakl a mekngit el kerebai er tirke el diak lolecholt a blekokeuii, e bai mo oltirakl a longelechel a Bades el kirel a omerellir el mo er a rechad el ledak el ngar er a skuul.—1 Korinth 13:4.
12 A rengeasek a dirrek el kirir el mo olecholt a blekokeuii el mo er a resensei er tir. Te betok el ngeasek a kmal sorir el omekseselk a rengrir a resensei er tir. Te omdasu el kmo ngmellomes a rengrir sel lak lolecholt a omengull el mo er a resensei el oeak sel loruul a tekoi el melemall a llechul a skuul. Ngoeak a ulekdakt ma ulecheracheb, e te orimeleterir a rebebil el mo obengterir. Sel lsekum a ngeasek el Kristiano a diak el kengei el mo obengterir, e tiang a mo uchul a omelenguul ma odechelakl el mo er ngii. A lechelebangel choua isel tekoi er a cherrengelel a rak el lengar er a skuul e a Kristiano a kmal mo measem a blakerreng er ngii el mo olecholt a blekokeuii. Engdi, kele mobes er tia el tekoi el kmo, ngkmal klou a ultutelel el doba blakerreng el mesiou er a Jehovah. Bo multerekokl a rengum el kmo ngulterekokl el mo ngosukau el oeak a chedaol el reng er ngii er a chelsel aike el meringel el taem er a klengar er kau.—Psalm 37:28.
Ochotel a Blekokeuii el Mo er a Tonari
13 A omkiei er a blai, ngchapartment, ngtrailer park, ma lechub e ngngii di el ker, me kau a sebechem el mdasu a rolel e ke mo olecholt a blekokeuii ma ulekerreuim el mo er a rechad el kiei el ngar er a bita er kau. Me nguaisei, engdi dirrek el diak lebeot el mekedmokl el tekoi.
14 Ke mekerang a lsekum a tonari er kau a mengetukl er kau el bliongel er a klechad er kau, ma lechub e ngbeluam, ma lechub e ngklechelid er kau a uchul? Ke mekerang a lsekum ngmekngit a omerellir el leko er kau a lebebil er a taem ma lechub e te kuk di olechib a mederir er kau el di ua lak mngar er sei? A dosiou er a Jehovah, e ngklou a ultutelel el dolecholt a blekokeuii el mo er sel ulterekellel el sebeched el ochotii. Ke mo mocholt el ngodech, me ke mera el mo uchul a odanges el mo er a Jehovah—el ngii a kmal ungil el kerebai el kirel a blekokeuii. Ngkmal diak modengei el kmo alta ngmo sebechir a rechad el kiei er a bita er kau el mengodech a blekerdelir el blekokeuii er kau a uchul. Alta nglocha dirrek el sebechel el mo mesiou er a Jehovah el omerellem a uchul.—1 Petrus 2:12.
15 Kede mekera e olecholt a blekokeuii el mo er a rekiei el ngar er a bita er kid? A kot e ngoeak a omeruul el mocholt er a chelsel a telungalek er kid el derta ma derta er a chelsel a telungalek a olecholt a rodech er a reng er a omerellir. Aikang a sebechir a retonari er kid el mes. A lebebil er a taem e ngkuk locha sebechem el rullii a kmung ngerang el kirel a tonari er kau. Molatk er tia el tekoi el kmo a blekokeuii a belkul a kmo kede mera el semeriar el mo meruul a tekoi el kirel a klungiolir a rebebil.—1 Petrus 3:8-12.
Ochotel a Blekokeuii el Ngar er a Urered er a Berkel a Klumech
16 A blekokeuii a kirel el mocholt el blekerdelel a urered el Kristiano er a berkel a klumech sel dorael el blak a rengud el osiik er a rechad er a rekeblirir, ma urerir, ma lechub aike el blil a kldibel er a buai. Ngkmal kired el diak dobes el kmo kede omtechei er a Jehovah, el ngii a kmal di blechoel el bekokeuii.—Exodus 34:6.
17 Ngera uldimukl er a blakerreng er kau el mo olecholt a blekokeuii er a chelsel a urerem er a berkel a klumech? El ua tia el olechotel, a lsekum kau a ulemerk er a klumech er a tkul a rael, e mochotii el blekokeuii el oeak sel di lekekedeb a cheldechedecham e lungil a omerellem el melatk er a chad el bocha mongedecheduch er ngii. Aike el rolir a rechad er a tkul a rael a blechoel el meseked er a rechad el melengelakl, me bo mkerekikl me lak molenget er a rolir a remerael. Ngdirrek, el sel kuk momerk er a klumech er aike el basio er a ureor, molecholt a blekokeuii el oeak sel di lemekekedeb a omolekoi, el diak mobes el kmo a ruureor a stoang a kirir el lomes er a rechokiak er tir.
18 A omoldingel a obliil, e molecholt er a llomeserreng. Lak mngar er a tuangel er a obliil el kmal mo meketeket, e ileakl sel lemekngit a eanged. Ngsebechem el mtebengii a kmo ngkal chad a mla mo kekerei a rengul ma lechub e ngmla mo checherd a rengul er kau? Alta e ngngar er a beluu el omngar er ngii e a Resioning er a Jehovah a kmal mekudem el mo oldingel er a osisiu el basio. A lsekum nguaisei, e molecholt a ungil el blekeradel, el blechoel el bekokeuii e ungil a omelekingem. (Osisechakl 17:14) Molasem el mo medengei el kmo ngmla er ngii a ungil el uchul e ngike el chad er sel blai a dimlak el lorrenges er sel sils. E modengei el kmo a ta er a odam ma lechub e ngodos er kau el Kristiano a lmuut el mo er sel blai er a di kesai el taem er a medad. Ma lsekum ke miltik er a chad el mle mekngit a omelekingel, e bo er sel tkurrebab el klisichem el olecholt a blekokeuii. Lak lebo leklou a ngerem el mengedecheduch, ma kele bo lemekngit a osengem, e bai mongedecheduch el oba delemedemek. A bekokeuii el Kristiano a diak el soal el ua lebekokeuii ngika el chad er a blai el mo mengaititekangel. (Matteus 10:11-14) E le lta ta er a klebesei e ngii el chad a sebechel el mo rongesii tia el ungil el chais.
Ochotel a Blekokeuii el Mocholt er aike el Miting er a Ongdibel
19 Ngdirrek el kmal klou a ultutelel el dolecholt a blekokeuii el mo er a rekldemed el ngar er a klemerang. (Hebru 13:1) Kid el teloi er a klodam el meliuekl er a beluulechad el rokir a uchul, e ngkmal klou a ultutelel el dolecholt a blekokeuii er a delongeled.
20 A lsekum a ongdibel er kid a ousbech er a osisiu el Kingdom Hall ngii ma tang, ngteblong, ma lechub e ngkuk betok el ongdibel, e ngkmal klou a ultutelel el molecholt a blekokeuii el mo er tirke el ngar er aike el bebil er a ongdibel el olecholt a omelengmes el mo er tir. A klakemeai a diak el sebechel el mo uchul a kltarreng ma klaingeseu er a omeruul sel mongedmokl a taem el kirel a usbechel a Kingdom Hall el kirel a miting ma lechub a ureor el kirel a omengedmokl ma lechub e ko mo omekbeches a klekedellel ngii el blil ongdibel. Altang mo kakebosech a uldasu engdi bo blechoel el olecholt a blekokeuii ma bltikerreng er a bek el taem. E a omuaisei e a blekokeuii a mo mesisiich, ma Jehovah a ulterekokl el mo omekngeltengat aike el ungil el uldesuiu el molecholt el mo er a rebebil.
Molemolem el Olecholt a Blekokeuii
21 A blekokeuii a blekeradel el sebechel el remutech a rokui el telengtengil a klengar er kid. Me ngkmal kirel el rullii el mo ta er a uchetemel aike el blekerdeled el ua Kristiano. Ngkirel el mo blekerdeled el olecholt a blekokeuii el mo er a rebebil.
22 Me kid el rokui bo lsebeched el olecholt a blekokeuii el mo er a rebebil me bo lsebechel a derta ma derta er kid el mo oltaut a tekingel a apostol el Paulus sel ledu el kmo: “Misei e ko mlengilt ra Dios, el chedaol el betik ra rengul, mo moubail ra reng ra klechubechub, ma blekokuii, ma klengariou, ma delemedemek, ma kllourreng.”−Kolose 3:12.
Kau Ke Dirk Melatk
● Ngera rullii me ngmo meringel er a Kristiano el mo olecholt a blekokeuii?
● Ngera uchul me ngklou a ultutelel el dolecholt a blekokeuii er a chelsel a telungalek er kid?
● Ngera bebil er a omelsemai el kirel a ochotel a blekokeuii sel dengar er a skuul, ma doureor, ma dolecholt er ngii el mo er a rekiei er a bita er kid?
● Ka msodii el kmo ngmekera Krsitiano e sebechel el olecholt er a blekokeuii er a chelsel a urerel er a berkel a klumech?
[Study Questions]
1. Ngera me ngsebechel el mo meringel el dolecholt a blekokeuii?
2. Ngera el omelsemai a sebechel el tomellii a ochoted er a blekokeuii?
3. Ngera el meringel el mondai el lechelebangel a rechad a sebechel el melasem er a kengei er tir el mo olecholt a blekokeuii?
4. Ngera el cheleuid el uldasu a bo lolab a rebebil sel bo lolebedebek er a ochotel a blekokeuii el mo er a rebebil?
5. Ngera bebil er aike el telengtengil a klengar el kmal kired el ousbech er a blekokeuii er ngii?
6. Ngera uchul ma blekokeuii er a chelsel a telungalek a klou a ultutelel, e mekera dolecholt er ngii?
7, 8. (a) Ngera el blekeradel a kired el mengeroid er kid er ngii a lsekum ngsoad el mo olecholt er a mera el blekokeuii er a chelsel a telungalek er kid? (b) Ng mekera e a ungil el rolel a cheldecheduch a smisichii a okul a telungalek? (c) Ngmekera omolecholt er a blekokeuii er a chelsel a telungalek er kau?
9, 10. Ka mosaod a bebil er a mondai el sebechel el mo duubech er a chelsel a basio er a ureor, e mochotii a uldesuem er a kmo ngmekera bo losmechokl ngii el mondai el oeak a blekokeuii?
11. Ngera el omelsemai a lechelebangel a rengeasek sel lolecholt a blekokeuii er tir el mo er a rebebil er a rengalek el ledak el ngar er a skuul?
12. (a) Ngera uchul me ngsebechel el mo uchul a omelsemai el kirir a rengeasek sel bo lolecholt a blekokeuii er tir el mo er a resensei? (b) A rengeasek ngsebechir el omes el bedul techang el kirel a ngeseu a lsekum te mo morimel el mo diak lebekokeuii?
13-15. Ngera sebechel el torbengid er a ochotel a blekokeuii el mo er a rekiei er bita er kid, e mekera dosmechokl aika el omelsemai?
16, 17. (a) Ngera uchul me ngklou a ultutelel a ochotel a blekokeuii er a chelsel a urered er a berkel a klumech? (b) Ngmekera blekokeuii e mocholt er a chelsel a kakerous el blekeradel er a berkel a klumech?
18. Ngera urerel a llomeserreng er a chelsel sel dolecholt er a blekokeuii sel domerk er a klumech?
19, 20. Ngera uchul ma blekokeuii a usbechall er a chelsel ongdibel, e mekera dolecholt er ngii?
21, 22. A doltirakl er a Kolose 3:12, e ngera kired el tuib a rengud el mo meruul er ngii?
[Picture on page 12]
A blekokeuii el mocholt er a rebek el chad er a chelsel a telungalek a sebechel el smisichii a kltarreng ma klaingeseu
[Picture on page 13]
Ngsebechem el ochotii a blekokeuii sel bo lsecher a chad el omdak el oureor ma lechub e ngchad er a blil
[Picture on page 14]
A Jehovah a olengeseu er tirke el outekangel a omelenguul e melemolem el blak a rengrir el olecholt a blekokeuii
[Picture on page 15]
A dolengeseu er a metacherbesul el chad el kiei er a bita er kid a ochotel a blekokeuii