Ngera Uchul ma Resioning er a Jehovah a Di Melemolem el Oldingel er Kau?

EL ILIUEKL er a beluulechad el rokir, e a Resioning er a Jehovah a merael a chisir e le te blechoel el meruul er tia el ureor el oldingel obliil. A rebebil er a rechad a rrau a rengrir el kmo ngera uchul ma Resioning a melemolem el di oldingel er tir, el tokubets a lsekum e te ulechotii a telkib el klemeriarreng er tir el kirel sel klumech el lomerk er ngii a Resioning. A teblo el babier el mla er a Russia a sebechel el mo smodii a uchul.

“A mera er ngii,” ngmelekoi a Marsha, el teruich ma etiu a rekil el redil er a Khabarovsk, “e a ngar er a mong, e ak millasem el chemiis er a Resioning er a Jehovah.” Engdi, uriul er a longuiu a bebil el babier el lurruul a Resioning er a Jehovah, e ngmillodech er a blekerdelel. “Aike el rokui el kchiluiu er aika el babier a kmal mle ungil e omekllomes,” ngmeluches a Marsha, “engdi a kot el klou a ultutelel a kmo, a tekoi el ngar er a chelsel aika el babier a rullau me ke mo omes er a beluulechad el ngar er a ngodech el rolel. Ak milekekokak el mocha melechesuar er a uchul ma rechad a ngar er ngii a moktek er a klengar er tir.”

E kuk ngar er sel mats er a Ussuriysk, el bekord el okeim el mael el diluches er a Vladivostok, e a Svetlana a milluches el kmo: “Ak dirk mlo omuchel el menguiu er a The Watchtower ma Awake! Aika el babier a kmal dousbech er a chelecha el taem er kid. Ngmera el dmeu a renguk er aika el suobel. Ngmera el ungil, e ngolisechakl, e omekllomes. Mesulang. Ko mera el mesulang el ngar er a beluulechad e meruul er tia el ungil el usbechall el ureor.”

A Resioning er a Jehovah er a beluulechad el rokir a mui el oumerang er sel klou a ultutelel el keril a apostol el Paulus el kmo: “A lak chomerk e te mekera e remenges?” (Rom 10:14) Me ngera me ngdiak mongoit a di sese el bung el orrenges sel lluut el eko el oldingel er kau a Resioning er a Jehovah? Kau me ke dirrek el locha mo dmeu a rengum er tia el klumech er a ongelaod el ngar er a Tekingel a Dios, el Biblia.