A Rael el kirel a a Kemanget el Klengar el Mui er a Deurreng

“A REBEK el chad a sorir a bo lekemanget a klengar er tir; engdi ngdiak a chad el soal el mo chuodel.” Tia kora belkul a tekoi. A rebetok el chad el mochu retire er a urerir a oureng er a taem el tir a mededesang e dirrek el mekesai a ngerechelir. Engdi, te kora bekikl a bo lak a moktek er tir e ua lekora dikea a ultutelir el chad. Te dirrek el kora suebek a rengrir a bo lak a chad el mo omes er tir, ma bo lak a deurreng er tir, ma bo lemechitechut a bedengir.

Ma leuaisei, e ngerang a bertelel a deurreng er a klengar? A rungil el sechelei ma telungalek el kaubltikerreng a mo uchul a deurreng el mo er a remekekerei ma remeklou el chad. Engdi aike el sebechir a rechad el remuul el kirel a klengar er a remechuodel a diak el di likeikid a meklou a belkul e lungiang. A kuk lmuut el klou a ultutelel a kmo a klou el chad ngngera sebechel el meruul el mo er a rebebil.

A kemanget-el-omesuub er a 423 el mechuodel el obekel a ullecholt el kmo “sel dolengeseu er a rekuk bebil er a rechad a sebechel el mengemanget er a klengar er kid.” A Stephanie Brown, el mirruul er tia el omesuub, a mesaod el kmo: “Aika el omesuub a olecholt el kmo a klungiaol el dengai er a delongeled kid ma rebebil a diak el di el seikid a kot el ungil e lemerekong; e ngbai oeak aike el sebeched el merous el mo er tir. Choua ika el omerous a uldimukl er ngii a omengetmokl er a blai, ma obetiterir a rengalek, ma ngar er a oderuchel, ma rolel a olidiuul, ma lechub el orrenges sel longedecheduch a chad.

Ngbekord el 2,000 el rak er a mla memong, e a Jesus Kristus a dilu el kmo: “A dorous e ngbai ngeltengat ra dolai.” (Rellir Ar Apostel 20:35) A rolel el sebeched el mo nguu a kemanget el klengar el mui er a deurreng a diak lultuil er a klou el udoud el ngar er a bank ma lechub a ukeruul ma omengang el sebeched el olekebai er a cheluodel. Ngbai, mo er ngii sel deblechoel el meruul a ungil el melenget a temed, ma klisiched, ma klisichel a bedenged el melisiich a klengar er a rekuk bebil.

Engdi, kede ousbech er a lmuut el betok er a di dorous e bocha lsebeched el osebelid er a cheluodel, ma secher, ma kodall. Ngdi ta el Rengedel a Dios a mo olekngemed aikaikid el tekoi. Ngar er a cheungel a omerreder er ngii, e a secher a mo diak ma “kodall me ngmo diak.” (Chocholt 21:​3, 4; Isaia 33:24) Me nguaisei, a rebekongesenges el chad a mo kiei el mo cherechar el ngar er a deurreng el ngar er a paradis el chutem. (Lukas 23:43) A Resioning er a Jehovah a kmal dmeu a rengrir e le ngsebechir el merous el mo er a rebebil tia el tekoi el mlengai er a Biblia el kirel a kemanget el klengar el mui a deurreng er ngii.