Ngera el Klechelid a Kirem el Ngiltii?

‘A KAKEROUS el klechelid a di kakerous el rael el mo er a osisiu el turrekong. A mera er ngii, ngngar er ngii a di ta el Dios, adang uaisei e ngdiak?’ Tiang a uldesuir a rebetok el chad el tirke el omdasu el kmo a bo dechedal a klechelid a kmal klou a ultutelel, engdi ngdiak leklou a belkul a kmo ngera el klechelid a bo lolilt a chad el mo oltirakl er ngii.

Sel dekot el omdasu er ngii, e tia el tekoi a kora klemerang, e le mera er ngii e ngngar er ngii a di ta el Dios, el ngike el Kot el Mesisiich. (Isaia 44:6; Johanes 17:3; 1 Korinth 8:​5, 6) Engdi, ngdiak lsebeched el mengemikr er aike el meklou el klekakerous​—⁠ma ike el ketouch el osisechakl​—⁠el ngar er a chelsel aike el betok el kakerous el klechelid el tir a melekoi el kmo te mesiou er ngike el mera el Dios. Ngkmal klou el klekakerous er a omerellir, ma klaumerang er tir, ma osisecheklir, ma ike el ngerechelir. Ngkmal klou a klekakerous er a delongelir me ngkmal meringel er tirke el ngar er a chimo el klechelid ma lechub e ngcheldebechel el mo medengei ma lechub el ngkongei a osisechakl ma klaumerang er a rekuk bebil.

Engdi ngar er a kuk bitang, e a Jesus a dilu el kmo: “A Dios a reng, me tirikel meluluuch er ngii a kirir el meluluuch er ngii loba reng ma klemerang.” (Johanes 4:​24) A omengull el mo er a Dios el oba klemerang ngsebechel el mo er ngii a betok el ketouch el uldasu el kirel a Dios el kmo ngii ngtechang, e ngera ike el moktek er ngii, e ngerang a sel soal el omengull? Ngmelemalt a doumerang el kmo ngdiak a ultutelel er ngike el Kot el Mesisiich el Dios a rolel a dongull er ngii?

A Remera el Kristiano er a Ngar er a Mong ma Chelechang

A lebebil er a taem e a Rekristiano er a kot el dart el rak a mla er ngii a kakerous el uldesuir el kirel a bebil er a tekoi. El ua itiang, ngmelekoi el kirir tirke el ngar er a Korinth, e a apostol el Paulus a millekoi el kmo: “Rudam er ngak, te mla ouchais er ngak ar chad ra blil a Kloe el kmo ngngarngii a klaititekangel ra delongeliu. El ngiil tekoi a kmo ko mla mo katekoi el kmo, ‘Ngak a chedal a Paulus,’ ma kmo, ‘Ngak a chedal a Apollos,’ ma kmo, ‘Ngak a chedal a Kefas,’ ma kmo, ‘Ngak a chedal a Kristus.’ ”​—1 Korinth 1:​11, 12.

Choua ike el klaititekangel ngdimlak a ultutelel er a osengel a Paulus? A derta el chad te di uleltirakl er a uldesuir el kirel a osobel? Ngkmal dimlak leuaisei! A Paulus a milengelechel el kmo: “E ngak, e rudam, a mengelechel er kemiu loeak a ngklel a Rubak er kid el Jesus Kristus el kmo, le bo lta ikel mongedecheduch e bo lak chomelekiakl ra delongeliu, e bai bo lta rengmiu el ta uldesuiu el mo kadibuk.”​—1 Korinth 1:​10.

Engdi, a kltarreng er a klaumerang a diak lsebechel el mo meketmokl el oeak a orrimel. Ngmo meketmokl sel lebo lorritel a tekoi a derta el chad e mo ngmai e kongei er a osisiu el uldasu. Me  nguaisei, a omesubel a Tekingel a Dios er a derta el chad ma mera el urungulel el mo oltaut aike el bla lsuub a kmal klou a ultutelel el tekoi a bo doldeu a rengud er sel kltarreng el lulsaod er ngii a Paulus. Ngsebeched el metik er choua itia el kltarreng? El ua dulemes er sel uchei el suobel, a Dios a di mle blechoel el ousbech er a rechedal el ua ta el cheldebechel. Ngsebeched el dongchii sel cheldebechel er a chelecha el sils?

A Klungiolel a Ungil el Klausechelei

Ngike el milluches a psalm el David a mle ta el oker el kmo: “Rubak, ngtecha subed er ngii el mo kiei ra templo er kau? Ngtecha disubed er ngii el kiei ra Sion, el chedaol bukl er kau?” Tiang a kmal mle klou a ultutelel el ker. Ma David a ulenger el kmo: “Ngkel chad el olengesenges ra Dios ra rokuil tekoi, e blechoel di meruul a melemalt; ma tikingel a klemerang e ulterekokl.” (Psalm 15:​1, 2) A melemalt el klemedengei er a Biblia a sebechel el ngosuir a chad el mo dongchii sel klechelid el oltaut aike el llechul a Dios. E sola, e a bo lechedal sel cheldebechel, e a chad a sebechel el mo oldeu a rengul er a ungil el klausechelei el obengterir tirke el mengull er a Dios el ngar er a kltarreng ma “reng ma klemerang.”

A Resioning er a Jehovah a mla ochotii el kmo ngsebechel el mo er ngii a kltarreng er a klaumerang ma omeruul el ngar er a delongelir a rechad el ngar er tia el diak a kltarreng er ngii el beluulechad. Ngar er a delongelir e te ngar er ngii tirke el mle chedal a betok el dart el kakerous el klechelid ma bliongel er a rechad. A rekuk bebil el Sioning a mle chad el tirke el diak loumerang er a Dios a lak lesang ma tirke el dimlak loumerang el kmo ngar er ngii a Dios. Ma lmuut el bebil er tir a dimlak lomdasu el kirel a klechelid. Ma rechad a tilobed el ngar er aike el kakerous el klechelid, ma siukang, ma uldasu e chelechang e te oldeu a rengrir er a kltarreng er a klechelid el diak desang er tia el beluulechad er a chelecha el taem.

A uchul choua itia el kltarreng a ngar er a Tekingel a Dios, el Biblia. Engdi, a Resioning er a Jehovah a medengei el kmo ngdiak lsebechir el orrimel er a rechad el mo oltirakl er tir. Engdi ngkmal dmeu a rengrir er a techellir el mo melisiich er a rebebil el mo mesuub er a Biblia me bo lsebechir el ousbech er a mesisiich el omekedecheraol sel lolilt el kirel a rolel a omengull er tir. Ngoeak itia el rolel, e a lmuut el betok a mo sebechir el ngmai aike el klungiaol el mo er ngii sel dongull er a Dios el “loba reng ma klemerang.”

A Ottmar a kongei er tia el uldasu. Ngmlukeroul er a chelsel a telungalek el mle Katolik el ngar er a beluu er a Dois, e di mle kekerei e ngmlo diak lebo er a eklesia. Ngmesaod el kmo: “Sel kbo er a eklesia, e sel ktobed e ngdirk bachachau a uldesued el di ua sera bo ktuu.” Engdi, ngulerreked er a klaumera er ngii el mo er a Dios. Ma uriul e ngmilengedecheduch er a Resioning er a Jehovah e mlo ulterekokl a rengul el kmo te mera el mesiungel a Dios. Ngmilsa klungel a ultutelel a bo lobengterir. Chelechang e ngdmu el kmo: “Chelechang e a kuureor el obengkel tia el cheldebechel el meliuekl er a beluulechad el rokir, e a dmeu a renguk er a budech er a uldasu ma reng. Ak mungeseu el melai a mera el klemedengei er a Biblia. Tiaikid a kmal klou a ultutelel el kirek.”

A Omengemedaol el Mo er Tirke el Dirk Osiik

A Resioning er a Jehovah a mesuub er a Biblia el obengterir a rechad el diak locheraol el ngosuterir el mo ngmai a dmolech el klemedengei el kirel aike el soal a Dios a bo doruul. Tia el mlo merek el rak, ngmla er a ngii a average, er a 5,726,509 el ildisel aike el omesubel a Biblia er a bek el sandei el obengterir a derta el chad ma lechub a rebetok el chad. Choua itia el osisechakl er a Biblia a ngilsuterir a betok el milliol el chad el mo nguu a mesisiich el omekedecheraol el mo ungil el melilt er a rolel a omengull er tir. Ke dirrek el sebechem el mo mesuub el kirel aike el soal a Dios el llechukl er a chelsel a Biblia. E sola e ngmo sebechem el melilt.​—Efesus 4:​13; Filipi 1:9; 1 Timoteus 6:​20; 2 Petrus 3:​18.

A lsekum ngsoam el mo odeuir a rengul e Dios, e ngkmal klou a ultutelel a obo mchedal a klechelid​—⁠engdi ngdiak el ngii di el klechelid. Engdi, ngkirem el mo melilt er a klechelid er kau el ousbech a melemalt el klemedengei er a Biblia, el diak loeak a di uldesuem ma lechub aike el lolekoi a rechad el kirel a Biblia. (Osisechakl 16:25) Mosuub aike el tekoi el kirel a mera el klechelid. Momekesiu er ngii er a klaumerang er kau. E sola e molilt e kung.​—Duteronomi 30:19.