A Omelsemai Er A Ulekurulir a Rengalek Er A Chelecha El Taem

NGMOCHA mo chosoi, ma merredel er a blil a blengur a mengetmokl el mo mengesimer er a blil a siobai e mo remei. E sola e a reteru er a redil ma ngalek el sechal a mle soiseb e omuus a kelir. Ngii el merredel a kmal mesaul a bedengel me ngkora soal dmu er tir el kmo ngmla mengesimer, engdi ngkilengei el remuul a kelir. Me sera lechadecheduch e lomengur tirka el teru el redil, e ngika el ngalek a mediderurt er a chelsel tia el blil a blengur, lorebet a cookies er a ulaol e oba chochil el merderd. A delal ngii el ngalek a di klikmechur, e dimlak lolekebai er a ngelekel me lak leuaisei. Me sera lorola tirka el okiaksang, e ngika el mesaul a bedengel el merredel a luueta el mocha mengetmokl er tia el kikiongel el ulaol.

Kau a ulterekokl el medenge el kmo, tia el blekeradel a olecholt el kmo ngar er a betok el telungalek e a omellach er a rengalek a diak el ungil el meketmokl. E ngar er ngii a betok el uchul me tiang a uaisei. A rebebil er a rechedam ma rechedil a mechititerir a rengelekir me te meruul aike el sorir, e le te omdasu el kmo a rengalek a kirir el mukeroul el oba reng er a ilmokl. Ma lechub te mechesang, ma rechedam ma rechedil a diak lechoit a taem el obengterir a rengelekir e lomesterir aike el ousbech el omellach. A rebebil er a rechedam ma rechedil a omdasu el kmo a skulir a rengelekir a kot el klou a ultutelel el tekoi, me te mesterir a rengelekir a diak a telkelel el ilmokl a lseku;m e te melemolem el ungil a teng er tir er a skuul me bo el sebechir el soiseb er a merael a chisel el daingak.

Engdi, a rebebil a kmo aike el meklou a ultutelel el tekingir a rechedam ma rechedil ma buai el dirrek a kirel el mo mengodech. Te mesaod el kmo a rengalek a mocha meruul a bek el bedengel a mekngit el omeruul ma uldikel er a skuul a di merael el mo klou er a bek el sils. Me sei a uchul, ma principal er a ta el skuul er a Seoul, Republic of Korea, a melekoi el kmo a osisecheklel a ngalek el mo melodech a blekerdelel el mo ungil a kirel el mo kot el tekoi el doureor el kirel. Ngmillekoi el kmo: “Uriul er a omomekeroul er a ungil el blekeradel e ngmocha kirel el medalem a ungil el klemedengei.”

A rebetok el chedam ma rechedil el sorir a rengelekir a lebo er a daingak me bo lungil el besul a klengar er tir a mengemikr a uleklatk. A lsekum e ke chedam me a chedil, ngsoam a ngelekem a bo leua ngera el chad? Ngsoam a ngelekem a bo leklou el chad el orreked a tekoi er a kldung ma ngerachel? Ngsoam a bo lechad el melatk er a rebebil, e sebechel el melodech a blekerdelel a klengar er ngii el oltirakl aike el meliuekl er ngii, e dirrek el oba ungil e melemalt el reng? A lsekum e nguaisei, e moutekangel el omtab er tia el oeak uruil el suobel.