Bo Melemalt El Omes Er A Kerresel A Sengk Er A Klengar

“A rsechel ngiil Jesus a . . . sebechel bai kmikiid a ukltked el choroid a ulekoad lurered e le rellid el mo mesiou ra dingar el Dios.”​—HEBRU 9:​14.

ALSEKUM a rechad a uleker er kau el kmo ngtela cheral a klengar er kau, e nglocha mo dmung telang? Kid a omes a klengar el kmal mekreos​—⁠a leklengar er kid ma leklengar er a rebebil er a rechad. E a olechotel tiang, kid el mo omes er a toktang sel kirel a ulekerreu sel bo desecher ma dirrek el blechoel el ngar er a kensa el omekerreu a klisichel a bedenged. Ngsoad el di ngar e mesisiich a bedenged. Ngmo lmuut er tirke el mechuodel ma dirrek el tirke el sechudel el chad me ngdiak lolatk el mad e te bai sorir el melemolem el di ngar.

² Sel osengem er a kerresel a klengar er kau a ngar er ngii a lrellii er a deleuill er kau ma rebebil. El di ua tia el olechotel, a Tekingel a Dios a melekoi el omekrael el kmo: “Morrenges ra demam; ele demam a uchul e ke chad. Sel le chudela delam, e mochotii chomereng el saul er kau el mor ngii.” (Osisechakl 23:22) A “dorrenges” a diak el belkul a kmo ngii di el be ltuu er a dingad a oto er a tekoi el mildung; e le tia el omelekoi a belkul a kmo kede remenges a tekoi e mo oltirakl. (Exodus 15:26; Duteronomi 7:12; 13:18; 15:5; Josua 22:2; Psalm 81:13) A Biblia ngdmung ngera uchul me ngkired el orrenges er a demad ma delad? Ngdiak di dorrenges er tir e le tir el meklou er kid e betok a duch er tir el merekong. Sel uchul el beskid a bades a kmo “ele demam a uchul e ke chad.” Ngar er ngii a bebil er a oidel a Biblia el loleiud er tia el bades el kmo: “Morrenges er a demad el ngii a milskau a klengar.” Me seikid a uchul, ma lsekum ke omes er a klengar er kau el kmo ngmekreos, e ke ulterekokl el mo melechesuar er a klou el ngerachel el bedul ngike el ngii a uchul ngii el klengar er kau.

³ Ngulterekokl el lsekum ke Kristiano, e ke omes el bedul a Jehovah el kmo ngii a ngike el kot el ngar er a uchei el uchelel a klengar. Ngoeak ngii e “ngmlo er ngii a klengar” er kau; me ngsebechem el “mengitengtik,” e meruul a tekoi el oltirakl er aike el omolechesuar; me chelechang e kau a “ngarngii” e sebechem el omdasu e melib a tekoi el kirel a ngar er a medam, el uldimukl er a diak a ullebengelel el klengar. (Rellir Ar Apostel 17:28; Psalm 36:9; Olisechakl 3:11) Ma doltirakl er a Osisechakl 23:22 e ngkmal melemalt el tekoi a “dorrenges” er a Dios el oba blekongesenges, el soad el melai a klemedengei e mo meruul a tekoi el oltirakl a uldesuel el kirel a klengar e bai diak doltirakl a di uldesuir a rechad.

Mochotii a Omengull el Mo er a Klengar

⁴ Ngdi mle uchelel a klengar, e a Jehovah a mileketeklii el kmo ngdimlak lekengei el di mechititerir a rechad me lousbech a klengar el di ngar er aike el sorir. Nguleak a mesisiich el chelechei, e a Kain a ulekngemedii a diak a telemellel el klengar er a ochellel, el Abel. Omomdasu e a Kain ngmla er ngii a llemeltel el mellib a ouaisei el tekoi el kirel a klengar? A Dios a dimlak lomdasu el uaisei. A Kain a mlokedong el mo er a kerrekeriil el kmo: “Ngera me ke mlor chouaisei el kdekudel tekoi? A rsechel chochellem a choldiu el ngara chutem el mer ngak el soal melaitechei.” (Genesis 4:10) A resechel a Abel el mla er a chutem a ulemtechei er a klengar er ngii, el mla nguemed, me ngua llangel el mo er a Dios el lolengit a omelaitechei.​—⁠Hebru 12:24.

⁵ Uriul er a ieleb, e a klengar er a klechad a liluut el omuchel el mla er a redi mle teai el chad. Ngar er a chelsel a tekingel el mo er a klechad el rokir, e a Dios a ullecholt a lmuut el betok el kirel a osengel er a klengar ma rasech. Ngmillekoi el kmo a rechad a mla mo subed el longa techel a charm, engdi mla er  ngii a ulterekokl el llechul el ulemekrael a omerellir el kmo: “Chelechang e ngsebechem el mengang a rokuil charm ma dellomel; ele kmla meskau el kirel kelem. Ngarngii a tal kall el diak le kiriu el menga er ngii, el ngiil kall a techel a charm el ngarngii a rsechel, ele nguchul a klengar.” (Genesis 9:3, 4) A rebebil er a rechad er a Judea a ulemes er tiang el kmo ngmle belkul a kmo a rechad a diak longang a techel ma rsechel a charm el dirk ngar. Engdi uriul e ngulebeketakl el kmo a Dios a ullekebai a omenga el rasech el mo olengeseu ma lechub e te melisiich a klengar. Ngdirrek, el sel llechul el okiu a Noah a mle klou el bakes el kirel a oketmeklel a ngar er a bab el moktek er ngii el kirel a rasech​—⁠el ngii el moktek a mo uchul ma rechad a mo sebechir el mo er ngii a techellir el mo kiei el diak a ullebengelel.

⁶ A Dios a millemolem el melekoi el kmo: “A lsekum ngarngii a chad el nguu a klengar er kemiu, e ak mo omals er ngii loba kodall. Ma ngii dil charm el mekodkemiu a bo kukodir, e ngak a mo omals ra ngiidil chad el ngarngii ra rengul chomekoad er chodam er ngii. A le ngarngii a chad el mekodir a chad el ngarngii ra rengul, e ngmo mokoad ra tara chad. Le chad a mirruul el okesiul a Dios.” (Genesis 9:5, 6) Me ngsebechem el mesang el kmo ngngar er tia el tekoi el mildung el mo er a telungalek er a klechad el rokir e a Dios a ulemes er a rsechel a chad el kmo ngulemtechei er a klengar er ngii. Ngike el Ulemeob a mesterir a rokui el chad a klengar, me ngdiak a ngii di el chad el kirel el melai er ngii el klengar, el ngii a mutechei er a rasech. Me ngdi ua Kain, a lsekum ngngar er ngii a chad el rullii a koad el chad, e ngar er ngii a llemeltel ngike el Ulemeob el “mo omals” a klengar el ngii, e lmuut el nguu.

⁷ Ngoeak a tekoi el ledilung, e a Dios a ulemekrael er a klechad me lak bo lemeterekakl a rasech. Ngmla ta el omolebedebek el kmo ngera uchul ma Dios a ulemesterir ouaisei el ulekrael? Chochoi, ngera mle uchul ouaisei el osengel a Dios el kirel a rasech? A nger er tiang a uldimukl er a ta er a kmal klou a ultutelel el osisechakl er a chelsel a Biblia. Alta e a betok el klechelid a mengemikr er ngii el osisechakl, engdi tiang a kmal cherrengul ma lechub a dodai er a klemechir a Rekristiano. Ngera tia el osisechakl, e mekera e a klengar er kau, ma tekoi el molib, ma omerellem el uldimukl er ngii?

Rasech​—⁠Ngngera Melemalt el Usbechellel?

⁸ A Jehovah a milsaod el mo komakai el kirel a klengar ma rasech er sera lebesterir a Rengalek er a Israel a llach el ulekiu a Moses. Nguleak tia el rolel, e ngua lliluut el olengeriakl er a okedmeklel a moktek er ngii. Kom locha medenge el kmo nguleak a Llach e ngmle kirir el oldars a tenget el mo er a Dios, el ua kokumots, ma cheluch, ma bilong. (Levitikus 2: 1-4; 23:13; Ulecherangel 15:1-5) Engdi dirrek el mla er ngii a tenget el charm, el Dios a millekoi el kirel kmo: “A klengar er a bek el outeliil a ngar a rasech ma uchul ma Rubak a dilu el kmo a rokui el rasech a mo moitel er a olengetongel el mo melai a kngterir a re chad el mengeroid. Ma rasech el ngii a klengar a melai a klengit el mo cheroid. Misei e ak mla dmu er a re chad er a Israel el kmo, ng diak a ta er kemiu . . . el mo menga rasech.” A Jehovah a dilechelii el kmo, a lsekum ngar er ngii a ngii di el chad, el chad er a skel a charm ma lechub e ngchad er a sers, el mekodir a charm el kirel el mo kall, e ngmle kirel el chochis a rsechel el mo er a chutem e dmakl. A chutem a deruchellel a chochil a Dios, ma loiitel a rasech el mo er a chutem, e ngii el chad a olecholt el kmo a klengar a lolluut er ngii el mo er Ngike el Milskid a Klengar.​—⁠Levitikus 17:11-13; Isaia 66:1.

⁹ Tia el llach a dimlak el kora dimle klou a belkul el siukang el lurruul er ngii me lak a belkul el me er kid er a chelechang. Ke milsang el kmo ngera uchul ma Rengalek er a Israel a dimlak longang a rasech? A Dios a dilu el kmo: “Misei e ak mla dmu er a re chad er a Israel el kmo, ng diak a ta er kemiu . . . el mo menga rasech.” E ngera mle uchul? E le “Rubak a dilu el kmo a rokui el rasech a mo moitel er a olengetongel el mo melai a kngterir a re chad el mengeroid.” Ngsebechem el mesa el kmo tiang a meskid a klemedengei er a kmo ngera uchul ma Dios a dilu er a Noah el kmo a rechad a diak bo longa rasech? Ngike el Ulemeob a ngileltii el mo omes er a rasech el kmo ngngar er ngii a klou el ultutelel, el sebeched el cheklii el kirel a ileakl el usbechellel el ngii a sebechel el mo uchul a osebelel a betok el klengar. Ngmlo usbechall el kirel a kmal klou a ultutelel el tekoi el ngii a mlo dekedekel a klengit. Me ngngar cheungel a Llach, e a di mle ta el usbechel a rasech el lekilengei er ngii a Dios a usbechel a rasech el ngar er a olengetongel el kirel a ngbetel a klengit  el kirel a klengar er a Rengalek er a Israel, el tir a mlo osiik er a Jehovah el kirel a klausubes.

¹⁰ Tia el uldasu el ousbech a rasech el kirel a ngbetel a klengit a tekoi el diak lecheroid er a osisecheklir a Rekristiano. A Kristiano el apostol el Paulus a milluches el kirel tia el telengtengil a llach el mla er a Dios el mei el kmo: “Me ngoumesingd a bek el tekoi el mekikiid ra rasech loltirakl ra llach, ma lak lomaoch a rasech e ngdiak le muusubes a klengit.” (Hebru 9:22) A Paulus a mileketeklii el kmo tia el tenget el lurruul er ngii a Rengalek er a Israel er cheungel a llach a dimlak el relleterir el mo cherrungel el chad, el diak a kengterir. Ngmillemolem el meluches el kmo: “Ngbai di omekdubech chomelatk ra klengit ra ikel bek el rak el omelenget a uchul. Ele ngkmal diak el sebechel a rsechel a sechal karbou ma kaming el choroid a klengit.” (Hebru 10:1-4) Me nguaisei, engdi ngii el tenget a mle meklou a ultutelel. Ngulemeklatk er a Rengalek er a Israel el kmo te mla er a klengit e uluusbech er a llmuut el ngar er a bab el omeruul el mo ngosuterir el mo nguu a cherrungel el klausubes el kirel a klengit. Engdi a lsekum a rasech el ulemtechei a klengar er a charm a dimlak el sebechel el mera el dokedek a kngterir a rechad, e ngmla er ngii a ngii di el rasech el sebechel el rullii tia el tekoi?

A Semecheklel a Tekoi el Mla er Ngike el Milskid a Klengar

¹¹ A Llach a mera er ngii a millutk el mo er a kmal ngar er a bab el omeruul el ngii a mle sebechel el churrengelii a soal a Dios. A Paulus a uleker el kmo: “Ma le uaisei e ngera blkul a llach?” Ngulenger el kmo: “A ika di mlo dechel el kirel a teluchakl, me nguleak ar anghel el mora chimal ngikel deleuill [el Moses] me ngmlukedechor, el di mo lmuut er sel le mei ngikel rasech er ngii el meltib a telbiil el kirel.” (Galatia 3:19) Me ngdi osisiu, a Paulus a milluches el kmo: “Ele llach a di chungel a ikel mereku lungil tekoi, e diak el sel meral ngii.”−Hebru 10:1.

¹² Ma dongedeb er a omesodel, e molatk el kmo ngar er a sils er a Noah e a Jehovah a dilu er a klechad el kmo ngsebechir el menga techel a charm el kirel a ulekerreuil a klengar er tir, engdi ngdimlak el kirir el menga rasech. Sese el taem er a uriul, e a Dios a dilu el kmo a “klengar er a tech a ngar er a rasech.” Chochoi, ngngileltii el mo omes er a rasech el ua lomtechei a klengar me ngdilu el kmo: “Rubak a dilu el kmo a rokui el rasech a mo moitel er a olengetongel el mo melai a kngterir a re chad el mengeroid.” Engdi, ngliluut el mo er ngii a lmuut el mengasireng el ochotel a moktek er a Dios. A Llach a mle chungel aike el merael mei el ungil el tekoi. Ngngera el ungil el tekoi?

¹³ Sel mera el tekoi el mlekedmokl er a kodellel a Jesus Kristus. Ke medenge el kmo a Jesus ngii a mlad el ua ble lemekngit el chad a mlechelebed e mildeel. Ma Paulus a milluches el kmo: “Le sera dirke de mechitechut, e a Kristus a mlad er sel kirel blsechel el kirir ar diak loluu ra Dios. . . . Ngdi Dios a ulechotii a bltikerreng er ngii el bedul kid luleak a kodellel a Kristus el kired er sera dirke doruul a klengit.” (Rom 5:6, 8) Sera lemad el kired, e a Jesus a kiltmeklii a olubet el mo melekedek a kngtid. Tiaikid el olubet a cherrengul a osisecheklir a Rekristiano. (Matteus 20:28; Johanes 3:16; 1 Korinth 15;3; 1 Timoteus 2:6) Engdi tia el tekoi er a olubet ngngerang rullii er a rasech ma klengar, ma klengar er kau ngmekera lechelsechusem er tia el tekoi?

 ¹⁴ A bebil er a klechelid a melisiich er a kodellel a Jesus, ma rechedal ngii el klechelid a melekoi el kmo “a Jesus a mlad el kirek.” Ka momes a bebil er a oidel a Biblia el kirel a Efesus 1:7 a lolekoi el kmo: “Ngngar er ngii e oeak a kodellel e ngngar er ngii a osobel el kired, el ngii, a sel lengai a telemelled el choroid.” ( The American Bible, er a Frank Scheil Ballentine, er a 1902) “Ngoeak a kodellel a Kristus e kede mo mimokl, ma kngtid a musubes.” (Today’s English Version, er a 1966) “Ngar er a Kristus e oeak ngii ma klengar er ngii el tilengetengii a uchul me kede mla mo mimokl, er a ilmokl el ngii a belkul a klausubes er a klengit.” (The New Testament, er a William Barclay, er a 1969) “Ngoeak a kodellel a Kristus e a kngtid a musubes me kid a mla mo mimokl.” (The Translator’s New Testament, er a 1973) Me ngsebeched el mes er aika el betok el kakerous el choidel a Biblia el melisiich er a kodellel a Jesus. ‘Engdi,’ a rebebil a locha mo melekoi el kmo, ‘A kodellel a Jesus a mera el klou a ultutelel. Ma leuaisei, e ngngera olengesonges er a chelsel aika el oidel a tekoi el lousbech?’

¹⁵ Ngmera el tekoi, el sekum kau a di ultuil er a di aika el oidel a Biblia el kirel tia el bades, e ke ulterekokl el mo diak mesa kmal klou a ultutelel el tekoi, e tiang a sebechel el rullii a telkael er a klemedengei er kau el kirel a mera el klemechel a Biblia. Aika el oidel a Biblia a mertii tia el tekoi el kmo aike el kot el omelechesel tia el bades er a Efesus 1:7 a mla er ngii er ngii a tekoi er a Griik el belkul a kmo “rasech.” Me seikid a uchul ma betok el Biblia, el ua New World Translation, a melemalt el loleiuid er tia el bades el kmo: “Ngoeakngii e kede mlo mimokl el oeak a tngakireng el tenget el oeak a rsechel, chochoi, ngklausubes er a teluchekled, el loltirakl er a iltetel a klechubechub er ngii.”

¹⁶ A oidel a tekoi el kmo “a rsechel” a kmal dmolech a belkul el kirel rullii a chad el mo melebedebek a betok el tekoi el kirel a rasech. Ngklou el tekoi a mle usbechall er a di kodall e merekong, el mo lmuut er a kodellel a cherrungel el chad el Jesus. Ngmlo otaut a tekoi el mla er a chungel a Llach, el ileakl er sel Sils er a Tngakireng. Ngar seikid el ileakl el sils, e ngar er ngii a ulterekokl el charm el kirel el mo metenget el oeak a Llach. E seikid e ngkel ngar er a bab el priist a ngmai a bebil er a rsechel ngii el charm el mo soiseb er a chelsel sel Chedolel a Chedaol el delmerab er a tento, ma lechub e ngtento el templo, e ngar isei e ngodars el mo er a Dios, el ua lengar er a medal a Dios.​—⁠Exodus 25:22; Levitikus 16:2-19.

¹⁷ A Jesus mlo churrungel aike el mla er a chungel a Llach er a Sils er a Tngakireng, el ua lulsaod a Paulus. A kot, e ngdilu el kmo ngike el ngar er a bab el priist er a Israel a mo soiseb er a Chedolel a Chedaol el tang er a ta el rak el mo oldars a rasech “el kirel a di telucheklel ma telucheklir ar chad.” (Hebru 9:6, 7) Ma loltirakl er tia el omeruul a Jesus, e sera uriul er a lebekiis el mo chad el reng, e ngmlo ngmasech el mo er a eanged. Me chelecha el lechelechad el reng, el dikea bedengel el tech ma rasech, e ngmlo sebechel el “mlo duum er medal a Dios el kired.” Me ngngera nguleldars el mo er a Dios? Ngdimlak lekmung ngerang el meues e ngbai lmuut el klou a belkul el tekoi. A Paulus a melemolem el melekoi el kmo: “Ngdi Kristus er sera le mei e ngmle ngarbab el priist . . . , e di mle tal le siseb ra Chedaol, el ngila kmal rsechel el churrengelii a ngubet el mo cherechar, el dimlak lolab a rsechel a kaming ma ngelekel a karbou. Le lsekum ngsebechel el de nga rsechel a kaming ma sechal karbou . . . el kmikiid a techel a bedengir el chemedaol, e a rsechel ngiil Kristus el uleak a diak a ullebengelel  Reng el tongetengii el diak a telemellel tenget el mo ra Dios, ngdiak el sebechel bai kmikiid a ukltked el choroid a ulekoad lurered e le rellid el mo mesiou ra dingar el Dios?” Chochoi, a Jesus a uldersii el mo er a Dios sel kerresel a klengar er ngii el ngar er a rasech.​—⁠Hebru 9:11-14, 24, 28; 10:11-14; 1 Petrus 3:18.

¹⁸ A klemerang el mla er a Dios el mei a ngosukid el mo medengelii a mengasireng el klungel a tekoi el lolekoi er ngii a Biblia el kirel a rasech​—⁠ngngera uchul me nguaisei a osengel a Dios el kirel, e ngera kirel el mo osenged el kirel, ma ngera uchul me ngkired el mo mengull aike el tekoi el lolekebai a Biblia el kirel a usbechel a rasech. Sel monguiu aike el babier er a Biblia el ngar sel Beches el Renged, e ke mo metik a betok el tekoi el medung el kirel a rsechel a Kristus. (Momes er a box.) Tiang a meketeklii el kmo a derta ma derta el Kristiano a kirir el locha klaumerang er tir er a “rsechel a Kristus.” (Rom 3:25) A bo dengai a klausubes e lebo er ngii a budech er a delongeled kid ma Dios a di sebechel el meketmokl el oeak a “rsechel [a Jesus] el mloitel” el kired. (Kolose 1:20) Tiang a kmal ulterekokl el klemerang el kirir tirke el Jesus a mirruul er a ileakl el telbiil el kirel a omengederedel el obengkel el ngar er a eanged. (Lukas 22:20, 28-30; 1 Korinth 11:25; Hebru 13:20) Ngdirrek el klemerang el kirel a “kloul seked” er a chelecha el sils, el tir a mo suobel er tia el merael el mei el “kloul ringel” e mo oldeu a rengrir er a diak a ullebengelel el klengar el ngar er a paradis el chutem. Me te mokesiu, el ua le ‘sililek a bilir er a resechel a Ngelekel a sib.’​—⁠Chocholt 7:9, 14.

¹⁹ Me ngbleketakl el kmo, a rasech a ngar er ngii a ileakl el belkul er a osengel a Dios. Me ngdirrek el kirel mo uaisei er osenged. Ngike el Ulemeob, el ngii a kmal kerekikl a klengar, a ngar er ngii a llemeltel el mo olekebai aike el loruul a rechad el kirel a rasech. Me ngngar tia el klou el ulekerreuil el kirel a klengar er kid, e ngulterekeklii a rasech el di mo kirel a usbechall er a kmal ngar er a bab el klou a ultutelel el tekoi, el ngii el tekoi a di ta el rolel e a diak a ullebengelel el klengar a sebechel el mo meketmokl.  Tia el tekoi a melutk er a usbechel a mekreos el rsechel a Jesus. Kede kmal oba klou el omereng el saul e le Jehovah el Dios a mirruul a tekoi el mlo uchul a klungioled er a lousbech er a rasech​—⁠el rsechel a Jesus​—⁠el kirel a osobelel a klengar! Kede dirrek el kmal oba omereng el saul el kirel a Jesus er a loitel a rsechel el ua tenget el kired! Ngulterekokl el kmal sebechel el mo bleketakl er a rengud a tekoi el lullekoi a apostol el Johanes el kmo: “Ngikel betik a rengul er kid me ngngila rsechel el ngubetid ra kngtid e rirellid el mo rengedel a king e priist el kirel a Dios el Demal, a klebkall ma klisichel chomerreder le bor ngii el mo cherechar. Amen.”​—⁠Chocholt 1:5, 6.

²⁰ A mellomes a rengul el Dios er kid el Milskid a klengar a kmal kemanget el taem el lolebedebek el kirel tia el omeruul el ngii a mo olsobel a klengar. Me ngsebeched el oker el kmo, ‘Tia el tekoi ng ngera ngrullii el kirel a uldesued ma omerelled?’ Sel ongingil el suobel a mo mesaod er tia el tekoi.

Ke Mekerang e Mo Onger?

• Ngera sebeched el suubii er a osengel a Dios el kirel a rasech er a chelsel aike el cheldechedechal a Abel ma Noah?

• Ngoeak a Llach, e ngera telkelel a usbechel a rasech el lekiltmeklii a Dios, e ngera uchul?

• Ngmilekera Jesus e uleltaut a tekoi el mla er a chungel a Sils er a Tngakireng?

• Ngmekera rsechel a Jesus e olsobel a klengar er kid?

[Study Questions]

1. Ngera ngar er ngii el olechotel el olecholt el kmo kede omes er a klengar el kmal mekreos?

2, 3. (a) Ngera el ngerachel a obeketakl el ngar er a Osisechakl 23:22? (b)  Ngmekera Dios e luldimukl er a chelsel sel ngerachel el medung el ngar er a Osisechakl 23:22?

4. Ngar er a dirk uchelel a reksi er a klechad, e ngmilekerang e a omengull el kirel a klengar a mlo klou el tekoi el kirel soadel?

5. (a)Ngera ngullekebai er ngii a Dios er sel sils er a Noah, e tia el tekoi ngmlo motaut el kirir a reua techang? (b) Ngoeak a ngera el rolel e tia el tekoi el lullekebai er ngii a mle klou a ultutelel?

6. Ngoeak a Noa, e ngmilekerang a Dios e lolisiich er a Osengel el kirel a kerresel a klengar?

7. Ngera uchul me ngkired el mo semeriar el mo medengei a lullekoi a Dios el mo er a Noah el kirel a rasech?

8. Ngar er a Llach, e ngera el tekoi a ledilung a Jehovah el kirel a usbechel a rasech?

9. Ngera sel di mle chimong el usbechel a rasech el mlocholt er a Llach, e ngera mle moktek er tiang?

10. Ngera uchul ma rsechel a charm a dimlak el sebechel el kutmeklii a cherrungel el klausubes er a klengit, engdi ngera el uleklatk a lebilskid aika el omelenget el oltirakl er a Llach?

11.Kede mekera e medenge el kmo a omelenget el rsechel a charm a ngar er ngii a tekoi el lullutk el kirel?

12. Ngoeak a rasech, e kede mekera e mesa ochotel a moktek er a Dios?

13. Ngera uchul ma kodellel a Jesus a mle klou a ultutelel?

14, 15. (a) Ngmekerang a bebil er a oidel a bades el ngar er a Efesus 1:7 a lolisiich er a kodellel a Jesus? (b) Ngera el tekoi el ngar er a Efesus 1:7 a mechoit me ngmo diak lesang a rechad?

16. Sel tekoi el kmo “a resechel” ngkirel el olecholt a ngerang el me er a uldesued?

17. Ngmilekera Jesus e uleltaut a tekoi el mla er a chungel a Sils er a Tngakireng?

18. Ngera me ngkirel a tekoi el lolekoi a Biblia el kirel a rasech el mo klou a ultutelel el mo er a Rekristiano er a chelecha el sils?

19, 20. (a) Ngera uchul ma Dios a ngileltii el mo olekebai a usbechel a rasech, me ngkirel mo ua ngera uldesued el kirel tia el tekoi? (b) Ngera kired el mo semeriar el mo medengelii el tekoi?

[Box on page 12]

NGRSECHEL A TECHANG A OLSOBEL A KLENGAR?

“Di le kemiu el kerekikl er kemiu ma delebechel sil el rokir, e a Chedaol Reng a mellalem er kemiu el mo klekar er ngiil delebechel, el kiriu lomeka ra eklesia ra Rubak, el lulecherar a Rubak ra di rsechel.”​—Rellir Ar Apostel 20:28.

“Me chelechal bla de muklemalt ra rsechel, e ngbai kmal osobelid ra cheldechuderreng ra Dios.”​—Rom 5:9.

“Ngdi dorael ra chelsel a llomes, el ua ingii el ngara llomes, e kede dul ngara klauchad, ma rsechel a Jesus el Ngelekel a kikidid ra bek el klengit.”​—1 Johanes 1:7.

“A Dios chomekingar a rokuil chelerrungel ra chelsel a Ngalek loltirakl a uldesuel a rengul, e rirellii a budech loeak a rasech ra [teluo el kerrekar].”​—Kolose 1:​19, 20.

“Ma le uaisei, e rudang, e ngmla morngii er kid a ulterekokl kloumerang el mo soiseb ra Chedaol, el rsechel a Jesus a uchul.”​—Hebru 10:19.

“Kemiu el mlengubet er sel diak a blkul blekeradel el mulidir rar mla mad el demmiu . . . , e ngbai mekreos el rsechel a Kristus el ua ngelekel a sib el diak a telemellel ma ka dimech er ngii a uchul.”​—1 Petrus 1:​18, 19.

“El diak chomeltkiu er tial belulechad, el diak a Dios er kemiu. Me ko mle uaisei ra ngara mong el mle cheroid, e chelechang e kom kmedang el ngara Kristus Jesus el rsechel a Kristus a uchul.”​—Efesus 2:​12, 13.

“Ikau a redemelel a nguu ngiil iluil babier e kodoked a ikel olangch el semosem er ngii, kau a mlokoad e ngila rsechem el ulemchar rar chad ra chelsel a bek el kebliil rar chad, ma chomelekoi, ma bliongel rar chad, ma renged el kirel a Dios.”​—Chocholt 5:9.

“Le ngikel oltutakl rar udam er kid . . . a mla obidokl el moriou. Ma rudam er kid a mlo kats er ngii el rsechel a Ngelekel a sib ma tekoi er chocholt er tir a uchul.”​—Chocholt 12:10, 11.

[Picture on page 10]

Ngoeak a Llach, e a Dios a mileketeklii el kmo a rasech a sebechel el mo kutmeklii a rolel a klausubes el kirel a klengit

[Picture on page 11]

Ngoeak a rsechel a Jesus, e ngkmal betok el klengar a sebechel el mo mosobel