Meruul a Ungil er Sel Taem er a Chelebuul

“MISEI e a bo ltechall e doruul a ungil el mora ngiidil chad,” el ua lulengelechel a apostol Paulus, “e a ngaruchei e doruul el mor tirikel ngara klauchad ra kloumerang.” (Galatia 6:​10) A Resioning er a Jehovah el meliuekl er a beluulechad el rokir a blak a rengrir el oltaut er tia el omellach er a klengar er tir, el meruul a ungil el mo er a rebek el chad, tokubets tirke el ledak el ngar er a ta el omengull. Tiang a mla meues el betok el taem er sel taem er a chelebuul. Ka me bo domes a okesiu el mla er a teblo el beluu.

Sera December 2002, e a kmal mesisiich el taifun a silbechii er a Guam, el klisichel ngii el eolt a mlo er a bab er a 190 el mael er a ta el sikang. Ngbetok el blai a miltemall, e a bebil a kmal di milteruud. A rechad er a ongdibel er a Guam a di mle mereched el chudelterir a rechad el mo mengetmokl el mo olengeseu er a rebebil el telungalek el Sioning el tir a kmal miltemall er a eolt. Ma Guam branch a uluungerachel a klekedall ma dirrek a rechad el oureor el mo meruul aike el miltemall el blai, ma branch er a Hawaii me te dirrek el lulengeseu. Uriul er a sesei el sandei, e a recheldebechel er a redaiksang el mla er a Hawaii a mlong el mo olengeseu el oureor el kirel el okedecherul a blai, ma rebebil er a odam er a Guam a ngilai a ulengellir er a urerir e mlo olengeseu. A deurreng er a klaingeseu er a delongelir a mlocholt er a rechad liliuekl er tir.

Tia el mlo merek el rak, e a rebetok el chad er a  beluu er a Mozambique a chilarm er a klengerenger e le ngmla er ngii a kemtimt ma dellomel a mlo diak leduubech. Sel branch el obis er a Resioning er a Jehovah er sel beluu a di mle mereched el oldurokl a kall el mo er tirke el luluusbech a ngeso. A omerusel a kall a mleketmokl er aike el Kingdom Hall, a lebebil er a taem e ngsel uriul er a miting er a ongdibel. A ta el odos el mesobil el oungalek a millekoi el kmo: “Ak mle er a miting el kmal di omdasu a mondai er ngak, el diak kudengei el kmo ngera ak mo mesterir a rengelekek el kall sel kibo mrei.” Sel bltikerreng er a klaingeseu er a rudam a kmal mle mereched el melisiich er ngii. Ngika el mesobil a dillechelii el kmo: “Ngkmal di ua lechokiis el mle er ngak!”

A Resioning a dirrek el “meruul a ungil” lokiu a tekoi er a klereng sel omerk a klumech er a Biblia el mengelaod e ouchais omelatk el mo er a rebebil. Te oumerang el di uai a ta el mellomes a rengul el chad er a irechar el kmo: “Ngdi ngikel orrenges er ngak a mo ungilbesul. Ngmo selebechakl, ele ngdiak a ngeral uchul me bo le medakd.”​—Osisechakl 1:​33.

[Pictures on page 31]

1, 2. Omerusel a kall el mo er a remechebuul el ngar er a Mozambique

3, 4. A taifun er a Guam a tirruud a betok el blai

[Picture Credits]

Ngalek, left: Andrea Booher/FEMA News Photo; redil, above: AP Photo/Pacific Daily News, Masako Watanabe