Mngai A Ulekrael Er A Di Ngar El Dios

“Mobult . . . el mora dingar el Dios el ngikel rirellii a eanged, ma chutem, ma daob, ma ikel bek el klalo el ngara chelsel.”​—RELLIR A RE APOSTOL 14:15.

1, 2. Ngera uchul me ngungil a bo dodengelii a Jehovah el ua el “dingar el meral Dios”?

 A APOSTOL Paulus ma Barnabas er uriul er a lomekungil er a chad, e a Paulus a millekoi aika el tekoi el mo er tirke el chad er a Listra el ulemes aika el dilubech el kmo: “Kemiul chad, ngera me ko meruul a ikal uaisel tekoi? Kemam a dirrek el chad el ua kemiu, loba chosisiul reng, ma ki omerk ra ungil klumech el mer kemiu, el kirel me mobult ra ikal diak a blkul tekoi el mora dingar el Dios el ngikel rirellii a eanged, ma chutem, ma daob, ma ikel bek el klalo el ngara chelsel.”​—Rellir Ar Apostel 14:15.

² Ngkmal mera el tekoi tia el kmo a Jehovah a diak lebleob el chaus el diak louteliil, e ngii a bai “dingar el meral Dios”! (Jeremia 10:10; 1 Thesalonika 1:9, 10) Ngii a di ngar, e ngii el Jehovah a dirrek el Uchul a klengar er kid. “Ngii a mesterir a rokuil chad a klengar, ma tellir, ma rokuil tekoi.” (Rellir Ar Apostel 17:25) Ngsoal a doldeu a rengud er a klengar er a chelechang ma klengar er a ngar er a medad. A Paulus a dilechelir el kmo a Dios a “dimlak lak lolecholt er ngii, me ngmeruul a ungil tekoi e milskemiu a chull ra eanged ma blsechel a sim, e milskemiu a kall e omekeek a rengmiu ra deourreng.”​—Rellir Ar Apostel 14:17.

3. Ngera uchul me ngsebeched el oumerang er a ulekrael el omeskid a Dios?

³ A Dios a semeriar er a klengar er kid ma uchul e ngkired el oumerang el ulsirs er a ulekrael er ngii. (Psalm 147:8; Matteus 5:45) A rebebil a kora mo ngodech a uldesuir a lsekum a llach er a Biblia a diak lebleketakl er a uldesuir ma lechub e ngkora kmal meringel. Me nguaisei, ngdi a doumerang er a ulekrael er a Jehovah a mla mocholt el mellomes el tekoi. El di ua tia el okesiu: A lsekum a chad er a Israel a dimlak lodengelii a belkul sel llach el olekebai er a chad el merutech er a bedengel a mla mad el chad, ngdi ngii a ngmai a klungiolel a lsekum  ngolengesenges er ngii. A kot, a blekongesenges el reng er ngii a rullii el mo kmeed er a di ngar el Dios, e a ongerung, tia mo omekerreu er ngii me ngdiak bo lsecher er a rakt.—Levitikus 5:2; 11:24.

4, 5. (a) Uchei er a taem er a Klekristiano, e ngera el ulekrael el kirel a rasech a lulechotii a Jehovah? (b) Kede mekerang e mo medengei el kmo a Rekristiano me te uldimukl er tia el ulekrael er a Dios el kirel a rasech?

⁴ Tia dirrek el uaisei er a ulekrael er a Dios el kirel a rasech. Ngii a dilu er a Noah el kmo a rechad a diak longang ma ka lolim a rasech. E sola e a Dios a ulechotii, el ngar er a Llach, el kmo a di ta el usbechel a rasech el lekengei er ngii a mo ngar er a altar​—el kirel a klausubes er a klengit. Me ngoeak aika el tekoi, e a Dios a kiltmeklii a rael el kirel a kot el ngar er a uchei el usbechel a rasech​—el olsobel a klengar loeak a olubet er a Jesus. (Hebru 9:14) Choi, a ulekrael er a Dios a ulechotii el kmo ngmelatk er a klengar er kid ma klungioled. Ma losaod er a Genesis 9:4, e a chad er a omesuub el kiliei er a 19-el-dart-el-rak er a memong a milluches el kmo: “Tia el llach [el mo er a Noah] a dirrek el dirk el kerekikl el olengesenges er ngii a Rekristiano el chad er a orient . . . Ngar er a eungel a llach, e ngdimlak longa rasech, e le ngmillutk el kirel a rasech el mo moitel el kirel a kngtil a beluulechad; ma ngar er a eungel a Evangkelio e a rasech a diak longa er ngii, e le ngkirel el blechoel el ua lomtechei er a rasech el mloitel el kirel a chitel a klengit.”

⁵ Ngka el chad er a omesuub a locha millekoi el kirel a evangkelio, ma lechub a ungil el chais el mesaod er a Jesus. E tia uldimukl er a Dios el ulderechii a Ngelekel el mo mad el kired, el resechel a mo moitel me bo lsebeched el mo nguu a diak a ullebengelel el klengar. (Matteus 20:28; Johanes 3:16; Rom 5:8, 9) A tekingel a dirrek el uldimukl er ngii sel llach el mo er a rultirakl er a Kristus er uriul el mo omekeiai a rasech.

6. Ngera el ulekrael el kirel a rasech a mlo er a Rekristiano, e ngera uchul?

⁶ Ke medengei el kmo a Dios a milsterir a rechad er a Israel a betok el dart el llach. Uriul er a lemad a Jesus, e a redisciplo er ngii a mlo diak el kirir el oltirakl aike el rokui el llach. (Rom 7:4, 6; Kolose 2:13, 14, 17; Hebru 8:6, 13) Ngdi, telkib el taem er uriul e ngdilubech a ker el kirel a ta el klou el tekoi​—el botk er a resechal. Tirke el chad el diak le Chijudea el sorir el mo er a botk, tiang olecholt el kmo te dirk ngar er a eungel a Llach? Sera 49 C.E., e a governing body er a Rekristiano a mlo mesaod er tia el tekoi. (Rellir Ar Apostel, 15 el bliongel) Loeak a ulengesuil a reng er a Dios, e a rechapostel ma remechuodel el sechal a ulterekeklii el kmo a llach er a botk a mlo merek lobengkel a Llach. Me nguaisei, ngdi bebil er a llechul a Dios a dirk ngar er ngii a klisichel el kirir a Rekristiano. Me ngar er a babier el mo er a ongdibel, e a governing body a milluches el kmo: “Ele ngmlo ungil ra Chedaol Reng me kemam a lak ki momekberaod er kemiu ra ikel kuk ngodech ra ikal dousbech el tekoi el kmo: ko momekiai a uldars el mora bleob el chelid, ma rasech, ma ulebeng a telil, ma deleboes. Cho mcheridemiu er aikang, e ngungil. A ikakid e merekong.”​—Rellir Ar Apostel 15:28, 29.

7. Ngua ngera klungel a ultutelel el kirir a Rekristiano tia el tekoi el kmo ‘momekiai a rasech’?

⁷ Me ngkmal bleketakl, a governing body ulemes er a ‘omekiai a rasech’ el mle klou a ultutelel el kirel a tekoi er a kldung el di ua omekiai a deleboes lomeruul ma omengull el bleob. Tia olecholt el kmo a bul el kirel a rasech a oberaod el tekoi. A Rekristiano el durengrir el mengull el meluluuch a bleob el chelid ma lechub e te meruul a deleboes lomeruul a diak el sebechir el “mediukes ra rengedel a Dios”; tir a bai “choubliongel er . . . itial chongerul kodall.” (1 Korinth 6:9, 10; Chocholt 21:8; 22:15) Ka momekesiu aika el kakerous  el tekoi: A dolechib er kid er a ulekrael er a Dios el kirel a cheledolel a rasech er a klengar a sebechel el mo uchul a diak a ullebengelel el kodall. E a olechotel omengull el kirel a tengetengel a Jesus a sebechel el omekrael el mo er a diak a ullebengelel el klengar.

8. Ngera ochotii el kmo a rekot el Kristiano uleltirakl er a ulekrael er a Dios el kirel a rasech?

⁸ Tirke el kot el Kristiano ngmle ua ngera uldesuir er a ulekrael er a Dios el kirel a rasech e mlekera loltirakl er tiang? Ka mluut el melatk er a tekingel a Clark: “Ngar er a eungel a Evangkelio e a rasech a dimlak longa er ngii, e le ngkirel el blechoel el ua lomtechei er a rasech el mloitel el kirel a chitel a klengit.” A reksi olecholt el kmo a rekot el Kristiano ulemes er tia el tekoi el kmo ngkmal oberaod el tekoi. A Tertullian a milluches el kmo: “Ka molebedebek er tirke el chad el mechede rengrir, el ngar er a klekool er a kurand, el melai a resechir a redengerenger el chad . . . el olab el mo omekungil a rektir el bellek.” Malta rechad el diak loumera er a Biblia a mengang e melim a rasech, engdi a Tertullian a melekoi el kirir a Rekristiano el kmo, “ngdiak a resechel a charm el urrachem er a kelir. . . E sel lengar er a kerrekeriil a Rekristiano e ko moldars er tir odoim el ngar er ngii a rasech lurrachem er ngii. E kemiu a ungil el medengei el kmo, tia el tekoi a diak el subed er tir.” Choi, mo lmuut er a lorrouk er tir el mo omekoad er tir, ma Rekristiano a dimlak longang ma ka lolim a rasech. A ulekrael er a Dios a kmal mle klou a ultutelel el kirir.

9. Omekiai a rasech nguldimukl er a ngerang tia el tekoi el kmo ngdiak longang a rasech?

⁹ A rebebil a sebechir el mo omdasu el kmo a governing body a di millekoi er a Rekristiano me ngdiak longang ma ka lolim er a rasech ma diak longang a techel a charm el ulebeng a telil ma kall el urrechomel er a rasech. Ngmera el uaisei, tiaikid a mle belkul a llechul a Dios el mo er a Noah. Me sel tekingir a rechapostol a mera el melsubed er a Rekristiano el ‘momekiai a ulebeng a telil,’ el techel a charm el dirk ngar er ngii a rasech. (Genesis 9:3, 4; Rellir Ar Apostel 21:25) Nguaisei, ngdi a rekot el Kristiano a mle medengei el kmo ngngar er ngii a kuk ta er a belkul tia el tekoi. E le a lebebil e a rasech a longang e le ngii a ua lomkar er a chad el smecher. A Tertullian a melsaod el kmo a losiik a kerul a secher el bellek, e a rebebil el chad el diak loumerang er a Biblia mengang a beches el rasech. E dirrek el locha mla er ngii a kuk bebil el rolel e a rasech a luluusbech el omkar a rakt ma lechub el melisiich er a bedengel a chad. Sei a uchul me Rekristiano, a lomekiai a rasech e nguldimukl er tir el diak lousbech er ngii el ua lengii a “kar.” Te mesisiich el dechor el kirel tia el tekoi el mo lmuut ma lsekum a klengar er tir a mo ocherur a kodall.

Rasech el Ousbech el ua el Kar

10. Ngera bebil er a rolel a lousbech a rasech el ngar er a ukeruul, el mo uchul a ngera el ker?

¹⁰ Chelecha e a rasech a kmal lousbech a rechad el omkar a secher. Aike el mle kot el oidel a rasech a mle cherrungel el rasech​—el mlengai er a donor, el mlo meketmokl, e uriul e ngmlo er a smecher, altang ngchad el miletemall er a taem er a mekemad. E a uriul, e a remesuub a mlo meduch el meleakl er a rasech el mo betok el kakerous el bliongel. Ma retoktang a lousbech a kakerous el bliongel er a oidel a rasech, e tir a sebechir el ousbech a rasech el bla lengai el mo er a rebetok el smecher, el ousbech er a plasma el mo er a mla metemall el chad ma bekerekard el cell el mo er a kuk ta er a chad. E a klou el omesuub a mla ochotii el kmo a bliongel, el ua rasech el plasma, a dirrek el sebechel el lemuut el obii el mo kakerous el mekekerei el bliongel, el mo sebechir el ousbech el mo er a rebetok el smecher el chad. E a choua ika el lurreor el meleakl a rasech el mo mekekerei el bliongel a dirk melemolem, ma beches el rolel a lousbech aika el bliongel a louchais el kirel. Ma Kristiano ngmo mekera er a ika el usbechel a mekekerei el bliongel er a rasech? E ngii a mla tibir el kmal diak bo lolai a oidel a rasech, ngdi a toktang orrimel er ngii el mo nguu a ta er aike el meklou el bliongel, altang ngdiak lurrechomel el bekerekard el cell. Ma lechub e a ukeruul a mo ousbech er a di telkib er a kekerei el bliongel. Ma mesiungel a Dios ngmekera bo lolilt a tekoi el kirel aika el ker, el diak lobes er a cheledolel a rasech ma resechel a Kristus el uchul osobel er a ngar er a uchei el rolel?

11. Ngera el melemalt el tekoi er a ukeruul el kirel a rasech a meketeketang el loltirakl er ngii a Resioning?

¹¹ Betok el rak er a mla me mong e a Resioning er a Jehovah a ulterekeklii a tekoi el ble ledechor er ngii el kmal mlo bleketakl. El ua tiang, te lilechesii a suobel el mlo tuobed er a The Journal of the American Medical Association (November 27, 1981; e dirrek el kuk tilobed el How Can Blood Save  Your Life? er a page 27-⁠9). * E sel suobel a llechukl er ngii a bades el mlengai er a Genesis, ma Leviticus, ma Rellir Ar Apostel. Ngdmu el kmo: “Aika el bades a diak losaod a tekoi el ousbech a tekoi er a ukeruul ma rolel a kar, ngii a Resioning omes ngii el tekoi el ua lolekebai a oidel a cherrungel el rasech, ma diak lurrechomel el RBC [bekerekard el cell er a rasech], ma plasma, ma dirrek el oidel a WBC [becheleleu el cell er a rasech] ma platelet.” E a hong er a 2001 el Emergency Care, er a cheungel a “Composition of the Blood,” a kmo: “A rasech a ngar er ngii a kakerous el bliongel er ngii: el plasma, ma bekerekard ma becheleleu el cell, ma platelet.” Ma loltirakl a tekoi er a ukeruul, e a Resioning a kotoar a oidel a cherrungel el rasech ma ngii di ngera el klekedall el mla er aike el kleuang el bliongel er ngii el mei.

12. (a) Ngera el blekeradel a mla mocholt el kirel aike el mekekerei el bliongel el mlengai er aike el meklou el bliongel er a rasech? (b) Ngsebeched el metik er ker a bebil el tekoi el kirel tiang?

¹² Me sel suobel er a ukeruul a melemolem el kmo: “A klaodengei er a klechelid er a Resioning a diak lolekoi el kmo ngkmal diak lousbech aike el mekekerei el bliongel el ua albumin, ma immune globulin, ma hemophiliac preparations; a derta ma derta el Sioning a kirir el di tir el melib el kmo te mo kongei el melai ma lechub e ngdiak.” Sera 1981, e a betok el mekekerei el bliongel a mla meakl el ousbech er ngii er a ukeruul. Me seikid, e a The Watchtower er a June 15, 2000, a mla meskid a ungil el chais el kirel tia el tekoi el ngar er a suobel el “Ker el Mla er a Remengeuiu.” Ngar er ngii a komakai el tekoi ma omesodel, e ngdi ke mo metik el kmo sel lolekoi er ngii a di osisiu ngii ma ike el uldasu el tilobed er a 1981.

E Mekerang a Ukltkem

13, 14. (a) Ngera a ukltked, e mekerang e ngar er ngii a delongelel ngii ma rasech? (b) Ngera el ulekrael el kirel omengang el techel a charm a lebilsa Israel a Dios, ngdi ngera el ker a mle sebechel el duubech?

¹³ Aika el tekoi a rullii a chad el mo ousbech er a ukeltkel. E ngera uchul? A Rekristiano kongei el kmo ngkirir loltirakl er a ulekrael er a Dios, me nguaisei ngdi ngar er a bebil el blekeradel el chad da kirel el di ngii el melib er a bo loruul er ngii, e a ukeltkel a mocha kirel el ousbech er ngii. A ukeltked a sel ileakl el dechal a chad el merritel a tekoi e melib aike el bo loruul, el blechoel el kirel a tekoi er a kldung. (Rom 2:14, 15) Ngdi, kau a medengei el kmo, a urrerel a ukltked a kakerous. * A Biblia mesaod el kmo a rebebil a ‘mechitechut a ukeltkir,’ el belkul a kmo a rekuk bebil a mesisiich a ukeltkir. (1 Korinth 8:12) A Rekristiano a kakerous a blekerdelel a ngesecheklel er a omesubir er a soal a Dios, el mera el mo medengelii a uldesuel er a tekoi, e mekerang a bo loltaut er a soal a Dios el ngar er aike el tekoi el loruul. Ngsebeched el omekesiu  er tiang er a rechad er a Chijudea ma longang a tech.

¹⁴ A Biblia meketeklii el kmo a chad el olengesenges er a Dios a diak longang a techel a charm el ulebeng a telil. Tia kmal mle klou a ultutelel me ngmo lmuut er a sera lebo er ngii a bkaischemrungel el tekoi ma resoldau er a Israel a kilang a techel a charm el di merserasech, e tir a rirellii a klou el mekngit, ma lechub e te rirebet er a klengit. (Duteronomi 12:15, 16; 1 Samuel 14:31-​35) Nguaisei, ngdi dirrek el sebechel el mo duubech a ker. A chad er a Israel a lokodir a sib, e ngngera kirel el mereched el meruul el mo oltobed a resechel? Ngii ngkirel el dosengii a iklel a charm me ltobed a rasech? Ngmle kirel lmechet ochil e kobsii me ngtellatel? El ua ngera klemengetel? Ngmo mekerang er a kmal klou el kerebou? Ma uriul er a ltobed a resechel, e ngdirk ngar er ngii a sesei el resechel el medechel. Ngmocha sebechel el mengang er a choua isel tech. E techang ngike el mo melilt a bo loruul?

15. Te mlekera rebebil er a Rechijudea el kirel omengang el tech, ngdi ngera mle ulekrael er a Dios?

¹⁵ Ka molebedebek er a blak a rengul el Chijudea el mo chelebangel choua ika el ker. Ngii a sebechel el omdasu el kmo ngbai ungil a bo lecheroid er aike el techel a charm el oteruul er a makit, el di ua kuk ta er a chad el kmal diak longang el techel a charm a lsekum e ngmodars el mo er a bleob el chelid. E a rekuk bebil er a Rechijudea a mlo mengang a tech er uriul er a loruul a omeruul el oltobed er a rasech. * (Matteus 23:23, 24) Ngera uldesuem er aika el kakerous el blekerdelir a rechad? Ma lmuut e kung, e le Dios a dimlak a tekingel el kirel choua ika el blekeradel, me ngbai ungil a lsekum a Rechijudea bo loldurokl a betok el ker el mo er a klobak er a rabbi el mo melai e nger er a derta er aika el ker? Tiaikid el teletael a mlo er ngii er a klechelid er a Rechijudea, ngdi kid a ngeltengat e le Jehovah a dimlak lolekoi er a remengull er ngii mo bo loruul choua ike el tekoi el kirel a rasech. A Dios a milsterir a uchetemel a ulekrael el kirel a okodellel a klikiid el charm ma otebedel a resechir, ngdi ngii a dimlak bo lengelakl er aikang.​—Johanes 8:32.

16. Ngera uchul ma Rekristiano a mo kakerous a uldesuir el kirel sel bo lokengei el melai a orus el ngar er ngii a kekerei el bliongel el mla er a rasech el mei?

¹⁶ El di ua bla desodii er a paragraph 11 ma 12, e a Resioning er a Jehovah a diak lekengei a oidel a cherrungel el rasech ma lechub aike el kleuang el meklou el bliongel er ngii​—el plasma, ma bekerekard el cell, ma becheleleu el cell, ma platelet. Ngdi kuk mekerang el kirel aike el mekekerei el bliongel el mlengai er aike el meklou el bliongel, el ua serum el ngar er ngii a antibodies er ngii el okoad a rakt ma kuk mo oumekemad a dok er a bersoech? A rebebil a mo omdasu el kmo aika el mekekerei el bliongel, a ua lekea el rasech, me ngdikea lengar er a chelsel sel llach el kmo ‘momekiai. . .a rasech.’ (Rellir Ar Apostel 15:29; 21:25) Seikid a di ngerechelir kung. E a ukltkir a rebebil el Kristiano a rulleterir el mo omekiai a bek el ngerang el mlengai er a rasech, el mo lmuut er aike el mekekerei el bliongel. * Ngdi a rekuk bebil a mo  kongei el melai orus er a plasma protein el mo okoad a dok er a bersoech, ngdi te diak lekengei a kuk bebil el mekekerei el bliongel. Ma lmuut el tang, a klekedall el mlengai er aike el kleuang el meklou el bliongel a di osisiu a urrerel el omekerreu er a klengar ma ruumesingd el Kristiano a mo omekiai er ngii.

17. (a) Ngmekerang a ukltked a sebechel el olengeseu a bo dechelebangel a ker el kirel a bliongel er a rasech? (b) Ngera uchul ma ike el tekoi el dolib el mo meruul a meklou a ultutelel?

¹⁷ A tekoi el lolekoi er ngii a Biblia el kirel a ukeltked a mo ngosukid sel bo lekired el melilt a tekoi. A kot el tekoi el bo doruul a kired el mo mesuub el kmo ngera ngdmu a Tekingel a Dios e sola e rullii a ukeltked el mo oltirakl er ngii. Tiang a mo ngosukau el mo merritel a tekoi el oltirakl a ulekrael er a Dios er a bai di moker er a chad me lolilt a tekoi el kirem. (Psalm 25:4, 5) A kuk dolekoi el kirel omelai er a mekekerei el bliongel er a rasech, e a rebebil a omdasu el kmo, ‘Tia di mo ior er a ukltked, me ngdiak el sal klou a ultutelel.’ Tiang a kmal cheleuid el uldasu. A tekoi el kirel a ukltkel a derta el chad el merritel er ngii a diak lebelkul a kmo tia el tekoi a kekerei el tekoi. A tekoi el dorritel el mo meruul a sebechel el mo uchul a klou el oberaod el tekoi. A ta er a uchul tiang a ngngar er ngii a lerellii er a rebebil el kuk ngodech a ukltkir er kid. Kede mesa tiang er a tekingel a Paulus el kirel a tech el altang ngmlodars el mo er a bleob el chelid e uriul e ngmloterau er a makit. A Kristiano kirel mo kerekikl me ngdiak el ‘temellii a mechitechut lukltkir’ a rebebil. E a lsekum ngmelibas er a rebebil, e ngii a mo uchul e ‘ngikal chad a mo metemall e a Kristus a mlad el dirrek el bedul ngii’ e mo er a klengit lomtok er a Kristus. Malta e a derta ma dertang a di tir el melib a bo loruul el kirel aika el mekekerei el bliongel er a rasech, ngdi aika el tekoi a kmal oberaod el meklou a ultutelel.​—1 Korinth 8:8, 11-​13; 10:25-​31.

18. Ngmekerang e a Kristiano a mo kerekikl me ngdiak bo lulekoad a ukltkel el kirel a bo loruul el tekoi el kirel a rasech?

¹⁸ Ngar er ngii a kuk ta er a tekoi el meketeklii a berredel aika el tekoi el bo dolib el kiel a rasech. E tia ngar er ngii a belkul el kirem. A lsekum e a di telkib er a kekerei el bliongel er a rasech a omnguu e ngii a mo melemall er a ukeltkem el mla mosisechakl er a Biblia, e ngdiak el kirem el okor er a ukltkem. Ma dirrek el diak el kirem el olechib er kau er a ulekrael er a ukeltkem e le a chad a kmu er kau el kmo, “Ngdi ungil omnguu tiang; betok el chad a mla nguu.” Ke le mobes, betok el milliol el chad er a chelechang a diak lorrenges er a ukltkir, me ngmo ua lulekoad, e rulleterir el mo melekoi a blulak ma lechub e te merruul a mekngit e diak louuchel a rengrir. A Rekristiano a kmal kirir el mengeroid er tir er a choua tia el blekeradel.​—2 Samuel 24:10; 1 Timoteus 4:1, 2.

19. Ma bocha dolilt a ukeruul el uldimukl er ngii a rasech, e ngera kirel el mo ngar er a uchei er a rokui el uldesued?

¹⁹ Kmeed er a ullebengelel, sel suobel el mla er a “Ker el Mla er a Remenguiu” er The Watchtower er a June 15, 2000 a kmo: “Le a uldesuir a rechad ma tekoi el lolib a sebechel el mo kakerous ngbelkul a kmo tia el tekoi a diak el klou a ultutelel? Ngdiak. Tiang a klou el oberaod el tekoi.” E tia kmal ileakl el uaisei e le delongelem kau ma “dingar el Dios” a uldimukl er ngii. E tiaikid el deleongel a ngii a di ta el rolel el sebechel el oitikikau el mo er a diak a ullebengelel el klengar, el uchetemel a delalem er a klisichel a resechel a Jesus el mo olsobel er kau. Mada momekeroul er a dmolech el omengull el kirel a rasech e le uchul e a Dios a ousbech er ngii el meruul er a soal​—el olsobel a klengar. A Paulus a ungil a tekingel el lulluches el kmo: “El diak chomeltkiu er tial belulechad, el diak a Dios er kemiu. Me ko mle uaisei ra ngara mong el mle cheroid, e chelechang e kom kmedang el ngara Kristus Jesus el rsechel a Kristus a uchul.​—Efesus 2:12, 13.

[Footnote]

Ke Dirk Melatk?

• A Dios ngera el ulekrael el kirel a rasech a lebilsa Noah, ma rechad er a Israel, ma Rekristiano?

• Ma kuk kirel a rasech, e ngera te kmal kotoar er ngii a Resioning er a Jehovah?

• Ngera el rolel a omelai el sesei el bliongel er a meklou el bliongel er a meklou el bliongel er a rasech a di ultuil er a ukltkel a chad, ngdi tiang ngera belkul?

• Ma dolib a tekoi el bo doruul, e ngera uchul ma deleongel er kid ma Dios a ngar er a uchei er a rokui el tekoi er a rengud?

[Study Questions]

[Picture on page 14]

A governing body a tilbir el kmo a Rekristiano a kirir el mo ‘momekiai a rasech’

[Chart on page 16]

Uchetemel A Delecherud El Kirel A Rasech

NGDIAK DEKENGEI

▼ ▼ ▼ ▼

A CHERRUNGEL Bekerkard Becheleleu Mekekerei el Mechebechubel

EL RASECH el cells el cells meliliut el el klekedellel

er a rasech er a rasech tebetbil a a rasech

klekedellel a rasech

▼ ▼ ▼ ▼

A KRISTIANO Tebetbil a Tebetbil a Tebetbil a Tebetbil a

A KIREL MELILT bekerkard becheleleu mekekerei e mechebechubel

el cells el cells meliliut el el klekedellel

klekedellel a rasech a rasech

[Picture on page 17]

Lak mokor er a ukltkem a lsekum kau a chelebangel er a obo moruul er ngii el kirel a bliongel er a rasech