‘Molisechakl Er Tir Me Bo Lolab A Ikel Rokui El Bla Kdu Er Kemiu’

“Misei e morael el mora rokuil renged el rulleterir ar chad el mo Obengkek . . . , e molisechakl er tir me bo lolab a ikel rokui el bla kdu er kemiu.”​—MATTEUS 28:19, 20.

1. Ngera el cheldecheduch a mla er ngii er a delongelel a disciplo el Filipus me ngike el chad er a Ethiopia?

 NGIKE el chad er a Ethiopia a mirrael el mo er a Jerusalem. Ngar isei, e ngmilengull er a Dios el lebetik a rengul er ngii, el Jehovah. Ngbleketakl el kmo, ngdirrek el mle betik a rengul er a mlukreng el Tekingel a Dios. El ngar er a omerolel el mo remei el ngar er a basia er ngii, e ngmilenguiu er a ta er a llel aike el babier el lulluches a profet el Jesaia e osisiu el taem e a Filipus, el disciplo er a Jesus, a milsang. A Filipus a uleker er ngii el chad er a Ethiopia el kmo: “Ke mtab a ikel monguiu?” Me ngulenger er ngii el kmo: “A lak a chad losisecheklak e ak mekera e mo medengei?” A Filipus a mocha ngosuir ngika el chad el mesuub a Chedaol el Llechukl el mo disciplo er a Kristus.​—Rellir Ar Apostel 8:26-​39.

2. (a) El oeak a ngera el rolel e sel nger er ngike el chad er a Ethiopia ngar er ngii a belkul? (b) Ngera el ker el obengkel sel ngerachel er a Kristus a bo dosaod er ngii?

² Sel nger er ngika el chad er a Ethiopia a kmal klou a ultutelel. Ngdilu el kmo: ‘Ngmekera bo kudengei, a lak a chad el losisecheklak.’ Chochoi, nguluusbech er a chad el mo osisecheklii el mo omtab aike el tekoi el lulenguiu. Nguaisei, e tia el nger a ulechotii a klungel a ultutelel sel ileakl el omellach el Jesus a uldekiar er a ngerachel el mo meruul er a redisciplo. Ngera tia el omellach? A lsoad el mo medengelii a nger, e ngungil a dolemolem el melatk aike el tekingel a Jesus el ngar er a Matteus er a 28 el klou el bliongel. Sel suobel er a uchei a melsaod er a ker el ngera uchul? ma ngar er ker? Chelecha e kede mo omes er a lmuut el eru el ker el uldimukl er sel omellach er a Jesus el mo meruul a disciplo​—ngerang? ma oingerang?

“Molisechakl er tir el mo Olab a ikel Rokui”

3. (a) Ngmekera chad a bo el disciplo er a Jesus Kristus? (b) A omeruul er a redisciplo nguldimukl er a ngerang?

³ Ngera kired el olisechakl me bo lsebeched el ngosuterir a rebebil el mo disciplo er a Jesus? A Jesus a milellach er a ruleltirakl er ngii el kmo: “Misei e morael el mora rokuil renged el rulleterir ar chad el mo Obengkek, e molecholb er tir loba ngklel a Chedam, ma Ngalek, ma Chedaol Reng, e molisechakl er tir me bo lolab a ikel rokui el bla kdu er kemiu.” (Matteus 28:19, 20) Ma leuaisei, e ngkired el olisechakl aike el tekoi el lulellach a Kristus. * Engdi ngera ruoll me bo lulterekokl el kmo a chad el mosisechakl aika el tekoi el lulellach a Jesus a diak el di bo ledisciplo el lemerekong e ngmelemolem el uaisei? A ta el klou el tekoi a meues er aike el tekoi el luluusbech a Jesus. Ka momtab, ngdimlak el di ledu el kmo: ‘Molisechakl er tir a ikel rokui el bla kdu er kemiu.’ E ngbai dilu el kmo: ‘Molisechakl er tir el mo olab a ikel rokui el bla kdu er kemiu’ (Matteus 19:17) Tiang ngera belkul?

4. (a) Ngera belkul a dolab a omellach?(b) Momekesiu er a rolel a dosisecheklii a chad el mo olab a omellach er a Kristus.

⁴ A bo dolab a omellach a belkul a kmo a “blekerdeled a oltirakl” a omellach el olengesenges, ma lechub el urrekodel, er ngii. Ma leuaisei, e ngmekera dosisecheklii a ta er a chad me bo lolab, ma lechub e ngolengesenges aike el tekoi el lullelach a Kristus? Ka momdasu er a chad el olisechakl a bekall  er a mlai el kirel losisecheklterir a remesuub el mo omekall el oltirakl a llach er a traffic. Ngika el sensei a sebechel el olisechakl er tirka el mesuub el kirel aike el llechul a rael er a chelsel a class. Engdi, a bo lolsisechakl er tirka el mesuub el kmo ngmekera a bo loltirakl aika el llach, e ngkirel el mo omekrael er tir er sel taem el omekall er a traffic el melasem el ngar er sel sebechir el mo oltirakl aike el bla lsuub. Me ngosisiu, sel dosuub a Biblia el obengterir a rechad, e kede olisechakl er tir aike el llechul a Jesus. Engdi, kired el dirrek el omekrael er tirka el mesuub sel lolasem el mo oltirakl aike el llechul a Jesus er a klengar er tir er a bek el sils ma ngar er a omesiou. (Johanes 14:15; 1 Johanes 2:3) Ma leuaisei, e sel demui el oltaut er tia el omellach er a Jesus el mo meruul er a redisciplo a ousbech er kid el mo sensei e mo omekrael. El ngar er tia el rolel, e kede oltirakl er sel kerebai el lebilecherei a Jesus ma Jehovah.​—Psalm 48:14; Chocholt 7:17.

5. Ngera uchul ma chad el dosuub a Biblia el obengkel a mo meringel er ngii el olengesenges er a omellach er a Kristus el mo meruul er a redisciplo?

⁵ A dolisechakl er a rebebil el mo olab aike el llechul a Jesus a uldimukl er a dolengeseu er tir el mo oltirakl er sel omellach el mo meruul er a redisciplo. El kirir a rebebil el dosuub a Biblia el obengterir, e tia sebechel el mo meringel el tekoi. Alta te dirrek el kmal mle mesisiich el chedal a bebil el eklesia er a Klekristiano, ngdi ngdiak el sal ulterekokl el kmo tirke el di mla sensei er tir er a klechelid a mla osisecheklterir el mong el mo meruul er a redisciplo e ngdiak. A rebebil er a remengeteklel a klechelid a di beches el melekoi el kmo sel bo dosaod er a mo olisechakl er a delebechel el mo omerk er a ungil el chais, e aike el klechelid er a Klekristiano a kmal diak el sebechir. Ma losaod el kirel tia el omellach er a Jesus el mo merael el mo er a chelsel a beluulechad e ngosuterir a rebek el bedengir el rechad el mo disciplo, e a ta el chellimosk er a Biblia el John R. W. Stott a dilu el kmo: “Kid el diak doltirakl er a belkul a tekoi el ngar er tia el omellach a ochotii a chelitecheterir a ruumerk el Kristiano el kirel tia el ureor er a berkel a klumech er a chelecha el sils.” Ngdilechel el kmo: “Kede blechoel el ouchais er tia el klemeched el nger er a cheroid. A lebebil er a taem e kede kora ua rechad el dechor er a kederang e oldiu a ungil el tekoi el mo er a rosngung el chad el cheridang er a kederang. Ngdiak dongikai el mo olsobel er tir. Kede medakt el mo dekimes.”

6. (a) Sel dolengeseu er a mesuub er a Biblia, e kede mekera a doltirakl er a kerebil a Filipus? (b) Ngmekera dolecholt el kmo kede kerekikl sel lomuchel ngike el mesuub er a Biblia, el mo teloi er a berkel a klumech?

⁶ A lsekum e kede mesuub a Biblia el obengkel a chad el mle teloi er a klechelid el rechedal a “medakt el mo dekimes,” e nglocha mo meringel er ngii el mo mesisiich er tia el dektel er a ralm, el di ua ngar er a mong, e mo oltirakl er a omellach er a Kristus el mo meruul er a redisciplo. Ngmo ousbech a ngeso. Me nguaisei, e ngkired el mo klou a rengud sel domsang aike el ousbech el osisechakl ma ulekrael el mo dmolech a utebengel me bo lolisiich er ngii el mo meruul a tekoi, el di uai aike el osisecheklel a Filipus el millisiich a ulemekllomes er ngike el chad er a Ethiopia e mellisiich er ngii el  mo metecholb. (Johanes 16:13; Rellir Ar Apostel 8:35-38) Ma lmuut el tang, e sel rengud el kmal soad el losisecheklterir tirke el dosuub a Biblia el obengterir el mo obang tia el omellach el mo meruul er a redisciplo a rullid el mo oureor el obengterir el lomekrael er tir sel lenguu sel kot el bakes er a berkel a Renged.​—Osisechakl 4:9, 10; Lukas 6:40.

“A ikel Rokui”

7. A dolisechakl er a rebebil el mo ‘olab a rokuil tekoi’ uldimukl er a dolisechakl er tir er a ngera el omellach?

⁷ Ngdiak di lekid el melecha er a telkeled el mo el mo olisechakl er a rebeches el disciplo el mo meruul er a redisciplo. A Jesus a milellach er kid el mo olisechakl er a rebebil “me bo lolab a ikel rokui” el tekoi el lullelach er tir. Tia ulterekokl el uldimukl er ngii aike el eru el meklou el omellach​—el mo betik a rengum er a Dios e mo betik a rengum er a ngar er a bita er a kau. (Matteus 22:37-​39) Ngmekera a beches el disciplo a mosisechakl el mo olab aika el teblo el llach?

8. Momekesiu a rolel e a beches el disciplo a mo sebechel el mosisechakl er sel omellach el mo olecholt a bltikerreng.

⁸ Ka mluut el omdasu er sel okesiu er ngike el mesuub el omekall. Sel bocha lomekall ngii el mesuub el mo soiseb er a traffic el obengkel a sensei el ngar er a bita er ngii, e ngii el chad a mesuub el omekall el diak di loeak sel orrenges er a sensei er ngii e ngdirrek el omes er tirke el bebil el omekall. El uai tiang, a sensei a locha mo ochotii a ta el omekall a mlai el ungil a rengul me ngmecherei ta er a mlai el mo oeakuchei er ngii er a traffic; ma lechub a ta el omekall a mlai el rullii a otelel a mlil me lak el sal medidiich a medad er ngii me bo luchul e bo el lak lemekngit a osengir tirke el merael el mei el omekall a mlai; ma lechub a chad el omekall a mlai el kongei el ngosuir a chad el mla metemall a mlil. Ma ua ika el okesiu a osisecheklii ngii el mesuub a bekall a meklou a ultutelel el tekoi el sebechel el oltirakl sel omekall a mlai. Me ngosisiu, a beches el disciplo el merael er tia el rael el mo er a klengar a diak di losuub er a sensei er ngii e ngdirrek el mesuub aike el ungil el kerebai el leues er a chelsel a ongdibel.​—Matteus 7:13, 14.

9. Ngmekera beches el disciplo a suubii a belkul a omellach el mo olecholt a bltikerreng?

⁹ El uai tiang, a mesuub er a Biblia a locha sebechel el mo omes er a ta el chedil el diak el bechiil el melasem er a tkurrebab el klisichel el mei er a Kingdom Hall el obetiterir a rengelekel. Nglocha sebechel el mesa a mekngit a rengul el chad el blak a rengul el me er aike el miting a ltang ngoldechelakl er tia el klengiterreng, ma mechas el mla mad a bechil el omekall er a rebebil er a remechuodel el me er a bek el miting er a ongdibel, ma lechub a ngeasek el olengeseu el mengedmokl er a Kingdom Hall. Ngika el mesuub er a Biblia a locha sebechel el mesa a chuodel er a ongdibel el blak a rengul el ngar er a medal el omerael er a berkel a klumech a ltang ngkmal betok a ngerechelel er a ongdibel. Nglocha sebechel el mo medengelii a Sioning el chitechut me ngdi kiei er a blai e ngdi nguchul a omelisiich er a tekoi er a klereng el mo er tirke el rokui el oldingel er ngii. Ngii el mesuub a locha sebechel el mesterir a rubekel el meruul a meklou el omelodech er a klengar er tir me bo lsebechir el omes e lobeteterir a remechuodel el demerir ma derrir. Me sel lomes er tirka el bekokeuii, e bokengeseu e bekongerachel el Kristiano, e ngika el beches el disciplo a mosisechakl er a kerebai el kmo ngera belkul sel dolengesenges er a omellach er a Kristus el mo betik a rengud er a Dios me tirke el ngar er a bita er kid, tokubets loubltikerreng el mo er tirke el dedu loumerang. (Osisechakl 24:32; Johanes 13:35; Galatia 6:10; 1 Timoteus 5:4, 8; 1 Petrus 5:2, 3) El ngar er tia el rolel, e a redersta el chad er a ongdibel er a Kristiano a sebechel​—e kirel​—el mo sensei e mo omekrael.​—Matteus 5:16.

“El mo lmuut er a Ullebongel ra Belulechad”

10. (a) Ngua ngera klteketel a taem el kired el melemolem el meruul er a redisciplo? (b) Ngera el kerebai a lebilecherei a Jesus el kirel a doltaut er a ngerachel?

¹⁰ El mo lmuut er a oingerang e ngkired el melemolem el meruul er a redisciplo? El mo lmuut er a ullebongel er tia el beluulechad. (Matteus 28:20) Ngmo sebeched el merekui er tia el telengtengil tia el omellach er a Jesus? Kid, el ua ta el ongdibel er a beluulechad el rokir, a ulterekokl el mo meruul el uaisei. Me ngar er aike el mereko el betok el rak, e kede mle dmeu a rengud el ousbech a temed, ma klisiched, ma klokled el mo osiik er tirke el “kirir el mo nguu a diak a ullebengelel el klengar a mlo oumerang.” (Rellir Ar Apostel 13:48) Chelecha el taem, e a Resioning er a Jehovah a chemoit a kuk betok er a edei el milliol el sikang er a bek el sils er a ta el rak el omerk er a klemechel a Renged el ngar er tia el ureor er a meruul er a rechad el mo disciplo  er a beluulechad el rokir. Kede meruul el uaisei e le kede oltirakl er a kerebil a Jesus. Ngdilu el kmo: “Sel kuruul a soal ngikel ulderchak e krekir a urerel, itiakid a kelek.” (Johanes 4:34) Tia el tekoi a dirrek el kmal soad er a rengud el rokir. (Johanes 20:21) Ngsoad el meruul a kuk lmuut el betok er a di domuchel er tia el ureor el mloterekokl er kid; ngsoad el merekui er ngii el rokir.​—Matteus 24:13; Johanes 17:4.

11. Ngera dilubech el kirir a rebebil er a rudam ma rudos er kid el Kristiano, e ngera kired el oker er kid?

¹¹ Ngmekngit a rengud e le kede mesterir er a rebebil er a dedak el ngar er a ta el klaumerang el merael el mo mechitechut er a tekoi er a klereng, el uchul, me te mla mo diak el blechoel ma lechub e te meterob el oltirakl er tia el omellach er a Kristus el meruul er a disciplo. Ngar er ngii a rolel el sebeched el ngosuterir tirka el chad el mo omekbeches er a klausechelei er tir el obengkel a ongdibel e lmuut el mo teloi er tia el ureor er a omeruul er a redisciplo? (Rom 15:1; Hebru 12:12) Sel blekeradel el uluusbech er ngii a Jesus el ngosuterir a rechapostol er ngii er sera bo lemechitechut el telkib el taem a ochotii el kmo ngera sebeched el meruul er ngii er a chelecha el taem.

Molecholt el Kmo Ke Kerekikl

12. (a) Ngdi telkib er a uchei er a kodellel a Jesus, e te milekera a rechapostol er ngii? (b) Ngmilekera Jesus er a losaod a tekoi el obengterir a rechapostol er ngii a lta te ullecholt a meklou el chelitechut?

¹² Sera ullebongel el omesiungel a Jesus el ngar er tia el chutem, el olekedang a kodellel, e a rechapostol er ngii a “chilitii el rokui e chemiis.” El ua lullekoi a Jesus, e te “meterakl el mora rekeblimiu.” (Markus 14:50; Johanes 16:32) Ngmilekerang a Jesus er a lengosuterir tirka el mechitechut er a klereng el lulebengkel? Ngdi mle telkib er uriul er a okisel, e a Jesus a dilu er a rebebil er a ruleltirakl er ngii el kmo: “Lako medakd, e morael el mo subedeterir ar udam er ngak me le bora Galilea, e te mo osiueklak er isei.” (Matteus 28:10) Alta tirka el apostol a ulecholt a meklou el chelitechut, engdi a Jesus a dirk millemolem el omekedong er tir el “mar uchellek.” (Matteus 12:49) Ngdimlak bo lak loumera er tir. El ngar er tia el rolel, e a Jesus a mle chubechub e ousubes, el uai a Jehovah el chubechub e ousubes. (2 King 13:23) Ngmekera e sebeched el oukerebai er a Jesus?

13. Ngkirel el mo ua ngera osenged el kirir tirke el mla mo mechitechut er a klereng?

¹³ Ngkired el mo kerekikl el melatk er tirke el mla mo diak el blechoel ma lechub e te mla meterob el oureor er tia el ureor er a omesiou er a Renged. Kede dirk melatk aike el ureor er a bltikerreng el luruul tirka el dedak el ngar er a ta el klaumerang er aike el mereko el betok el rak​—a rebebil el kirel a betok el rak. (Hebru 6:10) Kede kmal mera el loureng er sel klausechelei er tir. (Lukas 15:4-7; 1 Thesalonika 2:17) Engdi, ngmekerang a dolecholt er a omeltked el mo er tir?

14. El oltirakl er a kerebil a Jesus, e ngmekerang a dongeseuir a mechitechut el chad?

¹⁴ A Jesus a millekoi er tirke el mekngit a rengrir el apostol er ngii el kmo ngkirir el mo er a Galilea me bo lsebechir el mo er isei. Ngar er tia el rolel, e a Jesus a mlengemedaol er tir el mo er a ileakl el miting.  (Matteus 28:10) Me ngosisiu er a chelecha el sils, e kede melisiich er tirke el mechitechut er a tekoi er a klereng me lemei er aike el miting er a ongdibel er a Rekristiano, e locha dirrek el kired el melisiich er tir el betok er a ta el taem. El kirir tirke el apostol, e sel omengemedaol a mla er ngii a klisichel, e le “ar truich ma tal Obengkel a Jesus a mlora Galilea el mo ngmasech er sel rois e lullekoi er tir a Jesus el kmo ko mor ngii.” (Matteus 28:16) Ngkol ua ngera el deurreng a dolechesuar a lsekum tirke el mechitechut a mo onger el uai tirke el apostol er aike el mekeald el omengedaol er kid e lmuut el mer er aika el miting er a Rekristiano!​—Lukas 15:6.

15. Ngmekera doltirakl er a kerebil a Jesus sel douetkeu er a remechitechut el mei er a basio er kid er a miting?

¹⁵ Kede mo mekerang sel lemei a mechitechut el Kristiano er a Kingdom Hall? A Jesus, ngmilekerang er sera lesterir a rechapostol er ngii, el klaumera er tir a mle telkib el taem el mechitechut, er sel telutk el basio er a miting er tir? “Ma Jesus a mocha kmeed er tir e mengedecheduch er tir.” (Matteus 28:18) Ngdimlak el di lomes er tir er a cheroid e ngbai mlo kmeed er tir. Ka di molatk a rengrir a rechapostol el kmal mlo chelellakl e le Jesus a uluusbech er sel techall. Me kede dirrek el uaisei el ousbech a techall e douetkeu er tirke el mechitechut er a tekoi er a klereng el melasem el lmuut el mei er a ongdibel er a Rekristiano.

16. (a) Ngera sebeched el suubii er sel blekeradel el Jesus a uluusbech er ngii el mesaod a tekoi el obengterir a rulebengkel? (b) Ngmekera doba uldesuel a Jesus el kirir a remechitechut? (Momes er a footnote.)

¹⁶ Ngerang dirrek el mirruul er ngii a Jesus? A kot, e ngrirellii tia el subed: “A rokuil klisichel chomerreder ra eanged ma chutem a le bilskak.” A ongerung, e ngmilsterir tia el ngerachel: “Misei e morael el mora rokuil renged el rulleterir ar chad el mo obengkek.” A ongedei, e ngrirellii a telbiil: “Ak di blechoel lobengkemiu el mo lmuut era ullebongel ra belulechad.” Engdi ke milsa el kmo ngerang a dimlak el loruul er ngii a Jesus? Ngdimlak loungeroel er a redisciplo er ngii er a chelitecheterir ma kloumededenger er tir. (Matteus 28:17) Tia el rolel a omengedecheduch, ngmla er ngii a lerellii? Choi. Ngdimlak bo el meketeket, e a rechapostol a liluut el mo “olisechakl e omerk er tia el ungil chais.” (Rellir Ar Apostel 5:42) A bo doltirakl er a kerebil a Jesus er a kmo ngua ngera uldesued ma omerelled el mo er tirke el mechitechut, e kede ulterekokl el mo mesa osisiu el ungil el tekoi el mo er ngii er a chelsel a ongdibel er kid. *​—Rellir Ar Apostel 20:35.

“Ak Diblechoel Lobengkemiu el mo Lmuut er a Ullebongel ra Belulechad”

17, 18. Ngera el omelisiich el uldasu a ngar er ngii er a tekingel a Jesus el kmo, “Ak di blechoel lobengkemiu el mo lmuut era ullebongel ra belulechad”?

¹⁷ Aike el ullebongel el tekoi er a ngerachel er a Jesus, “Ak di blechoel lobengkemiu el mo lmuut er a ullebongel ra belulechad,” a ngar er ngii a mesisiich el uldasu el kirir a rokui el chad el melasem er a tkurrebab el sebechir el oltaut er a omellach er a Kristus el mo meruul er a redisciplo. A ngii di el ultok el loruul a recheroued el bedul tia el urered er  berkel a Renged ma ngii di el mekngit el tekoi el lotobed el omtok er kid, ngdiak a uchul e kede mo medakt. E ngera me ngdiak? A Jesus, el Merredeled, el ‘olab a bek el klisiich er a eanged ma chutem,’ a obengked el olengeseu er kid!

¹⁸ A telbilel a Jesus el kmo “Ak di blechoel lobengkemiu el mo lmuut el mo era ullebongel ra belulechad” a dirrek el uchul a klou el ongelaod. Sel dolasem er a tkurrebab el sebeched el oltaut er tia el omellach er a Kristus el mo meruul er a redisciplo, e kede mo melechesuar a diak el di sils er a deurreng e ngdirrek el sils er a klengiterreng. (2 Kronika 6:29) A rebebil er kid a melechesuar a taem er a klengiterreng sel dongeiung er a kodellel a betik er a rengud. (Genesis 23:2; Johanes 11:33-36) A rebebil a outekangel er a cheluodel, sel blekerdelel ma klisichel a bedengir a merael el mo mechitechut. (Olisechakl 12:1-6) Engdi ngar er ngii a rebebil el chelebangel a taem sel bo el klou a mondai er tir er a chelitechut el reng. (1 Thesalonika 5:14) Ma di merael el mo meklou el ildisir a rechad er a delongeled a outekangel a meringel el rolel a keizai. Nguaisei, alta ngar er ngii a betok el mondai, ngdi kede mesisiich el ngar er a oumesiunged e le Jesus a obengked “el mo lmuut er a ullebongel ra belulechad,” el uldimukl er aike el kot el meringel el sils er a klengar er kid.​—Matteus 11:28-​30.

19. (a) A ngerachel er a Jesus el mo meruul er a redisciplo nguldimukl er a ngera el osisechakl? (b) Ngera rullid me ngsebeched el oltaut er a ngerachel el mla er a Jesus?

¹⁹ El uaike el bla deues er tiang me sel uleak uchei el suobel, a ngerachel er a Jesus el mo meruul er a redisciplo a uldimukl er a rokui el tekoi. A Jesus a uluuchais er kid el kmo ngera uchul ma ngar er ker a kired el oltaut er tia el omellach. Ngdirrek el uluuchais er kid el kmo ngera kired el olisechakl e mo oingerang e kede meruul el uaisei. Merang, a doltaut er tia el klou el ngerachel a diak el beot. Engdi a doba omengederederel a Kristus el olengeseu er kid ma ngii el obengked, e ngsebeched el rullii el rokir! Kau ngdiak mkengei?

[Aike el footnote]

Ngmekerang a Omonger?

• Ngmekerang a dolisechakl er a rebebil el mo olab aike el tekoi el lulellach a Jesus?

• Ngera el suobel a sebechel a beches el disciplo el suub er a rebebil er a chelsel a ongdibel?

• Ngera sebeched el meruul el ngosuterir tirke el mla mo mechitechut er a tekoi er a klereng?

• Ngera el omelisiich ma ongelaod a sebeched el nguu er a telbilel a Jesus el kmo “Ak di blechoel lobengkemiu el mo lmuut era ullebongel ra belulechad”?

[Aike el Ker er a Suobel]

[Siasing el ngar er a 26 el llel]

Ngkired el mo sensei e mo omekrael

[Siasing el ngar er a 28 el llel]

A beches el disciplo a mesuub a meklou a ultutelel el tekoi er a kerebai er a rebebil