Domekeroul A Osenged El Kirel A Klengarbab El Ua Osengel A Kristus

“Ngikel soal ngarbab ra delongeliu a kirel mo mesiungiu.”​—MATTEUS 20:26.

NGKMEED er sel mats er a Egipten er a irechar el Thebes (el Karnak er a chelecha el sils), el bekord el 300 mael el ngar er a dimes er a Kairo, e ngdechor a 60-el-sak a klemengetel el bleob el llecheklel a Farao el Amenhotep III. A chad a diak lsebechel el omes er tia el kmal klou el bleob e lak lolechesuar el kmo ngii a kmal kekerei sel lomekesiu er ngii el mo er sel bleob. Me sel ngesechel a cherechar el bleob, el ulterekokl el lerirellii el rulleterir a rechad el mo mengull er ngii el merredel, a omtechei er a osengel a beluulechad el kirel a klengarbab​—⁠el chad el di ngii el rullii el mo klou e klou a ultutelel er a rebebil e rulleterir a rebebil el mo mekekerei e diak a ultutelir.

² Me domekesiu er tia el uldasu el kirel a klengarbab me sel uldasu el lullisechakl er ngii a Jesus Kristus. Altang mle ‘Rubak e Sensei’ er a rulebengkel, engdi ngullisechakl er tir el kmo a klengarbab a mo er tir a bo losiou er a rebebil. Ngar er sel ullebongel el sils er a klengar er ngii el ngar er tia el chutem, e a Jesus a ullecholt er a belkul a osisecheklel er a loriso a ocherir a redisciplo er ngii. Ngkol ua ngera el ngar er a eou el omerellel a omesiou! (Johanes 13:​4, 5, 14) Mo mesiou ma lechub e ngmo siungel​—⁠ngera er aikang a soam? A kerebil a Kristus ngmekedbechii er a chelsem a reng el soal el mo ngar er a eou a rengum el ua ingii? A leuaisei e ka me bo dorritel er a osengel a Jesus el kirel a klengarbab e domekesiu er ngii er a osengel a beluulechad el kirel tiang.

Mengeroid er Kau er a Osengel a Beluulechad el kirel a Klengarbab

³ Ngngar er ngii a betok el okesiu er a chelsel a  Biblia el olecholt el kmo a osengel a beluulechad el kirel a klengarbab a mo uchul a tellemall. Ka di molatk er ngike el luleba klisiich el Haman, e ngmle ngar er a bab el chad er a beluu er a Persia er a taem er a Esther ma Mordekai. A ngibeserreng er a Haman el kirel a klebkall a mlo uchul a rrengel ma kodellel. (Esther 3:5; 6:​10-​12; 7:​9, 10) Ngkuk mlo ua ngerang ngike el kedidai a rengul el Nebukadnesar, el ngii a mlo kebelung er sel taem el ngii a mle kot el ngar er a bab a klisichel? Sel cheleuid el uldesuel el kirel a klengarbab a mlocholt el ngar er aike el tekoi el kmo: “Ng meral kebkall a Babilon! Ak tileketekii el kirel mo blil omengedereder el olecholt er a klisichel omerrederek, ma klebkellek ma chetengek.” (Daniel 4:​30) E sola e ngmla er ngii ngike el kedidai a rengul el Herod Agrippa I, el ngii a kilengei er a diak lerredemelel el klebkall el mo er ngii er a bai longebkall er a Dios. “Me ngmleka ra chiekl e mad.” (Rellir 12:21-​23) E le tir el dimlak lodengelii a osengel a Jehovah el kirel a klengarbab me tia mlo uchul a telemellel a klisichir tirka el chad.

⁴ Ngungil a dousbech er a klengar er kid me bo luchul a klebkall ma omengull el me er kid. Nguaisei engdi, a Diabelong a sebechel el ousbech er tia el uldasu e melisiich er a kldidaireng, el ngii a olechotel a ngibeserreng er ngii. (Matteus 4:​8, 9) Kele mobes el kmo ngii a “chelid er tial belulechad,” e ngii a soal el melisiich er a uldesuel er tia el chutem. (2 Korinth 4:4; Efesus 2:2; Chocholt 12:9) E le te medengelii a uchul choua tia el uldasu, ma Rekristiano a mengeroid er tir er a osengel a beluulechad el kirel a klengarbab.

⁵ A ta el uldasu el lolisiich er ngii a Diabelong a kmo a bo lorael a chisir el ngar er tia el beluulechad, ma lenguu a odanges er a rechad, ma bo lebetok a udoud a ulterekokl el mo uchul a klou el deurreng er a klengar er tir. Tia ngmera el tekoi? A omeruul, ma chetengakl, ma kerruul ngoterekeklii a klengar el mui er ngii a deurreng? A Biblia a omeklatk er kid el kmo ngdiak el kired el mo mecheuid er choua ike el uldasu. Ngike el mellomes a rengul el King el Solomon a milluches el kmo: “Ak dirrek el mlo medengei el kmo ng ngera ma chad a meringel el oureor e oltobed a kldachelbil er a ureor el mo ungilbesul. Ng chelechingel er a chad el ngar bita er ngii a uchul. Tia dirrek el di diak a ultutelel e ua doltoir er a eolt.” (Olisechakl 4:4) A rebetok el chad el mtilenget a klengar er tir el mo ngmai a chetengakl er tia el beluulechad a sebechir el oterekeklii a klemerang er sel uleklatk er a Biblia. A ta el okesiu a kirel a chad el ullengeseu er a omelechesel, ma omerellel, ma oketmeklel sel skoki el ngiliititerir a rechad el mo er a buil. Me ngdilu el kmo: “Ak mle meringel el oureor e kmal mlo meduch er a urerek. Engdi ngmlo diak a ultutelel, el diak a belkul el kirek, e le ngdimlak lebeskak a mera el deurreng ma budech er a uldesuek.” * A uldesuel a beluulechad el kirel a klengarbab, el ngar er a siobai, ma lechub e ngklekool, ma lechub e ngomilil, a diak el sebechel el loterekeklii a diak a ullebengelel el deurreng.

A Klengarbab a Mei el Ngar er a Omesiou el Oeak a Bltikerreng

⁶ A ta er a tekoi el dilubech er a klengar er a Jesus a olecholt el kmo ngerang a uldimukl er a mera el klengarbab. A Jesus ma redisciplo er ngii a mlo  er a Jerusalem el kirel a oketmeklel a Baskua er a 33 C.E. Ma lengar er a omerollir el mong, e a reteru el chedal a Jesus, el Jakobus ma Johanes, a ulechotii a cheleuid el osengir el kirel a klengarbab. Ngoeak a derrir, e te ullengit er a Jesus er tia el tekoi el kmo: ‘Molekoi me bo lsebecham el terung a ta bo ldengchokl ra kidekmem, ma ta le bora katrum era rengedem.’ (Matteus 20:21) Ngar er a delongelir a Rechijudea, a bo ldengchokl er a kidekmel ma lechub a katrul a chad a mle kmal klou el klebkall. (1 Kings 2:​19) A Jakobus ma Johanes a millasem el melai aike el ngar er a bab el deruchall. Ngmle sorir el olterekokl a ngar er a bab el deruchall el kirir. Engdi Jesus a mle medenge el kmo ngerang a mla er a uldesuir e ngiluu a techall el mo omeklemalt er sel cheleuid el osengir el kirel a klengarbab.

⁷ A Jesus a mle medengei el kmo ngar er a chelsel tia el kedidai a rengul el beluulechad, e ngike el lekong ngar er a bab el chad a ngikeikid a omtebechel e mengedereder er a rebebil me ngdi olekesebakl a chimal e aike el rokui el soal a mo meketmokl. Ngdi a kuk lengar er a delongelir a rultirakl er a Jesus, e ngbai a ngar er a eou el reng el omesiou a seikid a oterekeklii a klengarbab er a chad. A Jesus a dilu el kmo: “Ngikel soal ngarbab ra delongeliu a kirel mo mesiungiu, me ngikel soal mo kot ra delongeliu a kirel mo sibmiu.” ​—Matteus 20:26, 27.

⁸ A tekoi er a Griik el mloiuid el kmo “mesiou” el ngar er a Biblia a mesaod er a chad el blak a rengul e blechoel el osiik a rolel el mo mesiou el kirir a rebebil. A Jesus a ullisechakl er a redisciplo er ngii a klou er a ultutelel el suobel: A chad el di oked er a rechad el mo meruul a tekoi a diak leseikid a rullii ngii el chad el mo ngarbab; ngbai ngike el modubech er a bltikerreng el mo mesiou er a rebebil a ngar er a bab. Me di lekau el oker er kau el kmo: ‘Omko ngak a mle Jakobus ma lechub ak mle Johanes e ak mlo mekerang er seikid el taem? Ngak ngmlo sebechek el mo medengei el kmo a mera el klengarbab a mei loeak a omesiou el mla er a bltikerreng el mei?’ ​—1 Korinth 13:3.

⁹ A Jesus a ullecholt er a redisciplo er ngii el kmo a teletael er a klengarbab er a beluulechad a diak el teletael er a klengarbab el lulechotii a Kristus. Ngkmal dimlak lekora oumerreder er ngii el bedul a rebebil ma lechub e lerelleterir el ua lsal ngar er a eou el chad. A rebek el bedengir a rechad​—⁠el sechal, ma redil, ma rengalek, ma remerau, ma remechebuul, ma remesisiich el chad, ma remerael a chisir el dengerenger el chad​—⁠a rokui el mle sebechir  el mo kmeed er ngii. (Markus 10:13-​16; Lukas 7:​37-​50) A rechad a blechoel el seselk a rengrir er tirke el chad el ngar er ngii a chelitecheterir. Ngdi a Jesus a mle ngodech a blekerdelel. Mo lmuut er a lak lomdasu e di lekaititekangel a redisciplo er ngii, ngdi Jesus a uluutekangel el olsisechakl er tir, el olecholt er tir el kmo ngii a mera el ngar er a eou a rengul e medemedemek. ​—Sekarias 9:9; Matteus 11:29; Lukas 22:24-​27.

¹⁰ Tia el diak longreos el kerebai el lebilecherei ngike el kot el ngar er a uchei el Ngelekel a Dios a ulechotii a mera el belkul a klengarbab el tekoi. A Jesus a dimlak lemei er a chutem el me siungel e ngbai mlei el me mesiou er a rebebil, el omekungil a “kakerous el rekdir” e uleldik er a remekngit el reng er a chelsir a rechad. Ngii a mlo mesaul a bedengel e mle kirel el mo olengull, ngdi ngii a mle blechoel el melatk a mo klungiolir a rechad er a ruchei er a lolatk a mo klungiolel, el uluutekangel el mo mengelaod er tir. (Markus 1:​32-​34; 6:​30-​34; Johanes 11:11, 17, 33) A bltikerreng er ngii a rirellii el mo olengeseu er a rechad er a tekoi er a klereng, el merael a betok el dart el mael er a rael el mui er a hokori el mo omerk er a ungil el chais er a Renged. (Markus 1:​38, 39) Me ngbleketakl el kmo, a Jesus a ulemes er a omesiou er a rebebil el klou a ultutelel el tekoi.

Moukerebai er a Klengareourreng er a Kristus

¹¹ Ngar er a ullebengelel a rak er a 1800, e sel melemalt el osengel a overseer el Kristiano el kirel lomekeroul er ngii a mlo bleketakl er a bocha lolilt er a resechal el mo merael el oldingel el olengeseu er aike el ousbech a rechedal a Dios. Ma ike el lousbech, a doltirakl er a Zion’s Watch Tower er a September 1, 1894, a resechal el “medemedemek​—el diak lomkuuk . . . , el ngar er a eou a rengrir el diak lomerk a tekoi el kirir, ngbai kirel a Kristus​—e diak lolecholt a di klemedengei er tir, ngbai olecholt a Tekingel el ngii a beot e mesisiich.” Me ngbleketakl, a remera el Kristiano a diak losiik a ngerachel el di kirel a sebesabelreng er tir ma lechub el mo melai a deruchall, ma klisiich, ma klisichel a omerredel er a rebebil. A ngar er a eou a rengul el overseer a melatk el kmo a ngerechelel a meruul a “ungil lurreor,” el diak el ngar er a bab el deruchall el mo uchul a klebkall el kirel. (1 Timoteus 3:​1, 2) A rechelder ma reministerial servant el rokui a kirir loba ngar er a eou el reng e mesiou er a rebebil er sel kot el ngar er a bab el klisichir e mo ngar er a medal a ureor er a chedaol el omesiou, el mechei a ungil el kerebai el bo loltirakl a rebebil.​—⁠​—1 Korinth 9:​19; Galatia 5:​13; 2 Timoteus 4:5.

¹² A ngii di el odam el osiik a techall a kirel di ngii el oker el kmo: ‘Ngak a kusiik a techall el mo mesiou er a rebebil, ma lechub e ngbai kora soak a losiou er ngak a rechad? Ngak ak kongei el meruul  a ureor el ngii a diak lemeues er a rebebil?’ El di ua tiang, a kekere el chad a kongei el oltobed a cheldecheduch er a ongdibel er a Rekristiano e ngdi ngdiak el soal el olengeseu er a remechuodel el chad. Ma ltang ngsoal lobengterir tirke el odam el oungerachel er a ongdibel ngdi ngdiak el soal el oldingel el obliil. Choua ingika el kekere el chad a kirel di ngii el oker el kmo: ‘Ngak ak di meruul aike el omesiou el sebechel el mo uchul a chetengakl ma odanges el kirek? Ngak ngsoak a bo lungil a chisek er a mederir a rebebil?’ A lsekum e ngsoad a chetengakl, e kid a diak doltirakl er a kerebil a Jesus. ​—Johanes 5:​41.

¹³ A doutekangel el oltirakl er a ngar er a eou el reng er a Kristus, a rullid el mo mesiou er a rebebil. Ka mesa tia el okesiu er a ta el zone overseer el ngii a merriter a ureor er a ta el obis er a branch er a Resioning er a Jehovah. Ngii a kmal mle betok a urerel ma ngerechelel a dirrek el oberaod, engdi ngmlo er a bita er a kekere el odam el mengituuk er a mesil er a omerasem el meruul a babier el mlo olengeseu er ngii. Ngka el kekere el odam a dilu el kmo: “Ngmera el mlo mechas a renguk! Nguluuchais er ngak el kmo sera lekekere el chad el oureor er a Bethel e ngii a uluureor er a choua itia el mesil, e dirk melatk el kmo ngkmal meringel a dechauaser a klekedellel tia el mesil. Me ngmlei ma ki mlengitituuk er ngii el telkib el mlo meketeket altang ngmla er ngii a kuk betok el meklou el lurreor el mle kirel el mo meruul. Ngmera el chilsir a renguk.” Ngka el odam, el ngii a ta er a overseer er a ta er a obis er a branch er a Resioning er a Jehovah er a chelechang, a dirk melatk er tia el tekoi el ulechotii a klengareourreng. Me kid lak domdasu el kmo kede kmal ngar er a bab el chad me ngdiak doruul a ngar er a eou el tekoi ma lechub e kede kmal meklou a ultuteled me ngdiak doruul a ngar er a eou el ureor. Kede bai kired, el mo oubail er a “ngariourreng.” Tiang a diak el ua letekoi el dolilt el mo meruul ma lechub e ngdiak. Tiang a telengtengil “ngikel beches el chad” el kmal kirir a Rekristiano el mo oubail er ngii.”​—Filipi 2:3; Kolose 3:​10, 12; Rom 12:16.

Ngmekerang a Denguu a Osisiu el Osengel a Kristus el Kirel a Klengarbab

¹⁴ Kede mekerang e nguu a melemalt el osenged el kirel a klengarbab? A ta er a rolel a bo dolebedebek er a delongeled kid ma Jehovah el Dios. A iltetel, ma klisichel, ma llemesel a rullii el kmal mo ngar er a bab er a remechitechut el chad. (Isaia 40:22) A bo dedmolech el melebedebek er a delongeled kid ma rechad a dirrek el sebechel el ngosukid el mo omekeroul er a klengareourreng. El di ua tiang, alta e kede kuk meduch er a rebebil er a kmung ngera el ureor, engdi tir alta e te kuk ngar er a uchei er kid er a kuk meklou el tekoi el kirel a klengar, ma lechub e a rudam er kid el Kristiano a ngar er ngii er tir a bebil el blekeradel el diak er kid. A mera er ngii, te betok er tirke el chad el mekreos er a medal a Dios a kora diak el sal ileakl el chad e le tir el medemedemek e ngar er a eou a rengrir.​—Osisechakl 3:​34; Jakobus 4:6.

¹⁵ A betok el experience er a Resioning er a Jehovah er a lengar er a kerrekeriil el kirel a klaumerang er tir a ungil el ocholt el kirel tia el tekoi. Ngbetok el taem, e tirke el chad er a beluu a omdasu er tir el kmo te di hutsu el chad a mle blak a rengrir el mo er a Dios er a chelsel a meringel el ongarm. Ma dolebedebek er a choua ika el kerebai a sebechel el ngosukid el mo oba ngareourreng e osisecheklid  me ‘lak bo lkididai a uldesued el bedul kid el engelakl er sel kired lomdasu er ngii.’​—Rom 12:3. *

¹⁶ A rokui el Kristiano, a remekekerei ma remeklou, a kirir el omekeroul er tia el osisiu el osengel a Kristus el kirel a klengarbab el tekoi. Ngar er a chelsel a ongdibel, e a kakerous el ureor a kirel ruoll. Lak lengasech a rengum a lolengit er kau el mo meruul a kora ngar er a eou el ureor. (1 Samuel 25:41; 2 King 3:​11) Kemiu el chedam ma rechedil, ko melisiich er a remekekerei ma rengeasek el ngelekiu el mo ungil el meruul a ngii di lureor el lebesterir el mo meruul, el ngar er a Kingdom Hall ma lechub el ngar er a basio er a convention? Tir te dirrek el omes er kemiu el meruul a ngar er a eou el lureor? A ta el odam, el oureor er a chelechang el ngar er sel headquarter er a Resioning er a Jehovah er a beluulechad el rokir, a kmal dirk melatk er a kerebai er a demal ma delal. Ngdmu el kmo: “A rolel a longetmokl a ureor er a Kingdom Hall ma ureor el ngar er a basio er a convention a ulechotii er ngak el kmo sel ureor a mle klou a ultutelel. Te mle blechoel el kongei el meruul a ureor el mo uchul a klungiolel a ongdibel ma lechub ngklungiolel a klodam, alta e ngii el ureor a mle ngar er a eou el ureor. Tiaikid el teletael a mla ngosukak el mo kongei el meruul a ngii di el ureor el ngar er a Bethel.”

¹⁷ Sel dosaod el kirel a bo denguu a mo klungiolir a rebebil el mo er a uchei er a mo klungioled, e ngar er ngii a kot el ungil el kerebai er a Esther, el ngii a mle kuin er a Renged er a Persia er a ongeim el dart el rak B.C.E. Altang mle kiei er a blil a king, engdi ngii a kilengei el mo ocherur a kodall el kirir a rechedal a Dios, el meruul el uaisei el oltirakl a soal a rengul. (Esther 1:​5, 6; 4:​14-​16) Ma lengar er a ngii di el blekerdelel a klengar er tir, e a redil el Kristiano er a chelechang a sebechir el olecholt er a ua rengul a Esther sel lolisiich er a resmecher er a berkel a klumech, ma lolengeseu er a remechuodel. Ngkol ua ngera el klengeltengat choua tirka el odos el mo er a ongdibel!

Aike el Klengeltengat el Mei a Doltirakl er a Klengarbab er a Kristus

¹⁸ A betok el klengeltengat a obo moridm a lsekum kau a orreked er a osengel a Kristus el kirel a klengarbab. A lak mongreos sel omosiou er a rebebil a mo uchul a deurreng el kirir ma deurreng el kirem. (Rellir Ar Apostel 20:35) E a kuk lmuut el klou a ultutelel, a Jehovah omes aike el moruul el kirel a klungiolir a rudam er kau el Kristiano el ungil el tenget er a odanges el mo er ngii. (Rellir Ar Apostel 20:37) E a kuk lmuut el klou a ultutelel, a Jehovah a omes aike el moruul el kirel a klungiolir a rudam er kau el Kristiano el ungil el tenget er odanges el mo er ngii.​—Filipi 2:​17.

¹⁹ A derta ma derta er kid a kired el di kid el merritel er a rengud e oker el kmo: Ngak ak di mo oba berdel a ngerek el omekeroul er a klengarbab el loltirakl er a osengel a Kristus, ma lechub e ngmo blak a renguk el omekeroul e oltaut er ngii? A uldesuel a Jehovah el kirel a kedidai a rengul a bleketakl. (Osisechakl 16:5; 1 Petrus 5:5) Ma omerelled bo lochotii el kmo ngdmeu a rengud el olecholt er a klengarbab el oltirakl er a osengel a Kristus el kirel a klengarbab, el ngar er a chelsel a ongdibel er a Rekristiano, ma chelsel a klengar er a telungalek er kid, ma ngar er a bek el sils er a delongelir a rebek el chad​—el meruul a rokui el tekoi el mo uchul a klebkall ma odanges el mo er a Dios.​—1 Korinth 10:31.

[Footnotes]

Ngsebechem el Mesaod?

• Ngera uchul me ngkired el ouketui er a osengel a beluulechad el kirel a klengarbab?

• Ngmekera Jesus er a losaod er a klengarbab el tekoi?

• A rechoverseer te mekerang a loukerebai er a klengareourreng er a Kristus?

• Ngera sebechel el ngosukid el mo omekeroul er a klengarbab el ua Kristus?

[Study Questions]

1. Ngera osengel a beluulechad el kirel a klengarbab?

2. Ngera el kerebai a lebilecherei a Jesus el kirir a rultirakl er ngii, e ngera el ker a kired el di kid el oker er kid?

3. Ngera el okesiu er a Biblia a olecholt er a mekngit el dilubech el mo er tirke el chad el mle nguibes a chetengakl er a rechad?

4. Ngtechang a ngike el uchul a kldidairreng er a beluulechad?

5. A kldachelbil, ma chisel, ma kerruul er a chad ngsebechel el msang a diak a ullebengelel el ungilreng er ngii? Mosaod.

6. Ngera ochotii el kmo a Jakobus ma Johanes a uleba cheleuid el osengir el kirel a klengarbab el tekoi?

7. Ngmlekera Jesus er a losaod er a rolel a mera el klengarbab el blekeradel er a Kristiano?

8. Ngera belkul tia el kmo a chad a mesiou, e ngera el ker a kired el di kid el oker er kid?

9. Ngera el kerebai a lebilecherei a Jesus er a omerellel el bedul a rebebil?

10. Ngmlekerang e a klengar er a Jesus el rokir a ulechotii a diak longreos el omesiou el kirir a rebebil?

11. Ngera el blekeradel a lousbech a rudam el tirke el mo metutk el mo mesiou el oungerachel er a ongdibel?

12. Ngera el ker a kirir el di tir el oker er tir tirke el chad el osiik a techall er a ongdibel?

13. (a) Ngmekerang e a kerebai er a overseer el kirel a klengareourreng a ngar er ngii a lerellii el mo er a rebebil? (b) Ngera uchul me ngsebeched el dmu el kmo a klengareourreng, ma lechub a ngar er a eou a rengul, a diak el tekoi el Kristiano a sebechel el melilt el mo meruul ma lechub e ngdiak?

14. Ngmekerang e a dolebedebek er a delongeled kid ma Dios ma delongeled kid ma rechad a sebechel el ngosukid el omekeroul er a melemalt el osenged el kirel a klengarbab?

15. Ngmekerang e a blakerreng er a rechedal a Dios a ochotii el kmo ngdiak a ungil el uchul ma ngii di lechad a mo omdasu el kmo ngii a kuk ngar er a bab er a rebebil?

16. Te mekerang a rokui el ngar er a ongdibel a sebechir el omekeroul er a klengarbab el oltirakl er a kerebai el lebilecherei a Jesus?

17. Ngoeak a ngera el rolel e a rengar er a eou a rengrir el redil a mo uchul a klengeltengat el mo er a ongdibel?

18. Ngera el klungiaol a mo er ngii er a olechotel a klengarbab el oltirakl er a kerebil a Kristus?

19. Ngera kired el mo meruul el kirel a otireklel a osengel a Kristus el kirel a klengarbab?

[Box on page 26]

Ngtechang a Oba Klengarbab el Ua Kristus?

Ngike el soal siungel ma lechub ngike el kongei el mesiou?

Ngike el soal dmiich er a mederir a rechad ma lechub e ngkongei a ngar er a eou el ureor?

Ngike el mengedidai er ngii ma lechub e ngmengedidai er a rebebil?

[Picture on page 23]

A klou el okesiul a Farao Amenhotep III

[Picture on page 24]

Kau ke medengelii sel mlo uchul a rebetel a Haman?

[Picture on page 25]

Kau ke osiik a techall el mesiou er a rebebil?