“Ngsoad el Mo Dmu el kmo, ‘Choi!’ ”

A OBIS er a branch er a Resioning er a Jehovah el ngar er a Nigeria a kmal dirk ngiluu a babier el melekoi el kmo:

“A ngelekam, el Anderson, a mlad el di mle 14 a rekil. A uchei er a kodellel e ngulemekeroul a teblo el malk. Ngmle soal el mo olterau e odurokl aike el udoud el mo er a obis er a branch el tenget el mo olengeseu er a berkel a klumech el urreor er a beluulechad el rokir. Engdi ngmlad a ngelekam er a uchei er a lemoterrau aika el malk.

“E le ngii el kmal mle mesisich a urungulel, me kemam, el delal ma demal, a ulemekeroul aike el malk e ulelterau. Ma ki oldurokl a udoud leko er kemiu el tengetengel a Anderson. E le sel telbilel a Jehovah uchul, ma ki kmal ulterekokl el medenge el kmo ngkmal di kmedung e aki lmuut el mo mesang a Anderson. Me ngsomam el mo kmo, ‘Choi!’ sel bo loker er kemam el kmo aki rirellii sel tekoi el kmal mle soal a rengul el mo meruul er ngii. Nguaisei, aki kmal omes el beduluchei el diak ki di bo mesang a Anderson e lemerekong, e ngdirrek a ‘betok locholt el ua diliuekl ra eabed’ el tirke el lmuut el mo mekiis.”​—Hebru 12:1; Johanes 5:​28, 29.

El ua lomeketakl tia el babier, a klaumerang er a okiis a omelatk el melisiich er a remera el Kristiano. Ngkol ua ngera el klou el deurreng a bo lcheremii a remilliol el telungalek, el uai a telungalek er a Anderson, a lluut el mo ouetkeu er a ririid el betik er a rengrir el mla mekiis er a kodall!​—1 Korinth 15:24-​26.

A tekingel a Dios a meskid tiaikid el ongelaod el ngii a omelatk er a okiis el ta er aike el betok el kmal ungil el tekoi el di kmedung el mo er ngii er a melemalt el beches el beluulechad el ngar er a eungel a Rengedel a Dios. (2 Petrus 3:​13) Ma lolekoi aike el bo loruul a Dios el kirir a rechad er sel taem, e a Biblia melekoi el kmo: “E mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.”​—Chocholt 21:4.