Mkebkellii A Dios “Loba Tal Ngor”

“Loba tal ngor el kobkellii a Dios el Demal a Rubak er kid el Jesus Kristus.”—Rom 15:6.

NGDIAK el rokui el Kristiano a melilt er a osisiu el tekoi ma lechub a sorir a osisiu el tekoi. Nguaisei, engdi, a rokui el Kristiano a kirir el kaiuerekedechim el ngar er sel rael el mo bedul a klengar. Ngsebechel el mo uaisei? Chochoi, a lsekum ngdiak doruul aike el mekekerei el tekoi el mo meklou el mondai. Tiakid el tekoi a lullisechakl er ngii a apostol el Paulus el mo er a rekldemel el oumerang er a chelsel a kot el dart el rak. Ngmilekerang e mesaod er tia el klou a ultutelel el tekoi? E kede mekerang e oltaut er tia el mlukreng el uleklatk er a chelecha el sils?

A Klungel a Ultutelel a Kltarreng er a Delongelir a Rekristiano

² A Paulus a mle medenge el kmo a kltarreng er a delongelir a Rekristiano a kmal klou a ultutelel, e milsterir a Kristiano a ungil el uleklatk el ngosuterir el mo kaberekakl a cheterir er a rechad el oeak a bltikerreng. (Efesus 4:​1-3; Kolose 3:​12-​14) Nguaisei, engdi, uriul er a lemeketmokl a betok el ongdibel ma klteketel er a loldingel er a kuk bebil el kirel a betok er a 20 el rak, e ngmle medenge el kmo a bo lurrekodel er a kltarreng a sebechel el mo meringel el tekoi. (1 Korinth 1:​11-​13; Galatia 2:​11-​14) Me seikid, e ngmilengelechel er a rekldemel el oumerang el kiliei er a Rom el kmo: “A Dios ra ducherreng ma chongelaod le rellemiu . . . me bo lta rengmiu loba tal ngor el kobkellii a Dios el Demal a Rubak er kid el Jesus Kristus.” (Rom 15:​5, 6) Chelecha el sils, e kid me ngdirrek el kired el kobkellii a Jehovah el Dios “loba tal ngor” el ua ta el cheldebechel el ta rengud el chedal. Kid ngua ngera blekerdeled el kirel tia el tekoi?

³ A rebetok el Kristiano el ngar er a beluu er a Rom a kmal mle sechelil a Paulus. (Rom 16:​3-​16) Altang mle kakerous a blekerdelel a klengar er tir, engdi a Paulus a kilengei el kmo tir el rokui el odam a mle “betik er a rengul a Dios.” Ngmilluches el kmo: “A kloumera er kemiu a muchisang ra belulechad el rokir, ma kumuchel loeak a Jesus Kristus el mereng a sulel a Dios er ngak el kiriu el rokui.” Ngbleketakl el kmo, a rechad er a Rom a kmal mle ungil el kerebai er a betok el rolel (Rom 1:​7, 8; 15:14) E osisiu el taem, e a rebebil er a rechad er a ongdibel a mla er ngii a kakerous el osengir el kirel a bebil er a tekoi. E le Rekristiano a mle ngar er a bek el bedengel a blekeradel er a klengar ma siukang el mei, ma losuub er a mlukreng el uleklatk er a Paulus el kirel a rolel a losmechokl a mondai a sebechel el ngosuterir el mo melekoi “loba tal ngor.”

⁴ Ngar er a Rom e te mla er ngii a Rechijudea ma Rechisentail el duluumerang. (Rom 4:1; 11:13) A rebebil el Kristiano el Chijudea a dimlak lsebechir el chemoit a bebil er aike el siukang el lurruul er a ledirk ngar er a cheungel a Llach er a Moses, alta e te mle medenge el kmo choua ike el omeruul a mla mo diak a ultutelel el kirel a osobel. Engdi ngar er a kuk bitang, e a rebebil er a Rechijudea el Kristiano a kilengei el kmo a tengetengel a Kristus a mla mesterir a ilmokl er aike el mle mekull er tir er a uchei er a lebo Lekristiano. Misei a uchul, e te millodech a bebil er a blekerdelir ma siukang er tir. (Galatia 4:​8-​11) Ngdirrek, el ua lullecholt er a Paulus, tir el rokui a mle “betik ra rengul a Dios.” Tir el rokui a mle sebechir el oldanges er a Dios “loba tal ngor” a lsekum e te orreked er a melemalt el uldasu el mo er a ta ma tang. Me kid er a chelecha el sils a dirrek el olab a  kakerous el uldasu el kirel a bebil er a tekoi, me ngkired el mo kerekikl el merritel el kmo ngmekerang a Paulus a mesaod er tia el klou a ultutelel el omellach el tekoi.​—Rom 15:4.

“Mkangingai”

⁵ Ngar er a chelsel a babilengel el mo er a rechad er a Rom, e a Paulus a melekoi el kirel a blekeradel el mle kakerous a uldesuir a rechad el kirel. Ngmeluches el kmo: “A tara chad choumera el kmo, ngdi ungil a donga ngiidi le ngerang, ngdi ngikel mechitechut a di menga yasai.” Ngera uchul me ngmle uaisei? E le, ngar er a cheungel a Llach er a Moses, e a babii a mle diak leklikiid el kall. (Rom 14:2; Levitikus 11:7) Engdi, sel Llach a dikea klisichel er a uriul er a kodellel a Jesus. (Efesus 2:​15) E sola, e a ede el rak ma tedobech er a uriul er a kodellel a Jesus, e a ta el anghel a dilu er a apostol el Petrus el kmo ngar er a osengel a Dios e ngdiak a kall el mle mekngit. (Rel. 11:​7-​12) Ngoeak aika el tekoi, e a rebebil er a Rekristiano el Chijudea a mocha omdasu el kmo ngmle sebechir el menga babii​—⁠ma lechub el menga kuk bebil er a kall el mle delasech er tir er a cheungel a Llach.

⁶ Engdi, sel uldasu el menga kall el mle delasech er a ngar er a mong a kmal mle mekngit el kirir a rekuk bebil er a Rechijudea el Kristiano. Choua itirka el metertord el chad a locha mlo metord er a lesterir a rekldemir el Kristiano el Chijudea el menga choua ike el kall. Ma lmuut el tang, a rebebil el Kristiano el Chisentail, el klechelid er tir a dimlak loudelasech a ngii di lekall, a locha mlo mechas a rengrir er a rechad el kautoketok er a delongelir el kirel a kall. Chochoi, ngdimlak lemekngit er a chad a lomekiai a bebil er a kall, ngii di lak lolisiich a tekoi el kmo choua isel el uldasu a kmal klou a ultutelel el kirel a osobel. Me nguaisei, engdi aike el kakerous el uldasu a mle sebechel el mekdubech a klautok er a chelsel a ongdibel. A Rekristiano el ngar er a beluu er a Rom a mle kirir el mo kerekikl ma choua ike el kakerous er a uldasu a diak bo lolekebai er tir el mo kobkellii a Dios “loba tal ngor.”

⁷ A Paulus a meskid a ongeru el okesiu el kmo: “Ma tara chad a melebedebek el kmo, tial sils a klou a blkul er sel sils, ma kuk tara chad a melebedebek el kmo, ngdi osisiu a bek el sils.” (Rom 14:5a) Ngar er a cheungel a Llach er a Moses, ngdiak loruul a ureor er a Sebado el Sils. Ngdirrek el mlo diak a kemanget el omerael er sel sils. (Exodus 20:​8-​10; Matteus 24:20; Rellir 1:​12) Engdi, sera bo lak a klisichel sel Llach, e aike el mekull el tekoi a mlo diak lemekull.  Me nguaisei, engi nglocha mle meringel er a rebebil er a Rekristiano el Chijudea el mo merruul a ngii di el ureor ma lechub e mo er a kemanget el omerael er sel sils el mle chedaol er a osengir er a ngar er a mong. Ngmo lmuut er a uriul er a leboch le Kristiano, e te locha millemolem el eklii sel ongeuid el sils el kirel a tekoi er a klereng, altang el ngar er a osengel Dios e ngmla mo diak a klisichel sel llach el kirel a Sebado el Sils. Ngmle cheleuid a uldesuir? Ngdiak, ngii di lak lorrimel el kmo a oketmeklel a Sebadong a dirk lolisiich er ngii a Dios. Me nguaisei, a Paulus a millatk er a ukltkir er a rudam er ngii el Kristiano, me ngmilluches el kmo: “Ar dertal chad a kirir lulterekokl loumera el uaisei ra chelsel a rengrir.”​—Rom 14:5b.

⁸ Me nguaisei, altang ngmelisiich er a rudam er ngii el mo oba klourreng el mo er tirke el dirk meringel er tir el omtebechel a bebil er a tekoi er a ukltkir, engdi Paulus a mle mesisich el omtok er tirke el millasem el orrimel er a rekldemel el oumerang el mo chederedall er a Llach er a Moses el ua letekoi el kirir el meruul el kirel a osobel. El ua itiang, ngbekord er a 61 C.E., e a Paulus a milluches er a babier er a Hebru, a mesisiich el babier el mo er a Rekristiano el Chijudea el omeketakl el kmo a otireklel a Llach er a Moses a mla mo diak a ultutelel e le Rekristiano a mla er ngii a lmuut el ngar er a bab el omelatk er tir el ngar er a tenget er a olubet er a Jesus.​—Galatia 5:​1-​12; Titus 1:​10, 11; Hebru 10:​1-​17.

⁹ El ua dulemes er a uchei, a Paulus a mesaod el kmo a omelilt el kirel a kakerous el tekoi a diak lebo lolemall er a kltarreng a lak a ngera el mo uchul a telemellel a omellach er a Rekristiano. Sei a uchul, ma Paulus a oker er a Rekristiano el tirke el mechitechut a ukltkir el kmo: “Me nguaisei e kau ngera me koukerrekeriil er chodam er kau?” E ngii oker er tirke el mesisiich a ukltkir (el tirke el ukltkir a kongei er tir el mo menga aike el kall el mle delasech er a cheungel a Llach ma lechub el mo meruul a ureor er a Sebado el Sils): “Kau ngera me ngimings a medam er chodam er kau?” (Rom 14:10) A doltirakl er a tekingel a Paulus, e tirke el Kristiano el mechitechut a ukltkir a kirir el lolekebai er tir me ngdiak loukerrekeriil er a rudam er tir el mededaes a osengir. Ngdi osisiu el taem, e tirke el Kristiano el mesisiich er a klereng a diak el kirel el metengel osengir er tirke el dirk mechitechut a ukltkir er a bebil er a tekoi. Tir el rokui a mle kirir el mo kakull el kirel a uldesuel a ta ma tang e diak ‘bo lkididai a uldesuir el bedul tir el engelakl er sel kiriu lomdasu er ngii.’​—Rom 12:​3, 18.

¹⁰ A Paulus a milsaod er sel tabesul el uldasu el ua itia el kmo: “Ngikel mengang lak le ings a medal er ngikel diak longang, me ngikel diak longang lak loukerrekeriil er ngikel mengang; le Dios a mla nguu.” Ma dirrek, ngmelekoi el kmo: “[A] Kristus el dirrek el ngilikid, me lemukebkall a Dios.” E le remesisiich ma remechitechut a ukltkir a dul lekengei er tir a Dios ma Kristus, me ngdirrek el kirel el mo uaisei a uldesued e “mkangingai.” (Rom 14:3; 15:7) Ngtechang a sebechel el omtok er tiang?

A Bltikerreng er a Klodam a Ourodech a Kltarreng er a Chelecha el Sils

¹¹ Ngar er a babilengel el mo er a rechad er a Rom, e a Paulus a millekoi el kirel a ileakl el blekeradel. A Jehovah a dirk sileldii a chimo el telbiil e kiltmeklii a beches. Ngmle meringel er a rebebil el mo melodech a uldesuir. Choua sel blekeradel a mla mo diak er a chelecha el sils, engdi a osisiu el tekoi a sebechel el mo duubech er a chelecha el taem.

¹² El ua itiang, a redil el Kristiano a ltang mle chedal a klechelid el millisiich a kantang a resmelel el bail ma oketmeklel a bedengel. E sera lebe er a klemerang, altang mo meringel er ngii el ngodechii a uldesuel el kmo ngdiak lemekngit a bo lousbech a ungilbesul el bail, ma ike el betok el bedengel a iro er ngii el bail a sebechel el ousbech er ngii a lebebil er a taem ma lechub a usbechel a ungilbesul el chilt er a medad. E le ngdiak a ngii di el omellach er a Biblia el uldimukl er ngii, me ngmekngit a lsekum a ngii di el chad a melasem el mengetakl er ngii el redil el Kristiano el mo omtok er a ukltkel. E a osisiu el taem, e ngika el redil a kirel el medenge el kmo ngdiak el kirel el melaes er tirke el redil el Kristiano el ukltkir a mechiteterir me ngsebechir lousbech aika el tekoi.

¹³ Ka me bo dosaod er a kuk ta er a okesiu. A sechal el Kristiano altang mlukeroul er a beluu el  uldesuir a kom a usbechel a rrom a mekngit. Engdi uriul er a bo lodengelii a klemerang, e ngmesuub el kirel a osengel a Biblia el kmo a bilong a sengk el mla er a Dios el mei ma dousbech er ngii er a ungilbesul el rolel a diak lemekngit. (Psalm 104:15) Me ngkongei er sel uldasu. Engdi, a ulekurulel a uchul, e ngsoal el omekiai a rrom, engdi ngdiak lolaes er tirke el melim a ungilbesul el ildisel a rrom. A bo leuaisei e ngoltaut er a tekingel a Paulus el kmo: “Misei e doltoir a tekoi ra budech ma ngarngii a blkul er chomeleketek ra klungiaol ra delongeled.”​—Rom 14:19.

¹⁴ A kuk bebil er a blekeradel a sebechel el mo duubech el uchul me ngkired el mo oltaut er sel belkul a uleklatk er a Paulus el mo er a rechad er a Rom. A ongdibel er a Rekristiano a uldimukl er ngii a rebetok el chad, el kakerous aike el tekoi el sorir. Me seikid, ngsebechel el mo kakerous aike el tekoi el bo lolilt​—⁠el ua itiang, sel lolilt a bail el lousbech ma oketmeklel a bedengir. Engdi, a Biblia a oltobed a bleketakl el omellach el kirir a rokui el Kristiano el oltirakl er ngii. Ngkmal diak el kirel a ta er kid el ousbech aike el bail ma lechub el mesongd a chiul el kmal ngodech ma lechub e ngdiak leklikiid ma lechub e ngochotid el kmo kede sechelirir a redengerenger er tia el mekngit el beluulechad. (1 Johanes 2:​15-​17) A Rekristiano a melatk el kmo a bek el taem, mo lmuut ma lolengull, e te dirrek el ousioning el omtechei er ngike el Chimong el Kedidai er a eanged ma chutem. (Isaia 43:10; Johanes 17:16; 1 Timoteus 2:​9, 10) Me nguaisei engdi, ngar er a betok el blekeradel, e ngngar er ngii a betok el ungil el tekoi el sebechir a Rekristiano el melilt aike el sorir. *

Ngdiak Molibesongel er a Rebebil

¹⁵ Ngngar er ngii a orekil el klou a ultutelel el omellach el losaod er ngii a Paulus el ngar er a uleklatk er ngii el mo er a Rekristiano el ngar er a beluu er a Rom. A lebebil er a taem, e a Kristiano el mesisiich a ukltkel a melilt el diak bo loruul a tekoi el mle sebechel el meruul er ngii. Ngera uchul? E le ngmelatk el kmo a bo loruul er ngii e ngsebechel el melemall er a rebebil. A bo leuaisei, e ngkired el mekerang? A Paulus a melekoi el kmo: “Ngungil tekoi a lak monga techel a charm, ma lak molim a bilong, ma lak moruul a ikel bebil ra melibas er chodam er kau.” (Rom 14:14, 20, 21) Me nguaisei, “e kid el meisisiich el kired loltour a chelitechut rar diak le misisiich, el diak le kired el di oldeu a di rengud e le merekong; ar derta er kid a kirir lomdasu ra ungilbesul ra ngar bita er tir loldeu a rengrir, el kirel me le meteketek a klungiolir.” (Rom 15:​1, 2) Sel lsekum a ukltkel a kldemed el Kristiano a sebechel el metemall el aike el doruul a uchul, e a bltikerreng er a klodam a oremelid el mo melatk er ngii e mo kerekikl er aike el tekoi el soad. A olechotel tiang a tekoi er a usbechel a rrom. A Kristiano a sebechel el melim a bilong el ungilbesul a ildisel. Engdi a lsekum a  bo lolim e ngmo melibas er a odam er ngii, e ngdiak di loldubech er a llemeltel.

¹⁶ Tia el omellach a dirrek el sebechel el melutk el mo er aike el doruul er a ikrel a ongdibel er a Klekristiano. El ua itiang, altang e kede kiei er a beluu e sel mesisiich el klechelid el ngar isei a olsisechakl er a rechedal el mo eklii a ta el sils er a chelsel a ta el sandei el ua lulengull el sils. Misei a uchul, me lak bo dolibesongel er a retonari er kid e domuchel a mondai el kirel a urered er a berkel a klumech, e kede mo melasem el diak doruul aike el tekoi el sebechel el melibas er a retonari er kid. Ngar er a kuk ta er a blekeradel, a merau el Kristiano altang melukl el mo mesiou el ngar er aike el beluu el ousbech a ngeso er a delongelir a remechebuul el chad. Ngii a ltang melatk er a rebeches el tonari er ngii me ngoubail a ungilbesul el bail ma lechub el kiei er a kmal beot el rolel a klengar altang sebechel el kiei er a ungilbesul el rolel a klengar.

¹⁷ Ngungil a domdasu el kmo tirke el “mesisiich” a mo melodech a uldesuir? Ka di molatk er tia el okesiu el kmo: Kede domekall er a mlai el ngar er a klou el rael, e ngar er a medad e kede meseterir a rebebil er a rengalek el merael el kmal kmeed er a rael. Kid kede di melemolem el meringel a bekelled er a mlai e le ngngar er ngii a llemelted? Ngdiak, kede mo soro me ngdiak lemetemall a rengalek. A lebebil er a taem, ngdirrek el kired el kongei el mo soro, ma lechub el ngoseklid, a doruul a ngera el obengterir a rekldemed el oumerang ma lechub a rekuk bebil. Altang e kede meruul a tekoi el ngar er ngii a llemelted el meruul er ngii. E ngdiak a omellach er a Biblia el detemellii. Me nguaisei engdi, a lsekum e ngsebeched el melibas er a rebebil ma lechub e kede tomall a rengrir tirke el mechitechut a ukltkir, e a bltikerreng er a Rekristiano a oremelid el mo kerekikl er a omerelled. (Rom 14:13, 15) A delemelemii a kltarreng e dolisiich er a tekoi er a Renged a lmuut el klou a ultutelel er a doruul a tekoi e le ngar er ngii a llemelted el meruul er ngii.

¹⁸ A bo deuaisei, e kede oltirakl er sel kot el ungil el kerebai. A Paulus a melekoi el kmo: “Le Kristus me ngdirrek el dimlak di loldeu ra rengul e le merekong; ngbai ua llechukl el kmo, ‘Chotuub er tirikel oltuub er kau a mler ngak.’ ” A Jesus a kilengei el mengkengkii a klengar er ngii el kired. Me ngulterekokl e kede kongei el melenget a bebil er a llemelted me bo lsebechir tirke el “diak le mesisiich”  el obengked el mengebkall er a Dios el ngar er a kltarreng. Me nguaisei, a dochotii a ungilreng ma blekerurau el reng el mo er a Rekristiano el mechitechut a ukltkir​—⁠ma lechub e kede kongei el mo kerekikl el melilt a tekoi e diak di doldubech er a llemelted⁠—a olecholt el kmo kede “mesuub ra Kristus Jesus, me mdul mo oba tal uldasu.”​—Rom 15:​1-5.

¹⁹ Alta e ngmo kakerous a osenged el kirel aike el tekoi el diak a omellach er a Bades el uldimukl er ngii, engdi a kuk letekoi er a omengull, e kede meruul a tekoi el oba ta el uldasu. (1 Korinth 1:​10) El ua itiang, choua itia el kltarreng a mocholt, er a blekerdeled el mo er tirke el omtok er a mera el omengull. A Tekingel a Dios a omekedong er tirke el uaisei el omtok el kmo te ngodech el chad e omeklatk er kid el mo kerekikl er a “ngerel a ngodech el chad.” (Johanes 10:5) Kede mo mekerang e dongcheterir choua itirke el ngodech el chad? Kede mekerang er tir? Aika el ker a bo dosaod er ngii er sel ongingil el suobel.

[Footnotes]

Ke Mekerang e Onger?

• Ngera uchul ma bo lekakerous a osenged el kirel a tekoi er a klengar er kid a diak bo lolemall er a kltarreng er kid?

• Ngera uchul me kid el Kristiano a kired el melatk er a ta ma ta el chad?

• Ngera bebil er a rolel e ngsebeched el oltaut er a uleklatk er a Paulus el kirel a kltarreng er a chelecha el sils, e ngerang oremelid el mo meruul el uaisei?

[Study Questions]

1. Ngera el suobel el kirel a smecheklel a kakerous el uldasu a lullisechakl er ngii a Paulus el mo er a rekldelem el oumerang?

2. Ngmilekerang a Paulus millisiich er a usbechellel a kltarreng?

3, 4. (a) Ngua ngera el kakerous el blekerdelel a klengar a lemla er ngii a Rekristiano el ngar er a beluu er a Rom? (b) Te mekerang a Rekristiano el ngar er a beluu er a Rom e mo sebechir el mesiou er a Jehovah el “oba tal ngor”?

5, 6. Ngera uchul me ngmla er ngii a kakerous el uldasu er a chelsel a ongdibel er a Rom?

7. Ngera el kakerous el osengir a rechad a mla er ngii el kirel a ileakl el sils er a bek el sandei?

8. Altang mle sebechir el melatk er a ukltkir a rebebil, engdi ngera el tekoi a dimlak el kirir el meruul er ngii a Rekristiano el ngar er a beluu er a Rom?

9, 10. Ngera el tekoi a diak el kirir el meruul er ngii a Rekristiano? Mosaod.

11. Ngera el ileakl el blekeradel a mla er ngii er a sils er a Paulus?

12, 13. Ngera bebil er a blekeradel el ngar er ngii el Rekristaino er a chelecha el sils a sebechir el olecholt a omengull er tir el kirel a ukltkir a rudam er tir?

14. Ngar er ngera el blekeradel e a Rekristiano a sebechir el oltaut er a belkul a uleklatk er a Paulus el mo er a rechad er a Rom?

15. Ngoeak a ngera el blekeradel e a Kristiano a sebechel el kotoar el oltaut er a llemeltel, el mo uchul a klungiolir a rudam er ngii?

16. Kede mekerang e melatk er tirke el ngar er a territory er kid?

17. Ngera uchul me ngmelemalt a dolatk er a rebebil sel dolilt aike el tekoi el soad el mo meruul?

18, 19. (a) Sel dolatk er a rebebil, kede mekerang e oltirakl er a kerebil a Jesus? (b) Ngera el tekoi a doruul er ngii el ngar er a kltarreng, e ngera bo dosaod er ngii er sel ongingil el suobel?

[Picture on page 22]

A uleklatk er a Paulus el kirel a kltarreng a kmal mle klou a ultutelel el kirel a ongdibel

[Picture on page 24]

A Rekristiano a ngar er a kltarreng e a ltang kakerous a blekerdelel a klengar er tir

[Picture on page 25]

Ngmo mekerang ngika el omekall er a mlai er a chelechang?