Ngdi Dimlak A Uchul E Mluketui

“Ng di dimlak a uchul e touketui er ngak.”​—JOHANES 15:25.

A RESIONING er a Jehovah a melasem el kiei el oltirakl aike el omellach el ngar er a chelsel a Tekingel a Dios. Sei a uchul, e te dmeu a rengrir er a ungil el chisir el ngar er a betok el beluu. Engdi,a lebebil er a taem, e a rechad a dmung a klsuul el tekoi el kirir. El di ua itiang, a ta el chad er a kabelment er a mats er a St. Petersburg, er a Rosia, a millekoi el kmo: “A Resioning er a Jehovah a lullekoi er tir el kmo te berrotel er a milkolk el cheldebechel el lomekeuad er a rengalek e dirrek el di tir el omekoad er tir.” Engdi uriul er a loureor el obengterir a Resioning er a Jehovah el kirel a international convention, e ngika el osisiu el chad a kmo: “Chelecha e ak mesterir el di ua rebek el chad, el di klikmechur el chad. . . Te sorir a budech e chellelakl, e kmal betik a rengrir er a ta ma ta er tir.” Ng dilechel el kmo: “Ng kmal diak el sebechek el mo medengei el kmo ngera uchul ma rechad a melekoi choua ika el blulak el tekoi el kirir.”​—1 Petrus 3:​16.

² A remesiungel a Dios a diak el lebetik a deurreng sel lomulak a rechad e lolekoi er tir el kmo te mekngit el chad, engdi diak lemechas a rengrir a lsekum a rechad a melekoi a mekngit el lomtok er tir. A Jesus a ulemeklatk er a rulebengkel el kmo: “A lsekum a beluulchad ouketui er kemiu, e lak mobes el kmo ng dimla ouketui er ngak. . . Ngdi tiang a mle kirel mo ua isei me bo letaut a ikel llechukl er a Llach er tir el kmo, ‘Ng di dimlak a uchul e touketui er ngak.’ ” * (Johanes 15:18-​20, 25; Psalm 35:19; 69:4) Uchei er isei e ngmillekoi er a disciplo er ngii el kmo: “Ma lsekum a bdelul a blai a lomekedong er ngii el Beelsebul, e a re chad er a blai a bo lomekedong er tir er a lmuut el mekngit el ngakl!” (Matteus 10:25) A Rekristiano a ungil el medengei el kmo a doutekangel er aika el ultok a tedebechel sel “kerus” el dekilengei er ngii er sera debo doltirakl er a Kristus.​—Matteus 16:24.

³ A odechelakl el mo er a remera el mengull a mla ngar er ngii er a kemanget el taem el ulemuchel er a me mong er a “diak a telemellel el Abel.” (Matteus 23:34, 35) Tiang a dimlak el di leduubech er a di mekesai el taem. A Jesus a dilu er a ruleltirakl er ngii el kmo a “re bek el chad a mo ouketui er kemiu” el ngklek a uchul. (Matteus 10:22) Ma lmuut kung, a apostol el Paulus a milluches el kmo a rokui el mesiungel a Dios​—el uldimukl er a redersta er kid​—a kired el medengei el kmo kede mo modechelakl. (2 Timoteus 3:​12) Ngera uchul tiang?

Sel Uchul a Diak el Melemalt el Kltui

⁴ A tekingel a Dios a ochotii el kmo sera uchelel, e ngmla er ngii a diak lemeues el uchul a kltui el mo er a remera el mengull el chad. Ka molatk er sel kdekudel el kodellel ngike el kot el chad er a klaumerang, el Abel. A Biblia a melekoi el kmo ngike el omekoad er a rechad el obekul, el Kain, a “mle chedal Ngikel Mekngit,” el Satan el Diabelong. (1 Johanes 3:​12) A Kain a ngiluu sel blekerdelel a Satan, ma Diabelong a uluusbech er ngii el mo oltaut aike el mekngit el uldesuel. A Biblia a dirrek el ochotii a urerel a Satan er a mekngit el odechelakl el mlo er a Job ma Jesus Kristus. (Job 1:​12; 2:​6, 7; Johanes 8:​37, 44; 13:27) A babier er a Chocholt a bleketakl el olecholt er a uchul a odechelakl el mo er a ruleltirakl er a Jesus, er a ledu el kmo: “Mosang, a Diabelong a mochu olsiseb er a re bebil er kemiu er a kelebus el mo mengarm er kemiu.” (Chocholt 2:​10) Ochoi, a  Satan a uchul a rokui el diak el lemelemalt el kltui el bedul a rechedal a Dios.

⁵ Ngerang a uchul tia el kltui er a Diabelong el mo er tirka el mera el mengull? El ngar er a telbilel el olecholt er a klou el kldidai el reng er ngii, e a Satan a mla melsemai er a “King el diak a uchelel ma ulebengelel,” el Jehovah el Dios. (1 Timoteus 1:​17; 3:6) Ngmillekoi el kmo a Dios a meringel a tekingel er a omerredelel er a reblebelel e dirrek el kmo ngdiak a chad el mesiou er a Jehovah er a ungil el uchul, te di meruul er ngii el kirel a di klungiolir. A Satan a melekoi el kmo a lsekum e ngmo sebechel el mengarm er a rechad, e ngsebechel el rulleterir a rokui el chad el mo diak losiou er a Dios. (Genesis 3:​1-6; Job 1:​6-​12; 2:​1-7) Ma loltelechakl er a Jehovah el kmo ngoumengedakl er a rechad, e bulak, e metitur, e a Satan a melasem el meruul er ngii el mo kuk ta er a ngar er a bab el merredel. Ma leuaisei, a kltui er ngii el bedul a remesiungel a Dios a modubech er sel reng er ngii el soal a bo dongull er ngii.​—Matteus 4:​8, 9.

⁶ Kau ngsebechem el mesa el kmo tia el tekoi ngerang rullii er a klengar er kau? E le kau el mesiungel a Dios, ke locha mla metik er ngii el kmo a omeruul er a soal a Dios a ousbech er a klou el omelasem, engdi a klungiolel a doruul uaisei a diak lemochur. Ngdi, ke mo mekerang, a lsekum a blekerdelel a klengar er a kau a rullii el mo chetituokel, ma lechub e ngmeringel, er kau el melemolem el oltirakl er a llechul a Jehovah? E mekera a lsekum e ngdiak omngai a klungiaol er a uriul? Ke mo omdasu el kmo ngdikea ultutelel a omolemolem el mesiou er a Jehovah? Ma lechub a bltikerreng er a kau el mo er a Jehovah ma klou el omereng el saul er kau el kirel aike el mengasireng el blekerdelel a odbechau el melemolem el merael er aike el rokui el rolel? (Duteronomi 10:12, 13) Ma lebecherei a Satan el mo meskid a sesei el ringel, e a Jehovah a mla meskid a techall el mo onger er sel otelecheklel a Satan.​—Osis. 27:11.

“A Loltuub er Kemiu”

⁷ Me bo dungil el omes er a ta er a bedikl el lousbech er ngii a Satan el melasem el mo melisiich er a uldesuel er tia el tekoi​—a usbechel er a blulak el otuub. A Jesus a ulemekedong er a Satan el kmo “demal a bek el blulak.” (Johanes 8:​44) Tia el ngakl el Diabelong, el belkul a kmo “Ngomtok” a olecholt er ngike el kot el ngar er a uchei el omtok er a Dios, ma ungil el tekingel ma chedaol el ngklel. A Diabelong a ousbech a omtechakl a tekoi, ma blulak el otelechakl, ma di chemolt el blulak el tekoi el mo omtok er a omengederederel a Jehovah, e ousbech aika el osisiu el bedikl el melekoi a mekngit el kirir a reblak a rengrir el mesiungel a Dios. Ma lousbech a chachisois el otuub el bedul tirka el Sioning, e ngsebechel el rullii a meringel el omengarm el kuk lmuut el mo meringel er tir el loutekangel er ngii.

⁸ Ka molatk er sel dilubech el mo er a Job, el ngklel a mle belkul a kmo “Blil a Kltui.” El uldimukl er a omerellel el mlo uchul e a Job a uridii a uchul a kerrekerngel, ma rengelekel, ma klisichel a bedengel, e a Satan a rirellii a Job me lebo lecholt el ua lemekngit el chad el mle delebeakl er a Dios. Alta te kmal millengull er ngii a rechad, ngdi a Job a lebocha loltuub er ngii, el mo lmuut er a rechedal ma rekmeed el sechelil a mlo oltuub er ngii. (Job 19:13-​19; 29:​1, 2, 7-​11) Ma lmuut e kung, el oeak tirke el klsuul a tekingir el sechelil, e a Satan a ulsiik a rolel el mo ‘mengitechut er a Job el olab a tekoi,’ er a lekot el lomtechakl a tekoi el kmo nglocha rirellii a  kmal oberaod el klengit e mereko e mocha oukerekeriil er ngii el kmo ngmekngit el chad. (Job 4:​6-9; 19:2; 22:​5-​10) Ngkol ua ngera el mlo uchul a chelitechetul a rengul a Job choua ika el tekoi.!

⁹ E le ngii a ngike el kot el ngar er a uchei el melisiich er a omengederederel a Jehovah, me seikid e a Ngelekel a Dios a mlo blil a ultok er a Satan. Sera lemei er a beluulechad a Jesus, e a Satan a ulsiik a rolel el mo olecholt er ngii el kmo ngmle mechitechut er a tekoi er a klereng, el ua ble lurruul el kirel a Job, el meruul er a Jesus el ua lemekngit el chad. (Isaia 53:​2-4; Johanes 9:​24) A rechad a ulemekedong er ngii el kmo ngsekengim er a bilong e ngemokel el chad e dirrek el millekoi el kmo ng ‘telechull er a mekngit el chelid.’ (Matteus 11:18, 19; Johanes 7:​20; 8:​48; 10:20) Ng mlotelechelakl el kmo nguleltuub er a Dios. (Matteus 9:​2, 3; 26:63-​66; Johanes 10:33-​36) Tia mlo uchul a kngtil a rengul a Jesus, e le ngmle medengei el mo ngmlo uchul a diak lemelemalt el otuub el mo er a Demal. (Lukas 22:41-​44) Ma uriul, e a Jesus a meldeel er a kerrekar el ua lemekngit el chad. (Matteus 27:38-​44) Me lolemolem el oba cherrungel el blakerreng, e a Jesus a uluutekangel a betok el “odechelakl er a re mekngit el chad.”​—Hebru 12:​2, 3.

¹⁰ Me chelecha el taem, e tirke el medechel er a rengellitel el oltirakl er a Kristus a dirrek el mla mo blil a ultok er a Diabelong. A Satan a losaod er ngii el kmo ng “uleltutakl er a re bebil er kid er a llomes ma klebesei.” (Chocholt 12:​9, 10) Ngulemuchel er sel taem er a lemodik er a eanged e mlei er tia el chutem, e a Satan a mla mo er sel tkurrebab el sebechel el olecholt el kmo a rudam er a Kristus a mengelengalek el cheitel el chad. (1 Korinth 4:​13) El ngar er a bebil er a beluu, e te mokedong el kmo te kdekudel el cheldebechel, el di uai tirke el Kristiano er a kot el dart el rak. (Rel. 24:​5, 14; 28:22) El di ua aike el meldung er a uchelel, e te mla mo mekngit a chisir el loeak a blulak el omelekoi. Engdi, ng “oeak a klebkall ma diak el klebkall, el oeak a mekngit el chais ma ungil chais,” a rengellitel el odam er a Kristus, el lolengeseu er tir a “kuk bebil er a chermek el sib,” a ngar er a iou a rengrir el melasem el ‘oltaut a llechul a Dios e kerekikl el oltirakl er a klemerang el lulechotii a Jesus.’​—2 Korinth 6:8; Johanes 10:16; Chocholt 12:17.

¹¹ Nguaisei, engdi diak el rokui el otuub el lechelebangel a derta el mesiungel a Dios a uaisei “el kirel a llemalt.” (Matteus 5:​10) A bebil er a mondai a sebechel el duubech e le kid el diak demecherrungel a uchul. Ngdiak a mo uchul a klungiaol a lsekum “cho moruul a mekngit e mlechelebed e outekangel el kilou a rengmiu.” Engdi, a lsekum a Kristiano “outekangel a ringel el dimlak le kiriu, ele kemiu el kerekikl el meruul a soal a Dios” e tiang a ungil el tekoi er a osengel a Jehovah. (1 Petrus 2:​19, 20) El ngar er a eungel a ngera el blekeradel e tia sebechel el mo uaisei?

¹² A rebebil a mlo meringel el modechelakl e le tir el dimlak loruul a siukang er a kemeldiil el ngii a diak loltirakl er a Biblia. (Duteronomi 14:1) A rengeasek el Sioning a mlo delenguchel a betok el mekngit el omelekoi e le tir el oltirakl er a tekoi er a kldung er a Jehovah. (1 Petrus 4:4) A rebebil el Kristiano el chedam ma rechedil a loltelechakl er diak tir el kmo te mekngit el oungalek e le tir el osiik a ukeuul el lousbech rasech el kirir a rengelekir. (Rel. 15:29) A Rekristiano a mla mo er a kemikr er a rechederir ma retonari er tir e le uchul e tir el mla mo mesiungel a Jehovah. (Matteus 10:34-​37) Tirka el uaisei el chad a oltirakl er sel kerebai el lebilecherei a reprofet ma Jesus er sera lemukringel el ngar er a diak lemelemalt el rolel.​—Matteus 5:​11, 12; Jakobus 5:​10; 1 Petrus 2:​21.

Kongei el Outekangel er Eungel a Otuub

¹³ Sel bo dechelebangel a mesisiich el otuub el kirel a klaumera er kid, e ngsebechel el mo mechitechut a rengud el di uai a profet el Jeremia, e mo omdasu el kmo ngdiak el sebeched el melemolem el mesiou er a Dios. (Jeremia 20:​7-9) Ngera sebechel el ngosukid me kede melemolem el ultebechel a klereng er kid? Kede melasem el omes er tia el tekoi el oba osengel a Jehovah. Ngomes er tirke el melemolem el blak a rengrir er eungel a orrimel el ua lekats el chad, el diak lemechitechut. (Rom 8:​37) Ka molasem el meluches er a siasing er a uldesuem tirke el mle mesisiich el orreked er a omengederederel a Jehovah alta te chillebangel a bek el otuub el Satan a milsterir​—a resechal ma redil el ua Abel, ma Job, ma delal a Jesus el Maria, ma relmuut el bebil el  blak a rengrir el chad er a irechar ma dirrek el tirke el kldemed er a omesiou er a chelecha el taem. (Hebru 11:35-​37; 12:1) Molebedebek er a blak el reng er tir. Tia el ua klou el eabed er a reblak a rengrir el chad a mengemedaol er kid el mo obengterir el mo nguu a kats el oeak a klaumerang.​—1 Johanes 5:4.

¹⁴ A lsekum ‘ngkmal mo ouedikel a rengud,’ e ngsebeched el mo chemau a Jehovah el ngar er a nglunguuch, e ngii a sebechel el chemolodid e smisichid. (Psalm 50:15; 94:19) Ngmo meskid a llomeserreng el dousbech er ngii el mo outekangel er a mondai e ngosukid el melelem er sel klou el tekoi, el omengederederel a Jehovah, el ngii a uchul aika el diak lemelemalt el kltui el bedul a remesiungel. (Jakobus 1:5) A Jehovah a dirrek el sebechel el meskid “a budech er a Dios, el diak el sebechel a chad el mo cherrungel el medengelii.” (Filipi 4:​6, 7) Tia el budech el mla er a Dios el mei a rullid me sebeched el mo chelellakl e ultebechel a rengud er a chelsel a mesisiich el omelsemai, el diak bo demechitechut ma lechub e demedakt. El oeak a reng er ngii, e a Jehovah a sebechel el melisiich er kid er a ngii di el ngera el tekoi el lebecherei el me mengarm er kid.​—1 Korinth 10:13.

¹⁵ Ngera sebechel el ngosukid me ngdiak demeeleb er a cheluached el bedul tirke el ouketui er kid el di diak a ungil el luchul? Ngdiak dobes el kmo tirke el kot el cherroued a Satan ma remengelengalek el reng. (Efesus 6:​12) Alta a rebebil er a rechad a medengei e durengrir el oldechelakl er kid, ngdi a rebetok er tirke el omtok er a rechedal a Dios a meruul el uaisei e loeak a telitur er tir ma lechub a rechad a ulemulak er tir. (Daniel 6:​4-​16; 1 Timoteus 1:​12, 13) A Jehovah a kmal soal a “rokui el chad” a lebo er ngii a techellir el “mosobel e bo lodengelii a klemerang.” (1 Timoteus 2:4) Nguaisei, a rebebil el mle omtok er kid a odam er kid el Kristiano er a chelechang e le tir el ulemes a ungil el omerelled. (1 Petrus 2:​12) Ma lmuut el tang, e ngsebeched el ngar er ngii a desubii er a kerebil a ngelekel a Jakob el Josef. Alta a Josef a kmal mlo chuarm e le rubekul el ngelekel a demal a uchul, ngdi ngdimlak lebo lekesib a rengul er tir. E le ngera me ngdiak? E le ngulemtab el kmo a chimal a Jehovah a mla er tia el tekoi, el mengedechuul a tekoi me bo luchul e a moktek er ngii a mo tmaut. (Genesis 45:​4-8) A Jehovah a dirrek el sebechel el remuul a ngii di el ngera el diak lemelemalt el ongarm el dosiuekl el mo uchul a odanges el kirel a ngklel.​—1 Petrus 4:​16.

¹⁶ Ngdiak el kired el mo suebek a rengud a lsekum a telkib el taem e a ruumtok a kora mo mesisiich el melenget er a ngesecheklel a ureor er a berkel a klumech. A Jehovah er a chelechang a simesim aika el renged el okiu a berkel tia el klumech er a beluulechad el rokir, misei e aike el mekreos el klalo a me tuobed e merael el mei. (Hagai 2:7) A Jesus Kristus, el Ungil el Klekerengel a sib, a dilu el kmo: “A sib er ngak orrenges er a ngerek, me ngak a medengei, me ng oltirakl er ngak. Ak umsang a diak a ulebengelel klengar,. . . ng diak a chad el sebechel el merober er ngak.” (Johanes 10:27-​29) A rechedaol el anghel a dirrek el uldimukl er tia el klou el blsechel omeridem er a klereng. (Matteus 13:39, 41; Chocholt 14:​6, 7) Ma leuaisei, ngdiak a ngerang el sebechir a ruumtok el kmung ma lechub e te meruul el tomelii a moktek er a Dios.​—Isaia 54:17; Rellir Ar Apostel 5:​38, 39.

¹⁷ Oumesingd el taem, e a omerellir a ruumtok a diak lotutii sel mle moktek er tir. El ngar er a ta el mats er a Africa, e a betok el blulak el tekoi a uleberk el kirir a Resioning er a Jehovah, el uldimukl er ngii a kmo te milengull er a Diabelong. Sei a uchul, me sel ta el bo loldingel a Resioning, e a Grace a chemiis el mo er a rebai er a blil e mertii el dimerkmo lorael. A ta er a klebesei e a pastor er a eklesia er ngii a uldersii a ta er aika el babilenged e uluuchais er tirke el rokui el mla er isei me lak longuiu aikang e le ngmo uchul e te choitii a klaumera er tir. Tia mlo uchul a Grace a kmal mlo melemlim a rengul. Sera lluut el  loldingel a Resioning, e ngmilengedecheduch er tir e ngiluu a babilengel er a bai lomart er ngii. Ngulemuchel a omesubel a Biblia, e sera 1996 e ngii a miltecholb. A Grace er a chelecha el taem a ousbech a temel el osiik er a rebebil el mla mecheblad el kirel a chisir a Resioning er a Jehovah.

Molisiich er a Klaumerang er Kau er a Chelechang

¹⁸ E le Satan a sebechel el di mereched el tomellid el olab a diak el melemalt el kltui er a ngii di el taem, me ngkmal klou a ultutelel a dolisiich a klaumera er kid er a chelechang. Kede mekera e meruul er tiang? A ta el tekoi el mla er a beluu el rechedal a Jehovah a mla modechelakl er ngii a kmo: “A ta el tekoi el mera el mla mo bleketakl a tiakid: Tirke el ngar er ngii a ungil el blekerdelir er a tekoi er a klereng e oba dmolech el omereng el saul el kirel a klemera er a Biblia a diak a mondai er tir el mesisiich el dechor sel lemei a omelsemai. Engdi tirke el ‘lungilbesul a belsechel’ a chemoit aike el kldibel er kid, e diak leblechoel el oldingel el obliil e ousumengoit a mekekerei el tekoi a blechoel el mo mechitechut sel bo lechelebangel a ‘meringel’ el omelsemai.” (2 Timoteus 4:2) A lsekum e ke mes a blekerdelem el mousbech el mo melodech el mo ungil, e molasem el meruul uaisei er a di mereched el taem.​—Psalm 119:60.

¹⁹ A blakerreng er a remerea el mengull er eungel a chelebed er a kltui er a Satan a ngar el ocholt er a llemeltel, ma redemelel ma melemalt el omengederederel a Jehovah. A blakerreng er tir a odeuir a rengul a Jehovah. Alta a rechad a melekoi a otuub el kirir, ngdi ngike el klebkall er ngii a ngar er a bab er a chutem ma eanged “a diak le merur a lomekedong er ngii el kmo ng Dios er tir.” Ochoi, el kirir tirka el rokui el blak a rengrir, ngmelemalt a lemedung el kmo: “Tial beluulchad a dimlak a klungiolel er tir.”​—Hebru 11:16, 38.

[Footnote]

Ngsebechem el Mesaod?

• Ngera uchul a diak el melemalt el kltui el bedul a remera el mengull?

• Ngmilekerang a Satan er a lousbech a otuub el melasem el melemall er a blakerreng er a Job ma Jesus?

• Ngmekerang a Jehovah a lengosukid el mo mesisiich el dechor sel dosiuekl a kltui er a Satan?

[Study Questions]

1, 2. (a) Ngera ma rebebil a rrau a rengrir sel lolekoi a mekngit el kirir a Rekristiano, engdi ngera uchul ma aika el omelekoi a diak lemechas a rengud er ngii? (b) Ngera el belkul sel tekoi el “kltui” a bo dosaod er ngii er tia el suobel? (Momes er a footnote.)

3. A remera el mengull te mla modechelakl el mo er a ua ngera el blekeradel?

4. Ngmekerang a Biblia a ochotii ngike el uchul a rokui el diak el melemalt el kltui?

5. Ngera uchul a kltui er a Satan el mo er a remera el mengull?

6. (a) Kede mekerang e uldimukl er sel klou el tekoi er a omengederederel a Jehovah? (b) Ngmekerang a bo dungil medengelii tia el klou el tekoi a sebechel el ngosukid el melemolem el oba blakerreng? (Momes er a box er a page 10.)

7. Ngerang a ta er a bedikl el ousbech er ngii a Diabelong el mengeroid er kid er a Jehovah?

8. Ngmilekerang a Satan a lotubii a Job, e tiang mlo ua ngera rsel?

9. Ngmilekerang a Jesus a blo lochotii el lekong ngmekngit el chad?

10. Ngmekerang e tirke el medechel el ngellitel a delenguchel a Satan er a chelecha el taem?

11, 12. (a) Ngera sebechel el mo uchul a bebil el oltuub el lechelebangel er ngii a Rekristiano? (b) Ngera bebil el rolel e ngsebechel a Kristiano el mo chuarm er a diak lemelemalt el rolel e le ngklaumera er ngii a uchul?

13. Ngera sebechel el ngosukid el orreked er a tabesul el klereng er kid sel dosiuekl a meringel el otuub?

14. Ngmekerang a dmolech el nglunguuch a melisiich er kid el melemolem el blak a rengud?

15. Ngera sebechel el ngosukid me ngdiak demeeleb er a cheluached er a chelsel ongarm?

16, 17. Ngera me ngdiak el kired el mo suebek a rengud er a klisichir tirke el omtok el melemall er a urered er a berkel a klumech?

18. Ngera me ngkired el melisiich a klaumera er kid er a uchei er a leduubech a meringel el omelsemai, e mekera e sebeched el meruul el uaisei?

19. Ngera mo ngrullii a blak el reng er a remesiungel a Dios er sel lechelebangel a diak el melemalt el kltui?

[Box on page 10]

Te Miltebengii Sel Klou a Ultutelel el Tekoi

A ta el Sioning er a Jehovah el ngar er a Ukraine, el ureor er a berkel a klumech a milterob el betok er a 50 el rak, a millekoi el kmo: “A blekeradel el lebla er ngii a Resioning er a Jehovah a diak el kirel el di soadel er a omerellir a rechad el bedul kid. . . A ruumesingd er a rechofiser a di miruul er a urerir. Sera lemengodech a kabelment, ma tir el ofiser a dirrek el mle ngodech a blak el reng er tir, e ngdi kemam a di mle osisiu. Aki mle medengei el kmo ngike el uchul a mondai er kemam a mlocholt el ngar er a Biblia.

“Ngdimlak ki di momes er kemam el di ua lak a telemellam el mlukringel er a ruumtok el chad. A ngilsukemam el outekangel a mle ungil el klemedengei el kirel sel klou el tekoi el dilubech er a sers er a Eden​—sel tekoi el kirel a llemeltel a Dios el mengedereder. . . Aki dilechor el kirel a tekoi el dimlak el di lulech er aike el mo uchul a klungiolel a klechad e ngdirrek el kirel a soal ngike el Mengedereder er a eanged ma chutem el rokir. Ngmla er ngii a kuk ngar er a bab el klemedengei er kemam er aike el mera el meklou el tekoi el mle uldimukl er ngii. Tia rirellemam el mo mesisiich e mo sebecham el melemolem el oba blak el reng el mo lmuut er a ki mngar er a eungel a kmal imis el kdekudel el blekeradel.”

[Picture on page 7]

Ngtechang ngike el mle uchul a otuub el mlo er a Jesus?

[Picture on page 9]

A Job, ma Maria, ma remesiungel a Dios er a chelechang, el ua Stanley Jones, a mle mesisiich el orreked er a omengederederel a Jehovah

[Picture Credit]

Victor Popovych, mlekelebus er a 1990