Ngera Kede Mera el Ousbech el mo Dmeu a Rengud

A JEHOVAH, “el ngii a dmeu a rengul Dios,” ma Jesus Kristus, “el dmeu a rengul e di ngiil tang a ngarngii a klisichel” a kmal ungil el medengei el kmo kede mekerang e mo dmeu a rengud. (1 Timoteus 1:​11; 6:​15) Me seikid a uchul, me ngdiak lemechas a rengud el mo medengei el kmo sel kiis el mo er a mera el deurreng a debetik er ngii er a chelsel a Tekingel a Dios, el Biblia.​—Chocholt 1:3; 22:⁠7.

Ngar er sel merael a chisel el chedechedechal el ngar er a Rois, e a Jesus a mesaod aike el tekoi el doruul e ngsebeched el mo dmeu a rengud. Ngmelekoi el kmo: “Ng dmeu a rengrir” tirke el (1) kerekikl a usbechellir er a tekoi er a klereng, (2) ngar er a klengiterreng, (3) medemedemek a rengrir, (4) songerenger e meched a rengrir el kirel a llemalt, (5) chubechubechad, (6) klikiid a rengrir, (7) meruul a budech, (8) modechelakl el kirel a llemalt, ma (9) rechad a moltuub e moldechelakl er kemiu el kirel.​—Matteus 5:​3-​11. *

Ngtechang a oumededenger el diak el kengei el kmo a chad el medemedemek, e chubechub , e meruul a budech loeak a klikiid el reng a bai kuk el klou a deurreng er ngii er a chad el di kesib a rengul, e di soal loldechelakl, e diak el chubechubechad? A Biblia a dirrek el ouchais er kid el kmo a chedaol el reng er a Dios a ngar er ngii a lerellii el kirel a deurreng er a chad, e dirrek el di mo er a rechad el tir a olengesenges er a Dios el ua lemerredel. (Rel. 5:​32) Choua itirke el chad a sorir el omes el bedul a Dios el kirel a ulekrael e le te medengei el kmo ngdi ngii el tang a sebechel el ngosuterir a rechad el mo mesisiich er aike el chelitecheterir.​—Osisechakl 16:​3, 9; 20:24.

Ngurelel a Tech ma lechub e NgRodech er a Reng?

A Jehovah diak el lomesterir a chedaol el reng er ngii el mo er tirke el chad el meruul a “urerel a tech.” Aike el ureor, el ngii a uldimukl er ngii a deleboes, ma oltuubladek, ma cheltelaol er a rrom, a losaod el ngar er a Galatia 5:​19-21. Choua isei el blekeradel a diak lebesterir a rechad a deurreng, e ngbai di tomall a deleuill er a klauchad ma klausechelei. Ma lmuut el tang, a Tekingel a Dios a bleketakl el melekoi el kmo tirkel chad el “meruul chouaisel tekoi a diak le sebechel mediukes ra rengedel a Dios.”

Ma klekakerous er ngii, a Dios a omsa chedaol el reng er ngii el mo er tirke el chad el omekeroul a “rodech ra Reng” er a klengar er tir. Aike el blekeradel el luldimukl er a chelsel tiang a “bltikerreng, ma deourreng, ma budech, ma kllourreng, ma blekokuii, ma ungilreng, ma blakerreng, ma delemedemek, ma chomengerem.” (Galatia 5:​22, 23) Sel dolecholt aika el blekeradel, e kede mekedbechii a blekeradel el ngar er ngii a budech er kid el lobengterir a rebebil ma dirrek el Dios, e tiang a sebechel el mo uchul a mera el deurreng el me er kid. (Momes er a box) E a lmuut el klou a ultutelel er tiang a kmo kede oldeu er a rengul a Jehovah e ngar er ngii a dmeu a rengud er ngii el omelatk er a klengar el diak a ulebengelel el ngar er a beches el beluulechad er a Dios el ngar er ngii a llemalt er a chelsel.

Ngera Kede Ousbech er Ngii me bo Ldeu a Rengud?

A kedeb lomesodel a kmo: Mongeroid er kau er a “urerel a tech” e momekeroul a “rodech ra Reng” er a Dios er a klengar er kau. Ma bo ldeu a rengul a chad, e ngkmal kirel ngii el chad el mo oureng el soal el mo er ngii a kmeed el deleuill er ngii ma Dios. Ma chad el melasem el mo meruul er tia el tekoi a rodemii a omesodel a Jesus el kirel a dmeu a rengul el chad.

Me seikid, e lak moba cheleuid el uldasu el kmo ngkmal diak el sebechel el mo dmeu a rengum. Ngmera el tekoi el chelechang, e ke locha chuarm a mondai er a klisichel a bedengem, ma chebechielem, ma urelem, ma lechub a ngelsengesel a ududem. Me nguaisei engdi, bo lemesisiich a rengum; e ngdiak a belkul a lsal mo moalech a rengum el kirel a klengar! A omengederderel a Rengedel a Dios a mo sumechokl aika el mondai ma lmuut el betok el dart el mondai el ngar er ngii er a chelechang. Ngulterekokl el kmal di kmedung, e a Dios a mo otaut aike el telbilel el lolekoi a ta er a remilluches er a psalm el kmo: “A rengedem a diak a ulebengelel . . . Ng mesterir a ungil a ildisel; ng mesterir a rokui a ikel lousbech.” (Psalm 145:​13, 16) Me ngdi ua lolecholt er ngii a rebetok el million el mesiungel a Jehovah el meliuekl er a beluulechad el rokir, a omolemolem el melatk er tia el ungil el telbilel a Jehovah e ngkmal sebechel el mo uchul a klou el deurreng er kau er a chelecha el sils.​—⁠Chocholt 21:3.

[Footnote]

 [Box on page 5]

Aike el Tekoi el Sebechel el mo Uchul a Deurreng

Bltikerreng el molecholt er ngii a rurelleterir a rebebil el mo olecholt er a bltikerreng leko er kau.

A Deurreng a smisichau me ngmo sebechem el outekangel a omelsemai el mchelebangel.

A Budech a ngosukau el rullii a deleuill er kau me ngmo diak a meringel el klautok er a chelsel.

A Klloureng a ngosukau ma lta ke chelebangel a meringel el taem ma omelsemai engdi ngsebechem el melemolem el dmeu a rengum.

A Blekokeuii a kurseterir a rebebil leko kmeed er kau.

A Ungilreng el molecholt er ngii a rulleterir a rebebil me te medengelkau sel mousbech a ngeseu.

A Blakerreng a mo oterekokl er a uldesuem aike el ulekrael el mla er a Dios el mei el oeak a bltikerreng er ngii.

A Delemedemek a rullau el mo chelellakl a rengum, ma uldesuem, ma bedengem.

A Chomengerem a mo uchul e a cheleuid el bo mruul a mekesadel.