Ngmekerang e Sebeched el Mtekengelii a Klengiterreng

KAU ngkora mekngit a rengum? Chelecha el taem er a rraurreng ma klautok, e te betok el chad a kora mekngit a rengrir. A rebebil a mekngit a rengrir e le ngdiak a urerir. E a rebebil a chelebangel a telemelir er a uriul er a accident. Ngdirrek a rekuk bebil a chelebangel a mondai er a telungalek, ma meringel el secher, ma lechub e te sabisi el di tir el tang.

A lsekum e kau a mekngit a rengum, e ngar er ker a sebechem el mo er ngii el kirel a ngeso? Te betok el million el ngar er a beluulechad el rokir a mla metik a ongelaod loeak omengiuel a Tekingel a Dios, el Biblia. Te muklatk er a tekingel a apostel Paulus, el dmu el kmo: “Le modanges a Dios el Demal a Rubak er kid el Jesus Kristus, el Chedam ra klechubechub, el Dios ra bek longelaod, el mengelaod er kid sel de ngara chelsel a ngiidil ringel.” (2 Korinth 1:​3, 4) Ngera me ngdiak bai monguiu er tiang ma aike el bebil er a bades el ngar er a Biblia er kau? Me sel moruul uaisei e ng ‘mo mengelaod a rengmiu el sisichemiu.’​—2 Thesalonika 2:​17.

A ngeseu el mo outekangel a klengiterreng a dirrek el sebeched el metik loeak a klausechelei lobengterir tirke el mesiou er a Jehovah. A Osisechakl 12:25 a kmo: “A sebekreng a mekberedii a rengul a chad, e a ungil tekoi a rullii el mo ungil a rengul.” Sel dengar er a miting er a Rekristiano, e kede remenges a “ungil tekoi” el ngii “a ua honey; ng ungil er a reng e melisiich a bedenged.” (Osisechakl 16:24) Ngera me ngdiak bo er a miting er a Kingdom Hall er a Resioning er a Jehovah el mo teloi er a cheldebechel el mo ngmai a omelisiich er ngii?

Ngdirrek el sebechem el ngmai a ngeso er a klisichel a nglunguuch. A lsekum e kau a melechesuar el kmo ngbetok a mondai er kau, e mouchais aike el ngar er a chelsel a rengum el mo er ngike el “Orrenges a nglunguuch.” (Psalm 65:​2, NW) A Ulemeob er kid, el Jehovah el Dios, a kmal ungil el medengelkid er a bai di lekid el medengelkid. Ngsebeched el mo ultuil er a ngelseuil. A Tekingel a meskid a telbiil el kmo: “Bsa RUBAK a berredem, e ng mo ngosukau. Ng kmal diak bo le bechere melemalt me bo lubuu.” (Psalm 55:22) Ochoi, “tirkel oumeral ulsirs er a Jehovah a mo metik a klisichir.”​—Isaia 40:​31, NW.

A Jehovah el Dios a mla meskid a mesisiich el sengk el sebechel el ngosukid el mo outekangel sel lemekngit a rengud. Kau ke mo ousbech ngii el sengk?