A Biblia er a Tekoi er a Dois a Ousbech er a Ngklel a Dios

A NGKLEL a Dios, el Jehovah, a llechukl el betok el telael el taem er a New World Translation of the Holy Scriptures er a tekoi er a Dois el tilobed er a 1971. a Engdi, tia dimlak lekot el Biblia er a tekoi er a Dois el ousbech er a chedaol el ngakl. Me sel kot el Biblia er a tekoi er a Dois el uluusbech er a ngklel a Jehovah a milluches er a bekord el 500 el rak er a mla me mong. E ngike el milluches er ngii a Johann Eck, el mle ngar er a bab el mengeteklel a klechelid er a Katolik.

A Johann Eck a milechell er a 1486 er a beluu er a Dois. Sera le 24 a rekil, e ngmle sensei er a tekoi er a klechelid el ngar er a daingak er a Ingolstadt, el ngii el deruchall a lulebang el mo lmuut er a kodellel er a 1543. A Eck a mle sechelil a Martin Luther er a telkib el taem. Engdi, a Luther a mlo ngar er a medal a ureor er a omelodech er a chelsel a klechelid er a beluu er a Dois, e a Eck a milsebechakl er a Eklesia er a Katolik.

A ta el ngar er a bab el chad er a Bavaria a ulemekngerachel er a Eck el mo oidii a Biblia el mo tekoi er a Dois, e tiang a mlo merek er a 1537. A ta el babier a melekoi el kmo sel oidel a Biblia a kmal uleltirakl er sel di mla babier me “ngkirel el nguu a lmuut el klou el chetengakl.” A oidel a Eck er a Exodus 6:3 a mechuiu el kmo: “Ak mlo chemolt er a Abraham ma Isak ma Jakob, el Dios el Olab a Bek el Klisiich. Ngdi dimlak kuchotak er tir el oba ngklek el RUBAK [el Adonai].” A Eck a dirrek el milluches a lmuut el bebil er a omesodel a bades el kmo: “A ngklel el Adonai a Jehoua.” A betok el chellimosk er a Biblia a oumerang el kmo tiaikid a mle kot el taem e a ngklel a Dios a melluches er a Biblia er a tekoi er a Dois.

Me nguaisei engdi, a rechad a mle medengelii a ngklel a Dios e uluusbech er ngii er a chelsel a betok el telael el rak. Sera lekot el ousbech er ngii er a tekoi er a Hebru, e tia el ngakl el “Jehovah” a mle usbechall el mo melangch er a mera el Dios. (Duteronomi 6:4) A bekord el 2,000 el rak er a mla me mong, e sel tekingel a Jesus el kmo ngullecholt er a ngklel a Dios a llechukl el ngar er a tekoi er a Chigriik. (Johanes 17:6) Seikid el taem el mei, e tia el ngakl a lousbech er ngii er a betok el kakerous el omelekoi, e di kmedung, e a Psalm 83:18 a mo tmaut el kmo, a rokui el chad a mo medengelii a ngklel a Jehovah el ngii a Kot el Ngar er a Bab el Merredel er a chutem el rokir.

[Footnote]

[Siasing er a 32 el llel]

A 1558 el omeldechel a Biblia er a Eck, a ngar er ngii a tekoi er a chelsel el melutk el mo er a ngklel a Jehovah el ngar er a Exodus 6:3