Momakes el Oltirakl a Ultil a Ochil a Jesus Kristus

“Ngikel dmu el kmo ng oltirakl er a Dios er a klengar er ngii a kirel el kmal di ua teletelel a Jesus er a le ngar tial beluulchad.”​—1 JOHANES 2:6.

1, 2. Nguldimukl er a ngerang sel dolanges er a Jesus?

 A PAULUS a milluches el kmo: “E dukduch a rengud el rurtii sel kirel de borngii el klaidesachel el melanges er a Jesus el uchelel e orekil a klaumera er kid.” (Hebru 12:1, 2) Ma doltirakl er a rael er a blakerreng e ngkired el oturk a osenged er a Jesus Kristus.

² Sel tekoi er a ngar er a mong el kmo “melanges” el ousbech er ngii er a Beches el Renged a belkul a kmo “ngellomel el belsechakl,” ma “chisngekl el omes er a kuk tang,”ma “doturk osenged.” A ta el omesuub a kmo: “A chad er a Griik el ngar er a rurt a lsekum e ngchisngekl el lomes er a rechad el choeng me lochebir a osengel er tia el rurt e le ngar er ngii, e ngulterekokl el mo beketimel. Tia dirrek el osisiu el kirel a Kristiano.” A debechei a tekoi me lechesengkid e ngmo tomellii a ngelsechekled er a klereng. Ngkired el mo melanges er a Jesus Kristus. E ngera kede mesang er ngika el Mengetekled? A tekoi er a Griik el kmo “a mengetekled” a belkul a kmo ngike el “merredel, el ngike el ngar er a medal a bek el tekoi el kired el oltirakl er a kerebil.” Ma dolanges er a Jesus, e ngbelkul a kmo ngkired el oltirakl er a kerebil.

3, 4. (a) Ngkired el mekerang a lsoad el mo merael el di ua lorael a Jesus Kristus? (b) Ngera el ker a kired el melatk er ngii?

³ A Biblia a kmo: “Ngikel dmu el kmo ng oltirakl er a Dios er a klengar er ngii a kirel el kmal di ua teletelel a Jesus er a le ngar tial beluulchad.” (1 Johanes 2:6) Ma dolemolem el obengkel a Dios, e ngkired el mo olab a llechul a Jesus el di ua ingii el ullab a llechul a Demal.​—Johanes 15:10.

⁴ Ma bo dorael el di ua lorael a Jesus e ngkired el oturk a osenged er ngii el Mengetekled e omakes el oltirakl a ultil a ochil. A meklou a ultutelel el ker a duubech el kmo: A Kristus ngmekera lomekrael er a chelechang? Kede mo mekerang a doukerebai er a rolel a lorael? Ngera el klungiaol a mo er ngii sel doltirakl er a kerebil a Jesus Kristus?

A Kristus Ngmekerang a Lomekrael er a Rubengkel

5. Uchei er a lengasech el mo er a eanged, e a Jesus ngerang tilbir el mo er a rulebengkel?

⁵ Uchei er a lengasech el mo er a eanged, e a mla mekiis er a kodall el Jesus Kristus a mlo duum er a redisciplo er ngii e milsterir a klou el ureor. Ngdilu el kmo: “Misei e morael el mora rokuil renged el rulleterir ar chad el mo Obengkek.” Ngar er seikid el taem, e ngika el merredel a dirrek el tilbir el kmo ngmo obengterir sel loruul a urerir e dmu el kmo: “Mesang, ak  diblechoel lobengkemiu el mo lmuut era ullebongel ra belulechad.” (Matteus 28:19, 20) Ngmekera Jesus Kristus a lobengterir a rubengkel er a chelecha el taem er a ullebongel?

6, 7. A Jesus e ngmekerang a lousbech er a chedaol el reng el omekrael er kid?

⁶ A Jesus a dilu el kmo: “E Chongeseu, el Chedaol Reng, el modurch ra Chedam loba ngklek a mo olisechakl er kemiu ra rokuil tekoi, e omeklatk er kemiu ra ikel bek el tekoi el kdilu er kemiu.” (Johanes 14:26) A chedaol el reng el mlodurech el oeak a ngklel a Jesus, a omekrael e melisiich er kid er a chelechang. Ngomekllomes er kid er a tekoi er a klereng “el mo lmuut er sel dmolech ra Dios.” (1 Korinth 2:10) Ma lmuut el tang, aike el blekerdelel a Dios el “bltikerreng, ma deourreng, ma budech, ma kllourreng, ma blekokuii, ma ungilreng, ma blakerreng, ma delemedemek, ma chomengerem” a rokui el “rodech er a Reng.” (Galatia 5:22, 23) Me ngoeak a ulengeseuil a chedaol el reng, e ngsebeched el omekeroul aika el blekeradel.

⁷ Me sel dosuub er a Biblia e doltaut aike el bla desuub, e a reng er a Dios a ngosukid el mo olengeriakl er a llomeserreng, ma sekutaberreng, ma utebengel a tekoi, ma klemedengei, ma omerritel er a tekoi, e mo meduch el omdasu. (Osisechakl 2:1-11) A chedaol el reng a dirrek el ngosukid el mo outekangel a ongetikaik ma ongarm. (1 Korinth 10:13; 2 Korinth 4:7; Filipi 4:13) A Rekristiano a muklatk el mo ‘mengikiid er tir er a bek el idokel ra bedengir ma rengrir e bo lemecherrungel el chedaol.’ (2 Korinth 7:1) Kid a sebeched el oltirakl a llechul a Dios el kirel a cheledaol ma lechub e bo deklikiid, a lsekum e kede ousbech er a chedaol el reng. A ta er a rolel el ousbech er ngii a Jesus el omekrael er kid er a chelechang a chedaol el reng el Jehovah el Dios el bla lebsa Ngelekel me lousbech er ngii.​—Matteus 28:18.

8, 9. Ngmekera Kristus a lousbech er a “blak a rengul e mellomes a rengul el mesiou” el omekrael er kid?

⁸ Ka molatk er a kuk ta er a rolel el ousbech er ngii a Jesus el omekrael er a ongdibel er a chelechang. Ma losaod er a demiel ma ullebongel er a blekeradel er a beluulechad, e a Jesus a dilu el kmo: “Ngbekord techa ngikel blak a rengul e mellomes a rengul mesiou, el le delemii a rubak er ngii er bebrir ar mesiungel, el kirel dmu me le mekedmokl a kelir el mechii a blsechel? Ngeltengat ngikel mesiou el le bo lrei a rubak er ngii e ngmesa el uaisei chomerellel. Ak meral dmu er kemiu el kmo, a rubak er ngii a mo dolemii el mo mengedereder a daisang er ngii el rokui.”​—Matteus 24:3, 45-47.

⁹ A Jesus Kristus ingii a “mastang.” E a “mesiou” a chelechad er a rengellitel el Kristiano el ngar er a chutem. Ngika el mesiou a mla mukngerachel el mo omekerreu a daisang er a Jesus er a chutem el kutmokl a kall er a klereng er a ungil el blsechel. A kekerei el chelechad el ngar er a delongelir tirkang a Governing Body el omtechei er a “blak a rengul e mellomes a rengul mesiou.” Tirkang a omekrael er a ureor er a berkel a renged er a beluulechad el rokir e omeskid a okelel a reng er a ungil el blsechel. Ma Kristus a uaisei el omekrael er a ongdibel el oeak a rengellitel el “blak a rengul e mellomes a rengul mesiou” ma Governing Body er ngii.

10. Ngkirel el mo ua ngera osenged el kirir a remechuodel, e ngera uchul?

¹⁰ A kuk ta er a olechotel a omerredelel a Kristus a “milsterir ar chad a ngat”​—a remechuodel el sechal el Kristiano. Tia el ngerachel a lebilsterir me bo luchul “me le meketmokl ar mechedaol el kirel a ureor el chomesiou, me le meteketek a chelechedal a Kristus.” (Efesus 4:8, 11, 12) Ma losaod el kirir, e a Hebru 13:7 a kmo: “Molatk er tirikel mengetekliu el mlengedecheduch er kemiu a tikingel a Dios; momes er sel ullebongel ra klengar er tir, e moltirakl er sel kloumera er tir.” A rechelder a omekrael er a ongdibel. E le te oukerebai er a Jesus Kristus, me ngkired el oukerebai er a klaumerang er tir. (1 Korinth 11:1) Ngsebeched el olecholt a omereng el saul el kirel tia el uleketmokl el tekoi er a remechuodel sel dolengesenges e doltirakl er tir el “ar chad a ngat.”​—Hebru 13:17.

11. Ngoeak a ngera el rolel e a Kristus a omekrael er a rubengkel er a chelechang, e nguldimukl er a ngerang a bo dorael el ua ingii?

 ¹¹ Chochoi, a Jesus Kristus a omekrael er a rulebengkel er a chelechang el oeak a chedaol el reng, ma “blak a rengul e mellomes a rengul mesiou,” ma remechuodel el chad er a ongdibel. Ma lsekum kede merael el oltirakl er a Kristus e ngkired el mo medengelii a rolel a lomekrael er kid e mo oltirakl er ngii. Ngdirrek el kired el mo oltirakl er a teletelel a lorael. A Petrus a milluches el kmo: “Kemiu a kmal mlokedong el mo uaisei, ma Kristus el mlukringel el kiriu a milechere kerebai el momakes loltirakl a ultil chochil.” (1 Petrus 2:21) A cherrungel el kerebil a Jesus, ngerang rullii el kired?

Moba Kllourreng a Omongedereder

12. Ngera el telengtengil a kerebai er a Kristus a kirir a rechelder el melatk er ngii?

¹² A Jesus a ngiluu a klou el klisichel a omerreder er a Demal, e ousbech er ngii el oba kllourreng. Ma rokui el ngar er a chelsel a ongdibel​—el ileakl a rechoverseer​—a “mochotii ra rokuil chad a kllourreng er kemiu.” (Filipi 4:5; 1 Timoteus 3:2, 3) A rechelder a ngar er ngii a klisichir er a omerreder er a chelsel a ongdibel me ngkirir el oltirakl er a ultil a ochil a Jesus.

13, 14. Ngoeak a ngera el rolel e a remechuodel a oukerebai er a Kristus el melisiich er a rebebil el mo mesiou er a Dios?

¹³ A Jesus a mle medengei a ngelsengesir a redisciplo er ngii. Ngdimlak lolengit er tir el mo meruul aike el diak el sebechir el meruul. (Johanes 16:12) Ngdimlak el lorrimel er tir, a Jesus a bai millisiich er a rulebengkel el mo ‘blak a rengrir’ el meruul a soal a Dios. (Lukas 13:24) Ngmirruul el uaisei er a loruul a ureor ma lolisiich a rengrir. Ngdirrek el uaisei, a remechuodel el Kristiano er a chelechang a diak lomekrur ma lechub e lorrimel er a rebebil el mo mesiou er a Dios. Te bai melisiich er tir el mo mesiou er a Jehovah e le ngbetik a rengrir er ngii ma Jesus, ma rechad el dirrek.​—Matteus 22:37-39.

¹⁴ A Jesus a dimlak lousbech er sel dereder el mloterekokl er ngii el mo mengedereder er a klengar er a rechad. Ngdirrek el dimlak lebechei a meringel el llach ma imis el betok el uleklatk el kirir el mo oltirakl. Ngbai uluusbech a omellach el mla er a llach er a Moses el mo melisiich a rengrir a rebebil. (Matteus 5:27, 28) Ma loukerebai er a Jesus, e a remechuodel a diak loruul a chetituokel el llach ma lechub e di lolisiich a tekoi er a uldesuir. Ma dolekoi el kirel a oketmeklel a biled ma teleteled ma rolel a omilil ma klekool, e a remechuodel a ousbech er a Dios el mo omekrael er a rengrir a rechad el di ua ike el tekoi el ngar er a Mika 6:8; 1 Korinth 10:31-33; ma 1 Timoteus 2:9, 10.

Bo Mungil e Mousubes

15. Ngmilekera Jesus er aike el chelitecheterir a redisciplo er ngii?

¹⁵ A Kristus a milecherei a kerebai el kired er a rolel a losmechokl a chelitecheterir ma cheleuid el omerellir a redisciplo er ngii. Ka molatk a eru el tekoi el dilubech er sel ullebongel el klebesei er a lechad er tia el chutem. Uriul er a lebo er a Gethsemane, a Jesus a “chilteklii a Petrus, ma Jakobus, ma Johanes” e dilu er tir el kmo “di mekar.” “E ngii a ulikal ngosechekl, e mo terrob ra chutem e melluluuch.” E sera el lluut el mong, “ngmiltik er tir el imiit a mederir.”  Ngmilekerang a Jesus? Ngdilu el kmo: “Adang, a reng a soal, e a klechad a mechitechut.” (Markus 14:32-38) Ngdimlak el oungeroel er a Petrus ma Jakobus ma Johanes, e ngbai millisiich er tir. Ngar er seikid el kesus, e a Petrus a uluumededenger er a Jesus el ede el taem. (Markus 14:66-72) Ma uriul e a Jesus ngmilekerang el kirel a Petrus? “A Rubak . . .  a mlo chemolt ra Simon!” (Lukas 24:34) A Biblia a kmo: “E mlo duum ra Kefas, e mo duum rar truich ma terung.” (1 Korinth 15:5) A Jesus a dimlak el lebo el kesib a rengul, e ngbai uluusubes er a apostol e millisiich er ngii. A uriul, e a Jesus a milsang a Petrus a betok el ngerachel.​—Rellir 2:14; 8:14-17; 10:44, 45.

16. Kede mekerang e merael el uai a Jesus a lsekum a rekldemed er a klaumerang a choitid ma lechub e te mo mekngit er kid?

¹⁶ A rekldemed er a klaumerang a lechitid ma lechub e bo lemekngit er kid e le tir el diak lemecherrungel, e kid ngdiak bo deua Jesus el mo ungil er a rechad e dousubes er tir? A Petrus a milengelechel er a rekldemel er a klaumerang el kmo: “Kemiu el rokui bo le ta rengmiu, e bo mchubechubechad, e bo mkaubltikerreng el odam, e bo bekokuii e moba ngariourreng er a delongeliu. E lako molab a mekngit el omtechei a mekngit malechub e molab a mekngit lomelekoi; e bai momekngeltengat.” (1 Petrus 3:8, 9) E kuk mekerang a lsekum a chad a diak loruul el me er kid el ua Jesus, el diak el ungil ma ka lousubes er kid? Mo lmuut er a dengar er a choua itia el blekeradel, e ngkired el mo oltirakl er a Jesus e meruul aike el lurruul.​—1 Johanes 3:16.

Mngai a Tekoi er a Renged el Mo Kot

17. Ngera olecholt el kmo a Jesus a ngiluu a omeruul el soal a Dios el mo kot er a klengar er ngii?

¹⁷ Ngar er a kuk ta er a rolel, e ngkired el merael el ua Jesus. A berkel a ungil el chais er a Rengedel a Dios a mle klou a ultutelel er a klengar er a Jesus. Uriul er a longedecheduch er a redil er a Samaria er a bita er a mats er a Sikar, a Jesus a dilu er a redisciplo er ngii el kmo: “Sel kuruul a soal ngikel ulderchak e krekir a urrerel, itiaikid a kelek.” (Johanes 4:34) Ma loruul er a soal a Dios a millisiich er a Jesus; ngmle ua ungil el kall el millisiich er a klisichel a bedengel. Ma doukerebai er a Jesus el otaut a medad er a soal a Dios a mo uchul a ungil el klengar el ngar er ngii a ultutelel.

18. Ngera el klungiaol a mo er ngii sel dolisiich er a rengalek el mo teloi er a mui el taem el omesiou?

¹⁸ A rechedam ma rechedil a lolisiich er a rengelekir el mo teloi er a mui el taem el omesiou, e tir ma rengelekir a mo ngmai a betok el klengeltengat. A demerir a rekebtot el buik a millisiich er a rengelekel el mo pioneer er sera lemekekerei. Ma lemerekong el ngar er a skuul e te mlo pioneer. Ma lolatk er tia el deuil a rengul ngika el chedam e ngmilluches el kmo: “Tirka el ngelekam a kmal dirkak a ta el letemellii a rengmam, me ngkmal sebecham el melekoi el kmo: ‘A re ngalek a sengk el mla er a Jehovah el mei, te meral klengeltengat.’” (Psalm 127:3) Ngera el klungiaol a mo er a rengalek a lsekum e te mo teloi er a mui el taem el omesiou? A redil el derrir a reteim el ngalek a kmo: “A klepioneer a mla ngosuterir a rengelekek el mo oba kmes el delongelir tir ma Jehovah, e mla ngosuterir el mo meduch el mesuub el di tir el tang, e mla mo meduch el ousbech a temir, e mla nguu a tekoi er a klereng el mo kot er a klengar er tir. Ngmla er ngii a betok el tekoi el mle kirir el melodech er a klengar er tir engdi ngdiak a ta er tir el ouuchel a rengrir er a rael el bla lengiltii el mo merael er ngii.”

19. A rengeasek ngera el tekoi er a ngar er a mederir a kirir el melatk er ngii?

 ¹⁹ Kemiu el ngeasek, ngera kom mo meruul er a ngar er a medemiu el klebesei? Kom melatk el mo meduch er a ta er a bedengel a ureor? Ma lechub e kom oureor el kirel a mui el taem el omesiou? A apostol el Paulus a mengelechel el kmo: “Misei e bo le blak a rengmiu el kerekikl er chomerolliu, e lak bo blekerdelir ar diak le mellomes a rengrir, e bai bo blekerdelir ar mellomes a rengrir.” E dilechelir el kmo: “Misei e lako bom kebelung, e bai momtab el kmo ngngera soal a Rubak.”​—Efesus 5:15-17.

Bo Leblak a Rengum

20, 21. Ngoeak a ngera el rolel e a Jesus a mle blak a rengul, e kede mekerang a doltirakl er a blakerreng er ngii?

²⁰ A bo doltirakl er a ultil a ochil a Jesus, e ngkired el mo oukerebai er a blakerreng er ngii. Ma losaod el kirel a blakerreng er a Jesus, e a Biblia a kmo: “Ngmle teletelel a Dios, e dimlak lomdasu el kmo, ‘Kungreos er ngak me di kua Dios,’ e bai di mle ngii el mechachongii e nguu a teletelel a mesiou, me ngmlo ua teletelel a chad, ma blekerdelel a diak lengodech ra chad. Ngdi mle ngii el oltubokl er ngii, me ngmle bekongesenges el mo lmuut er a kodall, el sel kodall ra [teluo el kerrekar].” A Jesus a mle urrekodel er a omengederderel a Jehovah er sera loruul er a soal a rengul a Dios el kirel. Ngmle bekongesenges el mo lmuut er a kodellel er a teluo el kerrekar. Me ngkired el “nguu a Reng er Kristus” e mo blak a rengud el meruul a soal a Dios.​—Filipi 2:5-8.

²¹ A Jesus a dirrek el ullecholt er a blakerreng er ngii el mo er a reblak a rengrir el apostol. Ngmla er ngii a chelitecheterir ma ngelsengesir, engdi a Jesus a mle betik a rengul er tir “el mora ullebongel.” (Johanes 13:1) Me ngdirrek el uaisei, ngdiak debechei a chelitecheterir a rudam er kid me lerellid el mo omdasu a mekngit el kirir.

Moltirakl er a Kerebil a Jesus

22, 23. Ngera el klungiaol a mo er ngii a doltirakl er a kerebil a Jesus?

²² Nguaisei, kid a diak demecherrungel me ngdiak el sebeched el mo cherrungel el oltirakl er a ultil a ochil a Mastang er kid. Engdi ngsebeched el mesuub el mo medengelii a rolel a Kristus e mo er sel tkurrebab el sebeched el oltirakl er a kerebai el lebilecherei.

²³ A bo doukerebai er a Kristus a mo uchul a betok el klengeltengat. Ngmo er ngii a moktek er a klengar er kid e mo ungilbesud e le kede mechesang el meruul er a soal a Dios e diak doruul aike el soad. (Johanes 5:30; 6:38) A ukltked a melemolem el ungil. A omerolled a dirrek el sebechel el mo uchul a ungil el kerebai. A Jesus a ulemekedong er tirke el chormang er a ureor me lebo er ngii me lebetik a ulengull. (Matteus 11:28-30) Me sel doukerebai er a Jesus, e kid a dirrek el mo uchul a ulengull el mo er tirke el chad el obengked. Mada me dolemolem el omakes el oltirakl er a ultil a ochil a Jesus.

Ke Dirk Melatk?

• A Jesus ngmekerang a lomekrael er a rubengkel er a chelechang?

• A remechuodel te mekerang a loltirakl er a Jesus sel loltaut er a klisichir el mengedereder el lebilsterir a Dios?

• Kede mekerang a doltirakl er a kerebil a Jesus el kirel a chelitecheterir a rebebil?

• A rengeasek te mekerang e ngmai a tekoi er a Renged el mo kot?

[Aike el Ker er a Suobel]

[Siasing er a 15 el llel]

A remechuodel el Kristiano a ngosukid el oltirakl er a omerredelel a Kristus

[Siasing er a 16 el llel]

Kemiu el ngeasek, ngera el tekoi a omolib el mo meruul el mo uchul a ungil el klengar er kau el Kristiano?