Ngtechang a Jesus Kristus?

KA MOLATK er a deuil a rengul a kekerei el chad er a Judea el Andreas a ngklel er a lekot el remenges a tekingel a Jesus er a Nazareth! A Biblia a melekoi el kmo a Andreas a rirurt el mo er a obekul e dilu el kmo: “A ki miltik ra Messias [el blkul a kmo Kristus].” (Johanes 1:41) Ngar er a tekoi er a Hebru ma Griik, e tia el tekoi el “Messias” ma “Kristus” a belkul a kmo “Ngellitel.” A Jesus a mle ngike el Ngellitel er a Dios el mo Merreder. (Isaia 55:4) A Bades a mui er a ulaoch el kirel, ma Rechijudea er sel taem a milengiil er ngii.​—Lukas 3:15.

Kede mekerang e medengei el kmo a Jesus a ngike el Ngellitel er a Dios? Ka molatk er sel dilubech er a 29 C.E. er a le 30 a rekil a Jesus. Ngmlo er a Johanes el Techolb el mo metecholb er a omoachel er a Jordan. A Biblia a melekoi e kmo: “Ma Jesus er a le metechelbang, e ngdimlemereched el tokerekl ra ralm, e mesang, ngulebkais a eanged e ngmesa Reng er a Dios el ua belochel el me metengel er a bebul; e mlarngii a ngor ra eanged el kmo, ‘Ngikang a betik ra renguk el Ngelekek, el odeuir a renguk.’” (Matteus 3:16, 17) Uriul er a lerrenges aika el tekoi, e a Johanes ngmle sebechel el oumededenger el kmo a Jesus a mle Ngellitel er a Dios ma lechub e ngdiak? Sera loitelii er a Jesus a chedaol el reng er Ngii , e a Jehovah a ngileltii el mo King er sel mereku el Rengedel. Seikid e a Jesus a mlo Jesus Kristus, ma lechub a Jesus el ngike el Ngellitel. A Jesus ngmilekerang e mlo ngelekel a Dios? Ngerang a mle uchelel?

A Uchelel a Mla er a “Kmal Irechar”

A klengar er a Jesus a ulebii el mo ede el dauch er a klengar. A kot el dauch er a klengar er ngii a ulemuchel er a uchei er a lemechell er a chutem. A Mika 5:2 a ouchais el kmo a uchelel “a uldidelid el mor a kmal irechar.” A Jesus a millekoi el kmo: “Ngak a mlarbab el mei,” el belkul a kmo ngmla er a eanged el mei. (Johanes 8:23) Ngmle mesisiich el reng el ngar er a eanged.

A rokui el bleob el tekoi a mla er ngii a uchelel, me ngmla er ngii a taem e a Dios a di mle ngii el tang. Engdi, a Dios a ulemuchel el Omeob er a betok el rak er a ngar er a mong. Ngtechang a ble lekot el mebii? A babier er a Chocholt a melutk er a Jesus el kmo ng “uchelel a ikel ulebeob ra Dios.” (Chocholt 3:14) Ma Jesus a “ulemuchel el mechell loeak uchei ra rokuil bleob.” Tiang a uaisei e le “rokuil tekoi el ikel ngara eanged ma ikel ngara chutem, ma ikel meues ma ikel diak le meues.” (Kolose 1:15, 16) A Jesus a di mle ngii el tang a ulebeob er a Dios. Misei a uchul me ngokedongall el kmo “dital Ngelekel” a Dios. (Johanes 3:16) Ngdirrek el okedongall el “Tekoi.” (Johanes 1:14) E ngera uchul? E le uchei er a lemechell el chad, e ngii a mla er a eanged el melekingel a Dios.

“A Tekoi” a ulebengkel a Jehovah el Dios “ra uchelel,” er sera lomeob “er a beluulchad ma bek el tekoi el ngar a melidiul.” A Dios a millekoi er ngii el kmo: “Chelechang e bo doruul er a chad; kede mo rullii el ua ikid el ua teleteled.” (Johanes 1:1; Genesis 1:1, 26) Ngika el kot el mlechell el ngelekel a Dios a mla er a bita er a Demal el oureor el obengkel. Ngar er a Osisechakl 8:22-31 e ngmelekoi el kmo: “Ak mlar bita er ngii el di ua chad er omelib el blai, ak mle uchul a deuil a rengul a Dios er a bek el sils, el blechoel el dmeu a renguk el ngar medal.”

Ngkmal mlo kmes a deleongel er a Jehovah ma di ta el Ngelekel er sera ledak el oureor el terung! Tia el kemanget el deleongel a  kmal riretechii a rengul a Ngelekel a Dios. Ngika el bekongesenges el Ngalek a mlo ua demal el Jehovah. A Kolose 1:15 a melekoi el kirel a Jesus el kmo ng “chokesiul a diak le meues el Dios.” Tiang a ta er a uchul ma klemedengei el kirel a Jesus a klou a ultutelel el kirel aike el dousbech er a tekoi er a klereng ma omengull er kid el mo er a Dios. A Jesus a mirruul aike el rokui el tekoi el mle soal a Jehovah a bo loruul er sera lengar er a chutem. Me nguaisei, a bo dodengelii a Jesus e ngdirrek el mo klou a klemedengei er kid el kirel a Jehovah. (Johanes 8:28; 14:8-10) Engdi, ngmlekera Jesus e mle er a chutem?

A Klengar er Ngii el Ua Chad

A ongeru el dauch er a klengar er a Jesus a ulemuchel er sera lodureklii a Demal el me er a chutem. A Jehovah a uluusbech er a ongasireng el omeruul el oiuelii a klengar er a Jesus er a eanged el mo er a delel a klikiid el ekebil el Maria. A Jesus a mle cherrungel e le ngdimlak a demal er a klechad. A chedaol el reng er a Jehovah a mlo er a Maria, e a klisichel a chilechebii, me ngmlo dioll. (Lukas 1:34, 35) Ma Maria a milechellii a cherrungel el ngalek. A Jesus a mlo rredelel a chad er a daiksang el Joseph e mlukeroul er a ungilbesul el delengchokl e mle kot el klou el ngelekir.​—Isaia 7:14; Matteus 1:22, 23; Markus 6:3.

Ngdiak el sal betok el tekoi a dodengei el kirel a klengar er a Jesus er a lekekerei, engdi chimo el tekoi a dodengelii. Sera le 12 a rekil a Jesus, e a demal ma delal a ngiluu el mo er a Jerusalem el kirel a Baskua. E sera lengar er sei, e ngmle klou el taem el lechiloit er a templo, “el dengchokl ra delongelir ar sensei, el orrenges a cheldechedecherir e okerker.” Ma lmuut el tang, “ar chad el rokui el orrenges a mlo medul a rengrir era llemesel a rengul ma nger er ngii.” A Jesus a dimlak el di loker a dmolech el ker el kirel a tekoi er a klereng e lemerekong, e ngdirrek el mle mellomes a nger er ngii me ngmlo mechas a rengrir a rulerrenges er ngii. (Lukas 2:41-50) Sera lorael el mo klou el chad er a beluu er a Nazareth, e ngmilsuub el mo daiksang, ngulterekokl el ngiluu a klubelel er a demal er a Joseph.​—Matteus 13:55.

A Jesus a kiliei er a Nazareth el mo lmuut er a lebocha 30 a rekil. E sola e mlo er a Johanes el mo metecholb. Uriul er a lemetecholb, e a Jesus a ulemuchel er a omesiungel. Ngmirrael el meliuekl er a belual el omerk er a ungil el chais el kirel a Rengedel a Dios el kirel a ede el rak ma tedobech. Ngullecholt el kmo ngmlodurokl er a Dios. Ngmekerang? Ngmirruul a betok el ongasireng el tekoi, el dimlak el sebechir a rechad el remuul.​—Matteus 4:17; Lukas 19:37, 38.

A Jesus a dirrek el mle medemedemek el chad e dmolech a uldesuel. Ngulechotii a delemedemek er a osengel ma omerellel el mo er a rechad. A rechad a mle sorir el mo er ngii e le Jesus a mle beot a dongedecheduch er ngii e bekokeuii. Mo lmuut er a rengalek me ngdimlak lemedakt er ngii. (Markus 10:13-16) A Jesus  a ullecholt a omengull el mo er a redil, altang a rebebil a dimlak el uaisei. (Johanes 4:9, 27) Ngullengeseu er a remechebuul ma rechuarm el mo metik a ‘ulengull el mo er a reng er tir.’ (Matteus 11:28-30) A rolel a osisecheklel a mle bleketakl e mle beot el moltirakl. E a osisecheklel a ullecholt el kmo ngmle soal el olengeseu er a rechad el mo medengelii a di ta el mera el Dios, el Jehovah.​—Johanes 17:6-8.

A Jesus a uluusbech er a chedaol el reng er a Dios el omekungil er a resmecher. (Matteus 15:30, 31) El ua itiang, a chad el mle chebedes a mlo er ngii e dilu el kmo: “A lungilbesul ra rengum e ngsebechem el kikidak.” Me ngmilekerang a Jesus? Nguldersii a chimal e riretechii, e dilu el kmo: “Ngsoak; me bo mklikiid.” Me ngika el smecher a mlo ungil!​—Matteus 8:2-4.

Ka dirrek el molatk er a seked el mle er a Jesus e ulebengkel el ede el klebesei el diak leblengur. Ngmle chubur tia el seked e uluusbech er a ongasireng el tekoi el omeka er ‘tirkel mlengang, el diak domasech rar dil mar ngalek, e mle eual telael.’ (Matteus 15:32-38) A kuk ta er a taem, e a Jesus a ulekebir a eolt el omekerreu er a resechelil. (Markus 4:37-39) Ngullekiis er a rulekoad. a (Lukas 7:22; Johanes 11:43, 44) A Jesus a dirrek el kilengei el tongetengii a cherrungel el klengar er ngii ma diak lecherrungel el klechad a mo er ngii a omeltkir el kirel a ngar er a mederir el klebesei. Ngkol ua ngera el bltikerreng a lulechotii a Jesus el mo er a rechad!

Ngar er Ker a Jesus er a Chelechang?

A Jesus a mlad er a teluo el kerrekar er a lebocha 33 ma tedobech a rekil. b Engdi, a kodall a dimlak el uchul a ullebengelel a klengar er ngii. Sel ongede el dauch er a klengar er ngii a ulemuchel er a ede el klebesei er a uriul er a lokisii a Jehovah el mo ua chad el reng. Uriul er a okisel, e a Jesus a mlo duum er a rebetok el chad el kiliei er sel taem. (1 Korinth 15:3-8) E a uriul, e ngmlo “dengchokl ra kidekmel a Dios” e milengiil el mo nguu a klisichel a omengedereder. (Hebru 10:12, 13) Sera lemei sel taem, e a Jesus a ulemuchel el mengedereder el King. Me ngua ngerang a osenged el kirel a Jesus er a chelechang? Kede melatk er ngii el ua lechad el chuarm el mochu er a kodall? Ma lechub kede omes er ngii el ua lechad el kired el meluu er ngii? A Jesus er a chelechang a ka lechad me ka Lechimong el Kedidai el Dios. Ngii a bai mesisiich el reng el mengedereder el King. Ngdi kmedung e ngmo olecholt er a omengederederel el kirel tia el mekngit el beluulechad.

El ousbech er a okesiu el tekoi, e a Chocholt 19:11-16 a mesaod er a Jesus Kristus el ua king el dengchokl er a becheleleu el uos e me oukerrekeriil e oumekemad el ngar er a llemalt. Ngoba “kedorm el saider el kirel mengelebed er a bek el renged.” Choi, a Jesus a mo ousbech er a klisichel el mo olekngemed er a redengerenger. E kuk mekerang el kirir tirke el melasem el oltirakl er a kerebil el lebilecherei er sera lengar er a chutem? (1 Petrus 2:21) Ngii ma Demal a mo osebelterir er “sel klaumekemad er sel kloul sils ra Dios,” el domekedong er ngii el kmo Armageddon me bo lsebechir el kiei er tia el chutem el ngar er a eungel a Rengedel a Dios el mo cherechar.​—Chocholt 7:9, 14; 16:14, 16; 21:3, 4.

Sel bo longedereder el ngar er a budech, ngkol ua ngera el betok el ongasireng el tekoi a bo loruul a Jesus el kirel a klechad! (Isaia 9:6, 7; 11:1-10) E ngii a mo okngemedii a secher ma kodall. A Dios a mo ousbech er a Jesus el mo olekiis er a rebetok el billiol el chad, el mesterir a techall el mo kiei el mo cherechar el ngar er tia el chutem. (Johanes 5:28, 29) Ngdiak el sebeched el melechesuar sel klungiolel a klengar el mo er ngii er a eungel a omengederederel sel Renged. Me ngklou a ultutelel a dolemolem el melai a klemedengei er a Biblia e mo ungil el medengelii a Jesus Kristus.

[Footnote]

 [Baks er a 7 el llel]

A JESUS NGDIOS EL OLAB A BEK EL KLISIIICH?

A rebetok el chad er a klechelid a melekoi el kmo a Jesus a Dios. A rebebil a kuk melekoi el kmo a Dios a Trinidad. El oltirakl er tia el osisechakl, “e a Chedam a Dios ma Ngalek me ng Dios ma Chedaol el Reng me ng Dios, e diak el tedei e te bai di ta el Dios.” Ma tekoi a kmo tirka el tedei “a di ngar el mo cherechar e osisiu a deruchellir.” (The Catholic Encyclopedia). A choua ike el uldasu ngmelemalt?

A Jehovah el Dios a ngike el Ulemeob. (Chocholt 4:11) Ngdiak a uchelel el diak a ullebengelel, e cherrengelel a klisiich. (Psalm 90:2) E a Jesus a bai mla er ngii a uchelel. (Kolose 1:15, 16) Ma lolekoi el kirel a Dios el kmo Ngdemal, e a Jesus a dilu el kmo: “E le chedam a kuk ngarbab er ngak.” (Johanes 1:28) A Jesus a dirrek el milsaod el kmo ngmla er ngii a bebil el tekoi el ngii ma rechanghel a dimlak lodengei e ngbai di ta el Chedam a medengei.​—Markus 13:32.

Ma Jesus a dirrek el milluluuch el mo er a Demal el kmo: “Ngdi lak le uldesuek, e bai le ngar sel uldesuem.” (Lukas 22:42) A Jesus a milluluuch el mo er a chad el kuk ngar er a bab er ngii. Ma lmuut el tang, e a Dios a ulekisii a Jesus er a kodall; a Jesus a dimlak el di lengii el olekiis er ngii. (Rellir 2:32) Me ngbleketakl el kmo, a Chedam ma Ngalek a dimlak losisiu a deruchellir er a uchei er a lemei er tia el chutem a Jesus ma dirrek er sera lengar er tia el chutem. E kuk mekerang er a lengasech el mo er a eanged a Jesus? A 1 Korinth 11:3 a melekoi el kmo: “Ma bdelul a Kristus a Dios.”A mera er ngii a Ngalek a blechoel el chederedall er a Dios. (1 Korinth 15:28) Ma Bades a olecholt el kmo a Jesus a diak el Dios el Olab a Bek el Klisiich. Ngii a bai Ngelekel a Dios.

E ngike el lekong ongedei el chad er a Trinidad el chedaol el reng a diak lechad. Ma loluluuch el mo er a Dios e a melluches er a psalm a kmo: “Ngdi sel bsa telil, e ng mo ngar.” (Psalm 104:30) Me seikid el reng a diak le Dios; ngbai klisiich el Dios a oldurokl er ngii ma lechub e ngousbech er ngii el mo oltaut a soal. Ngoeak ngii el reng, e a Dios a milebii a eanged ma chutem ma rokui el outeliil el bleob. (Genesis 1:2; Psalm 33:6) A Dios a uluusbech er a chedaol el reng er ngii el omekrael a uldesuir tirke el milluches er a Biblia. Ma Trinidad a diak losisechakl el debetik er ngii er a Biblia. c A Biblia a kmo: “A RUBAK [el Jehovah] el di ngii el tang el RUBAK a Dios er kid.”​—Duteronomi 6:4.

[Footnote]

[Siasing er a 5 el llel]

Sera lemetecholb, e a Jesus a mlo Ngike el Ngellitel er a Dios

[Siasing er a 7 el llel]

A Jesus a uluusbech aike el rokui el klisichel er sel ureor el lebilsang a Dios

[Siasing er a 7 el llel]

Chelechang, e a Jesus a mesisiich el King