Ngtechang a Obo Moltirakl er Ngii​—Dios ma Lechub e Ngchad?

“Ngkired loltirakl ra Dios ra bai doltirakl rar chad.”​—RELLIR 5:29.

1. (a) Ngera el bades a dai er tia el suobel? (b) Ngera uchul ma rechapostol a mlo mekelebus?

 A RECHAD er a kerrekeriil er sel kot el ngar er a bab el kort er a rechad er a Chijudea a locha kmal mle kesib a rengrir. A rekelebus a mla mo dibus. Te mle apostol er a Jesus Kristus, el ngii a mlo okodall er a sese el sandei er a uchei. Chelechang e a kort a mle kltmokl el oukerrekeriil er a rulebengkel. Engdi, sera bo lolai er tir a remengkar, te miltik el kmo ngdimlak a rechad er a chelsel, engdi tia el blil a kelebus a mle chelsimer. Telkib er a uriul, e te miltik el kmo a rechapostol a ngar er a templo er a Jerusalem el oba blekeu el olsisechakl er a rechad el kirel a Jesus. Tia el ureor a uchul me te mlo er a kelebus! A remengkar a di mle mereched el mo er a templo e liluut el ngoititerir a rechapostol el mo er a kort.​—Rellir 5:17-25.

2. Ngika el anghel ngulemeklatk er a rechapostol el mo mekerang?

² A ta er a anghel a ultebedeterir a rechapostol er a kelebus. Ngmirruul el uaisei me lak bo lechelebangel a odechelakl? Ngdiak. Tiang a dilubech me bo lsebechir a rechad er a Jerusalem el rongesii a ungil el chais el kirel a Jesus Kristus. Ngika el anghel a milengelechel er a rechapostol el mo ‘mengedecheduch er a rechad a tekoi el rokui er tial Klengar.’ (Rellir 5:19, 20) Me sera lebetik er tir a remengkar, e te miltik er a rechapostol el olengesenges er tia el uleklatk.

3, 4. (a) Sera lomeklatk er tir me lak lomerk, ngmle ua ngerang a nger er a Petrus ma Johanes? (b) Ngmle ua ngerang a nger er tirke el bebil er a rechapostol?

 ³ A ngar er a bab el chad er a kerrekeriil el Josef Kaifas a ulemeklatk er a reteru er tirka el blak a rengrir el ruumerk, el Petrus ma Johanes, el kmo ngmla ta lengar er a kerrekeriil. Ngmillekoi el kmo: “A ki kora mla mellach el merrob er kemiu cho molisechakl er ngiil ngakl [el Jesus], e ka mesang, ko mla mekekii a Jerusalem er chosisechekliu.” (Rellir 5:28) Ngdimlak el mechas a rengul a Kaifas el lmuut el mesa Petrus ma Johanes el ngar er a kort. Sera lekot el omeklatk er tir, e tirka el teru el apostol a ulenger el kmo: “Di le kemiu losiik er ngii, el kmo ngmelemalt er medal a Dios a dolengesenges a tikingiu ra dolengesenges a tekingel a Dios? Ngdiak el sebecham el diak ki molekoi a ikel ki mules ma kim rirenges.” A Petrus ma Johanes a dimlak el sebechir el torebengii a urerir el omerk er a klumech el di ua profet er a irechar el Jeremia.​—Rellir 4:18-20; Jeremia 20:9.

⁴ Chelechang, e a rechapostol el rokui, el uldimukl er ngike el beches el apostol el Mattias, me ngmlo er a kort. (Rellir 1:21-26) Sera lomeklatk er tir me lak lomerk, e tir me te dirrek el uleba blekeu el onger el kmo: “Ngkired loltirakl ra Dios ra bai doltirakl rar chad.”​—Rellir 5:29.

A Dios el Mengedereder ma lechub a Chad el Mengedereder

5, 6. Ngera uchul me tirke el apostol a dimlak el oltirakl er sel omellach er a kort?

⁵ A rechapostol a rechad el uleltirakl er a llach e dimlak lomtok er a uleklatk er a kort. Engdi, ngdiak a chad, alta ngmesisiich ma lechub ngdiak, el sebechel el mellach er a chad el mo omtok er a llechul a Dios. A Jehovah a kot el “ngarbab el merreder er a beluulchad el rokir.” (Psalm 83:18) Ngdiak el di le “Ngikel oukerrekeriil er a beluulchad el rokir” el merekong, e ngdirrek el kot el ngar er a bab el Meruul a Llach e King er aike el bek el taem. A ngii di el tekoi el tuobed er a kort el omtok er a omellach er a Dios a diak a ultutelel er a osengel a Dios.​—Genesis 18:25; Isaia 33:22.

⁶ Tia el tekoi a bla loterekeklii a rechellimosk el chad er a llach. El ua itiang, a ta er a chellimosk er a llach a milluches el kmo ngdiak a ngii di el llechul a chad el kirel el omtok er a “llach er a ocholt” el debetik er a chelsel a Biblia. Me sel ngar er a bab el kort a kmal mlo imis el mellach er a rechapostol me lak lomerk er a klumech. A rechapostol a dimlak el sebechir el oltirakl er sel omellach.

7. Ngera uchul ma berkel a klumech a ulengasech a rengrir a rebderrir ar priist?

⁷ A blakerreng er tirka el apostol a kmal ulengasech a rengrir a rebderrir a repriist. A Kaifas ma rebebil er tirka el priist a mle Saddusee, el tir a dimlak loumerang er a okiis. (Rellir 4:1, 2; 5:17) Engdi, a rechapostol a millemolem el melekoi el kmo a Jesus a milekiis er a kodall. Ma lmuut el tang, a rebebil er tirka el priist a millasem el nguu a kengei er a remerreder er a Rom. Ngar er a kerrekerilel a Jesus, e a Pilatus a milsterir a techall el kongei er a Jesus el mo king er tir, engdi a rebderrir a repriist a millekoi el kmo: “Ngdiak a ngodech el king er kemam, ngdi kaiser.” (Johanes 19:15) a A rechapostol a dimlak el di lolisechakl el kirel a okisel a Jesus el lemerekong, te dirrek el ullisechakl el kmo “ngdiak a ngodech el ngakl el ngar cheungel a eanged el le bilsterir ar chad el bo de sobel er ngii.” (Rellir 2:36; 4:12) Ulekum a rechad a ulemuchel el omes el bedul a Jesus el ua lemerrederir, e ngrulleterir tirka el priist el mo medakt el kmo a rechad er a Rom a “mei el ngma mats er kid mar chedal a beluad.”​—Johanes 11:48.

8. A Gamaliel ngmilsterir a rechad er a ngar er a bab el kort a ngera el uleklatk?

⁸ Aike el mo duubech er a ngar er a mederir a dimlak el sal ungil el kirir a rechapostol er a Jesus. A rechad er a kerrekeriil er tia el kort a mle sorir a bo lokodall. (Rellir 5:33) Engdi, ngmla er ngii a mlo ngodech. A ta er a sensei er a llach el Gamaliel, a ulemeklatk er tir me lak el sal lorreched. Ngmillekoi el kmo: “A lsekum a ikel uldesuir ma chomerellir a meltib rar chad, e ngmo nguemed; e a le mlara Dios el mei, e ngdiak el sebechiu el tomall.” Ngdirrek el millekoi el kmo: “Me ngmekngit cho bo mcherarou ra Dios!”​—Rellir 5:34, 38, 39.

9. Ngerang a olecholt el kmo a urerir a rechapostol a mla er a Dios el mei?

 ⁹ Sel kort a kilengei er a tekingel a Gamaliel. Me “tulekerterir ar apostel el mei, e chillebedeterir e mlellach el merrob er tir me lak lolisechakl ra ngklel a Jesus, e milechiiteterir.” Ngdi mle mereched e a rechapostol a liluut el oltirakl er a tekingel ngike el anghel. Ma uriul er a lechititerir, e ng “mle bek el sils el lolisechakl ra templo ma blai, el dimlak le meterob lomerk el kmo a Jesus a Kristus.” (Rellir 5:40, 42) A Jehovah a ulemekngeltengat er tir. El ua klungel a ngerang? “Ma Tekoi ra Dios a mengal uleberk; ma ildisir ar Ubengkel a Jesus a kmal mlo betok ra Jerusalem, ma dirrek el kloul ildois rar priist a mlo oltirakl ra kloumerang.” (Rellir 6:7) Ngkmal mlo mechas a rengrir a rebderrir a repriist! Ngkmal mle ulterekokl el kmo: A urerir a rechapostol a mera el mla er a Dios el mei!

A Rumtok er a Dios A Diak el Sebechir el Mo Kats

10. Ngar er a osengir a rechad, ngera uchul ma Kaifas a mle ulterekokl a rengul er a deruchellel, engdi ngera uchul ma klaumerang er ngii a mle cheleuid?

¹⁰ Sera kot el dart el rak, e a remerreder er a Rom a millilt er a rengar er a bab el priist er a Rechijudea. Ngike el meteet el Josef Kaifas a mla er a deruchellel el Valerius Gratus a uchul, e ngii a mla er tia el deruchall el kuk kemanget er a rebebil er a rengar er a bab el priist. A Kaifas a ulemdasu el kmo aike el lurruul a mlo er ngii el duch er ngii ma deleongel er ngii ma Pilatus a uchul er a bai lemla er a Dios. Ngmle cheleuid a klaumerang er ngii el ultuil er a rechad. Ngdi mle ede el rak er a uriul er a lengar er a kort a rechapostol, e a remerreder er a Rom a mlo mekngit er a osengir er a Kaifas me ngmlo diak el ngar er a bab el priist.

11. Ngera dilubech el kirel a Pilatus ma Juda, e ngerang a uldesuem el kirel tiang?

¹¹ Sel tekoi el nguu a Kaifas er a deruchellel a mla er a Lucius Vitellius el gobernor er a Syria, el ngii a ngar er a bab a deruchellel er a Pilatus. Ma sechelil a Kaifas el Pilatus a dimlak el sebechel el mekerang. Ngdi mle ta el rak er a lemengai a Kaifas, e a Pilatus a dirrek el milengai er a deruchellel e liluut el mo er a Rom e mlo er a kerrekeriil. El kirir tirke el merreder el Rechijudea el uluumerang er a Kaiser, a rechad er a Rom a ngiluu a ‘mats er tir mar chedal a belurir.’  Tiang a dilubech er a rak er a 70 C.E. er sera ltemellii a Jerusalem a resoldau er a Rom, el uldimukl er a templo ma ngar er a bab el kort. Ngkol ua ngerang el klemerang el tekoi a tekingel ngike el milluches er a psalm el kmo: “Lak moumeral ulsirs er a re merreder, ng diak a di chad el sebechel el osebelau.”​—Johanes 11:48; Psalm 146:3.

12. Ngmekerang e a blekerdelel a Jesus a olecholt el kmo a blekongesenges el reng el mo er a Dios a uchul a llomeserreng?

¹² Ngar er a kuk bitang, e a Dios a ngileltii ngike el milekiis el Jesus Kristus el mo Ngar er a Bab el Priist er a templo er a klereng. Ngdiak a ngii di el chad el sebechel el torebengii tiang. Choi, a Jesus a “melemolem ra diak le mengodech el klepriist er ngii.” (Hebru 2:9; 7:17, 24; 9:11) A Dios a dirrek el ngileltii a Jesus el mo Chad er a Kerrekeriil er a redi ngar ma remla mad. (1 Petrus 4:5) Seikid, e a Jesus a mo mesa el kmo a Josef Kaifas ma Pontius Pilatus ngngar er ngii a techellir el nguu a klengar er a ngar er a mederir el klebesei ngdiak.​—Matteus 23:33; Rellir 24:15.

A Rebekeu el Omerk er a Renged er a Chelecha el Sils

13. Chelecha el taem, e ngera el ureor a mla er a rechad, e ngera el ureor a mla er a Dios? Ke mekerang e medengei?

¹³ Chelecha el taem, el di ua kot el dart el rak, e ngkmal betok a ‘recherarou er a Dios!’ (Rellir 5:39) El ua itiang, sera lak lekengei a Resioning er a Jehovah el mo mengull er a Adolph Hitler el ua lemerredelir, e ngtilbir el mo omekoad er tir. (Matteus 23:10) E a cheldebechellel a kmal mle sebechel el kutmeklii tia el tekoi. A Renazi a mle sebechir el mdechemeterir a rebetok el telael el Sioning e ngoititerir el mo er a kelebus. Te dirrek el milekodeterir a rebebil er tir. Engdi, ngdimlak el sebechir el tomellii sel blakerreng er tir el mengull er a Dios el di ngii el tang, e dirrek el dimlak el sebechir el okngemedeterir a remesiungel a Dios el rokui. Sel urerir a Rekristiano a mla er a Dios el mei, el diak el rechad, ma urerel a Dios a diak el sebechel el metemall. Okolem el rak er a uriul, e a reblak a rengrir el silobel er a kelebus a dirk melemolem el blak a rengrir el mesiou er a Jehovah ‘era rengrir el rokir, ma chomeltkir el rokir, ma chomelebedebekir el rokir,’ engdi a Hitler ma rechedal a mla mo diak.​—Matteus 22:37.

14. (a) Ngera el tekoi a bla lruul a ruumtok el oltuub er a remesiungel a Dios, e ngera mlo rsel? (b) Ma ika el otuub ngsebechel el tomelleterir a rechedal a Dios? (Hebru 13:5, 6)

¹⁴ Uriul er a temir a Renazi, e te betok el chad a dirrek el ulemtok er a Jehovah ma rechedal. Ngar er a betok el beluu er a Europe, e a betok el klechelid ma rechad er a politiks a millasem el omekedong er a Resioning er a Jehovah el ‘kdekudel el cheldebechel,’ el di osisiu er sel blekeradel el dilubech er a Rekristiano er a kot el dart el rak. (Rellir 28:22) A klemerang a kmo, sel Kort er a Llemeltir a Rechad er a beluu er a Europe a mla kongei el kmo a Resioning er a Jehovah a mera el klechelid el diak el kdekudel el cheldebechel. Ma rumtok a medengelii tiang. Engdi, te dirk melemolem el oltuub er a Resioning. Ngoeak tiakid el omeruul, e ngmlo uchul ma rebebil el Kristiano a mlo diak el oureor. Ma Resioning el ngar er a skuul me te dirrek el mucheracheb. A rebekikl el oublai a blai a mla tomall a contract er a blirir el lekilengei me lousbech a Resioning er a kemanget el taem. E dirrek, a chelechad er a gobelment a diak el kengei el mesterir a llemeltir el mo kiei er a beluu e le tir el Sioning er a Jehovah! Engdi, tir a kmal diak lemeterrob.

15, 16. Te mlekerang a Resioning er a Jehovah er a beluu er a France el kirel a ultok er tia el ureor er a berkel a klumech, e ngera uchul me te melemolem el omerk?

¹⁵ El ua itiang, ngar er a beluu er a France, e a rechad er ngii a tabesul a uldesuir. Engdi, a rebebil er a ruumtok a melisiich a llach el mo merrob  er tia el ureor er a berkel a Renged. Me te mlo mekerang a Resioning er a Jehovah er sel beluu? Te ulengesecheklii a urerir er a berkel a klumech me ngkmal mlo ungil a rsel. (Jakobus 4:7) Ngar er a chelsel a elolem el buil, e a ildisir a remesuub a Biblia a ngilsechekl er a 33 el basent er sel beluu! Nglocha kmal longesechii a rengul a Diabelong sel lomes er tirke el blak a rengrir er a beluu er a France el kongei er tia el ungil el chais. (Chocholt 12:17) A rekldemed el Kristiano er a beluu er a France a ulterekokl a rengrir er a tekingel a profet el Isaia el kmal melutk er tir sel ledu el kmo: “Ngdi diak a klekedall er a mekemad el merruul el mo sebechel tomellau; ng mor ngii a nger er kau el kirir tirkel rokui el oltutakl er kau.”​—Isaia 54:17.

¹⁶ A Resioning er a Jehovah a diak el sorir el modechelakl. Engdi, ngoeak a blekongesenges er a llechul a Dios el mo er a rokui el Kristiano, e ngdiak el sebechir e diak el sorir el mo meterob el ouchais er aike el tekoi el bla lrrenges. Te melasem el mo ungil el chad er a beluu. Engdi, sel lebo er ngii a klekakerous er a llechul a Dios ma llecherir a rechad, e te bai kongei el oltirakl er a Dios el ua lemerredelir.

Lak Medakt

17. Ngera uchul me ngdiak el kired el medakt er a recherroued, engdi ngkirel el mo ua ngerang a blekerdeled el bedul tir?

¹⁷ A recherroued a ngar er a kmal kdekudel el blekeradel. Te oumekemad el omtok er a Dios. Ma leuaisei, e kede oltirakl er a tekingel a Jesus el mo meluluuch el kirir tirke el oldechelakl er kid er bai demedakt er tir. (Matteus 5:44) El di ua Saulus er a Tarsus el ulemtok, e kede meluluuch el kirir a ruumtok er a Dios me bo lsebechel a Jehovah el omok a mederir me lesa klemerang. (2 Korinth 4:4) Ma Saulus a mlo apostol el Paulus e ngmlukringel er a chimorir a rullab a dereder er isel taem. Engdi, ngulemeklatk er a rekldemel el oumerang “me loltirakl rar merreder mar uba klisichel chomerreder, e lolengesenges e le kldmokl ra bek lungil lurreor, e lak lolaes rar chad el ka longaititekangel , e bai le sorir a budech e dileblechoel lolecholt ra delemedemek el mora rokuil chad.” (Titus 3:1, 2) A Resioning er a Jehovah er a beluu er a France ma kuk bebil er a beluu a melasem el oltirakl er tia el omellach.

18. A Jehovah ngmesebechakl er a rechedal er a ngera el rolel, e ngera mo duubech er a orekil?

¹⁸ A Dios a millekoi er a profet el Jeremia el kmo: “Ngak a mo obengkem el mo mesebechakl er kau.” (Jeremia 1:8) Ngmekerang a Jehovah e mesebechakl er kid er a odechelakl er a chelecha el sils? Nglocha sebechel el ousbech er a tabesul a uldesuel el chad er a kerrekeriil el ua Gamaliel. Ma lechub e ngsebechel el mesa el kmo a ta er a omtok el merreder a mo mutechei er a kuk ta er a chad el oba tabesul el uldasu. Engdi lebebil er a taem, e a Jehovah a mo kongei er a rechedal el mo modechelakl. (2 Timoteus 3:12) Ma lta e a Jehovah a mechikid me kede modechelakl, engdi ngmo meskid a klisiich me bo lsebeched el outekangel. (1 Korinth 10:13) Ma ngii di el ngerang el lekengei er ngii a Dios, e ngulterekokl a rengud er aike el mo duubech er a orekil: Tirke el omtok er a rechedal a Dios a omtok er a Dios, e a ruumtok er a Dios a diak bo lekats.

19. Ngerang a bades el kirel a rak er a 2006, e ngera uchul me ngkmal rredemelel?

¹⁹ A Jesus a millekoi er a redisciplo er ngii el kmo te mo chuarm. (Johanes 16:33) Ma ike el medung er a Rellir 5:29 a kmal ungil er a chelecha el taem el kmo: “Ngkired loltirakl ra Dios ra bai doltirakl rar chad.” Misei a uchul me tia el tekoi a mlengilt el mo bades er a rak er a 2006. Bo le blak a rengud er a chelecha el mei el rak ma chelsel a klengar er kid el mo oltirakl er a Dios el ua lemerredeled!

[Footnote]

Ngsebechem el Onger?

• Ngera el kerebai a lebilecherei a rechapostol er sera bo lechelebangel a ultok?

• Ngera uchul me ngkired el oltirakl er a Dios el ua lemerredel er a bai rechad?

• A ruumtok er kid te mera el omtok er a techang?

• Ngngera el tekoi a mo duubech el kirir tirke el outekangel a odechelakl?

[Aike el Ker er a Suobel]

[Blurb er a 21 el llel]

A bades el kirel a rak er a 2006 a mo kmo: “Ngkired loltirakl ra Dios ra bai doltirakl rar chad.” ​—Rellir 5:29

[Siasing er a 18 el llel]

“Ngkired loltirakl ra Dios ra bai doltirakl rar chad”

[Siasing er a 20 el llel]

A Kaifas a uluumerang er a rechad er a bai Dios