“El Kirel Locholt el Bedul a Bek el Renged”
“El Kirel Locholt el Bedul a Bek el Renged”
“Me ko mo ochotek . . . ra bek lullebongel ra belulechad.”—RELLIR 1:8.
1. Te mla er ker e oingerang e a redisciplo er a Jesus e rongesii sel ulaoch er a Matteus 24:14?
A REBETOK er kid a kmal medengelii a tekingel a Jesus el llechukl er a Matteus 24:14. Tiang a kmal mechas a rengud er ngii el ulaoch! Ka molatk er a uldesuir a redisciplo er sera lekot el rongesii sel ulaoch! Ngmle rak er a 33 C.E. A redisciplo a ulebengkel a Jesus el ede el rak, me te dirrek el ulebengkel el mo er a Jerusalem. Te miles aike el ongasireng el leriruul e ulerrenges aike el osisecheklel. Ngmle dmeu a rengrir er aike el klemerang el lullisechakl er tir a Jesus, engdi te mle medengei el kmo ngdiak el rokui el chad a mo sorir. A Jesus a mla er ngii a recherrouel el mle mesisiich e ngar er a bab a deruchellir.
2. Ngera el kdekudel el tekoi ma omelsemai a bo lechelebangel er ngii a redisciplo?
2 Ngar er a Rois el Olifet, e a reteua el disciplo er a Jesus a ulebengkel e ulerrenges er ngii er a losaod aike el kdekudel el tekoi ma omelsemai el bo lechelebangel er ngii. Uchei er isei, e a Jesus a uluuchais el kmo ngmo okodall. (Matteus 16:21) Chelechang e ngmileketeklii el kmo tir a dirrek el mo chelebangel a meringel el ultok. Ngmillekoi el kmo: “Ar chad a mo omekesiuekl er kemiu ra ringel, e mo omekoad er kemiu; me kemiu a dirrek el mo muketui ra rokuil renged el ngklek a uchul.” Engdi ngmo er ngii a lmuut el betok el mo duubech. A reklsuul el profet a mo mengeuid er a rebetok. E a rekuk bebil a mo mekurt a rengrir e mo kakemikr e kauketui. E dirrek, a bltikerreng er a Dios ma Tekingel a mo mekelekolt el kirir ‘ar betok.’—Matteus 24:9-12.
3. Ngera uchul me ngmechas a rengud er a tekingel a Jesus el ngar er a Matteus 24:14?
3 Uriul er a losaod er aika el mekngit el blekeradel, e a Jesus a millekoi er a tekoi el kmal mlo mechas a rengrir a redisciplo er ngii. Ngdilu el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.” (Matteus 24:14) Me sel ureor el ulemuchel er ngii a Jesus, el ‘kirel lochotii a klemerang,’ a mo melemolem e oberk er a beluulechad el rokir. (Johanes 18:37) Ngkmal mechas a rengud er ngii el ulaoch! Ngkmal klou el omelsemai a bo loruul er tia el ureor er a “bek el renged.” Te dirrek el locha “mo muketui ra rokuil renged” me tiang a kmal mengasireng el tekoi. Tia el ureor a diak el di lolisiich er a omengederederel ma klisichel a Jehovah, ngdirrek el melisiich er a bltikerreng ma klechubechub ma kllourreng er ngii. Ma lmuut el tang, ngmo mesterir a rechedal a techall el mo olecholt er a klaumerang ma omeluu er tir el mo er ngii.
4. Te rua techang a kirir el meruul er tia el ureor, e ngera el ongelaod a lebilsterir a Jesus?
4 A Jesus a ulterekeklii el mo er a redisciplo er ngii el kmo tia el ureor a kmal klou a ultutelel. Uchei er a lebo er a eanged, e a Jesus a mlo duum er tir e millekoi el kmo: “Kom di mo nguu a klisiich sel be le metengel er kemiu a Chedaol Reng; me ko mo ochotek ra Jerusalem, ma Judea el rokir, ma Samaria el mo lmuut ra bek lullebongel ra belulechad.” (Rellir 1:8) Chochoi, ngmo er ngii a lmuut el bebil er a rechad el mo teloi er tir. Engdi, a redisciplo a mle mekesai. Me ngmlo uchul a klou el ongelaod er a bo lodengei el kmo a chedaol el reng er a Dios a mo ngosuterir el meruul er tia el ureor!
5. Ngera el tekoi el kirel tia el ureor er a berkel a klumech a dimlak lodengei a redisciplo?
5 A redisciplo a mle medengei el kmo ngmle kirir el omerk er tia el ungil el chais e “rulleterir ar chad el mo [disciplo].” (Matteus 28:19, 20) Engdi, te dimlak lodengei el kmo ngua klungel a ngera el ocholt a kirir el meruul er ngii e dirrek el dimlak lodengei el kmo ngoingerang a ullebongel. Kid me ngdirrek el diak dodengei. Ngdi ta el Jehovah a medengei. (Matteus 24:36) Sel bo lungil er a rengul a Jehovah el kirel a urered, e seikid e ngmo okngemedii tia el mekngit el beluulechad. Ngdi seikid el taem e a Rekristiano a mo medengei el kmo ngmla mo merek sel ureor el lebilskid a Jehovah. Tirke el kot el disciplo a dimlak el sebechir el medengelii a klungel tia el ureor el mo er ngii er a taem er a ullebongel.
A Berkel a Klumech er a Kot el Dart el Rak
6. Ngera dilubech er sera Pentecost 33 C.E. ma telkib el taem er a uriul?
6 Sera kot el dart el rak, e a berkel a klumech a kmal mle ungil. Sera Pentecost 33 C.E., e a 120 el disciplo a mla er a chelsel a delemerab el ngar er a Jerusalem. A chedaol el reng er a Dios a mloitel er a bebrir, e a apostol el Petrus a milengedecheduch er tir e millisiich er tir el kirel a belkul tia el mengasireng el tekoi. Ma 3,000 a mlo oumerang e miltecholb. Tiang a di mle uchelel. Alta e a remengeteklel a klechelid a millasem el merrob er tia el ureor, engdi a “Rubak a mle bek el sils el tirikel mo suobel a luleldak er tir.” Ngdi mle telkib el taem, e ng “bekord mlo eim el telael a ildisir ar sechal.” E uriul er isei, e a re “sechal mar dil, a kuk mlo betok el mengal mlo kloul seked el mlo modak er tir.”—Rellir 2:1-4, 8, 14, 41, 47; 4:4; 5:14.
7. Ngera uchul ma bult er a Kornelius a kmal mle klou a ultutelel el tekoi?
7 Ngdirrek el mla er ngii a kuk ta er a klou a ultutelel el tekoi el dilubech er sera rak er a 36 C.E., a bult ma techolb er a Kornelius, el ngii a mle chad er a Chisentail. Sera loldurokl er a apostol el Petrus el omes er ngika el chad, e a Jehovah a ulemeklatk er ngii el kmo a tekingel a Jesus el mo er a “rokuil renged el rulleterir ar chad el mo [disciplo]” a diak el di kirir a Rechijudea er a kakerous el beluu e lemerekong. (Rellir 10:44, 45) Ngmle ua ngerang a uldesuir a remechuodel? Sera bo lodengei a rechapostol ma remechuodel el kmo a ungil el chais a mo oberk er a Rechisentail, e te uleldanges er a Dios. (Rellir 11:1, 18) Engdi, a berkel a klumech a millemolem el ourodech el kirir a Rechijudea. A sese el rak er a uriul, el locha mle rak er a 58 C.E., e ngmlo uldimukl er a ruumerang el Chisentail, e “ngmocha telal telael ar chad ra Judea el mocha oumerang.”—Rellir 21:20.
8. A ungil el chais ngerang rullii er a klengar er a rechad?
8 Altang mechas a rengud er a ngelsecheklir a Rekristiano er sel taem, engdi ngdiak dobes el kmo aika el ochur a melutk el mo er a dersta el chad. Sel klemechel a Biblia el lerirengesii a kmal mle mesisiich. (Hebru 4:12) Ngkmal ngildechii a rolel a klengar er tir. A rechad a ulemuchel el mengikiid a klengar er tir, e uluubail er ngike el beches el chad, e kilengei er a Dios. (Efesus 4:22, 23) Ngdi osisiu er a chelecha el taem. E tirke el kongei er a ungil el chais a ngar er ngii a techellir el mo kiei el mo cherechar.—Johanes 3:16.
Oureor el Kldemel a Dios
9. Ngera el techall ma ngerachel a lulebang a rekot el Kristiano?
9 Tirke el kot el Kristiano a dimlak el omdasu el kmo tir a uchul aike el tekoi el mileketmokl. Te mle medengei el kmo a urerir a mle ultuil er a “klisichel a Chedaol Reng.” (Rom 15:13, 19) A Jehovah ingii a mle uchul a ulekurulel a klereng. Ma osisiu el taem, e tirke el Kristiano a mle medengelii a techellir ma ngerechelir el “choureor el kldemel a Dios.” (1 Korinth 3:6-9) Ma leuaisei, ngmle blak a rengrir el meruul er sel ureor el oltirakl er a tekingel a Jesus.—Lukas 13:24.
10. Ngera el tekoi a leriruul a rebebil er a rekot el Kristiano me bo lsebechir el ousioning el mo er a bek el renged?
10 A Paulus, el ngii a mle “apostel rar Chisentail,” a mirrael el betok el telael el mael er a daob ma beluu el mengetmokl er a beches el ongdibel er a beluu er a Asia ma Gris. (Rom 11:13) Ngdirrek el mirrael el mo er a Rom ma dirrek a Sebangiol. A osisiu el taem, e a apostol el Petrus a uleba “evangkelio . . . el kirir ar blotk.” Me ngmirrael el mo er a Babilon e le ngmlo betok a Rechijudea er sel beluu er sel taem. (Galatia 2:7-9; 1 Petrus 5:13) A Trifena ma Trifosa ma Persis a dirrek el mle teloi er tirke el “mle meringel loureor el ngara Rubak.”—Rom 16:12.
11. Ngmilekerang a Jehovah e omekngeltengat er a urerir a redisciplo er ngii?
11 A Jehovah a ulemekngeltengat er a urerir tirke el blak a rengrir el chedal. Ngkesai er a 30 el rak er a uriul er a lolekoi a Jesus el kmo ngmo er ngii a ocholt er a rokui el renged, e a Paulus a milluches el kmo a “evangkelio” a “uleberk el kirel a ikel rokuil dingar el bleob el ngar cheungel a eanged.” (Kolose 1:23) Ma ullebongel ngmlei er sel taem? Ngoeak a kuk ta er a rolel e ngmlo er ngii a ullebongel. Ngmlo ullebengelel sel mekngit el blekeradel er a Rechijudea er a rak er a 70 C.E., sel taem e a resoldau er a Rom a tilemellii a Jerusalem ma templo er ngii. Engdi, a Jehovah a mle ulterekokl a rengul el kmo ngmo er ngii a lmuut el klou el ocholt el mo er ngii, el ngii a mo uchul a ullebengelel a mekngit el beluulechad er a Satan.
Sel Ocholt el Ngar er Ngii er a Chelecha el Taem
12. Ngmle ua ngerang a uldesuir a rekot el Ngalek er a Skuul er a Biblia el kirel sel omellach el mo omerk?
12 Ngar er a ullebengelel aike el rak er a 1800, e uriul er a kemanget el taem el lengar er ngii a ultok er a osisechakl, e ngmlekedmokl a mera el omengull. A Resioning er a Jehovah el mlungakl el Rengalek er a Skuul er a Biblia er sel taem, a mle medengelii sel omellach el mo meruul er a disciplo er a beluulechad el rokir. (Matteus 28:19, 20) Ngar er a ullebengelel a 1914, e te mle bekord el 5,100 el chad a ulemerk er a klumech, ma ungil el chais a uleberk er a 68 el beluu. Engdi, tirke el kot el Ngalek er a Skuul er a Biblia a dimlak el sal medengelii a belkul a Matteus 24:14. Seikid el taem, e a Biblia a mloiuid el mo betok el omelekoi e merous el mekelekelii a beluulechad. Me ngmle telkib el taem, e a Rengalek er a Skuul er a Biblia a ulemdasu el kmo sel ocholt er a bek el renged a mla mo merek.
13, 14. A babier el The Watch Tower er sera 1928 ngmileketeklii a ngerang el kirel a soal a Dios ma moktek er ngii?
13 A Jehovah a milekekokil el mesterir a rechedal a melemalt el klemedengei el kirel aike el soal ma moktek er ngii. (Osisechakl 4:18) Sel The Watch Tower er a December 1, 1928 a millekoi el kmo: “Kid ngsebeched el melekoi el kmo a omerusel a Biblia a uleltaut er a berkel a evangkelio er a renged? Ngkmal diak! Malta e a Biblia a bla lerusii er a betok el beluu, engdi ngdirk klou a ultutelel a loruul a babier el mesaod er a moktek er a Dios e bo loldingel er tirke el chad el ngilai aika el Biblia. A lak, e tirke el chad a mo diak a klemedengei er tir el kirel a oketmeklel a Rengedel a Messias er a taem er kid.”
14 Sel osisiu el babier a dirrek el melekoi el kmo: “Sera rak er a 1920 . . . e a Rengalek er a Skuul er a Biblia a mlo medengelii a ulochel a Rubak el ngar er a Matteus 24:14. Seikid e te mlo medengei el kmo ‘tial evangkelio’ el mle kirel el oberk er a beluulechad el rokir el ocholt el mo er a rokui el renged, a dimlak el evangkelio er a renged el merekung e ngbai mle evangkelio er a Rengedel a Messias el King el mla mo mengedereder er a chutem.”
15. A berkel a klumech ngmilekerang e mlo klou er a 1920 el me er a chelechang?
15 Me sel kekerei el delebechel er a resioning er a 1920 a dimlak el di lemedechel el kekerei. Ngar er aike el uriul el rak, e sel “kloul seked” er a “ngodech el chermek el sib” a meldangch e mocha mechudel. (Chocholt 7:9; Johanes 10:16) Chelecha el taem, e te ngar er ngii a 6,613,950 el chad el omerk er a ungil el chais el ngar er a chelsel a 235 el beluu. Ngkol ua ngerang el mengasireng el otutel a ulaoch! Ma berkel “tial evangkelio ra rengedel a Dios” a dirkak a ta lemeketmokl el mo ua itiang, e dirrek el ketengel el mo uaisei el kmal imis el betok a ildisir a remesiungel a Dios.
16. Ngera el tekoi a mileketmokl er sel mlo merek el rak er a Society? (Momes er a chart el ngar er a page 13-16.)
16 Tia el klou el seked er a Resioning a dilak el oureor e mle mechesang er a 2005 el rak er a Society. A kuk betok er a billiol el sikang a lechiloit el omerk er a ungil el chais el ngar er a 235 el beluu. Te mirruul a betok el milliol el return visit e ulemuchel a betok el telael el omesubel a Biblia. Tia el ureor a lurruul er ngii a Resioning er a Jehovah, el tir a melenget a temir ma ike el ngar er ngii er tir me bo lsebechir el ouchais er a rechad el kirel a Tekingel a Dios. (Matteus 10:8) A Jehovah a melemolem el melisiich er a rechedal el okiu a chedaol el reng er ngii me bo lsebechir el kutmeklii tia el ureor.—Sekaria 4:6.
Te Blak a Rengrir el Omerk
17. Te mekerang a rechedal a Jehovah el oltirakl er a tekingel a Jesus el mo omerk er a ungil el chais?
17 Altang mla chuib a 2,000 el rak er a lollach a Jesus el mo omerk er tia el ungil el chais, engdi sel blakerreng er a rechedal a Dios a dirk ngar er ngii. Kede medengei el kmo a lsekum kede outekangel el meruul a ungil, e kid a mo olecholt aike el blekerdelel a Jehovah el ua bltikerreng ma klechubechub ma kllourreng. El ua ingii, ngchetid a lengemed a rechad e ngbai soad a lobult e lsemecheklii a deleongel er tir ma Jehovah. (2 Korinth 5:18-20; 2 Petrus 3:9) Misei a uchul ma Resioning er a Jehovah el oba chedaol el reng er a Dios a melemolem el blak a rengrir el omerk er tia el ungil el chais er a beluulechad el rokir. (Rom 12:11) Me nguaisei, e a rechad a kongei er a klemerang e oltirakl er a ulekrael er a Jehovah. Ka molatk a bebil er a okesiu.
18, 19. Ngera el experience a sebechem el ouchais el kirir a rebebil el kilengei er a ungil el chais?
18 A Charles a mle chad er a sers er a beluu er a Kenya. Sera 1998 e ngulelterau a kuk betok er a 18,000 el bond el dekool e ngiluu a certificate el ulemekedong er ngii el kmo Ngike el Kot el Meduch el Chad er a Sers er a Dekool. Seikid el taem e ngulemuchel el mesuub er a Biblia. Ngdi mle telkib el taem e ngmlo medengei el kmo a chad el melalem a dekool a diak loltirakl er a omellach er a Jesus el mo betik a rengud er a retonari er kid. (Matteus 22:39) Sera bo lodengei el kmo aike el dellemelel a bai omekoad er a rechad, e ngsilubs el mekoad. Ngtilbir a klengar er ngii e miltecholb e chelechang e ngta er a mui el taem el pioneer e dirrek el ministerial servant.
19 Ngulterekokl a rengud el kmo a Jehovah a melmesim er a rokui el renged el oeak tia el berkel a ungil el chais ma rechad a mocha oltirakl er ngii. (Hagai 2:7) A Pedro el kiei er a beluu er a Portugal, a mlo er a skuul el mesuub el mo badrei er a le 13 a rekil. A turrekong er ngii a mle soal el mo missionari e olsisechakl er a Biblia. Ngdi mle telkib el taem e ngtilobed er sel skuul e le ngmilsa el kmo aike el class er ngii a dimlak el ungil el mesaod er a Biblia. Elolem el rak er a uriul e ngmilsuub a psychology er a daingak er a Lisbon. Ngkiliei el obengkel a merrengel a delal, el ngii a mle ta er a Sioning er a Jehovah el millisiich er ngii el mo mesuub er a Biblia. Seikid el taem e nguluumededenger er a Dios e dimlak el lolatk el kmo ngsoal el mesuub a Biblia ma lechub e ngdiak. Me ngmilengedecheduch er a sensei er ngii el kirel tiang. Ngike el sensei a millekoi er ngii el kmo a ta er a llechul a psychology a kmo a chad el diak el sebechel el mo medengelii a rengul a sebechel el di ngii el mo tomellii. Seikid e a Pedro a millilt el mo mesuub er a Biblia. Me chelechang e ngdirk miltecholb e mesuub a Biblia el obengterir a rechad.
20. Ngera uchul me ngsebeched el dmeu a rengud er a klungel a berkel a ungil el chais?
20 Ngdiak dodengei el kmo ngmo ua klungel a ngerang tia el berkel a klumech ma ka dodengei el kmo ngoingera el sils ma sikang e a ullebongel a mei. Engdi kede medengei el kmo ngkmal kmedang. Ngdmeu a rengud e le berkel a ungil el chais a ta er a olechotel a kmo a taem a kmedang el kirel a Rengedel a Dios el mo omtechei er a kabelment er a rechad. (Daniel 2:44) Ma bek el rak, a rebetok el milliol a ngar er ngii a techellir el mo kongei er a ungil el chais, e tiang a mengebkall er a Jehovah el Dios er kid. Me bo leblak a rengud el oureor el obengterir a rudam er kid er a beluulechad el rokir el omerk er tia el ungil el chais el mo er a rokui el renged. A doruul el uaisei, e kede mo osobelid me tirke el orrenges er kid.—1 Timoteus 4:16.
Ke Dirk Melatk?
• Ngera uchul ma Matteus 24:14 a kmal mengasireng el ulaoch?
• Ngera el tekoi a lurruul er ngii a rekot el Kristiano er a urerir er a berkel a klumech, e ngera mlo rsel?
• Te milekerang a Rengalek er a Skuul er a Biblia e mlo medengelii a ultutelel a bo locholt el bedul a bek el renged?
• Sel molatk er a urerir a rechedal a Jehovah er tia el mlo merek el rak er a Society, e ngera el tekoi a mechas a rengum er ngii?
[Aike el Ker er a Suobel]
[Chart er a 13-16 el llel]
2005 SERVICE YEAR REPORT OF JEHOVAH’S WITNESSES WORLDWIDE
(Momes er a babier)
[Siasing er a 11 el llel]
A Paulus a mirrael el betok el telael el mael er a beluu ma daob el mo omerk er a ungil el chais
[Siasing er a 10 el llel]
A Jehovah a ulemekrael er a Petrus el mo ousioning er a Kornelius ma telungalek er ngii