Kau Ke Di Ua Kerrekar el Lagani Auna?
Kau Ke Di Ua Kerrekar el Lagani Auna?
NGAR er a beluu er a tkul a daob er a Port Moresby, er a Papua New Guinea, e a reteru el sioning a ngar er a omerolir el mo remei el mla er a odingel. Ngar er a omerolir, e te milsang a kmal klebokel el kerrekar. “Ngmera el klebokel el lagani auna!” ngdilu ngike el rubak. Ngmillekoi er ngike el kekerei el buik el kmo: “Sel ngakl a belkul a kmo ‘kerrekar er a bek el rak.’ Ngdiak el uai a bek el kerrekar, e le bek el rak e ngmo diak a llel el di ua lulekoad. Engdi, sel lemei a chull, e ngduubech, e omung, e tuobed sel mera el klebekellel.”
Ngsebeched el nguu a klubeled er a kerrekar el lagani auna, ma lechub e ng royal poinciana. A rebebil er tirke el chad er a dellomel a melekoi el kmo tia el kerrekar a uldimukl er aike el eim el kot el klebokel a bngal el kerrekar er a beluulechad el rokir. Malta e ngmo diak a bngal ma llel er a temel a kleald, engdi tia el kerrekar a di melemolem el ngar er ngii a ralm er ngii. A risel a kmal mesisiich e sebechel el duubech er a delongelel a bad er a chelsel a chutem. Tiai a uchul me ngdiak el beot el meuukel er a mesisiich el eolt. Ngsebechel el melemolem el dechor er a chelsel a meringel el blekeradel.
Kid me ngdirrek el sebeched el mo chelebangel a meringel el blekeradel el melasem er a klaumerang er kid. Ngera sebechel el ngosukid el mo outekangel? El di uai sel kerrekar el lagani auna, ngsebeched el melim e mengereomel er a ralm el ngii a Tekingel a Dios el meskid a klengar. Ngdirrek el kired el urrekodel er a ‘osebechekled,’ el Jehovah, ma cheldebechellel. (2 Samuel 22:3) Me nguaisei, a kerrekar el lagani auna a ungil el uleklatk el me er kid el kmo ngmo lmuut er a meringel el blekeradel, me kid a sebeched el melemolem el mesisiich el kirel a tekoi er a klereng a lsekum kede ousbech er sel techall el lomeskid a Jehovah. A dolemolem el meruul el uaisei, e kede mo “mediukes ra ikel telbiil” el ngii a tilib, el uldimukl er sel telbiil er a diak a ullebengelel el klengar.—Hebru 6:12; Chocholt 21:4.