Kid Kede Ousbech er a Messias?

KE LOCHA mo oker er tia el ker el kmo, “Kid kede ousbech er a Messias?” Chochoi, ngmelemalt a dolatk el kirel a Messias el kmo ngngar er ngii a lerellii el kirem, ma lechub e ngdiak.

A Biblia a meketeklii el kmo kede kmal ousbech er a Messias. A ta el chellimosk er a llecherir a Rechijudea er a kot el dart el rak a milluches el kirel a Messias el kmo: “Ele rokuil telbilel a Dios a di mlo Choi er ngii.” Me ngmileketeklii sel klou el deruchellel a Messias el mo otutii a moktek er a Ulemeob el mo omekngeltengat a rokui el renged er a chutem. (2 Korinth 1:20) A ngerechelel a Messias a kmal klou a ultutelel a uchul ma ulaoch er a Biblia a mesaod el kirel a demiel ma klengar er ngii. Engdi a demiel ngklou a ultutelel? Ngera uchul me ngkirem el melatk er tiang?

A belkul a “Messias” a kmo “Ngike el Ngellitel” e di osisiu a belkul ngii ma ngakl el dodengelii el “Kristus.” Ngii a mle kirel el mei e le ngmekngit el omerellir a rekot el obekel el Adam ma Eba a uchul. Te ulebeob el cherrungel e mla er ngii a techellir el mo kiei el diak a ullebengelel el ngar er a chelsel a Paradis, engdi te urridii ngii el techall. A omtok el anghel, el mlo Satan el Diabelong, a millekoi el kmo a Dios a kmal meringel a tekingel, e dirrek el dilu el kmo te sebechir el mo ungilbesrir a di ltir el melilt el kmo ngera ungil ma mekngit.​—Genesis 3:1-5.

Ma Eba a mlo oumerang er sel blulak. Ma dirrek el Adam a ngiluu a bechil el mo er a uchei er a blakerreng el bedul a Dios me ngmlo obengkel a Diabelong e omtok er a Dios. (Genesis 3:6; 1 Timoteus 2:14) El oeak a omerellir, e ngdimlak el di lurridii a techellir el mo kiei el diak a ullebengelel er a chelsel a paradis e lemerekong. Te dirrek el uliuid er a klengit ma kodall el mo er a rengelekir.​—Rom 5:12.

A Ulemeob er kid, el Jehovah, a di mle mereched el rullii a tekoi el mo sumecheklii sel mekngit el blekeradel el dilubech el ultok a uchul. Sera loukerrekeriil er a Diabelong, e a Jehovah a millekoi er sel kot el ulochel a Biblia el kmo: “E kau ma redil a mo kauketui, ma ruldidellel a rsechem ma ruldidellel a rsechel a redil a di mo blechoel el kaucherarou. E a uldidellel a rsechel a mo rukemii a bdelum e kau a mo mengchii a kotel ochil.” (Gen. 3:15) A ta el chellimosk er a Biblia a millekoi el kmo a Messias a ngike el bo lousbech er ngii a Dios el mo “melubet a rokui el mekngit el tekoi el klengit a uchul,” e mo uchul a klengeltengat el mo er a klechad.​—Hebru 2:14, 15.

Engdi, ke locha melechesuar el kmo a klechad er a chelechang a kmal diak el ngeltengat. Ngbai kmal dikea omeltkir. Misei a uchul, ma The World Book Encylopedia a dmu el kmo “betok el Chijudea a dirk mengiil er a ltel a Messias” e te melatk el kmo ngmo “sumechokl a cheleuid e mo kats er a recherrouir.” Engdi, a Biblia a melekoi el kmo a Messias a mla mei el ngii a Jesus. Ngsebeched el oumerang a tekoi el lolekoi a Biblia.