A Rechedam ma Rechedil​—Ngera el Klengar a Somiu el Kirir a Rengelekiu er a Ngar er a Mederir el Klebesei?

“A remekekerel chad ma re ekebil. . . Tir el rokui bo loldanges er a ngklel a [Jehovah el] RUBAK!”​—PSALM 148:12, 13.

1. A rechedam ma rechedil ngera te melatk el kirir a rengelekir?

 NGTECHA el chedam ma chedil a diak lolatk el kirel aike el mo duubech el mo er a rengelekir er a ngar er a mederir el klebesei? Sel taem el lemechell a ngalek, ma uchei er a lemechell, e a chedam ma chedil a melatk er aike el bo lousbech. Ngmo mesisiich a bedengel, e diak a rektel? A lorael el mo klou a ngalek, e ngar er ngii a lmuut el betok el tekoi el kirir el melatk er ngii. A mera er ngii, a chedam ma chedil a sorir a bo lungilbesul a rokui el tekoi er a klengar er a rengelekir.​—1 Samuel 1:11, 27, 28; Psalm 127:3-5.

2. Ngera uchul ma rechedam ma rechedil a sorir a bo lungil a klengar er a rengelekir sel bo lemeklou el chad?

² Engdi, chelecha el taem e a rechedam ma rechedil a chelebangel er a klou el omelsemai el kirir el omesterir aike el ousbech a rengelekir. A rebetok er tir a chillebangel a meringel el blekeradel, el ua mekemad ma mondai er a tekoi er a politiks ma mondai er a udoud ma telemellel a bedengir ma uldesuir ma lmuut el bebil. Me nguaisei, a rechedam ma rechedil a diak el sorir a rengelekir a bo lechelebangel aikaikid el tekoi. Ngar er aike el meteet el beluu, e a rechedam ma rechedil a omes er a rengelekir a resechelirir ma rechederir el ungil a urerir e oldeu a rengrir er a klengar er tir. Misei a uchul, e te omdasu el kmo ngkirir el meruul aike el sebechir ma rengelekir a bo lungil a klengar er tir sel bo lemeklou el chad.​—Olisechakl 3:13.

Melilt er a Ungil el Klengar

3. Ngera el omelilt a bla lerellii a Rekristiano?

³ A Rekristiano el oltirakl er a Jesus Kristus a mla tuib a klengar er tir el mo er a Jehovah. Te oltirakl er a tekingel a Jesus el kmo: “A le ngarngii a soal lokiuellek, e le chitii a klechad er ngii e le chelngii a kerus er ngii loltirakl er ngak ra bek el sils.” (Lukas 9:23; 14:27) Chochoi, ma Dekristiano  e ngkired el olecholt er a reng er a omelenget, me nguaisei engdi a klengar er a Kristiano a diak di leklengar er a ringel ma ongarm e lemerekong. Ngbai kmal ungil el klengar e le kede merous el mo er a rechad, el ua lullekoi a Jesus el kmo, “a dorous e ngbai ngeltengat ra dolai.”​—Rellir 20:35.

4. A Jesus ngmilengelechel er a redisciplo er ngii el mo oltirakl er a ngerang?

⁴ A rechad el kiliei er a temel a Jesus a kmal mle meringel a klengar er tir. E le ngmle kirir el oureor el mesiou er a delengcheklir, e dirrek el mle kirir el outekangel er a meringel el omengederederel a beluu er a Rom ma mesisiich el tekoi er a klechelid er sel taem. (Matteus 23:2-4) Me nguaisei engdi, te betok er tirke el ulerrenges er a Jesus a kilengei el chemoit a urerir e uleltirakl er ngii. (Matteus 4:18-22; 9:9; Kolose 4:14) Tia el omelilt er tirke el disciplo ngmlo uchul a mekngit el kirel a ngar er a mederir el klebesei? Ka molatk er a tekingel a Jesus el kmo: “Me ngikel mlo imikr a blil malechub ar ubekul, mar uchellel, mar uchedal, malechub ar udos, malechub a demal, malechub a delal, malechub ar ngalek, malechub a chutem, el ngklek a uchul, a mo ngma chachisois, e dirrek el mo mediukes ra diak a ullebengelel klengar.” (Matteus 19:29) A Jesus a millekoi er a ruleltirakl er ngii el kmo a Demerir er a eanged a medengei aike el ousbech. Me ngmilengelechel er tir el kmo: “Mo momuchel losiik ra rengedel a Dios ma llemeltel, ma ika le medchel el rokui lekor kemiu.”​—Matteus 6:31-33.

5. Ngua ngerang a uldesuir a rebebil er a rechedam ma rechedil el kirel a tekingel a Jesus el kmo a Dios a mo omekerreu er a remesiungel?

⁵ Ngdiak el ngodech er a blekeradel er a chelecha el sils. A Jehovah a medengei aike el dousbech, e tirke el osiik a tekoi er a Renged el mo kot er a chelsel a klengar er tir a ulterekokl a rengrir el kmo a Dios a mo omekerreu er tir, el tokubets el kirir tirke el ngar er a mui el taem el omesiou. (Malakai 3:6, 16; 1 Petrus 5:7) Engdi, a rebebil er a rechedam ma rechedil a diak el ulterekokl a rengrir el kirel tia el tekoi. Me nguaisei, e te bai sorir el mesterir a rengelekir el olengeriakl er a omesiungir el mo er a Jehovah, el mo soiseb er a mui el taem el omesiou. Engdi, ngoeak a osengir er a blekeradel er a keizai ma ureor er a beluulechad er a chelecha el taem, e te omdasu el kmo ngdirrek el klou a ultutelel el kirir a rengeasek el mo nguu a ungil el skulir me bo lsebechel el mo er ngii a ungilbesul el urerir. A choua itirka el chedam ma rechedil a omdasu el kmo a ungil el rolel a omesuub a belkul a kmo ngkirir el mo er a ngar er a bab el skuul.

Mengetmokl el Kirel a Ngar er a Mederir el Klebesei

6. Ngera belkul a tekoi el “ngar er a bab el skuul” el ngar er tia el suobel?

⁶ A rolel a skuul a kakerous a blekerdelel er a bek el beluu. El ua itiang, ngar er a beluu er a Merikel e a rengalek a mo er a public skuul el 12 el rak. E sel bo lemerek, e ngsebechir el melilt el mo er a ngar er a bab el skuul ma lechub e ngdaingak el kirel a eua el rak, me bo lsebechir el nguu a ngar er a bab el deruchall er a ureor er a osbitar ma llach ma lmuut el bebil er a ureor. A “ngar er a bab el skuul” el ngar er tia el suobel a melutk el mo er a rolel a omesuub el ngar er a university ma lechub a daingak. E dirrek el ngar er ngii aike el skuul er a ureor er a chim, el sebechir a rechad el di mereched el ngmai a babilengir er ngii.

7. Ngera el orimel a lechelebangel er ngii a rengalek er a high skuul?

⁷ Chelecha el taem e a high skuul a mengetmokl er a rengalek el kirel a ngar er a bab el skuul. Misei a uchul ma betok el high skuul a mesterir a rengalek aike el suobel el sebechel el ngosuterir el mo ungil a teng er tir me bo lsebechir el mo er a ngar er a bab el skuul e bai diak el omesterir aike el suobel el sebechel el kutmeklterir el kirel a ureor. A rengalek er a high skuul er a chelechang a morimel er a resensei ma recounselor ma rebebil er a rengalek er a skuul el mo soiseb er aike el kot el ungil el ngar er a bab el skuul, me bo lsebechir el ngmai babilengir el kirel a ungil el ureor.

8. Ngera el omelilt a lechelebangel er ngii a rechedam ma rechedil el Kristiano?

⁸ Ma leuaisei, ngerang a bo loruul er ngii a rechedam ma rechedil el Kristiano? Ngulterekokl el sorir a rengelekir a bo lungil er a skuul e lsuub aike el tekoi el mo ngosuterir me ldi tir el mesiou er a klengar er tir. (Osisechakl 22:29) Engdi ngungil a di lebechiteterir a rengelekir me lemechetakl er a reng er a klaiuechit el kirel a ungil  el klengar er tia el beluulechad? Ngera el turrekong a longetmokl el kirir a rengelekir, el okiu a tekingir ma omerellir? A rebebil er a rechedam ma rechedil a meringel el oureor el mengudel a ududir me bo lsebechir el oldurokl er a rengelekir el mo er a ngar er a bab el skuul. E a rekuk bebil a kongei el mo omals er tir el kirel tia el tekoi. Engdi, aika el omelilt a lmuut el klou er a di le tekoi er a udoud el ungiang. Ngua ngera klungel a cheral a ngar er a bab el omesuub er a chelecha el taem?​—Lukas 14:28-33.

A Cheral a Ngar er a Bab el Omesuub

9. Ngerang a sebeched el dmung el kirel a cheral a ngar er a bab el skuul er a chelecha el a sils?

⁹ Sel dolatk er a char el tekoi, e a omeltked a ulterekokl el di kirel a udoud. Ngar er a bebil er a beluu, e a kabelment a olengeseu er tirke el mo er a ngar er a bab el skuul me lsebechir el di ngar er a skuul e diak el omechar er a skulir. Engdi ngar er a betok el beluu, e a ngar er a bab el skuul a kmal meringel a cheral e di melemolem el merael el mo er a bab a cheral. A ta el babier a melekoi el kmo: “A rechad a ulemes er a ngar er a bab el skuul el ua luchul a betok el techall. E chelechang, e ngochotii a klekakerous er a delongelir a remeteet ma remechebuul.” Me tia belkul a kmo a ngar er a bab el skuul a di kirir a remeteet ma rengar er a bab a deruchellir el chad, el tir a olsiseb er a rengelekir er a choua ika el skuul me di leuaisei el ngar er a bab a klengar er tir er a chelecha el taem. Ma leuaisei, e ngungil er a rechedam ma rechedil el Kristiano a bo lolilt er a choua itia el turrekong el kirir a rengelekir?​—Filipi 3:7, 8; Jakobus 4:4.

10. Ngmekerang e a ngar er a bab el skuul a dmak el merael ngii me tia el blekeradel er a beluulechad?

¹⁰ Mo lmuut er aike el basio el diak el ocheraol a ngar er a bab el skuul er ngii, me ngdirrek el ngar er ngii a kuk bebil er a tekoi el kired el melatk er ngii. El ua itiang, a kuk ta er a babier a melekoi el kirel a ta er a beluu er a Asia el kmo a kabelment a “orrurt er a ta er a bedengel a skuul el oldubech er a remellomes a rengrir el mo er a ngar er a bab el skuul.” A “ngar er a bab el skuul” a melutk el mo er aike el ngar er a bab el skuul el ua Oxford ma Cambridge er a beluu er a England, ma Harvard ma Yale er a beluu er a Merikel, ma lmuut el bebil. Ngera uchul ma kabelment a oldubech a choua ika el tekoi? A ta er a omesuub a melekoi el kmo: “Me bo lsebechel el olengeseu er a keizai er a beluu.” A rolel a omesuub a diak el ocheraol, engdi a ngalek er a skuul a kirel el mo tongetengii a klengar er ngii el kirel tia el blekeradel er a beluulechad. Alta e a rechad a osiik er a choua itia el blekerdelel a klengar, engdi a Rekristiano el chedam ma rechedil ngsorir a choua itia el blekerdelel a klengar el kirir a rengelekir?​—Johanes 15:19; 1 Johanes 2:15-17.

11. A bebil er a chais ngouchais a ngerang el kirel a imis el omelim el rrom ma deleboes el omeruul er a delongelir tirke el ngar er a daingak?

¹¹ E dirrek el ngar er ngii a osisiu el blekeradel er a chelsel a skuul. Aike el university ma daingak a ngar er ngii a mekngit el chisir el ua omelai el mekngit el kar ma omelim el rrom ma deleboes el omeruul, ma lmuut el betok el tekoi. Ka me dosaod er a omelim el rrom. A babier el New Scientist a melekoi el kirel a imis el omelim el mo cheltelaol el kmo: “Ngbekord el 44 el basent er a rengalek er a skuul er a university er a beluu er a Merikel a melim el kmal mo cheltelaol el tang er a chelsel a bek el eru el sandei.” Tia el mondai a osisiu el kirir a rengeasek er a beluu er a Australia ma Britain ma Russia ma lmuut el betok el beluu. Sel dosaod er a tekoi er a deleboes, e a rengalek er a skuul a sorir el mo “dmak,” ma babier el Newsweek a mesaod er tia el tekoi el kmo “ngmesaod  er a ngii di el rolel a durs el obengkel a chad el di ta el taem e a uriul e ngdiak lolatk el lmuut el mo dmak ma lechub e le chadecheduch.” A ta er a omesuub a olecholt el kmo ngbekord el 60 el mo 80 el basent er a rengalek er a skuul a meruul aika el tekoi. A ta el redil a melekoi el kmo: “A lsekum ke ngalek er a skuul er a daingak e ngkirem el meruul aikakid el tekoi.”​—1 Korinth 5:11; 6:9,10,

12. A rengalek er a skuul er a daingak te chelebangel a ngera el orimel?

¹² El uldimukl er aike el mekngit el blekeradel er a skuul, e ngdirrek el ngar er ngii a orimel er a omesuub ma test. Ngmera el tekoi, a rengalek er a skuul a kirir el mesuub e meruul a urerir a lsekum ngsorir el ngmai a ungil el teng er tir. E ngar er ngii tirke el kirir el oureor e mo er a skuul er a osisiu el taem. A choua ika el tekoi a kmal ousbech er a klou el temir ma klisichir. Ma leuaisei, ngkuk mo ua ngerang a tekoi er a klereng er tir? Sel bo leklou a berraod, e ngera el tekoi a bo lechitii? A tekoi er a klereng ngmelemolem el kot er a klengar er tir ma lechub ngdiak? (Matteus 6:33) A Biblia a mengelechel er a Rekristiano el kmo: “Misei e bo le blak a rengmiu el kerekikl er chomerolliu, e lak bo blekerdelir ar diak le mellomes a rengrir, e bai bo blekerdelir ar mellomes a rengrir, e le blak a rengmiu lousbech a techall, e ngmekngit el taem er chelechang.” (Efesus 5:15, 16) Ngmekngit a rengud e le rebebil a mla choitii a klemerang e le te uluusbech a temir ma  klisichir el mo teloi er aike el mekngit el blekeradel sel lengar er a daingak!

13. A rechedam ma rechedil ngkirir el melatk a ngera el ker?

¹³ Chochoi, a deleboes el omeruul ma mekngit el blekeradel ma orimel a diak el di lengar er a skuul e lemerekong. Engdi, a rebetok el ngeasek er a beluulechad a omdasu el kmo aika el tekoi a tedebechel a tekoi er a omesuub me ngdiak a cheldechulel. Ma Rekristiano el chedam ma rechedil ngungil a lebechiteterir a rengelekir me bo lechelebangel a choua ika el blekeradel el kirel a euang ma lechub a lmuut el betok el rak? (Osisechakl 22:3; 2 Timoteus 2:22) Ngdi ungilbesul a bo lechebangel choua ika el kdekudel el tekoi, me bo luchul el sebechir el ngmai a klungiolir er a skuul? E a lmuut el klou a ultutelel a kmo, a rengeasek te mesuub a ngerang el kirel aike el tekoi el kirel el mo kot er a chelsel a klengar er tir? a (Filipi 1:10; 1 Thesalonika 5:21) Ngklou a ultutelel el kirir a rechedam ma rechedil a bo loluluuch e lolatk aika el ker, el mo lmuut er a kengaol el tekoi el sebechel el mo duubech er a uchei er a lekengei er a rengelekir el mo er a skuul er a kuk ta er a beluu.

Ngar er Ngii a Sebechel el Mtechir a Ngar er a Bab el Skuul?

14, 15. (a) A rechad a ngar er ngii a osengir el kirel a ngar er a bab el skuul, engdi ngera el omellach er a Biblia a doltirakl er ngii er a chelechang? (b) A rengeasek ngsebechir el di tir el oker a ngera el ker?

¹⁴ Chelecha el taem, e a rechad a melatk el kmo a ngar er a bab el skuul a di ta el rolel e a rengeasek a sebechir el mo nguu a ungil el klengar. Engdi, a Rekristiano a diak loltirakl er a osengir a rechad, e le te bai oltirakl er a omellach er a Biblia el kmo: “E lako bo blekerdelel tial belulechad, e bai mngedechedmiu loeak a ukbechesul a reng er kemiu, e bo msal medengei el kmo ngngera soal a Dios, me ngngera ungil lodeuir a rengul a Dios.” (Rom 12:2) Ngerang a soal a Dios el kirir a rechedal er a chelecha el taem er a ullebengelel aika el uriul el sils? A Paulus a milengelechel er a Timoteus el kmo: “E ngdi kau bo mulserechakl ra ngiidil tekoi, e moutekangel ra ringel, e moruul a urerel chomerk ra evangkelio, el churrengelii chomesiungem.” Aika el tekoi a mera el melutk el me er kid el rokui er a chelecha el taem.​—2 Timoteus 4:5.

¹⁵ Kid el rokui a kired el mo ‘ulserechakl’ el kirel a delecherud er a klereng, er a bai de bo demechesang er a ngibes er a kerruul er tia el beluulechad. A lsekum e ke ngeasek, e di lekau el oker er kau el kmo: “ngak ak meruul er a tkurrebab el sebechek el ‘meruul a urerek el chomerk ra evangkelio,’ me bo lsebechek el mo rredemelel a mesiou el omerk er a klumech? Ngera uldesuek el mo ‘churrengelii’ a omesiungek? Ngak ak melatk el mo nguu a mui el taem el omesiou el mo urerek?” Aika kmal meringel el ker, tokubets el sel momes er a rebebil el ngeasek el oltirakl er a ngelbesel a rengrir, el ‘osiik a ngarbab el tekoi’ e le tir el omdasu el kmo ngmo uchul a ungil el klengar er a ngar er a mederir el klebesei. (Jeremia 45:5) Ma leuaisei, e a Rekristiano el chedam ma rechedil a kirir el mesterir a rengelekir a ungil el ulekerreu ma osisechakl er a klereng el omuchel er sel ledirk tolechoi.​—Osisechakl 22:6; Olisechakl 12:1; 2 Timoteus 3:14, 15.

16. Ngmekerang e a Rekristiano el chedam ma rechedil a sebechir el mesterir a rengelekir a ungil el ulekerreu er a klereng?

¹⁶ A buik el ngar er ngii a reteru el ochellel, el delal a mesiou el mui el taem, a dmu el kmo: “A delak a kmal mle kerekikl er a klausechelei er kemam. Ngdimlak ki mobengterir a rengalek er a skuul, aki bai ulebengterir tirke el mla er a chelsel a ongdibel el mle ungil a blekerdelir. Ngdirrek el milengemedaol er a rengar er a mui el taem el omesiou el me er a blimam, el ua remissonari ma remerael el oldingel el overseer ma rechoureor er a Bethel, ma repioneer. Aike el experience er tir ma deuil a rengrir a ngilsukemam el mo melatk el kirel a mui el taem el omesiou.” Ngkmal dmeu a rengud e le ngii ma ruchellel a teloi er a mui el taem el omesiou, el ta er tir a ngar er a Bethel, e ngike el tang a mlo er a Ministerial Training Skuul, ma tang a pioneer!

17. A rechedam ma rechedil ngsebechir el mesterir a rengelekir a ngera el ulekrael el kirel a omelilt el suobel er a skuul ma turrekong er a urreor? (Momes er a baks er a 15 el llel.)

¹⁷ A rechedam ma rechedil a dirrek el kirir el  omesterir a rengelekir a ungil el ulekrael er a omelilt er tir er a suobel er a skuul ma ureor el bo loureor er ngii. A kuk ta er a ngeasek el ngar er a Bethel a dilu el kmo: “A demak ma delak a mle pioneer er a uchei ma uriul er a bo lebechiil e mlo er a tkurrebab el sebechir el meskemam a uaisei el reng er a klepioneer. Sel ki molilt a suobel er a skuul ma ngii di rolel a omelilt el ngar er ngii a lerellii er a ngar er a medemam el klebesei, e te mle blechoel el melisiich er kemam el mo ngiltii sel tekoi el meskemam a techall el mo oureor el part-time e mo pioneer.” A rechedam ma rechedil ma rengalek a kirir el melatk er a suobel er a skuul el sebechel el ngosuterir er a mui el taem el omesiou er a bai lolilt a suobel el mo kirel a ngar er a bab el skuul. b

18. Ngera el techall er a ureor a ungil el lolatk er ngii a rengeasek?

¹⁸ A ta er a omesuub a olecholt el kmo ngar er a betok el beluu e te kmal ousbech er a rechad el meruul a ureor er a chim, er a bai rechad el tuobed er a ngar er a bab el skuul. A ta er a babier a ouchais el kmo “a 70 el basent er a rechad er a ureor er aike el merael el mei el rak a mo diak lousbech a babilengir er a ngar er a bab el skuul, te bai mo ousbech a babilengir el lengilai er aike el skuul er a ureor er a chim.” A choua ika el skuul a mesterir a rechad a telkib el klemedengei er a ureor er a obis ma omengituuk el mlai ma computer ma chad er a baeb ma chad er a omengimd ma lmuut el bebil er a ureor. Aika ngungil el ureor? Chochoi! Ma ika el ureor altang diak el sorir a rechad el meruul, engdi a chad a ngar er ngii a techellel el melilt el kmo ngmo oureor ma lechub e ngolengull er a oingerang, el ileakl el kirir tirke el chad el moktek er tir a mesiou er a Jehovah.​—2 Thesalonika 3:8.

19. Ngera el tekoi a ulterekokl el mo meskid a klengar el mui er a deurreng ma budech?

¹⁹ A Biblia a dmu el kmo: “A remekekerel chad ma re ekebil, ma re mechuodel chad e dirrek a rengalek! Tir el rokui bo loldanges er a ngklel a [Jehovah el] RUBAK! A ngklel a kuk chetengakl er a ikel rokui el ngodech el ngakl; a klebkellel a ngar bab er a chutem ma eanged!” (Psalm 148:12, 13) Aike el deruchall ma klungiaol el lebeskid a beluulechad a diak el sebeched el omekesiu er ngii er a ureor er a mui el taem el omesiou el mo er a Jehovah, el ngii a ulterekokl el mo meskid a klengar el mui er a deurreng ma budech. Lak mobes! A Biblia a kmo: “Ng klengeltengat er a [Jehovah el] RUBAK a rullau el mo merau, el diak le meringel el ureor.”​—Osisechakl 10:22.

[Footnote]

Ngsebechem el Mesaod?

• A Rekristiano te ultuil er a ngerang el kirel a ungil el klengar er a ngar er a mederir el klebesei?

• Ngera el omelsemai a lechelebangel er ngii a rechedam ma rechedil el kirir a rengelekir er a ngar er a mederir el klebesei?

• Ngerang a klungiolel ma telemellel a ngar er a bab el skuul?

• Ngmekerang e a rechedam ma rechedil a sebechir el olengeseu er a rengelekir el melatk er a omesiou el mo er a Jehovah?

[Aike el Ker er a Suobel]

[Baks er a 15 el llel]

Ngua Ngera Klungel a Ultutelel a Ngar er a Bab el Skuul?

A rebetok el chad el mo er a ngar er a bab el skuul a melatk el mo ngma babilengir me bo luchul a ungil e klou a udoud er ngii el ureor. Engdi, a omesuub er a kabelment a olecholt el kmo a redi 25 el basent er tirke el mo er a ngar er a bab el skuul a ngma babilengir er a chelsel a elolem el rak. Me sel lengai a babilengir, e tiang belkul a kmo ngmo ungil a urrerir? Ka momes a bebil er a omesuub ma omesodel.

“A obo er a ngar er bab el skuul, el ua Harvard ma Duke, e ngdiak el bo luchul a ungil e klou a udoud er ngii el ureor . . . Aike el kombalii a diak lodengelterir tirke el rengeasek el tir a osiik a ureor. Ngkmal kesiokel a babier er a ngar er a bab el skuul. Me nguaisei, engdi uriul er isei, e aike el sebechel a chad el remuul ma diak a ngar er ngii a ultutelel.”​—Newsweek, er a November 1, 1999.

“A ureor er a chelechang altang ousbech er a klou el dechal a chad el kuk ngar er a bab er aike el duch er a ngar er a mong . . . , e aike el usbechall el tekoi a mengai er a suobel er a high school, el ua ike el tekoi er a ochur ma omenguiu ma omeluches . . . el diak el ike el omesuub el mengai er a daingak. . . . A rengalek er a skuul a diak a belkul a lebo er a daingak me bo lungil a urerir, ngbai ngkmal kirir el mo meduch a rengrir er aike el losuub er a high school.”​—American Educator, Spring 2004.

“A betok el daingak a diak longetmokl er a rengalek er a skuul el kirel a klengar er tir er a uriul. Aike el skuul er a ureor er a chim . . . a mla mo merael a chisel. A ildisir tirke el mlo soiseb er aika el skuul a ngilasech er a 48 el basent er sera 1996 el mo er a 2000. . . . Ma daingak el meringel a cheral e ousbech er a klou el taem me bo lenguu a babilengel a mla mo diak a belkul.”​—Time, January 24, 2005.

“A omesuub er a U.S. Department of Labor er a rak er a 2005 a olecholt el kmo a tang er a delongelir a retedei el chad el tilobed er a ngar er a bab el skuul a diak lsebechir el metik a ureor el rodemii a babilengir.”​—The Futurist, July/August 2000.

Maike el rokui el tekoi a uchul, e a rebetok el sensei a mla mo oumededenger er a ultutelel a ngar er bab el skuul. A babier el Futurist a melekoi el kmo: “Kid a diak dongetmokl er a rechad el kirel a ungil el klengar er a ngar er a mederir el klebesei.” Engdi, ka molatk er a tekingel a Dios el ngar er a Biblia el kmo: “Ngak a [Jehovah el] RUBAK el Dios el olsisechakl er kemiu el mo ungilbesmiu, ak ngikel omekrael er kemiu er sel rael el kiriu el okiungii. Ulekum me kom rirenges a tekingek! Seikid e a budech er kemiu a omaoch el ua omoachel ma llemeltiu a ua chedesaoch er a daob.”​—Isaia 48:17, 18.

[Siasing er a 12 el llel]

Te chiloit a urerir e mlo oltirakl er a Jesus

[Siasing er a 17 el llel]

A Rekristiano el chedam ma rechedil a kirir el mesterir a rengelekir a ungil el ulekerreu er a klereng sel ledirk tolechoi