Kau Ke “Merau el Bedul a Dios”?

A TA er a okesiu el ouchais er ngii a Jesus Kristus a kirel a merau el chad el betok a chetemel. E le ngmle soal a bo lungilbesul a klengar er ngii er a ngar er a medal el klebesei, me ngmillatk el mo menglou aike el soko er ngii. Engdi, ngar er a okesiu er a Jesus, e ngika el chad a okedongall el kmo ‘cheldeng a rengul’ el chad. (Lukas 12:16-21) A betok el oidel a Biblia a dirrek el ousbech er a tekoi el kmo “kebelung.” Ngera me ngousbech er a kmal mesisiich el tekoi?

Ngbleketakl el kmo, ngika el merau el chad a dimlak lolatk er a Dios er a loruul aike el lolatk el tekoi. Ngdirrek el dimlak el loureng a sulel a Dios el kirel a kekuii el chetemel. (Matteus 5:45) E bai uluumead el kmo: “Kaul renguk, kau a betok a kelem el ulatek el kirel a kemanget el rak; ka bong, bo le kie rengum, e mongang, e molim, e moldeu ra rengum.” Ochoi, ngulemdasu el kmo a rdechel a urerel a mo uai a “mesisiich el cheuatel.”​—Osisechakl 18:11.

Ngike el disciplo el Jakobus a milluches el omeklatk el kirel a kldidairreng el kmo: “Ka morrenges, kemiu el dmu el kmo, ‘Chelecha el sils malechub e ngklukuk e a ki mora ngerrach el beluu, e kiei er isei el tal rak el omsasou el mengereker’; kemiu a diak modengelii a tikingel a klukuk. Ngera klengar er kemiu? Kemiu a ua chetechat el duum el di tedeb e nguemed.”​—Jakobus 4:13, 14.

Aike el tekoi a mlo klemerang, e le ngike el chad er a okesiu er a Jesus a ledilu er ngii el kmo: “Kau el cheldeng a rengum! A reng er kau a mo mengai er kau er chelechal kesus; a ikel mkildmokl ngmo kloklel techang?” El di ua chetechat el duum el di tedeb e nguemed, ngike el chad a mo mad er a uchei er a leues aike el lomdasu er ngii el mutaut. E kid kede mtebengii a suobel? A Jesus a millekoi el kmo: “Me ngikel mengudel a daisang el di kirel, e diak bo le merau el bedul a Dios a uaisei.” Kau ke “merau el bedul a Dios”?