Ngklou a Ultutelel el Bo Domtab a Belkul a Olangch!

“A kot e a kulemdasu el kmo a ngelekam el Andreas a di mle meringel a bdelul. Engdi ngmlo chetil el omengur e kmal mlo mekeald. Ngsilebek a renguk e le ngliluut el kmal mo meringel a bdelul. Ma le merema lrei a bechik, e aki ngiluu el mo er a toktang. Me ngmilsang e dilung me bo leniuing er a osbitar. A rektel a kuk mle klou er a di rengelel a bdelul. A Andreas a silecher er a meningitis. Me ngmlo er a ukeruul e di mle mereched el mo ungil.”​—a Gertrud, el chedil er a beluu er a Dois.

A CHOUA itia el blekeradel el blo lecheremii a Gertrud a lodengelii a rebetok el chedam ma rechedil. Te mes a betok el olangch el olecholt el kmo a ngelekir a mla mo smecher. Maltang diak el rokui el secher a kdekudel, engdi a rechedam ma rechedil a kmal diak el sebechir el di mengemikr er a olangch el ochotii el kmo a rengelekir a socherang. A bo lomtab aike el olangch e lemereched el ngoititerir el mo er a ukeruul e ngsebechel el okebir a kdekudel el secher. Tiang a kmal klou a ultutelel el tekoi.

Tia dirrek el klemerang er a bebil er a tekoi el diak el di el ulekerreuil a bedenged e lemerekong. A ta er a ungil el okesiu el kirel tiang a sel tsunami el dilubech er a beluu er a India er sera December 2004. A betok el cheldebechel er a kabelment er a beluu er a Australia ma Hawaii a milsa sel klou el desiu el dilubech er a beluu er a Sumatra e mlo melechesuar a klungel a telemellel. Engdi, ngdimlak a techellir er a rechad el ngar er aike el metemellung el basio el mo nguu a uleklatk ma lechub e bo loltirakl er ngii. Me sei a uchul, e a kuk betok er a 220,000 el chad a uriid a klengar er tir.

A Olangch el Lmuut el Klou a Ultutelel

Sera lengar er tia el chutem a Jesus, e ngmilsterir a rulebengkel a suobel el kirel a olangch me bo lomtab e loltirakl. Ngmilsaod el kirel a lmuut el klou a ultutelel el tekoi. A Biblia a ouchais el kmo: “E ar Farisee mar Saddusee a mocha kmeed el mengarm ra Jesus, me tullengit er ngii me lochotii er tir cholangch el mlara eanged. Me ngulenger er tir el kmo, ‘Sel le kebesengei e kom kmo, “A eanged a bekerekard; me ngmo ungil.” Me sel le tutau e kom kmo, “Ngkebodel a eanged e bekerekard, ngmo meses a eolt er chelechang.” Ko medengelii a kutukel a blekeradel ra eanged, e diak el sebechiu el kutukel cholangch ra taem.’ ”​—Matteus 16:​1-3.

 Sera lolekoi el kirel a “cholangch ra taem,” e a Jesus a millekoi el kirir a Rechijudea er a kot el dart el rak el kmo te mle kirir el mo kerekikl e le ngmla mo kosekodel a taem el lekiei er ngii. A mekngit el blekeradel er a Rechijudea a di kmedung el mo chemau a klou el tellemall. A sesei el klebesei er a uchei er a kodellel, e a Jesus a millekoi er a redisciplo er ngii el kirel a kuk ta er a olangch​—a olangch er a demiel. A tekoi el ledilu er seikid el taem a klou a ultutelel el mo er a rokui el chad er a chelecha el taem.