A Ulochel a Hosea a Ngosukid el Mo Merael el Obengkel a Dios

“Te mo oltirakl er a RUBAK [el Jehovah].”​—HOSEA 11:10.

1. Ngera el okesiu el sibai a debetik er ngii er a babier er a Hosea?

 KAU ngdmeu a rengum el omes a sibai el ngar er ngii a rekmal meduch el ousekool? Ma babier er a Hosea el ngar er a Biblia a ngar er ngii a okesiu el sibai er a chelsel. a Tia el sibai a mesaod el kirel a telungalek er a profet er a Dios el Hosea, e tiang a ngar er ngii a deleongel er ngii me sel okesiu el chebechiil er a delongelel a Jehovah ma Israel er a irechar el oeak a Llach er a Moses.

2. Ngera kede medengei el kirel a Hosea?

² A uchetemel tia el sibai a debetik er ngii er a kot el klou el bliongel er a Hosea. Ngbleketakl el kmo a Hosea a kilie er sel kerrengsel aike el teruich el klebliil er a Israel (el mle okedongall el Efraim el kmal mesisiich el kebliil). Ngulemlaoch er a chelsel aike el temir tirke el mlo uriul el teuid el king er a Israel ma rua Usia ma Jotham ma Ahas ma Hesekia el mle king er a Juda. (Hosea 1:1) Ma Hosea a ulemlaoch el bekord el 59 el rak. Ma lta e a babier el ousbech er a ngklel a mileketmokl er a telkib er uriul er a 745 B.C.E, engdi ngdirk klou a ultutelel er a chelecha el taem, e le a rebetok el milliol el chad a oltirakl er sel tekoi el meldung el kmo: “Te mo oltirakl er a RUBAK [el Jehovah].”​—Hosea 11:10.

Ma Omesodel Ngolecholt a Ngerang

3, 4. Ka di mtelkib el mesaod el kmo ngerang melekoi er ngii a Hosea er a 1 el mo er a 5 el bliongel.

³ Ma telkib el omesodel a 1 el mo er a 5 el bliongel er a Hosea a sebechel el melisiich er kid sel dorael el obengkel a Dios el oba klaumerang el oltirakl er aike el soal. Malta e a rechad er a renged er a Israel a mlo er a klengit el mengull a bleob el chelid, engdi a Dios a mo ousubes er tir a lsekum e te mo obult er aike el mekngit el blekerdelir. Tiang a mocholt el oeak sel rolel a Hosea a losmechokl er a bechil, el Gomer. A uriul er a lebechellii a kot el ngelekir, e ngmlo er ngii a reteru el ngelekel er a rael. Engdi a Hosea a liluut el nguu, el di ua Jehovah el kmal kilengei el mo olecholt a klechubechub el mo er tirke el ulebult el ngalek er a Israel.​—Hosea 1:1–3:5.

⁴ A Jehovah a mla er ngii a ultuteklel el bedul a Israel e le ngdimlak a klemerang ma blekokuii el bltikerreng ma klemedengei er a Dios er sel beluu. Ngmillemolem el urrekodel er sel ultuteklel el bedul a Israel el mlo er klengit el mengull a bleob el chelid ma medecherecher a rengul el renged er a Juda. Me nguaisei, a lsekum a rechedal a Dios a mo “ngar a chelsel a ringelir” e te mo osiik er a Jehovah.​—Hosea 4:1–5:15.

A Sibai a Mla Obeketakl

5, 6. (a) Ngmle ua ngera klungel a laokreng er a chelsel aike el teruich el klebliil er a renged er a Israel? (b) Ngera uchul me sel uleklatk el mlo er a Israel er a ngar er a mong a klou a ultutelel el kired?

⁵ A Dios a milellach er a Hosea el kmo: “A re chad er tial beluu a diak le blak a rengrir er ngak e mengull el meluluuch a ngodech el chelid. Isei e bong e bo bechil a tar a redil el mo mengoit er kau; e le bor ngii a re ngelekem er ngii.” (Hosea 1:2) Ngmle ua ngera klungel a laokreng er a beluu er a Israel? Kede menguiu el kmo: “Te mla choitak; te mla odersterir el mor a ngodech el chelid, el ua tal redil el mocha oteruul redil. . . . Itia ia  uchul ma re ngelekiu el redil a oteruul redil, ma re buchelsechal er kemiu a ngar a laokreng. . . . ele kemiu me kom dirrek el touchakl el obengterir a ruteruul redil er a templo, e dmak kemiu me tir el oldars a tenget el mor a diak el meral chelid.”​—Hosea 4:12-14.

⁶ A laokreng a kuk mle klou er a tekoi er a klereng ma dirrek el klechad er a chelsel a beluu er a Israel. Ma leuaisei, e a Jehovah a mo “omals” er a rechad er a Israel. (Hosea 1:4; 4:9) Tia el uleklatk a ngar er ngii a belkul el kired, e le Jehovah a mo omals er tirke el ngar er a deleboes el omeruul e dirrek el ngar er a diak leklikiid el omengull er a chelecha el sils. Engdi tirke el melemolem el merael el obengkel a Dios e mo oltirakl er sel klikiid el omengull a dirrek el medengei el kmo “ngdiak a ngara deleboes . . . el mediukes ra rengedel a Kristus ma Dios.”​—Efesus 5:5; Jakobus 1:27.

7. Ngera el tekoi a omtechei er a chebechiielel a Hosea ma Gomer?

⁷ A Hosea er sera bo lebechil a Gomer, e ngii el dil a mle klikiid e mle blak a rengul el bedul a bechil er sera le “mechellii a ngelekel sechal.” (Hosea 1:3) El di ua mlocholt er sel okesiu el sibai, e a telkib er a uriul er a lolsobel er a rechad er a Israel er a klsibai er a Egipten er sera 1513 B.C.E., e a Dios a dirrek el mirruul er a telbiil el obengterir el ua okul a klikiid el chebechiil. Me ngoeak a kengei el kirel sel telbiil, e a Israel a tilbir el mo blak a rengul el kirel ngike el “bechiil sechal,” el Jehovah. (Isaia 54:5) Me tia el okesiu el chebechiielel a Israel ma Dios a desang er sel klikiid el chebechiielel a Hosea ma Gomer. Engdi ngmera el mlengodech a tekoi!

8. Ngmlekera e mlo er ngii aike el teruich el klebliil er a Israel, e ngera sebeched el dmung el kirel a omengull er ngii?

⁸ A bechil a Hosea “a liluut el mo dioll me ng mlo er ngii a ngelekel redil.” Ma ngii el ngalek el redil ma ngike el ongingil a ulterekokl el mle ngelekel a Gomer el oeak a laokreng. (Hosea 1:6, 8) Ma Gomer el ulemtechei er a Israel a uchul, e ke ulterekokl el mo oker el kmo, ‘Me ngmekera e a Israel a mlo uai a oteruul el dil? Sera 997 B.C.E, e aike el teruich el klebliil er a Israel a mlo ileakl er aike el klebliil er a Juda ma Benjamin el ngar er a dimes. A omengull el ngelekel a kerebou a milteketek er a diluches er a delongelel aike el teruich el klebliil er a Israel me bo lak lebo er a Juda a rechad el mo mengull er a Jehovah el ngar er a templo er a Jerusalem. Ma rechad er a Israel a mlo oba omengull el mo er a klsuul el chelid el Baal ma ike el mengelengalek el deleboes el omeruul el lurruul.

9. El ua meldung el ngar er a Hosea 1:6, e ngera dilubech el mo er a Israel?

⁹ Sel ongeru el cherellel a Gomer er ngike el ngalek er a rael, e a Dios a mellekoi er a Hosea el kmo: “Mungeklii el ‘Diak-le-chebur’, ele uchul e ng dikea bo kchebur ma lechub e kuusubes a kngterir a re chad er a Israel.” (Hosea 1:6) Ma Jehovah ‘olsobel er tir’ er sel taem e a rechad er a Asiria a mo ngoititerir a rechad er a Israel el mo blebaol er a rak er a 740 B.C.E. Me nguaisei, engdi a Dios a ulechotii a klechubechub el mo er aike el eru el kebliil er a Juda e ulelsobel er tir el diak lokiu a mekemad ma saider ma uos ma lechub e te chad el ngar er a uos. (Hosea 1:7) Ngdi mle chelsel a ta el kesus er a rak er a 732 B.C.E., e a ta el anghel a milekodeterir a 185,000 el soldau er a Asiria el tir a ulemtok er sel klou el mats er a Jerusalem, er a beluu er a Juda.​—2 King 19:35.

A Ultuteklel a Jehovah el Bedul a Israel

10. Ngera ngolecholt er ngii sel rebetel a Gomer er a laokreng?

¹⁰ Ma Gomer a chilitii a Hosea me ngmlo ‘ngar a laokreng’ el obengkel a ta er a chad. Me tiang a olecholt el kmo ngmlekerang a renged er a Israel e mlo mekur a deleongel er ngii ma ike el renged el  mengull a bleob el chelid e mlo omuchel el ultuil er tir. Me nguaisei, e a Israel a dimlak loba omereng el saul el kirel aike el klengeltengat el mla er a Jehovah el mei, e bai uluureng a sulel a chelid er aike el renged me ngmlo tomellii sel telbilel er a chebechiil el obengkel a Dios e mlo mengull a klsuul el klechelid. Sei a uchul me ngmla er ngii a ultuteklel a Jehovah el bedul a Israel el mlo er a klengit el mengull a bleob el chelid!​—Hosea 1:2; 2:2, 12, 13.

11. Ngera dilubech el mo er sel Llach er a telbiil er sel taem el Jehovah a milecherei a Juda ma Israel me ngmlo blebaol?

¹¹ Ngera el blals a blo lechelebangel er ngii a rechad er a Israel e le tir el chilitii a Dios? A Dios a milechititerir “el mor a ked” er a Babilon, isel renged el mlo mesisiich er a Asiria, el ble leblebaol er ngii a Rengalek er a Israel er sera 740 B.C.E. (Hosea 2:14) Ma lta e a Jehovah a ulekngemed aike el renged er a teruich el klebliil, engdi dirk millemolem el urrekodel er sel chebechiielel el obengkel ngii el klebliil er a renged er a Israel. Me ngii el Dios a milecherei a Jerusalem me lemetemall er a rechad er a Babilon er sera 607 B.C.E e dirrek el milechititerir a rechad er a Juda me te mlo blebaol, engdi ngdimlak letemellii sel telbiil el oeak a Llach er a Moses el kirel aike el teruich ma eru el klebliil el mlo soiseb er a okesiu el chebechiil el obengkel. Engdi tia el deleuill a mlo nguemed er a uriul er tirke el mengeteklir a rechad er a Juda er a lotngeklii a Jesus Kristus e lokodir er sera 33 C.E.​—Kolose 2:14.

A Jehovah a Mengelechel er a Israel

12, 13. Ngera el tekoi a medung el ngar er a Hosea 2:6-8, e mekera ngii el tekoi a melutk el mo er a Israel?

¹² A Dios a mengelechel er a Israel me “le merekol ngar a laokreng,” engdi ngii a mle soal el oltoir er tirke el songel. (Hosea 2:2, 5) Ma Jehovah a dilu el kmo: “Isei e ak mo sorsii er a beritechetoched el kerrekar. Ak mo toketekii a cheuatel el meliuekl er ngii, me ng mo diak el sebechel el tuobed. Ng mo remurt loltirakl er a re songel, e ngdi mo diak el sebechel mor tir. Ng mo osiik er tir, e ngdi diak le betik er tir. Isei e ng mo dmu el kmo, ‘Ak bai lmuut el mor a kot el bechik, ng bai kuk mle ungilbesuk er chelechang. ’ Ng dimlak bo lodengei el kmo ngak ngikel milsa redechel a wheat ma bilong ma cheluchul a olib. Ak dirrek el milsa betok el silber ma kolt, el ikel ngii a uluusbech er omesiou er a Baal.”​—Hosea 2:6-8.

¹³ Malta e a Israel a ulsiik a ngesou er aike el renged el tir a mle ‘songel,’ engdi ngdimlak a ta er tir el ngosuir. Ngmle ua leserresoll er a beritechetoched el kerrekar, me ngdimlak el sebechir el olengeseu er ngii. Uriul er a edei el rak el liliuekl er a beluu a urrurt er a Asiria, e a Samaria el klou el mats a miltemall er a 740 B.C.E., e seikid e aike el teruich el klebliil a ngilemed. Te di mle mekesai er a delongelir a reblebaol el chad er a Israel a mlo melechesuar a klungiaol e le tir el milsiou er a Jehovah el uleltirakl er a redemerir er a irechar. Tirka el di mekesai el chad a ultngeklii a omengull el mo er a Baal e liluut el mo osiik er a telbiil el obengkel a Jehovah.

A Ta er a Osenged er a Sibai

14. Ngmlekerang a Hosea e liluut el mo obengkel a bechil er a Gomer?

¹⁴ Ngsebeched el mo medengelii sel rael el omekesiu er a chebechiielel a Hosea el mo er sel delongelel a Israel ma Jehovah, sel dolatk aika el tekoi el kmo: “A RUBAK a liluut el mengedecheduch er ngak. Ng dilu el kmo, ‘Bong e bo le betik a rengum er a tar a redil el mla mor ngii a songel  e ngar a laokreng.’ ” (Hosea 3:1) Ma Hosea a mlo omechar er a Gomer e ngiluu er ngike el chad el ledilak el kiei e le nguleltirakl er tia el omellach. Ma uriul, e a Hosea a milengelechel er a bechil el kmo: “Ng mo kiei el obengkek el meketeket e diak bo loteruul el redil. Ng diak bo lobengkel a ngodech el chad.” (Hosea 3:2, 3) A Gomer a kilengei er sel omellach, ma Hosea a liluut el mo obengkel. Tiang mlekerang e mutaut er aike el omerellel a Dios el obengterir a rechad er a Israel ma Juda?

15, 16. (a) Ngoeak a ngera el blekeradel e a renged a sebechel el nguu a klechubechub er a Dios? (b) Ngmilekera e motaut a Hosea 2:18?

¹⁵ A Israel ma Juda er sera leblebaol er a Babilon, e a Dios a uluusbech er a reprofet er ngii el “lmuut el oltii a rengul.” Me bo lsebechir el ngma klechubechub er a Dios, e a rechedal a kirir el mo ouuchel a rengrir e obult el lmuut el mo er a Jehovah, el di ua Gomer el liluut el mo er a bechil. E seikid e a Jehovah a mo otebedii ngika el bechil el renged er a “ked” er a Babilon e olutii el mo er a Juda ma Jerusalem. (Hosea 2:14, 15) Nguleltaut er sel telbiil er a 537 B.C.E.

¹⁶ A Dios a dirrek el uleltaut er tiaikid el telbiil: “Ak mo rullii a telbilek el mor a rokui el tebelik el charm ma suebek el charm, me ng diak bo lolemall er a re chedak. Ak mo ngmai a rokui el klekedall er a mekemad er a beluu, ng rokuil saider ma balech, ma re chedak a mo kiei el ngar a budech e ungil selebechakl.” (Hosea 2:18) Tirke el mle medechel el chad er a Judea el liluut el mo remei er a belurir a kiliei el selebechakl, el dimlak lemedakt er a ngii di ltebelik el charm. Tia el ulaoch a dirrek el mla er ngii a otutel er a 1919 C.E., el mo er a rengellitel el Israel er a klereng, er sera bo lemimokl er a “kloul Babilon,” el renged er a klsuul el klechelid er a beluulechad el rokir. Me chelechang e te kiei el selebechakl e dmeu a rengrir er a paradis er a klereng el obengterir a resechelirir, el tir a melatk el mo kiei er a chutem el mo cherechar. E diak a terached er a klechad el deues er a delongelir a remera el Kristiano.​—Chocholt 14:8; Isaia 11:6-9; Galatia 6:16.

Msichedekl er a Rengum Aika el Suobel

17-19. (a) Ngera el blekerdelel a Dios a kired el mo oukerebai er ngii? (b) Ngerang rullii er kid a klechubechub er a Jehovah?

¹⁷ A Dios a chubechubechad me kid me ngdirrek el kired el mo ua ingii. Tiakid a ta er a suobel el desilubii er aike el bliongel er a uchelel a babier er a Hosea. (Hosea 1:6, 7; 2:23) A Dios el soal el olecholt a klechubechub el mo er tirke el mla obult el chad er a Israel a oltirakl er a mlukreng el osisechakl el kmo: “Ngikel omart a kngtil a diak bo lungilbesul a klengar er ngii, e ngdi ngikel ocholt a kngtil e choridii er ngii, a mo nguu a klechubechub er a Dios.” (Osisechakl 28:13) Me tirke el mla obult er a mekngit el omerellir a dirrek el ngmai a ongelaod er a tekingel a milluches er a psalm el kmo: “Dios, a tengetengek a reng er a oltubokl, a oltubokl e bekongesenges el reng a diak moltngakl er ngii.”​—Psalm 51:17, 18.

 ¹⁸ A ulochel a Hosea a omeketakl er a klechubechub er ngike el Dios el dosiou er ngii. Mo lmuut ma lsekum a rebebil a mo cheroid er a melemalt el rolel, e ngsebechir el ouuchel a rengrir e obult el mo er ngii. A bo leuaisei e a Jehovah a ngoititerir. Ngulechotii a klechubechub el mo er tirke el mla obult el chedal er a renged er a Israel, el tir a ua ble lengar er a chebechiil el obengkel. Ma lta e te ‘ulemekringel er ngiil Chedaol Dios er a Israel, ngdi Dios a chubechubchad me ngdimlak lobes el kmo te di chad.’ (Psalm 78:38-41) A choua isel klechubechub a odbechid el mo merael el obengkel a chubechubechad el Dios er kid, el Jehovah.

¹⁹ Malta e a klengit el ua koadelchad ma omerechorech ma laokreng a mle klou er a chelsel a Israel, engdi a Jehovah a “lmuut el oltii a rengul.” (Hosea 2:14; 4:2) Ma leuaisei e a rengud a kirel el mo mengitengtik ma delongeled kid ma Jehovah a mengal mo mesisiich sel dolebedebek er a klechubechub er ngii. Me di lekid el loker er kid el kmo: ‘Ngmekerang e sebechek el mo oukerebai er a klechubechub er a Jehovah er a omerellek el mo er a rebebil? Ma lsekum a kldemek el Kristiano a tilemellii a renguk e olengit a klausubes, e ngak ak mereched el ousubes el di ua Jehovah?’​—Psalm 86:5.

20. Ka mochotii a okesiu el ngosukid el mo oumerang er a omelatk el lebeskid a Jehovah.

²⁰ A Dios a meskid a mera el omelatk. El ua tiang, ngmla tibir el kmo: “Ak lmuut el mo msang . . . a dellas er a Uldikel el mo sisebellel omelatk.” (Hosea 2:15) A cheldebechel el ua ble lebechil a Jehovah er a irechar a mla er ngii a omeltkir el lmuut el mo er a belurir er a “dellas er a Uldikel.” Ma otutel sel telbiil er sera 537 B.C.E. a meskid a ungil el uchul e kede oldeu a rengud er a omelatk el bla lebeskid a Jehovah.

21. A klemedengei ngmekerang e ngosukid el merael el obengkel a Dios?

²¹ A dolemolem el merael el obengkel a Dios, e ngkired el blechoel el melai a klemedengei el kirel e oltaut er a klengar er kid. Ngdimlak a klemedengei el kirel a Jehovah el ngar er a beluu er a Israel. (Hosea 4:1, 6) Me nguaisei, engdi ngoeak a osengir a rebebil e a osisecheklel a Dios a mle mekreos me te uleltirakl er ngii e mlukngeltengat. A Hosea a mle ta er tirka el chad. Ma dirrek el tirke el 7,000 el chad er a sils er a Elias, el tir a dimlak bo loutubuach el mengull er a Baal. (1 King 19:18; Rom 11:1-4) A omereng el saul er kid el kirel a osisecheklel a Dios a ngosukid el mo melemolem el merael el obengkel a Jehovah.​—Psalm 119:66; Isaia 30:20, 21.

22. Ngkirel mo ua ngera osenged el kirir tirke el omtok a mera el osisechakl?

²² A Jehovah a soal tirke el olab a ngerachel er a delongelir a rechedal el mo oltngakl er tirke el omtok a mera el osisechakl. Me nguaisei, e a Hosea 5:1 a kmo: “Morrenges er tiang kemiu el prist! Bo le blak a rengmiu el orrenges kemiu el chad er a Israel! Morrenges kemiu el chad er a telungalek er a king! Kemiu el kiriu el oukerrekeriil er a re chad el oba llemalt a mocha kiriu el mukerrekeriil! Kom mla mo bedikl er a Mispa, e uuked el berrokel er a rois el Tabor.” Ma remengeteklir tirke el omtok a mera el osisechakl a ulemedikl e ulemuked er a rechad er a Israel, el mengurs er tir el mo mengull a bleob el chelid. A Rois el Tabor ma beluu el Mispa a ngklel a mle basio er a choua ike el klsuul el klechelid.

23. Ngera ke mla ngmai el klungiolem er a omesubem er a Hosea er a 1 el mo er 5 el bliongel?

²³ A ulochel a Hosea a mla meketeklii el kmo a Jehovah a chubechubechad el Dios el omeskid a omelatk e omekngeltengat er tirke el oltaut a tekingel e oltngakl er tirke el omtok a mera el osisechakl. El di ua rulebult el chad er a Israel er a irechar, kid me ngkired el osiik er a Jehovah e mo blechoel el meruul a soal. (Hosea 5:15) A bo deuaisei, e kede mo meridm a ungil e mo medengelii a klou el deurreng ma budech el obang tirke el blak a rengrir el merael el lobengkel a Dios.​—Psalm 100:2; Filipi 4:6, 7.

[Footnote]

Ngmekerang a Omonger?

• A chebechiielel a Hosea el mo er a Gomer ngokesiul a ngerang?

• Ngera uchul ma Jehovah a mla er ngii a ultuteklel el kirel a Israel?

• Ngera el suobel el ngar er a Hosea er a 1 el mo er a 5 el bliongel a kmal mlo soam?

[Aike el Ker er a Suobel]

[Siasing er a 8 el llel]

A bechil a Hosea ngomtechei er a techang?

[Siasing er a 9 el llel]

A rechad er a Samaria a mlo mechitechut er a urrurt er a Asiria er a 740 B.C.E.

[Siasing er a 10 el llel]

A redmeu a rengrir el chad a luueta el mo er a belurir